Le rucudzuꞌ didzaꞌ yöl-laꞌ nutsaga naꞌ
7
Bö́chaꞌadoꞌ,
núlöliꞌ núnbëꞌëliꞌ xibá queëꞌ Dios.
Nöz quéziliꞌ rinná beꞌe xibá naꞌ nu bönniꞌ tsanni ni zoëꞌ nabanëꞌ.
2 Naca queë́liꞌ ca naca que tu nigula nutsaga náꞌlennu-nëꞌ bönniꞌ,
yúꞌunu lu nëꞌë bönniꞌ queë́nu tsanni ni zoëꞌ nabanëꞌ ca rinná bëꞌ xibá que yöl-laꞌ nutsaga naꞌ,
pero channö chinátiëꞌ,
nurúajnu lu naꞌ xibá naꞌ.
3 Caní naca,
tsanni ni zoëꞌ nabanëꞌ bönniꞌ queë́nu,
channö utsaga náꞌlennu-nëꞌ iaꞌtúëꞌ bönniꞌ,
gunnu dul-laꞌ le riguitsaj xibá que yöl-laꞌ nutsaga naꞌ,
pero channö chinátiëꞌ bönniꞌ queë́nu naꞌ,
nurúajnu lu naꞌ xibá naꞌ,
ateꞌ naꞌa,
channö utsaga náꞌlennu-nëꞌ nu bönniꞌ yúbölö,
bitiꞌ gunnu dul-laꞌ le riguitsaj xibá que yöl-laꞌ nutsaga naꞌ.
4 Lëscaꞌ caní raca queë́liꞌ,
bö́chaꞌa.
Tuꞌ dzágaliꞌ-nëꞌ Cristo chinati cázaliꞌ libíꞌiliꞌ para cabirö inná beꞌe libíꞌiliꞌ le rinná bëꞌ xibá naꞌ,
para guéquiliꞌ que Nu yúbölö.
Naꞌa chinéquiliꞌ queëꞌ Cristo,
Nu naꞌ bubán lu yöl-laꞌ guti.
Caní naca,
para gaca gunruꞌ le raza ládxëꞌë Dios.
5 Tsanni niꞌ guyúꞌuruꞌ lu naꞌ yöl-laꞌ bönáchisö queë́ruꞌ,
le rinná bëꞌ xibá naꞌ ben ga gulaca bëꞌ le guzë́ ládxiꞌruꞌ le ruáꞌ döꞌ,
le gulún dxin lu idútë le naca cázaruꞌ para ilún ga gátiruꞌ.
6 Naꞌa nuláruꞌ lu naꞌ xibá naꞌ tuꞌ nati cázaruꞌ tsca naca le rinná bëꞌ xibá naꞌ gunná beꞌe rëꞌu zíꞌalö.
Caní naca para gaca gunruꞌ xichinëꞌ Dios lu yöl-laꞌ naꞌbán cubi le runnëꞌ queë́ruꞌ Dios Böꞌ Láꞌayi,
en calëga gunruꞌ xichinëꞌ lu lë naꞌ chinaca gula,
le naca xibá naꞌ.
Le dzaga nedaꞌ le naca dul-laꞌ
7 ¿Bizxi caz innaruꞌ naꞌa?
¿Naruꞌ runtsö xibá queëꞌ Dios ga runaꞌ dul-laꞌ?
¡Bitiꞌ caꞌ run caní!
Laꞌtuꞌ cabí buzéajniꞌi le rinná bëꞌ xibá naꞌ nedaꞌ,
bitiꞌ gunözdaꞌ naca dul-laꞌ le runaꞌ.
Laꞌtuꞌ cabí zoa lu xibá naꞌ le rnna:
“Bitiꞌ së ládxuꞌu le dë que luzóꞌo”,
bitiꞌ gunözdaꞌ naca dul-laꞌ yöl-laꞌ rizë́ ladxiꞌ le dë que luzáꞌa.
8 Cateꞌ bidxín quiaꞌ xibá naꞌ,
guca bëꞌ le naca dul-laꞌ naꞌ run dxin lu idútë le nacaꞌ,
ateꞌ ben ga gúquibeꞌedaꞌ rizë́ ládxaꞌa yúguꞌtë le ruáꞌ döꞌ.
Ga bitiꞌ ridxini xibá naꞌ,
bitiꞌ naca bëꞌ le naca dul-laꞌ.
9 Dza niꞌte,
zíꞌatëlö ga bidxín quiaꞌ xibá queëꞌ Dios,
niꞌ gúquidaꞌ zoaꞌ nabanaꞌ,
pero cateꞌ bidxín quiaꞌ xibá naꞌ,
gúquibeꞌedaꞌ nabágaꞌa dul-laꞌ,
en chinati cazaꞌ.
10 Dios gunná bëꞌë xibá naꞌ para gun ga gataꞌ queë́ruꞌ yöl-laꞌ naꞌbán,
pero ben ga gúquibeꞌedaꞌ chinati cazaꞌ.
11 Guca bëꞌ nazíꞌ yéꞌedaꞌ ca naca dul-laꞌ,
tuꞌ ben xibá naꞌ ga gúquibeꞌedaꞌ nabágaꞌa dul-laꞌ,
en ral-laꞌ gátiaꞌ.
12 Que lë ni naꞌ,
láꞌayi naca xibá queëꞌ Dios,
ateꞌ láꞌayi,
en tsahuiꞌ,
en dxiꞌa naca le gunná bëꞌë.
13 ¿Naruꞌ bentsö lë naꞌ naca dxiꞌa ga bidxín quiaꞌ yöl-laꞌ guti?
¡Bitiꞌ caꞌ naca caꞌ!
Le naca dul-laꞌ bugún dxin lë naꞌ naca dxiꞌa,
en ben ga gúquibeꞌedaꞌ chinati cazaꞌ para gaca bëꞌ naca dul-laꞌ le runaꞌ.
Caní guca,
para gaca bëꞌ niꞌa que xibá naꞌ nácatërö xihuiꞌ yúguꞌtë le naca dul-laꞌ.
14 Nö́ziruꞌ Dios Böꞌ Láꞌayi bennëꞌ queë́ruꞌ xibá naꞌ,
pero nedaꞌ nacaꞌ bönáchisö,
en yuꞌa lu naꞌ dul-laꞌ ca tu bönniꞌ nadóꞌo que.
15 Naꞌa,
bitiꞌ réajniꞌidaꞌ le runaꞌ.
Rë́ꞌëndaꞌ gunaꞌ ca rinná bëꞌ xibá naꞌ,
pero bitiꞌ runaꞌ lë naꞌ rë́ꞌëndaꞌ gunaꞌ.
Le naca dul-laꞌ le cabí riléꞌedaꞌ dxiꞌa,
lë naꞌ runaꞌ.
16 Runaꞌ dul-laꞌ sal-laꞌ bitiꞌ rë́ꞌëndaꞌ gunaꞌ dul-laꞌ naꞌ.
Xibá naꞌ rusëdi nedaꞌ naca dul-laꞌ le cabí naca dxiꞌa.
Que lë ni naꞌ naca bëꞌdaꞌ naca dxiꞌa le rinná bëꞌ xibá naꞌ.
17 Caní naca,
calëga nédaꞌsö runaꞌ dul-laꞌ naꞌ,
pero dul-laꞌ naꞌ dzaga nedaꞌ run ga runaꞌ dul-laꞌ naꞌ.
18 Nözdaꞌ bitiꞌ zóalen nedaꞌ le naca dxiꞌa,
o huáca inníaꞌ,
lë naꞌ naca dxiꞌa bitiꞌ zóalen le naca yöl-laꞌ bönáchisö quiaꞌ.
Rë́ꞌëndaꞌ gunaꞌ le naca dxiꞌa,
pero laꞌ nédaꞌsö bitiꞌ gaca gunaꞌ lë naꞌ naca dxiꞌa.
19 Bitiꞌ runaꞌ le naca dxiꞌa le rë́ꞌëndaꞌ gunaꞌ,
pero rúnticaꞌsaꞌ le bitiꞌ naca dxiꞌa le cabí rë́ꞌëndaꞌ gunaꞌ.
20 Que lë ni naꞌ,
channö runaꞌ dul-laꞌ naꞌ bitiꞌ rë́ꞌëndaꞌ gunaꞌ,
calëga nedaꞌ caz runaꞌ le,
pero dul-laꞌ naꞌ dzaga nedaꞌ run ga runaꞌ dul-laꞌ naꞌ.
21 Caní naca le raca queë́ruꞌ yúguꞌtëruꞌ.
Cateꞌ rë́ꞌëniruꞌ gunruꞌ le naca dxiꞌa,
dzaga rëꞌu le run ga runruꞌ le ruáꞌ döꞌ.
22 Lu icja ládxiꞌdaꞌahuaꞌ raza ládxaꞌa xibá queëꞌ Dios
23 pero réquibeꞌedaꞌ dzaga idútë le nacaꞌ le rinná beꞌe nedaꞌ,
ateꞌ lë ni ridáꞌbagaꞌ xibá queëꞌ Dios yuꞌu icja ládxiꞌdaꞌahuaꞌ.
Lë naꞌ dzaga idútë le nacaꞌ run ga runaꞌ dul-laꞌ.
24 ¡Bicaꞌ bayechiꞌ nedaꞌ!
¿Nuzxi caz gaca usölá nedaꞌ lu yöl-laꞌ bönáchisö quiaꞌ le run ga runaꞌ dul-laꞌ?
25 ¡Xclenëꞌ Dios,
chinularuꞌ naꞌa niꞌa que le benëꞌ Xanruꞌ Jesucristo!
Que lë ni naꞌ,
tsca naca le yuꞌu icja ládxiꞌdaꞌahuaꞌ runaꞌ ca rinná bëꞌ xibá queëꞌ Dios,
sal-laꞌ yöl-laꞌ bönáchisö quiaꞌ run ga rë́ꞌëndaꞌ gunaꞌ dul-laꞌ.