Le rataꞌ queë́ruꞌ tuꞌ rnnëꞌ Dios nuhuöácaruꞌ tsahuiꞌ
5
Naꞌa,
rnnëꞌ Dios nuhuöácaruꞌ tsahuiꞌ lahuëꞌ Lëꞌ niꞌa que le benëꞌ Xanruꞌ Jesucristo,
channö réajlëꞌëruꞌ Lëꞌ,
ateꞌ que lë ni naꞌ nuhuöácaruꞌ tuz len Lëꞌ.
2 Tuꞌ réajlëꞌëruꞌ Jesucristo,
ruzíꞌiruꞌ xibé le ruzáꞌ ládxëꞌë Dios queë́ruꞌ,
le rutipa ládxiꞌruꞌ.
Rudzéjaruꞌ tuꞌ runruꞌ löza uzíꞌiruꞌ caꞌ xibé yöl-laꞌ zxön queëꞌ Dios.
3 Calë́gasö caní rudzéjaruꞌ,
pero rudzéjaruꞌ caꞌ cateꞌ riguíꞌi rizácaꞌruꞌ,
tuꞌ chinö́ziruꞌ le riguíꞌi rizácaꞌruꞌ rusedi rëꞌu cö́zaruꞌ zxön ladxiꞌ.
4 Cateꞌ ribö́zaruꞌ zxön ladxiꞌ rurúajruꞌ tsahuiꞌ lahuëꞌ Dios,
en cateꞌ chinurúajruꞌ tsahuiꞌ runruꞌ löza Lëꞌ gácalen cazëꞌ rëꞌu.
5 Cateꞌ runruꞌ löza Lëꞌ,
bitiꞌ caꞌ raca chopa ládxiꞌruꞌ.
Caní naca,
tuꞌ nuhuö́laj nudzë́ꞌe icja ládxiꞌdoꞌoruꞌ yöl-laꞌ nadxíꞌi queëꞌ Dios rëꞌu.
Runëꞌ Dios Böꞌ Láꞌayi,
Bönniꞌ gusö́l-lëꞌë Dios queë́ruꞌ ga raca caní.
6 Cateꞌ niꞌ bitiꞌ caꞌ guca uláruꞌ rácasö queë́ruꞌ,
cateꞌ gúlaꞌrö dza queëꞌ,
Cristo gútiëꞌ uláz queë́ruꞌ,
niꞌ nácaruꞌ bönachi dul-laꞌ.
7 Cuntu nu guë́ꞌëni gati uláz queëꞌ tu bönniꞌ tsahuiꞌ.
Nadxi caꞌ nu urugui gati uláz queëꞌ tu bönniꞌ náquiëꞌ idú dxiꞌa.
8 Dios ruluíꞌinëꞌ rëꞌu ca nadxíꞌideꞌenëꞌ rëꞌu,
tuꞌ gútiëꞌ Cristo uláz queë́ruꞌ cateꞌ niꞌ nácaruꞌ bönniꞌ dul-laꞌ.
9 Chinuhuöácaruꞌ tsahuiꞌ lahuëꞌ Dios tuꞌ bulaljëꞌ Cristo xichönëꞌ,
gútiëꞌ uláz queë́ruꞌ.
Que lë ni naꞌ chinácadaꞌ löza usölë́ꞌ Lëꞌ rëꞌu lu dza ichúguiëꞌ Dios quégaca bönachi dul-laꞌ gátigaca.
10 Cateꞌ niꞌ bitiꞌ riléꞌeruꞌ-nëꞌ Dios dxiꞌa,
gútiëꞌ Zxíꞌinëꞌ Dios uláz queë́ruꞌ para huöácaruꞌ tuz len Lëꞌ.
Naꞌa,
tuꞌ zoëꞌ nabanëꞌ,
en chinuhuöácaruꞌ tuz len Lëꞌ,
chinácadaꞌ löza uláruꞌ.
11 Rudzéjaruꞌ lahuëꞌ Dios niꞌa que le benëꞌ Xanruꞌ Jesucristo,
tuꞌ nuhuöácaruꞌ tuz len Dios niꞌa que lë naꞌ benëꞌ Lëꞌ.
Le benëꞌ Adán, en le benëꞌ Cristo
12 Guyúꞌu dul-laꞌ yödzölió ni tuꞌ nözi le benëꞌ tuzëꞌ bönniꞌ,
ateꞌ tuꞌ benëꞌ dul-laꞌ,
guyúꞌu caꞌ yöl-laꞌ guti.
Que lë ni naꞌ ilátigaca yúguꞌtë bönachi tuꞌ nabágaꞌgaca yúguꞌtë bönachi dul-laꞌ.
13 Zíꞌatëlö ga bidxintë xibá queëꞌ Dios,
gulún bönachi yödzölió ni dul-laꞌ,
pero bitiꞌ busubáguëꞌë Dios bönachi naꞌ xíguiaꞌ ca nupa taꞌdáꞌbagaꞌ xibá queëꞌ tuꞌ nözi dul-laꞌ naꞌ,
tuꞌ bitiꞌ ridxini xibá queëꞌ quégaquiëꞌ.
14 Ga gudelaꞌ zoëꞌ Adán ga bidxintë zoëꞌ Moisés gulati yúguꞌtë bönachi tuꞌ gulaꞌbagaꞌ dul-laꞌ,
sal-laꞌ bitiꞌ gulaꞌdáꞌbagaꞌ tu le gunná bëꞌë Dios ca benëꞌ Adán.
Nácagaca yúguꞌtë bönachi tuz len Adán tuꞌ nácagaca zxíꞌini xiꞌsóëꞌ.
Lë ni ruluíꞌi rëꞌu ca ilaca tuz len Cristo yúguꞌtë nupa ilaꞌyéajlëꞌ Lëꞌ.
15 Le rúnnasëꞌ queë́ruꞌ Dios bitiꞌ naca ca le guca queë́ruꞌ tuꞌ nözi dul-laꞌ benëꞌ Adán.
Tuꞌ nözi dul-laꞌ benëꞌ tuzëꞌ bönniꞌ,
ilátigaca yúguꞌtë bönachi.
Dxíꞌatërö naca le ruzáꞌ ládxëꞌë queë́ruꞌ Dios,
en le rúnnasëꞌ queë́ruꞌ.
Ruzáꞌ ládxëꞌë queë́ruꞌ lë ni niꞌa que le benëꞌ yetuzëꞌ Bönniꞌ,
Jesucristo.
16 Le rúnnasëꞌ Dios queë́ruꞌ bitiꞌ naca ca le guca queë́ruꞌ tuꞌ nözi dul-laꞌ naꞌ benëꞌ tuzëꞌ bönniꞌ naꞌ.
Le guchúguiëꞌ Dios queëꞌ Adán gátiëꞌ tuꞌ nözi dul-laꞌ naꞌ benëꞌ,
guchúguiëꞌ caꞌ Dios quégaca yúguꞌtë bönachi gátigaca.
Le rúnnasëꞌ Dios queë́ruꞌ naca para huöácaruꞌ tsahuiꞌ lahuëꞌ Lëꞌ sal-laꞌ nabágaꞌruꞌ dul-laꞌ zián.
17 Guyúꞌu yöl-laꞌ guti tuꞌ nözi dul-laꞌ benëꞌ tuzëꞌ bönniꞌ.
Nácatërö löza ilaꞌdeliꞌ yöl-laꞌ naꞌbán nupa uluꞌhuöáca tsahuiꞌ lahuëꞌ Dios tuꞌ zoa le ruzáꞌ ládxëꞌë queë́ruꞌ Dios niꞌa que le benëꞌ yetuzëꞌ Bönniꞌ,
Jesucristo.
18 Dios guchúguiëꞌ quégaca yúguꞌtë bönachi ilátigaca tuꞌ nözi dul-laꞌ benëꞌ tuzëꞌ bönniꞌ naꞌ.
Lëscaꞌ caní gaca uluꞌhuöáca tsahuiꞌ yúguꞌtë bönachi niꞌa que le naca tsahuiꞌ benëꞌ yetuzëꞌ Bönniꞌ naꞌ,
gataꞌ yöl-laꞌ naꞌbán idú quégaquiëꞌ.
19 Buluꞌhuöáca huen dul-laꞌ bönachi zián tuꞌ cabí benëꞌ tuzëꞌ bönniꞌ ca rnna xtídzëꞌë Dios.
Lëscaꞌ caní uluꞌhuöáca tsahuiꞌ bönachi tuꞌ benëꞌ yetuzëꞌ Bönniꞌ naꞌ ca rnna xtídzëꞌë Dios.
20 Guyúꞌu xibá queëꞌ Dios yödzölió ni para gaca bëꞌdaꞌ nabágaꞌgaca bönachi dul-laꞌ.
Tuꞌ guca bëꞌrö nabágaꞌgaca dul-laꞌ,
guca bëꞌrö caꞌ zxö́ntërö naca le buzáꞌ ládxëꞌë Dios quégaca bönachi.
21 Gutaꞌ yöl-laꞌ huáca unná bëꞌ que dul-laꞌ guti rëꞌu.
Lëscaꞌ caní le ruzáꞌ ládxëꞌë Dios queë́ruꞌ napa yöl-laꞌ huáca gun ga huöácaruꞌ tsahuiꞌ lahuëꞌ Lëꞌ,
ateꞌ gataꞌ yöl-laꞌ naꞌbán idú queë́ruꞌ niꞌa que le benëꞌ Xanruꞌ Jesucristo.