Naca tsahuiꞌ ichúguiëꞌ Dios quégaca bönachi gátigaca
2
Que lë ni naꞌ,
bitiꞌ gaca ubéaj tsahuiꞌ cuinuꞌ,
nútiꞌtës nu nacuꞌ,
richugu bëꞌu luzóꞌo.
Cateꞌ richugu bëꞌu luzóꞌo,
rusubagaꞌ cuinuꞌ xíguiaꞌ,
tuꞌ richugu bëꞌu luzóꞌo,
en lëscaꞌ runuꞌ liꞌ.
2 Nöz quéziruꞌ ca ruchiꞌa rusörö́ëꞌ Dios.
Naca idútë li ca ruchiꞌa rusörö́ëꞌ nupa tun le ruáꞌ döꞌ.
3 Liꞌ richugu bëꞌu nupa tun le ruáꞌ döꞌ,
en tuz ca runuꞌ liꞌ.
¿Naruꞌ réquitsenuꞌ ulóꞌ liꞌ cateꞌ uchiꞌa usörö́ëꞌ Dios?
4 ¿Naruꞌ rucáꞌanatsoꞌ cáꞌasö yöl-laꞌ dxiꞌi ladxiꞌ idú queëꞌ Dios,
en yöl-laꞌ riböza zxön ladxiꞌ queëꞌ,
en ca runëꞌ,
ridzenëꞌ para lenëꞌ liꞌ?
¿Naruꞌ cabí nöz quézinuꞌ ruzáꞌ ládxëꞌë Dios quiuꞌ yöl-laꞌ dxiꞌi ladxiꞌ queëꞌ para gunëꞌ ga ubíꞌi ládxuꞌu?
5 Lu yöl-laꞌ ládxiꞌdoꞌ zidi quiuꞌ bitiꞌ rubíꞌi ládxuꞌu.
Que lë ni naꞌ rusubagaꞌ cuinuꞌ xíguiaꞌ gunëꞌ Dios liꞌ cateꞌ uchiꞌa usörö́ëꞌ bönachi,
ateꞌ gaca bëꞌ naca ca ral-laꞌ gunëꞌ Dios cateꞌ ichúguiëꞌ quégaca bönachi ilátigaca.
6 Laꞌ dza níꞌisö ubíꞌi cazëꞌ Dios que queëꞌ bönniꞌ tsca naca le gulunëꞌ tu tuëꞌ.
7 Unödzjëꞌ yöl-laꞌ naꞌbán idú quégaca nupa túnticaꞌsö le naca dxiꞌa,
tuꞌ tuíꞌi ládxiꞌgaquiëꞌ uluꞌziꞌë xibë́ꞌ Dios,
en uluꞌrúajëꞌ dxiꞌa lahuëꞌ Lëꞌ,
en ilaꞌcuáꞌticaꞌsëꞌ.
8 Lu yöl-laꞌ rilé queëꞌ,
Dios gunëꞌ xíguiaꞌ nupa taꞌdáꞌbagaꞌ,
en bitiꞌ të́ꞌëni ilún ca rnna le naca idútë li,
pero tun ca rnna le cabí naca tsahuiꞌ.
9 Ilaꞌguíꞌi ilaꞌzáquiëꞌ,
en huíꞌinidaꞌ ládxëꞌë yúguꞌtë bönniꞌ tunëꞌ le ruáꞌ döꞌ.
Ga risí lo gaca caní quégaca bönachi judío,
en gaca caꞌ caní quégaca bönachi izáꞌa.
10 Dios gunëꞌ ga ilácagaquiëꞌ bicaꞌ ba,
en gunëꞌ légaquiëꞌ bal,
en guꞌë le cuéqui dxi ládxiꞌgaquiëꞌ yúguꞌtë bönniꞌ tunëꞌ le naca tsahuiꞌ.
Ga risí lo gunëꞌ caní quégaca bönachi judío,
en gunëꞌ caꞌ caní quégaca bönachi izáꞌa.
11 Caní uchiꞌa usörö́ëꞌ Dios bönachi,
ateꞌ Lëꞌ bitiꞌ runëꞌ bal le taꞌnnasö bönachi.
12 Yúguꞌtë bönniꞌ naꞌ bitiꞌ bilaꞌyönnëꞌ le rinná bëꞌ xibá queëꞌ Dios,
en gulunëꞌ dul-laꞌ,
lëscaꞌ ilátiëꞌ,
sal-laꞌ bitiꞌ téquibeꞌenëꞌ gulaꞌdáꞌbaguëꞌë le rinná bëꞌ xibá naꞌ,
ateꞌ yúguꞌtë bönniꞌ bilaꞌyönnëꞌ le rinná bëꞌ xibá queëꞌ Dios,
en gulunëꞌ dul-laꞌ,
Lëꞌ uchiꞌa usörö́ëꞌ légaquiëꞌ ca naca le rinná bëꞌ xibá naꞌ.
13 Caní gaca,
tuꞌ cabí nácagaquiëꞌ tsahuiꞌ lahuëꞌ Dios yuguꞌ bönniꞌ taꞌyö́nisëꞌ xibá queëꞌ,
pero uluꞌhuöáca tsahuiꞌ lahuëꞌ Lëꞌ yuguꞌ bönniꞌ tunëꞌ ca rnna xibá queëꞌ.
14 Bönniꞌ naꞌ bitiꞌ nácagaquiëꞌ judío,
en bitiꞌ bilaꞌyönnëꞌ le rinná bëꞌ xibá queëꞌ Dios,
pero tun cazëꞌ ca rinná bëꞌ xibá queëꞌ naꞌ,
bönniꞌ ni,
sal-laꞌ bitiꞌ bilaꞌyönnëꞌ le rinná bëꞌ xibá queëꞌ Dios,
zóalen légaquiëꞌ tu xibá le nuzóëꞌ Dios icja ládxiꞌdoꞌgaquiëꞌ.
15 Nupa ni tuꞌluíꞌi lahui le run xibá naꞌ nazúaj lu icja ládxiꞌdoꞌgaquiëꞌ.
Le yuꞌu icja ládxiꞌdoꞌgaquiëꞌ naca bëꞌ naca caní.
Ca taꞌzáꞌ ládxiꞌgaquiëꞌ,
tuꞌzéguiëꞌ luzáꞌagaquiëꞌ didzaꞌ,
o tuꞌbéaj tsahuiꞌ luzáꞌagaquiëꞌ tuëꞌ iaꞌtúëꞌ.
16 Caní ubiꞌë Dios quégaquiëꞌ dza niꞌ uchiꞌa usörö́ëꞌ lu naꞌ Jesucristo yuguꞌ le núngaquiëꞌ,
en le gulaꞌzáꞌ ládxiꞌgaquiëꞌ yúguꞌtëꞌ.
Caní rusëdi didzaꞌ dxiꞌa runaꞌ libán que.
Yuguꞌ bönniꞌ judío, en xibá queëꞌ Dios
17 Núlöliꞌ rnnaliꞌ nácaliꞌ judío,
en ruzxöni ládxiꞌliꞌ xibá queëꞌ Dios,
en run ba zxön cuinliꞌ tuꞌ núnbëꞌëliꞌ-nëꞌ Dios,
18 nöz quéziliꞌ le rë́ꞌënëꞌ Dios gunliꞌ,
en le rusëdi libíꞌiliꞌ xibá queëꞌ,
en réquibeꞌeliꞌ le nácatërö dxiꞌa.
19 Réquiliꞌ gaca uluíꞌiliꞌ nöza dxiꞌa nupa taꞌdá ga yúbölö ca nu nachul-la lahui,
en gaca uzéajniꞌiliꞌ nupa nachul-la nanítigaca.
20 Réquiliꞌ gaca usë́diliꞌ nupa bitiꞌ taꞌyéajniꞌi,
en nupa taꞌyéajniꞌi látiꞌdoꞌos,
tuꞌ dë lu náꞌaliꞌ xibá queëꞌ Dios le rusëdi bönachi ca naca yöl-laꞌ réajniꞌi idú,
en le naca idútë li.
21 Naꞌa,
libíꞌiliꞌ rusë́diliꞌ iaꞌzícaꞌrö bönachi.
¿Naruꞌ cabí ral-laꞌ usëdi cuinliꞌ?
Libíꞌiliꞌ rnnaliꞌ:
“Bitiꞌ cuanuꞌ.”
¿Naruꞌ ribántsaliꞌ libíꞌiliꞌ?
22 Rnnaliꞌ caꞌ:
“Bitiꞌ gunuꞌ dul-laꞌ le riguitsaj xibá que yöl-laꞌ nutsaga naꞌ.”
¿Naruꞌ rúntsaliꞌ libíꞌiliꞌ dul-laꞌ le riguitsaj xibá que yöl-laꞌ nutsaga naꞌ?
Libíꞌiliꞌ bitiꞌ riléꞌeliꞌ dxiꞌa yuguꞌ budóꞌ guiö́j budóꞌ yaga.
¿Naruꞌ ribántsaliꞌ le dzöꞌö lu yudoꞌ quéguequi?
23 Run ba zxön cuinliꞌ tuꞌ dë lu náꞌaliꞌ xibá queëꞌ Dios.
¿Naruꞌ rucáꞌanatsaliꞌ Dios cáꞌasö,
en riguítsjaliꞌ xibá le gunná bëꞌë Lëꞌ?
24 Nazúaj lu guichi láꞌayi ca runliꞌ,
rnna:
Niꞌa que le runliꞌ libíꞌiliꞌ nupa bitiꞌ nácagaca judío taꞌnnë́ ziꞌ queëꞌ Dios.
25 Le nácatë ruziꞌu xibé lë naꞌ narugu lu xipë́luꞌu le naca bëꞌ nazíꞌ lu náꞌaliꞌ xibá queëꞌ Dios channö runuꞌ ca rinná bëꞌ xibá naꞌ queëꞌ Dios,
pero channö riguitsjuꞌ xibá le gunná bëꞌë Lëꞌ,
nuhuöácuꞌ ca tu bönniꞌ bitiꞌ néquinëꞌ queëꞌ Dios.
26 Que lë ni naꞌ,
channö zoëꞌ tu bönniꞌ bitiꞌ narugu lu xipë́lëꞌë lë naꞌ naca bëꞌ nu nazíꞌi xibá queëꞌ Dios,
pero runëꞌ idútë ca rinná bëꞌ xibá queëꞌ Lëꞌ,
bönniꞌ ni náquiëꞌ lahuëꞌ Dios ca tu bönniꞌ narugu caz lu xipë́lëꞌë lë naꞌ naca bëꞌ sal-laꞌ bitiꞌ narugu lu xipëlaꞌ cazëꞌ.
27 Bönniꞌ naꞌ bitiꞌ narugu lu xipë́lëꞌë lë naꞌ naca bëꞌ nu nazíꞌi xibá queëꞌ Dios,
pero runëꞌ idú ca rinná bëꞌ xibá naꞌ queëꞌ Dios,
ca runëꞌ bönniꞌ ni ruluíꞌi nabágaꞌliꞌ libíꞌiliꞌ xíguiaꞌ,
sal-laꞌ dë lu náꞌaliꞌ xibá naꞌ queëꞌ Dios,
en narugu lu xipë́laꞌliꞌ lë naꞌ naca bëꞌ nazíꞌ lu náꞌaliꞌ xibá naꞌ queëꞌ Dios,
pero bitiꞌ runliꞌ ca rinná bëꞌ xibá queëꞌ naꞌ.
28 Bitiꞌ náquiëꞌ idú bönniꞌ judío tu bönniꞌ nácasëꞌ caní lu yöl-laꞌ bönáchisö queëꞌ,
ateꞌ bitiꞌ naca idú lë naꞌ naca bëꞌ le narúgusö lu xipë́lëꞌë nu bönniꞌ.
29 Náquiëꞌ idú bönniꞌ judío bönniꞌ naꞌ náquiëꞌ caní lu icja ládxiꞌdaꞌahuëꞌ,
en le naca idú le narugu lu xipë́lëꞌë nu bönniꞌ le naca bëꞌ nu nazíꞌi xibá queëꞌ Dios,
naca tu le yuꞌu icja ládxiꞌdoꞌgaca bönachi.
Naca que böꞌ naca cázaruꞌ,
en calëga que yöl-laꞌ bönáchisö queë́ruꞌ.
Nu bönniꞌ náquiëꞌ caní,
bitiꞌ tun bönachi lëꞌ bal,
pero Dios caz gunëꞌ lëꞌ bal.