3
Channö caní naca,
¿bizxi ruziꞌtsëꞌ xibé tu bönniꞌ tuꞌ náquiëꞌ judío?
¿Bizxi ruziꞌë xibé tu bönniꞌ judío tuꞌ narugu lu xipë́lëꞌë?
2 Yenniꞌ ruziꞌë xibé,
en zián ca ruziꞌë xibé.
Le nácatërö lo,
Dios guluꞌë lu náꞌagaquiëꞌ yuguꞌ bönniꞌ judío didzaꞌ láꞌayi queëꞌ.
3 Bal-lëꞌ bitiꞌ taꞌyéajlëꞌë Dios.
¿Naruꞌ réquitsenuꞌ bitiꞌ gunëꞌ Dios ca rnna xtídzëꞌë tuꞌ cabí taꞌyéajlëꞌë Lëꞌ?
4 ¡Bitiꞌ caꞌ gaca!
Ral-laꞌ guéquibeꞌeruꞌ rúnticaꞌsëꞌ Dios ca rnna didzaꞌ bëꞌë,
sal-laꞌ taꞌzíꞌ yëꞌ yúguꞌtë bönachi.
Ca naca queëꞌ nazúaj lu guichi láꞌayi le rnna:
Gaca bëꞌ nacuꞌ tsahuiꞌ niꞌa que didzaꞌ ruꞌu,
en urujuꞌ tsahuiꞌ channö nu uchiꞌa usörö́ Liꞌ.
5 Cateꞌ runruꞌ le ruáꞌ döꞌ,
Dios rnnëꞌ bitiꞌ naca tsahuiꞌ le runruꞌ.
Lë ni naca bëꞌ tsahuiꞌ náquiëꞌ Dios.
Nacuáꞌ nupa taꞌnná:
“Le cabí naca tsahuiꞌ le runruꞌ naca bëꞌ náquiëꞌ Dios tsahuiꞌ,
ateꞌ que lë ni naꞌ bitiꞌ ral-laꞌ gunëꞌ rëꞌu xíguiaꞌ.”
6 ¡Bitiꞌ caꞌ naca caní!
Laꞌtuꞌ ruziꞌë xibé Dios le ruáꞌ döꞌ runruꞌ,
¿nacxi caz gaca uchiꞌa usörö́ëꞌ bönachi yödzölió ni?
7 Cateꞌ nu rizíꞌ yëꞌ,
Dios rnnëꞌ bitiꞌ ruíꞌi didzaꞌ nu naꞌ ca runëꞌ Lëꞌ.
Lë ni naca bëꞌ naca idútë li didzaꞌ ruꞌë Dios.
Taꞌnnë́ꞌ bönniꞌ le taꞌzíꞌ yëꞌë légaquiëꞌ run ga gaca queëꞌ Dios yöl-laꞌ ba,
ateꞌ bitiꞌ ral-laꞌ ichúguiëꞌ quégaquiëꞌ,
cabí innë́ꞌ nácagaquiëꞌ bönniꞌ dul-laꞌ.
8 ¿Naruꞌ huannátsaruꞌ:
“Guáꞌaruꞌ döꞌ para gaca le naca dxiꞌa”?
Nupa naꞌ taꞌnnë́ ziꞌ queë́ruꞌ taꞌnná rusédiruꞌ caní,
ateꞌ tsahuiꞌ naca ichúguiëꞌ Dios quéguequi.
Yúguꞌtëruꞌ nabágaꞌruꞌ dul-laꞌ
9 ¿Bizxi caz innaruꞌ naꞌa?
Ca naca queë́tuꞌ netuꞌ,
bönniꞌ judío,
¿nácarötuꞌ tsahuiꞌ ca iaꞌzícaꞌrö bönachi?
¡Bitiꞌ caꞌ nácatuꞌ!
Chibuluꞌa ni,
nabágaꞌgaca dul-laꞌ bönachi judío,
ateꞌ nabágaꞌgaca caꞌ dul-laꞌ bönachi izáꞌa.
¡Yúguꞌtëꞌ nabágaꞌgaquiëꞌ dul-laꞌ!
10 Nazúaj lu guichi láꞌayi le rnna:
Cuntu nu zoa naca tsahuiꞌ,
cuntu nu caz.
11 Cuntu nu réajniꞌi.
Cuntu nu riguilaj Dios.
12 Yúguꞌtëꞌ taꞌdë́ꞌ ga yúbölö.
Yúguꞌtëꞌ nanítigaquiëꞌ.
Cuntu nu run le naca dxiꞌa,
cuntu nu caz.
13 Lubáꞌagaquiëꞌ nácagaca ca yeru ba nayáljagaca.
Len yöl-laꞌ rinnësö quégaquiëꞌ taꞌzíꞌ yéꞌenëꞌ luzáꞌagaquiëꞌ.
Didzaꞌ rirúaj ruáꞌagaquiëꞌ naca ca le yudzu láyaꞌbaꞌ bëla síniaꞌ.
14 Len yuguꞌ didzaꞌ tuꞌë,
tuꞌdidzaꞌ yúdxinëꞌ bönachi,
en taꞌnnë́ ziꞌë quégaca bönachi naꞌ.
15 Nacuꞌë sinaꞌ tútigaquiëꞌ bönachi.
16 Gátiꞌtës ga taꞌdödëꞌ tuꞌsunítiëꞌ,
en tuꞌsacaꞌ ziꞌë luzáꞌagaquiëꞌ.
17 Bitiꞌ taꞌzéquiꞌnëꞌ ilaꞌbözëꞌ dxíꞌadoꞌ.
18 Bitiꞌ caꞌ tádxinëꞌ Dios.
19 Nö́ziruꞌ yúguꞌtë didzaꞌ ni bëꞌë Dios,
rëꞌ yuguꞌ bönniꞌ naꞌ dë lu náꞌagaquiëꞌ xibá queëꞌ.
Que lë ni naꞌ cuntu nu gaca inná bitiꞌ nabagaꞌ dul-laꞌ,
ateꞌ yúguꞌtë bönachi idútë yödzölió,
uchiꞌa usörö́ëꞌ Dios quéguequi.
20 Tuíꞌi ládxiꞌgaquiëꞌ yuguꞌ bönniꞌ judío ilunëꞌ yuguꞌ le rinná bëꞌ xibá queëꞌ Dios para uluꞌhuöáquiëꞌ tsahuiꞌ,
pero cuntu nu huöáca tsahuiꞌ caní,
tuꞌ nuzóëꞌ Dios xibá queëꞌ para guéquibeꞌeruꞌ nabágaꞌruꞌ dul-laꞌ.
Uláruꞌ tuꞌ réajlëꞌëruꞌ Jesucristo
21 Naꞌa,
chibuluíꞌi lahui ca gaca huöácaruꞌ tsahuiꞌ lahuëꞌ Dios.
Bitiꞌ gaca huöácaruꞌ tsahuiꞌ tuꞌ runruꞌ ca rinná bëꞌ xibá queëꞌ Dios,
sal-laꞌ lu xibá queëꞌ naꞌ,
en lu guichi láꞌayi ga nazúajgaca le gulaꞌnnë́ꞌ bönniꞌ guluꞌë didzaꞌ uláz queëꞌ Dios,
ruíꞌi didzaꞌ ca gaca huöácaruꞌ tsahuiꞌ.
22 Dios caz runëꞌ ga huöácaruꞌ tsahuiꞌ tuꞌ réajlëꞌëruꞌ Jesucristo,
ateꞌ gunëꞌ ga uluꞌhuöáca tsahuiꞌ yúguꞌtë nupa ilaꞌyéajlëꞌ Lëꞌ.
Tuz ca nácagaca yúguꞌtë bönachi
23 tuꞌ núngaquiëꞌ yúguꞌtëꞌ dul-laꞌ,
en bitiꞌ caꞌ nácagaquiëꞌ tsahuiꞌ ca naꞌ náquiëꞌ Dios idú tsahuiꞌ.
24 Dios ruzáꞌ ládxëꞌë queë́ruꞌ,
en nunsëꞌ rëꞌu tsahuiꞌ tuꞌ böáꞌuëꞌ Jesucristo rëꞌu.
25 Dios budödëꞌ Jesucristo uláz queë́ruꞌ.
Lëꞌ bulaljëꞌ xichönëꞌ,
le rigúa dul-laꞌ,
lë naꞌ uzíꞌiruꞌ xibé channö uyéajlëꞌëruꞌ Lëꞌ.
Caní benëꞌ Dios para gaca bëꞌ náquiëꞌ tsahuiꞌ Lëꞌ sal-laꞌ lu yöl-laꞌ riböza zxön ladxiꞌ queëꞌ budö́disëꞌ cáꞌasö yuguꞌ dul-laꞌ benruꞌ dza niꞌte.
26 Caní benëꞌ Dios,
buluíꞌi cuinëꞌ tsahuiꞌ dza ni zóaruꞌ naꞌa,
ateꞌ rugáꞌanëꞌ tsahuiꞌ sal-laꞌ rugǘëꞌ dul-laꞌ nabágaꞌgaca bönachi,
runëꞌ ga tuꞌhuöáca tsahuiꞌ nupa taꞌyéajlëꞌ Cristo.
27 ¿Naruꞌ huácatsö gun ba zxön cuinruꞌ ca naca queë́ruꞌ?
¡Bitiꞌ caꞌ gácaruꞌ!
¿Bizx que naꞌ?
Naca tuꞌ nuláruꞌ,
calëga tuꞌ runruꞌ ca rinná bëꞌ xibá queëꞌ Dios,
pero tuꞌ réajlëꞌësiruꞌ Jesucristo.
28 Naꞌa,
rusácaꞌruꞌ queë́ruꞌ nuhuöáquiëꞌ tsahuiꞌ tu bönniꞌ tuꞌ réajlëꞌë Jesucristo,
en calëga tuꞌ runëꞌ ca rinná bëꞌ xibá queëꞌ Dios.
29 Ca naca Dios,
¿náquiëꞌ Dios quégacasö bönachi judío?
¿Naruꞌ cabí náquiëꞌ caꞌ Dios quégaca bönachi izáꞌa?
Ön,
náquiëꞌ caꞌ Dios quégaca bönachi izáꞌa naꞌ
30 tuꞌ zoa Tuz Nu naca Dios.
Dios ni gunëꞌ ga uluꞌhuöáquiëꞌ tsahuiꞌ yuguꞌ bönniꞌ judío tuꞌ taꞌyéajlëꞌë Jesucristo,
yuguꞌ bönniꞌ naꞌ narugu lu xipë́laꞌgaquiëꞌ lë naꞌ naca bëꞌ nu nequi queëꞌ Dios,
en lëscaꞌ caní gunëꞌ ga uluꞌhuöáquiëꞌ tsahuiꞌ yuguꞌ bönniꞌ ziꞌtuꞌ tuꞌ taꞌyéajlëꞌë Jesucristo,
en bitiꞌ narugu lu xipë́laꞌgaquiëꞌ lë naꞌ naca bëꞌ.
31 Naꞌa,
channö nuláruꞌ tuꞌ réajlëꞌësiruꞌ Jesucristo,
¿ba nagáꞌana cáꞌasö xibá queëꞌ Dios?
¡Bitiꞌ caꞌ naca caꞌ,
pero nagáꞌanarö tsutsu xibá queëꞌ naꞌ!