Le runruꞌ tuꞌ zóalenëꞌ Dios Böꞌ Láꞌayi rëꞌu
8
Que lë ni naꞌ,
bítiꞌrö bi xíguiaꞌ nabágaꞌgaquiëꞌ yuguꞌ bönniꞌ néquiguequinëꞌ queëꞌ Jesucristo,
bönniꞌ naꞌ bítiꞌrö tunëꞌ ca rë́ꞌëni yöl-laꞌ bönáchisö quégaquiëꞌ,
pero ca rë́ꞌënëꞌ Dios Böꞌ Láꞌayi tunëꞌ.
2 Tuꞌ nacaꞌ tuz len Jesucristo,
Dios Böꞌ Láꞌayi,
Nu naꞌ nabániruꞌ,
rácalenëꞌ nedaꞌ.
Que lë ni naꞌ,
nuláꞌ lu lë naꞌ ben ga benaꞌ dul-laꞌ,
encaꞌ lu yöl-laꞌ guti.
3 Chinunëꞌ Dios le cabí guca gun xibá naꞌ,
tuꞌ cabí bi guzxéquiꞌ gun tuꞌ nácaruꞌ bönáchisö.
Dios gusö́l-lëꞌë Zxíꞌini cazëꞌ,
ateꞌ guljëꞌ bönachi ca nácaruꞌ rëꞌu,
nácaruꞌ bönachi dul-laꞌ,
pero bitiꞌ bi dul-laꞌ benëꞌ Lëꞌ.
Busubagaꞌ cuinëꞌ dul-laꞌ nabágaꞌruꞌ rëꞌu,
ateꞌ caní guca,
guchúguiëꞌ que dul-laꞌ runruꞌ lu yöl-laꞌ bönáchisö queë́ruꞌ.
4 Caní benëꞌ para gaca gunruꞌ idútë le naca tsahuiꞌ le rinná bëꞌ xibá queëꞌ,
núlöruꞌ naꞌ bítiꞌrö runruꞌ ca rë́ꞌëni yöl-laꞌ bönáchisö queë́ruꞌ,
pero ca rë́ꞌënëꞌ Dios Böꞌ Láꞌayi runruꞌ.
5 Bönniꞌ tunëꞌ ca rë́ꞌëni yöl-laꞌ bönáchisö quégaquiëꞌ,
tuíꞌi ládxiꞌgaquiëꞌ le naca que yöl-laꞌ bönáchisö quégaquiëꞌ,
pero bönniꞌ tunëꞌ ca rë́ꞌënëꞌ Dios Böꞌ Láꞌayi,
tuíꞌi ládxiꞌgaquiëꞌ le naca queëꞌ Dios Böꞌ Láꞌayi.
6 Channö ruíꞌi ládxiꞌsiruꞌ le naca que yöl-laꞌ bönáchisö queë́ruꞌ,
tsaz gátiruꞌ,
pero channö ruíꞌi ládxiꞌruꞌ le naca queëꞌ Dios Böꞌ Láꞌayi,
chidë́ yöl-laꞌ naꞌbán idú queë́ruꞌ,
en ribö́zaruꞌ dxi ladxiꞌ.
7 Nútiꞌtës nu ruíꞌi ládxiꞌsö le naca que yöl-laꞌ bönáchisö que,
bitiꞌ riléꞌe Dios dxiꞌa,
tuꞌ cabí run nu naꞌ ca rinná bëꞌ xibá queëꞌ Dios,
en bitiꞌ caꞌ gaca gun caní.
8 Que lë ni naꞌ,
bönniꞌ naꞌ tunëꞌ ca rë́ꞌëni yöl-laꞌ bönáchisö quégaquiëꞌ bitiꞌ gaca ilunëꞌ le raza ládxëꞌë Dios.
9 Naꞌa,
bítiꞌrö runliꞌ ca rë́ꞌëni yöl-laꞌ bönáchisö queë́liꞌ,
pero runliꞌ ca rë́ꞌënëꞌ Dios Böꞌ Láꞌayi tuꞌ zóalen cazëꞌ Lëꞌ libíꞌiliꞌ.
Tu bönniꞌ bitiꞌ zóalenëꞌ Dios Böꞌ Láꞌayi lëꞌ,
Nu naꞌ risö́l-lëꞌë Cristo queë́ruꞌ,
bitiꞌ néquinëꞌ queëꞌ Cristo.
10 Tuꞌ zóalenëꞌ Cristo libíꞌiliꞌ,
chinati caz idútë le guca cázaliꞌ tuꞌ nözi dul-laꞌ,
ateꞌ naꞌa nabániliꞌ-nëꞌ Dios Böꞌ Láꞌayi tuꞌ nunëꞌ Dios libíꞌiliꞌ tsahuiꞌ.
11 Böꞌ Láꞌayi queëꞌ Dios,
Nu naꞌ busubán Jesús lu yöl-laꞌ guti,
zóalenëꞌ libíꞌiliꞌ.
Lë cazëꞌ Dios,
Nu busubán Jesucristo lu yöl-laꞌ guti,
runëꞌ ga nubanliꞌ lu idútë le gúcaliꞌ le rati caz.
Caní nunëꞌ tuꞌ zóalenëꞌ Dios Böꞌ Láꞌayi libíꞌiliꞌ.
12 Que lë ni naꞌ,
libíꞌiliꞌ bö́chaꞌa,
dë tu le ral-laꞌruꞌ,
pero calëga que yöl-laꞌ bönáchisö queë́ruꞌ,
para cabirö gunruꞌ ca rë́ꞌëni yöl-laꞌ bönáchisö queë́ruꞌ naꞌ.
13 Channö runliꞌ ca rë́ꞌëni yöl-laꞌ bönáchisö queë́liꞌ,
gátiliꞌ tsaz,
pero channö len yöl-laꞌ huáca queëꞌ Dios Böꞌ Láꞌayi runliꞌ ga ilaꞌniti le runliꞌ lu yöl-laꞌ bönáchisö queë́liꞌ,
gataꞌ yöl-laꞌ naꞌbán idú queë́liꞌ.
14 Yúguꞌtë nupa tun ca rë́ꞌënëꞌ Dios Böꞌ Láꞌayi nácagaca zxíꞌinëꞌ Dios.
15 Dios Böꞌ Láꞌayi naꞌ zóalenëꞌ libíꞌiliꞌ bitiꞌ nuzóëꞌ libíꞌiliꞌ leyúbölö ca bönniꞌ nadóꞌogaca para gadxi idzö́biliꞌ,
pero chinunëꞌ ga nácaliꞌ zxíꞌinëꞌ Dios caz,
en runëꞌ caꞌ ga rulídzaruꞌ-nëꞌ Dios,
rnnaruꞌ:
“Abba”,
le rnna:
Dad.
16 Lë cazëꞌ Dios Böꞌ Láꞌayi ruzéajniꞌinëꞌ böꞌ naca cázaruꞌ,
en runëꞌ ga nö́ziruꞌ nácaruꞌ zxíꞌinëꞌ Dios.
17 Channö chinácaruꞌ zxíꞌinëꞌ Dios,
gataꞌ caꞌ queë́ruꞌ tsözxö́n len Cristo le nequi queëꞌ Xúziruꞌ Dios.
Caní gaca queë́ruꞌ channö riguíꞌi rizácaꞌlenruꞌ-nëꞌ tsözxö́n Cristo para uzíꞌiruꞌ xibé tsözxö́n len Cristo yöl-laꞌ zxön queëꞌ Dios.
18 Runi nedaꞌ,
yuguꞌ lë ni riguíꞌi rizácaꞌruꞌ naꞌa naca tu le cuídiꞌdoꞌos tsca naca yöl-laꞌ zxön naꞌ gataꞌ queë́ruꞌ dza siꞌ zaꞌ.
19 Taꞌböza yúguꞌtë le nunëꞌ Dios,
en taꞌzë́ ládxiꞌgaca idxintë dza naꞌ uluꞌë lahui Dios yuguꞌ bönniꞌ nácagaquiëꞌ zxíꞌini cazëꞌ.
20 Yúguꞌtë lë naꞌ nunëꞌ Dios gulaꞌdödi lu naꞌ le run ga ilaꞌniti,
calëga tuꞌ gulë́ꞌëni caz gaca caní,
pero tuꞌ benëꞌ Dios ga naca caní.
Benëꞌ caꞌ ga naca löza que idútë lë naꞌ nunëꞌ,
21 ateꞌ uluꞌlágaca yúguꞌtë le nunëꞌ Dios lu lë naꞌ run ga ilaꞌniti.
Caní gaca,
yúguꞌtë lë naꞌ uluꞌzíꞌ caꞌ xibé yöl-laꞌ rusölá le nazácaꞌdaꞌ naꞌ uluꞌziꞌë xibé yuguꞌ zxíꞌinëꞌ Dios.
22 Nö́ziruꞌ taꞌguíꞌi taꞌzacaꞌ yúguꞌtë le nunëꞌ Dios ga ridxintë naꞌa dza,
ca naꞌ riguíꞌi rizácaꞌnu tu nigula chizóa sóabiꞌ bíꞌidoꞌ queë́nu.
23 Riguíꞌi rizácaꞌa,
calë́gasö yödzölió ni,
pero riguíꞌi rizácaꞌruꞌ caꞌ rëꞌu,
sal-laꞌ zóalenëꞌ Dios Böꞌ Láꞌayi rëꞌu,
Nu naꞌ naca queë́ruꞌ le ruluíꞌi rëꞌu ca ral-laꞌ gaca cázaruꞌ.
Riguíꞌi rizácaꞌruꞌ tsanni ni ribö́zaruꞌ dza niꞌ uluꞌë lahui Dios nácaruꞌ idú zxíꞌinëꞌ,
dza niꞌ únëꞌ caꞌ idútë le naca cázaruꞌ.
24 Tuꞌ runruꞌ löza lë ni,
nuláruꞌ rëꞌu,
pero channö gaca iléꞌeruꞌ lë naꞌ runruꞌ löza,
bitiꞌ naca tu le ribö́zaruꞌ.
Bitiꞌ ribö́zaruꞌ le chiriléꞌeruꞌ.
25 Naꞌa,
channö runruꞌ löza tu le cabí gaca iléꞌeruꞌ,
lu yöl-laꞌ riböza zxön ladxiꞌ ribö́zaruꞌ le.
26 Lëscaꞌ caní rácalenëꞌ Dios Böꞌ Láꞌayi rëꞌu cateꞌ rudú ládxiꞌruꞌ,
tuꞌ cabí nö́ziruꞌ bi ral-laꞌ inábiruꞌ-nëꞌ Dios,
pero Lë cazëꞌ Dios Böꞌ Láꞌayi rudödëꞌ xtídzaꞌruꞌ lahuëꞌ Dios,
ateꞌ lu yöl-laꞌ rinaba yudxi queëꞌ rinnëdaꞌ ládxëꞌë,
tsca cabí gaca nu inná.
27 Dios ruyúëꞌ le yuꞌu icja ládxiꞌdoꞌgaca bönachi,
en nö́zinëꞌ le rë́ꞌënëꞌ innë́ꞌ Dios Böꞌ Láꞌayi naꞌ,
ateꞌ Lëꞌ,
ca rë́ꞌëni quézinëꞌ Dios,
rudödëꞌ xtídzaꞌgaca nupa néquiguequi quez queëꞌ Cristo lahuëꞌ Dios.
Nadéliꞌtëröruꞌ tuꞌ zóalenëꞌ Cristo rëꞌu
28 Nö́ziruꞌ tuꞌziꞌë xibé bönniꞌ yúguꞌtë le raca quégaquiëꞌ,
bönniꞌ naꞌ nadxíꞌiguequinëꞌ Dios,
ateꞌ bulidzëꞌ Dios légaquiëꞌ ca nuzóa cazëꞌ gunëꞌ.
29 Yuguꞌ bönniꞌ naꞌ gurö́ cazëꞌ queëꞌ Dios zíꞌatëlö,
buzóëꞌ caꞌ quégaquiëꞌ zíꞌatëlö ilácagaquiëꞌ ca naca cazëꞌ Zxíꞌinëꞌ,
para gáquiëꞌ Zxíꞌinëꞌ lo ladaj zián bö́chëꞌë.
30 Nupa naꞌ buzóëꞌ Dios quégaquiëꞌ zíꞌatëlö ca ral-laꞌ ilácagaquiëꞌ,
bulidzëꞌ caꞌ légaquiëꞌ,
ateꞌ yuguꞌ bönniꞌ naꞌ bulidzëꞌ,
benëꞌ légaquiëꞌ tsahuiꞌ,
ateꞌ yuguꞌ bönniꞌ naꞌ benëꞌ légaquiëꞌ tsahuiꞌ,
benëꞌ ga tuꞌziꞌë caꞌ xibé yöl-laꞌ zxön queëꞌ.
31 ¿Bizxi caz innaruꞌ naꞌa ca nácagaca lë ni?
Channö rácalenëꞌ Dios rëꞌu,
bitiꞌ ral-laꞌ gádxiruꞌ sal-laꞌ bi ilún bönachi queë́ruꞌ.
32 Dios,
idú ládxëꞌë bennëꞌ queë́ruꞌ Zxíꞌini cazëꞌ.
Budödëꞌ lëꞌ para gútiëꞌ uláz queë́ruꞌ.
Channö caní benëꞌ Dios,
¿naruꞌ cabí gúnnadëꞌë queë́ruꞌ tsözxö́n len Zxíꞌinëꞌ yúguꞌtë le dë?
33 ¿Nuzxi caz gaca bi usubagaꞌ nupa naꞌ gurö́ cazëꞌ queëꞌ Dios?
¡Cuntu nu gaca,
tuꞌ run cazëꞌ Dios ga nuhuöácaruꞌ tsahuiꞌ!
34 ¿Nuzxi caz gaca ichugu queë́ruꞌ gátiruꞌ?
¡Cuntu nu gaca,
tuꞌ guti cazëꞌ Cristo uláz queë́ruꞌ,
en le nácarö lo,
bubanëꞌ lu yöl-laꞌ guti,
ateꞌ naꞌa zoëꞌ cuita lëꞌë ibëla Dios ga nácatërëꞌ zxön,
ateꞌ rnnëꞌ dxiꞌa uláz queë́ruꞌ lahuëꞌ Dios!
35 Sal-laꞌ bi raca queë́ruꞌ,
nöz quéziruꞌ nadxíꞌinëꞌ Cristo rëꞌu.
Nö́ziruꞌ nadxíꞌinëꞌ rëꞌu:
sal-laꞌ riguíꞌi rizácaꞌruꞌ,
o sal-laꞌ risëbi ládxiꞌruꞌ,
o sal-laꞌ taꞌbía ládxiꞌgaca bönachi rëꞌu,
o sal-laꞌ ridunruꞌ,
o sal-laꞌ riyadzaj le gácuruꞌ,
o sal-laꞌ zoa bönadxi queë́ruꞌ,
o sal-laꞌ ilútiëꞌ bönniꞌ rëꞌu.
36 Ca nácagaca lë ni nazúaj lu guichi láꞌayi,
rnna:
Tuꞌ néquituꞌ quiuꞌ Liꞌ,
túnticaꞌsö bönachi ga gátituꞌ.
Nácatuꞌ ca yuguꞌ böꞌcuꞌ zxilaꞌ,
nadö́digacabaꞌ lu naꞌ nu guti légacabaꞌ.
37 Naꞌa,
tuꞌ zóalen rëꞌu Nu naꞌ nadxíꞌi rëꞌu,
nácatërö löza idéliꞌruꞌ lu le raca queë́ruꞌ.
38,39 Que lë ni naꞌ runi nedaꞌ:Bitiꞌ bi sequiꞌ gun ga bítiꞌrö idxíꞌinëꞌ Dios rëꞌu.
Nadxíꞌinëꞌ rëꞌu tuꞌ néquiruꞌ queëꞌ Xanruꞌ Jesucristo.
Bitiꞌ sequiꞌ gun caní yöl-laꞌ guti o yöl-laꞌ naꞌbán,
o yuguꞌ gubáz láꞌayi o nupa taꞌnná bëꞌ,
o yuguꞌ yöl-laꞌ huáca que tuꞌ xihuiꞌ,
o bítiꞌtës bi zoa o bítiꞌtës bi siꞌ zaꞌ,
o tu le dë xitsáꞌalö o tu le dë cadxíꞌilö,
o bítiꞌtës bi nunëꞌ Dios.