Naca tsca chinátiruꞌ para cabirö gunruꞌ dul-laꞌ tuꞌ nabániruꞌ-nëꞌ Jesucristo
6
¿Bizxi caz innaruꞌ naꞌa?
¿Naruꞌ gúntsaruꞌ dul-laꞌ para gátaꞌrö queë́ruꞌ le ruzáꞌ ládxëꞌë Dios queë́ruꞌ?
2 ¡Bitiꞌ gun cázaruꞌ caꞌ!
Naca queë́ruꞌ ca tsaz chinati cázaruꞌ para cabirö gunruꞌ dul-laꞌ.
¿Naruꞌ gúnticaꞌsiruꞌ dul-laꞌ?
3 ¿Naruꞌ cabí nö́ziliꞌ ca naꞌ naca queë́ruꞌ?
Channö bidílaruꞌ nisa para huöácaruꞌ tuz len Cristo,
lë naꞌ bidílaruꞌ nisa ruluíꞌi rëꞌu chigudö́diruꞌ lu yöl-laꞌ guti tsözxö́n len Lëꞌ.
4 Ca naꞌ guca,
gútilenruꞌ-nëꞌ Cristo tsözxö́n,
lëscaꞌ caní bigáchiꞌlenruꞌ-nëꞌ tsözxö́n niuꞌ yeru ba cateꞌ niꞌ bidílaruꞌ nisa.
Ca naꞌ busubanëꞌ Dios Cristo lu yöl-laꞌ guti len yöl-laꞌ huáca zxön queëꞌ,
lës caní caꞌ rëꞌu nubánlenruꞌ-nëꞌ Jesús tsözxö́n para gácaruꞌ bönachi idútë cubi queëꞌ.
5 Channö nunruꞌ Cristo tsözxö́n,
gútiruꞌ ca naꞌ gútiëꞌ Lëꞌ,
lëscaꞌ caní gunruꞌ-nëꞌ tsözxö́n,
ubanruꞌ lu yöl-laꞌ guti ca naꞌ bubanëꞌ Lëꞌ.
6 Chinö́z quéziruꞌ lë ni,
yöl-laꞌ bönachi queë́ruꞌ le guzóa zíꞌalö gudáꞌlen Lëꞌ tsözxö́n lëꞌe yaga cruz,
para initi yöl-laꞌ bönachi queë́ruꞌ naꞌ bénlenruꞌ le dul-laꞌ,
para cabirö inná beꞌe le naca dul-laꞌ rëꞌu.
7 Channö nácaruꞌ tuz len Nu naꞌ guti tuꞌ nözi dul-laꞌ,
nuhuöácaruꞌ tsahuiꞌ lahuëꞌ Dios tuꞌ cabirö nabágaꞌruꞌ dul-laꞌ naꞌ,
ateꞌ bítiꞌrö yúꞌuruꞌ lu naꞌ dul-laꞌ.
8 Naꞌa,
channö nátilenruꞌ-nëꞌ Cristo tsözxö́n,
réajlëꞌëruꞌ ubánlenruꞌ-nëꞌ caꞌ tsözxö́n,
9 tuꞌ chinö́ziruꞌ bubanëꞌ Cristo lu yöl-laꞌ guti,
en bítiꞌrö gátiëꞌ.
Que lë ni naꞌ bítiꞌrö bi gaca gun yöl-laꞌ guti naꞌ queëꞌ Lëꞌ.
10 Ca naꞌ guca,
gútiëꞌ Lëꞌ,
tu luzuísö gútiëꞌ tuꞌ nözi dul-laꞌ quégaca yúguꞌtë bönachi,
pero ca naꞌ naca,
zoëꞌ nabanëꞌ,
nabánlenëꞌ Dios.
11 Lëscaꞌ caní ral-laꞌ usácaꞌliꞌ queë́liꞌ naca queë́liꞌ ca chinati cázaliꞌ para cabirö gunliꞌ dul-laꞌ,
pero zóaliꞌ nabanliꞌ para gunliꞌ ca rnna xtídzëꞌë Dios tuꞌ nácaliꞌ tuz len Xanruꞌ Jesucristo.
12 Que lë ni naꞌ,
bitiꞌ güíꞌiliꞌ lataj le naca dul-laꞌ,
para cabí gun ga gunliꞌ dul-laꞌ lu le naca cázaliꞌ le gati caz.
Bitiꞌ gunliꞌ ca naca le rizë́ ládxiꞌliꞌ le ruáꞌ döꞌ,
lu le naca cázaliꞌ.
13 Bitiꞌ udödi cuinliꞌ lu dul-laꞌ,
bitiꞌ gunliꞌ le ruáꞌ döꞌ,
pero guliꞌdödi cuinliꞌ lu nëꞌë Dios tuꞌ nubanliꞌ lu yöl-laꞌ guti,
en guliꞌdödi lu nëꞌë idútë le naca cázaliꞌ para ugúnlenëꞌ le le naca dxiꞌa.
14 Bitiꞌ güíꞌiliꞌ lataj le naca dul-laꞌ,
para cabí gun ga gunliꞌ dul-laꞌ,
tuꞌ nuzóëꞌ Dios libíꞌiliꞌ,
calëga para inná beꞌe libíꞌiliꞌ xibá queëꞌ,
pero para inná beꞌe libíꞌiliꞌ le ruzáꞌ ládxëꞌë queë́ruꞌ.
Le rucudzuꞌ didzaꞌ ca naca que nu bönniꞌ nadóꞌo
15 ¿Bizxi caz innaruꞌ naꞌa?
¿Naruꞌ gúntsaruꞌ dul-laꞌ tuꞌ cabirö rinná beꞌe xibá queëꞌ Dios rëꞌu,
pero rinná beꞌe le ruzáꞌ ládxëꞌë Dios rëꞌu?
¡Bitiꞌ caꞌ gunruꞌ caní!
16 Chinö́z quéziliꞌ dxiꞌa channö udödi cuinliꞌ lu nëꞌë nu bönniꞌ para gácaliꞌ bönniꞌ nadóꞌogaca queëꞌ,
en gunliꞌ ca rnna xtídzëꞌë,
tsaz nácaliꞌ bönniꞌ nadóꞌogaca queëꞌ bönniꞌ naꞌ runliꞌ ca rnna xtídzëꞌë.
Lëscaꞌ caní gaca channö udödi cuinliꞌ para gunliꞌ dul-laꞌ le gun ga gátiliꞌ,
o channö udödi cuinliꞌ para gunliꞌ ca rnna xtídzëꞌë Dios,
Nu gun ga huöácaliꞌ tsahuiꞌ.
17 Naꞌa,
¡Xclenëꞌ Dios!
Sal-laꞌ zíꞌalö gúcaliꞌ bönniꞌ nadóꞌogaca lu naꞌ dul-laꞌ,
naꞌa idú ládxiꞌliꞌ runliꞌ ca rinná bëꞌ xibá naꞌ budödi cuinliꞌ lu nëꞌe.
18 Tuꞌ chinulaliꞌ lu naꞌ dul-laꞌ,
nuhuöácaliꞌ ca yuguꞌ bönniꞌ nadóꞌogaca lu naꞌ le naca dxiꞌa.
19 (Ruíꞌilenaꞌ libíꞌiliꞌ didzaꞌ ca tuíꞌi didzaꞌ bönachi,
tuꞌ cabí réajniꞌiliꞌ idútë lu yöl-laꞌ bönachi queë́liꞌ.)
Zíꞌalö budödi cuinliꞌ len idútë le naca cázaliꞌ lu naꞌ le ruáꞌ döꞌ,
en lu naꞌ le cabí naca tsahuiꞌ,
ateꞌ gúcaliꞌ ca yuguꞌ bönniꞌ nadóꞌogaca lu në́ꞌeguequi,
en benliꞌ xichini le ruáꞌ döꞌ naꞌ.
Naꞌa,
guliꞌdödi idútë le naca cázaliꞌ lu naꞌ le naca tsahuiꞌ,
para gácaliꞌ ca yuguꞌ bönniꞌ nadóꞌogaca lu nëꞌe,
en gunliꞌ xichini lë naꞌ naca tsahuiꞌ para gácaliꞌ bönachi narúajgaca quez queëꞌ Dios.
20 Cateꞌ niꞌ nácaliꞌ ca yuguꞌ bönniꞌ nadóꞌogaca lu naꞌ dul-laꞌ,
bitiꞌ benliꞌ xichini le naca tsahuiꞌ.
21 Naꞌa,
¿naruꞌ buzíꞌitsaliꞌ xibé lë naꞌ benliꞌ zíꞌalö?
Naꞌa lë naꞌ benliꞌ run ga rutuíꞌiliꞌ,
en run ga nu gati tsaz.
22 Naꞌa chinulaliꞌ lu naꞌ dul-laꞌ,
en nácaliꞌ ca yuguꞌ bönniꞌ nadóꞌogaca queëꞌ Dios,
en ruzíꞌiliꞌ xibé le run ga nácaliꞌ bönachi narúajgaca quez queëꞌ Dios,
en le run ga dë queë́liꞌ yöl-laꞌ naꞌbán idú.
23 Lazxaj nu run dul-laꞌ naca yöl-laꞌ guti,
pero le rúnnasëꞌ Dios queë́ruꞌ naca yöl-laꞌ naꞌbán idú,
le rataꞌ queë́ruꞌ tuꞌ nácaruꞌ tuz len Xanruꞌ Jesucristo.