Le benëꞌ Abraham rusedi rëꞌu
4
¿Bizxi caz innaruꞌ naꞌa?
¿Bizxi bidéliꞌnëꞌ Abraham,
xuz xtóꞌotuꞌ netuꞌ,
nácatuꞌ judío?
2 Laꞌtuꞌ böáquiëꞌ tsahuiꞌ Abraham tuꞌ zoa le ben cazëꞌ lëꞌ,
gunna gun ba zxön cuinëꞌ,
pero calëga lahuëꞌ Dios.
3 Ca naca lë ni nazúaj lu guichi láꞌayi,
le rnna:
“Abraham guyéajlëꞌë Dios,
ateꞌ que lë ni naꞌ Dios benëꞌ ga böáquiëꞌ tsahuiꞌ lahuëꞌ Lëꞌ.”
4 Channö zoa nu bönniꞌ runëꞌ xichinruꞌ,
le riguízxjaruꞌ-nëꞌ bitiꞌ naca tu le ruzáꞌ ládxiꞌruꞌ queëꞌ,
pero naca tu le ral-laꞌruꞌ queëꞌ bönniꞌ naꞌ.
5 Lëscaꞌ caní channö tu bönniꞌ réajlëꞌë Dios,
sal-laꞌ bitiꞌ bi dxin benëꞌ bönniꞌ naꞌ,
Dios,
Nu run ga uluꞌhuöáca tsahuiꞌ bönachi bitiꞌ nácagaca tsahuiꞌ,
rnnëꞌ náquiëꞌ tsahuiꞌ lahuëꞌ Lëꞌ bönniꞌ naꞌ,
tuꞌ réajlëꞌë Lëꞌ.
6 Lëscaꞌ caní bëꞌë didzaꞌ David ca náquiëꞌ bicaꞌ ba bönniꞌ,
Dios rnnëꞌ náquiëꞌ tsahuiꞌ sal-laꞌ bitiꞌ bi dxin nunëꞌ bönniꞌ naꞌ.
7 Caní gunnë́ꞌ David:
¡Bicaꞌ ba bönniꞌ naꞌ Dios runiti lahuëꞌ le bitiꞌ naca tsahuiꞌ nunëꞌ,
en rugǘëꞌ yuguꞌ dul-laꞌ nabáguëꞌë!
8 ¡Bicaꞌ ba bönniꞌ naꞌ,
Dios bitiꞌ rusubáguëꞌë lëꞌ xíguiaꞌ tuꞌ nözi dul-laꞌ benëꞌ bönniꞌ naꞌ!
9 ¿Naruꞌ nácagacsëꞌ bicaꞌ ba bönniꞌ narugu lu xipë́laꞌgaquiëꞌ lë naꞌ naca bëꞌ,
o nácagaca caꞌ caní nupa naꞌ cabí narugu lë naꞌ lu xipë́laꞌgaquiëꞌ?
Chigunná cázaruꞌ böáquiëꞌ Abraham tsahuiꞌ lahuëꞌ Dios tuꞌ guyéajlëꞌë Lëꞌ.
10 ¿Bátaxi böáquiëꞌ tsahuiꞌ caní Abraham?
¿Naruꞌ guca cateꞌ niꞌ chinarugu lu xipë́lëꞌë lë naꞌ naca bëꞌ,
o guca zíꞌalö?
Bitiꞌ guca cateꞌ chinarugu lu xipë́lëꞌë,
pero zíꞌalö guca.
11 Abraham guyéajlëꞌë Dios cateꞌ niꞌ bitiꞌ narúguni lu xipë́lëꞌë lë naꞌ naca bëꞌ.
Gudödi naꞌ gurugu lu xipë́lëꞌë lë naꞌ naca bëꞌ,
le ruluíꞌisö chinuhuöáquiëꞌ tsahuiꞌ lahuëꞌ Dios.
Guca caní para gáquiëꞌ Abraham ca xúzgaquiëꞌ yuguꞌ bönniꞌ ilaꞌyéajlëꞌë Dios sal-laꞌ bitiꞌ narugu lu xipë́laꞌgaquiëꞌ lë naꞌ naca bëꞌ.
Tuꞌ taꞌyéajlëꞌë Dios,
huáca innë́ꞌ Dios nácagaquiëꞌ tsahuiꞌ lahuëꞌ Lëꞌ.
12 Náquiëꞌ Abraham xuz xtóꞌogaquiëꞌ yuguꞌ bönniꞌ judío taꞌyéajlëꞌë Dios.
Calë́gasö náquiëꞌ xúzgaquiëꞌ bönniꞌ naꞌ narugu lu xipë́laꞌgaquiëꞌ lë naꞌ naca bëꞌ,
pero lëscaꞌ náquiëꞌ xúzgaquiëꞌ bönniꞌ naꞌ tunëꞌ ca benëꞌ Abraham,
taꞌyéajlëꞌë Dios ca naꞌ benëꞌ Abraham cateꞌ niꞌ bitiꞌ narúguni lu xipë́lëꞌë lë naꞌ.
Le guzxíꞌ lu nëꞌë Dios gataꞌ queë́ruꞌ tuꞌ réajlëꞌëruꞌ Lëꞌ
13 Guzxíꞌ lu nëꞌë Dios bi unödzjëꞌ queëꞌ Abraham,
en quégaca zxíꞌini xiꞌsóëꞌ,
gataꞌ quégaquiëꞌ laꞌ yödzölió nisö.
Gaca caní,
calëga tuꞌ tunëꞌ ca rinná bëꞌ xibá queëꞌ Dios,
pero tuꞌ nuhuöácagaquiëꞌ tsahuiꞌ lahuëꞌ Lëꞌ tuꞌ taꞌyéajlëꞌë Lëꞌ.
14 Laꞌtuꞌ gataꞌ yödzölió ni quégacasö nupa tun ca rinná bëꞌ xibá queëꞌ Dios,
bitiꞌ gun bayudxi nu tséajlëꞌ Lëꞌ,
ateꞌ nítisö gaca le guzxíꞌ lu nëꞌë Dios.
15 Ruluíꞌi xibá queëꞌ Dios rëꞌu nabágaꞌruꞌ xíguiaꞌ,
le run ga ichúguiëꞌ Dios queë́ruꞌ gátiruꞌ.
Ga niꞌ bitiꞌ ridxini xibá queëꞌ naꞌ,
bitiꞌ gaca ilaꞌdáꞌbagaꞌ bönachi le rinná bëꞌ xibá naꞌ.
16 Que lë ni naꞌ uzíꞌiruꞌ xibé le guzxíꞌ lu nëꞌë Dios tuꞌ réajlëꞌëruꞌ Lëꞌ,
para gaca bëꞌ naca tu le ruzáꞌ ládxëꞌë queë́ruꞌ.
Caní naca,
para gaca bëꞌdaꞌ gataꞌ quéguequi yúguꞌtë zxíꞌini xiꞌsóëꞌ Abraham lë naꞌ guzxíꞌ lu nëꞌë Dios,
calë́gasö quégaquiëꞌ bönniꞌ naꞌ dë lu náꞌagaquiëꞌ xibá queëꞌ Dios,
pero lëscaꞌ quégaca nupa taꞌyéajlëꞌ Dios ca naꞌ guyéajlëꞌë Abraham Dios.
Abraham naꞌ náquiëꞌ ca xuz xtóꞌoruꞌ yúguꞌtëruꞌ rëꞌu,
réajlëꞌëruꞌ-nëꞌ Dios.
17 Caní náquiëꞌ ca naꞌ nazúaj lu guichi láꞌayi,
le rnna:
“Nuzóaꞌ liꞌ ca xúzgaca bönachi idútë yödzölió.”
Caní naca,
lahuëꞌ Dios,
Nu naꞌ guyéajlëꞌë Abraham,
náquiëꞌ xuz gudödi queë́ruꞌ yúguꞌtëruꞌ.
Dios ni rusubanëꞌ nupa chinátigaca,
en ruꞌë didzaꞌ que nu bitiꞌ zuíni tsca chizóa caz nu naꞌ bitiꞌ zuíni.
18 Caní naca tuꞌ gudxëꞌ Dios Abraham naꞌ:
“Ziántërö ilaꞌcuáꞌ zxíꞌini xiꞌsúꞌ.”
Abraham guyéajlëꞌë Dios,
en benëꞌ löza lë naꞌ guzxíꞌ lu nëꞌë Dios,
sal-laꞌ bitiꞌ guca iléꞌenëꞌ lë naꞌ runëꞌ löza,
ateꞌ caní guca,
bidéliꞌnëꞌ náquiëꞌ xúzgaca bönachi idútë yödzölió.
19 Bitiꞌ guca Abraham chopa ládxëꞌë ca naꞌ réajlëꞌë Dios,
sal-laꞌ chiyuꞌë ca tu gayuáꞌ iz,
en yöjnenëꞌ ca naca que le naca cazëꞌ,
chinati caz tuꞌ chinagúladëꞌë,
encaꞌ ca naca queë́nu Sara queëꞌ,
nácanu nigula huödx.
20 Bitiꞌ guca chopa ládxëꞌë,
en bitiꞌ gúquiëꞌ tuꞌ caréajlëꞌ ca naca le guzxíꞌ lu nëꞌë Dios gunëꞌ queëꞌ,
pero bidipa ládxëꞌë tuꞌ guyéajlëꞌë Dios,
ateꞌ guluꞌë Dios yöl-laꞌ ba.
21 Idú ládxëꞌë benëꞌ löza Dios,
napëꞌ yöl-laꞌ huáca gunëꞌ idútë lë naꞌ guzxíꞌ lu nëꞌë.
22 Que lë ni naꞌ,
tuꞌ guyéajlëꞌë Abraham Dios,
Dios buzóëꞌ queëꞌ náquiëꞌ tsahuiꞌ.
23 Nazúaj lu guichi láꞌayi le rnna:
“Dios buzóëꞌ queëꞌ náquiëꞌ tsahuiꞌ.”
Nazúaj lu guichi caní,
calë́gasö para uziꞌë xibé Abraham,
24 pero para uzíꞌiruꞌ xibé caꞌ rëꞌu.
Rëꞌu ni,
Dios gunëꞌ ga huöácaruꞌ tsahuiꞌ lahuëꞌ Lëꞌ channö uyéajlëꞌëruꞌ Lëꞌ,
busubanëꞌ Xanruꞌ Jesús lu yöl-laꞌ guti.
25 Jesús naꞌ,
Dios budödëꞌ Lëꞌ para gútiëꞌ tuꞌ nözi dul-laꞌ nabágaꞌruꞌ,
ateꞌ busubanëꞌ Lëꞌ lu yöl-laꞌ guti,
para gaca gunëꞌ ga huöácaruꞌ tsahuiꞌ lahuëꞌ Lëꞌ.