Dios Böꞌ Láꞌayi ridisóalenëꞌ légaquiëꞌ
2
Cateꞌ chibidxín dza Pentecostés,
nudúbigaquiëꞌ tsözxö́n yúguꞌtë bönniꞌ taꞌyéajlëꞌë Cristo.
2 Tsálidoꞌos biyö́n bö le birúaj lúzxiba,
le biyö́n ca riyö́n cateꞌ recja böꞌ budunuꞌ,
ateꞌ biyö́n idútë lu yuꞌu ga naꞌ rö́ꞌögaquiëꞌ.
3 Buluꞌluíꞌi lahui yuguꞌ bululu guíꞌdoꞌ lu böꞌös lógaquiëꞌ,
ateꞌ gulaꞌguísi que queë́gaquiëꞌ.
Bidisóalengaca tu tuëꞌ.
4 Caní guca,
Dios Böꞌ Láꞌayi bidisóalenëꞌ yúguꞌtëꞌ,
ateꞌ gulaꞌsí lógaquiëꞌ tuꞌë didzaꞌ yúbölö,
tsca naca le bëꞌë Dios Böꞌ Láꞌayi que queëꞌ guꞌë didzaꞌ yúbölö naꞌ.
5 Nacuꞌë zián bönniꞌ judío yödzö Jerusalén dza naꞌ,
nácagaquiëꞌ bönniꞌ taꞌyéaj ládxiꞌgaquiëꞌ Dios,
en záꞌgaquiëꞌ narúajgaquiëꞌ yúguꞌtë yödzö idútë yödzölió ni.
6 Cateꞌ bilaꞌyönnëꞌ bö naꞌ,
buluꞌdubëꞌ bönniꞌ zián,
ateꞌ gulaꞌbö́ꞌë böniga,
tuꞌ bilaꞌyönnëꞌ,
ca naca xtídzaꞌgaquiëꞌ que queë́gaquiëꞌ,
tuꞌë didzaꞌ bönniꞌ naꞌ taꞌyéajlëꞌë Cristo.
7 Gulaꞌnáꞌ badxëꞌ yúguꞌtëꞌ,
en buluꞌbáninë,
taꞌnnë́ꞌ:
―Buliꞌyútsöcaꞌ.
¿Naruꞌ calëga bönniꞌ Galilea yúguꞌtë bönniꞌ ni tuꞌë didzaꞌ?
8 ¿Nacxi caz naca riyö́niruꞌ tuꞌë xtídzaꞌruꞌ ca naca didzaꞌ ruíꞌiruꞌ tu turuꞌ?
9 Rëꞌu ni nácaruꞌ bönniꞌ zián yödzö,
bönniꞌ narúajgaquiëꞌ
luyú Partia,
en luyú Media,
en luyú Elam,
en luyú Mesopotamia,
en luyú Judea,
en luyú Capadocia,
en luyú Ponto,
en luyú Asia,
10 en luyú Frigia,
en luyú Panfilia,
en luyú Egipto,
en luyú Africa,
ga nácarö ziꞌtuꞌ ga dë luyú Cirene.
’Lëscaꞌ nacuꞌë bönniꞌ yödzö Roma ni.
Bal-lëꞌ nácagaquiëꞌ bönniꞌ judío,
en iaꞌbal-lëꞌ nazíꞌ lu náꞌagaquiëꞌ le taꞌyéajlëꞌë bönniꞌ judío Dios.
11 Lëscaꞌ nacuꞌë ni yuguꞌ bönniꞌ narúajgaquiëꞌ Creta,
en luyú Arabia.
Riyö́niruꞌ tuꞌë didzaꞌ ruíꞌiruꞌ que queë́ruꞌ,
ateꞌ taꞌguíxjöꞌë yuguꞌ le zxön benëꞌ Dios,
le tun ga rubániruꞌ.
12 Caní guca,
buluꞌbáninë yúguꞌtëꞌ,
en gulaꞌbö́ꞌë böniga.
Gulë́ luzáꞌagaquiëꞌ tuëꞌ iaꞌtúëꞌ,
taꞌnnë́ꞌ:
―¿Bizxi caz lë ni?
13 Buluꞌtitjëꞌ bal-lëꞌ,
taꞌnnë́ꞌ:
―¡Taꞌzúdxinëꞌ!
Libán benëꞌ Pedro lógaca bönachi zián
14 Níꞌirö Pedro guzuílenëꞌ iaꞌchinéajëꞌ gubáz naꞌ nasö́l-lëꞌë Cristo,
ateꞌ gusí lahuëꞌ ruꞌë zidzaj didzaꞌ,
rëꞌ légaquiëꞌ:
―¡Libíꞌiliꞌ,
bönniꞌ Judea,
en yúguꞌtëliꞌ nacuáꞌaliꞌ yödzö Jerusalén!
¡Lë ni ral-laꞌ inö́ziliꞌ!
¡Buliꞌzë́ nágaliꞌ le guíaꞌ libíꞌiliꞌ!
15 Netuꞌ ni bitiꞌ rizúdxituꞌ ca naꞌ réquiliꞌ libíꞌiliꞌ,
tuꞌ ni zóaruꞌ siꞌ galaꞌ xsila,
ateꞌ cuntu nu rizudxi hora caní.
16 Lë ni naca le gunnë́ꞌ Joel,
bönniꞌ bëꞌë didzaꞌ uláz queëꞌ Dios,
gunnë́ꞌ:
17 Caní rnnëꞌ Dios:
Lë ni le gaca dza tsöjsétëgaca.
Isö́l-laꞌa Böꞌ Láꞌayi quiaꞌ,
tsöjsóalenëꞌ yúguꞌtë bönachi.
Zxíꞌiniliꞌ,
bönniꞌ,
en nigula,
iluíꞌibiꞌ didzaꞌ uláz quiaꞌ nedaꞌ.
Yuguꞌ biꞌi raꞌbán ilaꞌléꞌebiꞌ le uluꞌa lahui,
ateꞌ yuguꞌ bönniꞌ gula ilaꞌnenëꞌ yëla.
18 Cateꞌ idxín dza niꞌ quísiaꞌ Böꞌ Láꞌayi quiaꞌ,
tsöjsóalenëꞌ huen dxin quiaꞌ,
bönniꞌ,
en nigula,
ateꞌ iluꞌë didzaꞌ uláz quiaꞌ nedaꞌ.
19 Uluꞌa lahui lúzxiba xitsáꞌ le ilún ga uluꞌbani bönachi,
ateꞌ yödzölió uluꞌa lahui le ilaca bëꞌ,
rön,
en guíꞌ,
en dzön ca böaj.
20 Ichul-la gubidza,
ateꞌ gaca beoꞌ xiná ca naca rön.
Caní gaca cateꞌ idxín dza niꞌ chibuluꞌë Dios.
Gaca dza niꞌ le catu caz riléꞌeruꞌ.
21 Uluꞌlágaca yúguꞌtë nupa niꞌ uluꞌlidza Lëꞌ Xanruꞌ,
lu yöl-laꞌ réajlëꞌ quéguequi Lëꞌ.
22 ’Buliꞌzë́ nágaliꞌ lë ni guíaꞌ libíꞌiliꞌ,
bönachi Israel.
Dios caz benëꞌ bal Jesús,
bönniꞌ Nazaret ga zóaliꞌ.
Dios bëꞌë Lëꞌ lataj benëꞌ le tun ga rubániruꞌ,
yuguꞌ yöl-laꞌ huáca,
en le taca bëꞌ.
Yúguꞌtë lë naꞌ benëꞌ Dios lu nëꞌë Jesús,
ca naꞌ chinö́z quéziliꞌ.
23 Lëscaꞌ caní,
Dios bëꞌë lataj nu budödi Jesús lu náꞌaliꞌ.
Caní guca,
ca naꞌ chigunná ládxëꞌë Dios gunëꞌ,
en ca naca le chibucözëꞌ dza niꞌte.
Libíꞌi cázaliꞌ guzxönliꞌ-nëꞌ Jesús,
en bë́tiliꞌ-nëꞌ lu náꞌagaquiëꞌ yuguꞌ bönniꞌ tuáꞌ döꞌ,
bönniꞌ gulútiëꞌ Lëꞌ cateꞌ niꞌ buluꞌdáꞌgaquiëꞌ Lëꞌ lëꞌe yaga cruz.
24 Níꞌirö Dios caz busubanëꞌ Jesús naꞌ.
Bubéajëꞌ Lëꞌ lu yöl-laꞌ guti,
tuꞌ cabí guca ugáꞌanëꞌ tsaz lu yöl-laꞌ guti naꞌ.
25 Ca naca lë ni,
bëꞌë didzaꞌ David uláz queëꞌ Dios ca naca queëꞌ Jesús,
gunnë́ꞌ:
Biléꞌetiquiꞌsidaꞌ-nëꞌ Xanruꞌ,
zoëꞌ lahuaꞌ.
Lëꞌ zoëꞌ cuita lëꞌa ibëla,
rizönëꞌ nedaꞌ,
para cabí gaca nu bi gun quiaꞌ.
26 Que lë ni naꞌ budzeja ládxaꞌa,
ateꞌ lu yöl-laꞌ rudzeja quiaꞌ bil-laꞌ.
Que lë ni naꞌ gunaꞌ löza Lëꞌ
cateꞌ idxín dza gátiaꞌ.
27 Xantuꞌ Dios,
nözdaꞌ bitiꞌ ucáꞌanuꞌ nedaꞌ
lataj chul-la ga nacuáꞌ nupa nátigaca.
Bitiꞌ guꞌu lataj initi idútë le nacaꞌ.
Nacaꞌ bönniꞌ nadxíꞌi quézinuꞌ Liꞌ.
28 Buzéajniꞌinuꞌ nedaꞌ ca ral-laꞌ gunaꞌ
para idéliꞌdaꞌ yöl-laꞌ naꞌbán idú.
Gunuꞌ ga udzéjadaꞌ tuꞌ zóalen cazuꞌ nedaꞌ.
29 ’Naꞌa,
libíꞌiliꞌ,
bö́chaꞌa.
Naca bëꞌ gútiëꞌ xuz xtóꞌoruꞌ David,
en bigáchëꞌë yeru ba,
ateꞌ ba queëꞌ naꞌ dë ga zóaruꞌ ga ridxintë naꞌa dza.
30 David naꞌ bëꞌë didzaꞌ uláz queëꞌ Dios,
en gunö́zinëꞌ benëꞌ tsutsu Dios didzaꞌ le guzxíꞌ lu nëꞌë queëꞌ,
gunëꞌ ga galjëꞌ Cristo ladaj diꞌa dza queëꞌ siꞌ záꞌgaca,
ateꞌ Cristo naꞌ inná bëꞌë xilatjëꞌ David naꞌ.
31 Tuꞌ biléꞌenëꞌ David lë ni zíꞌalö,
bëꞌë didzaꞌ ca guca,
bubanëꞌ Cristo,
en ca guca,
bitiꞌ bugáꞌanëꞌ lataj chul-la ga nacuáꞌ nupa nátigaca,
en bitiꞌ guniti le naca cazëꞌ.
32 Dios busubanëꞌ Jesús lu yöl-laꞌ guti,
ateꞌ ca guca lë ni yúguꞌtëtuꞌ runtuꞌ ba nalí que.
33 Caní guca,
len yöl-laꞌ huáca queëꞌ,
Dios buchisëꞌ Lëꞌ xitsáꞌ ga niꞌ nácatërëꞌ zxön.
Naꞌa,
Cristo chigusö́l-lëꞌë Dios Böꞌ Láꞌayi ni,
ateꞌ raca ca naꞌ guzxíꞌ lu nëꞌë Dios gunëꞌ lu nëꞌë Cristo,
ateꞌ Dios Böꞌ Láꞌayi naꞌ runëꞌ yuguꞌ lë ni riléꞌeliꞌ,
en riyö́niliꞌ.
34 Bitiꞌ buëpëꞌ David naꞌ yehuaꞌ yubá,
pero lë cazëꞌ David naꞌ gunnë́ꞌ:
Xanruꞌ Dios gudxëꞌ Xanaꞌ:
Guröꞌi cuita lëꞌa ibëla ga naca lo
35 cateꞌ gunraꞌ ga uluꞌzechu zxíbigaca nupa taꞌdáꞌbagaꞌ Liꞌ loꞌ Liꞌ.
36 ’Naꞌa,
bönachi Israel,
ral-laꞌ inö́ziliꞌ le nácatë.
Dios benëꞌ ga náquiëꞌ Lë cazëꞌ Jesús ni Xanruꞌ,
en Bönniꞌ Rusölá,
bönniꞌ naꞌ budáꞌaliꞌ-nëꞌ lëꞌe yaga cruz.
37 Cateꞌ yuguꞌ bönniꞌ niꞌ bilaꞌyönnëꞌ lë ni,
gulaꞌböꞌë böniga,
ateꞌ gulë́ꞌ Pedro,
en iaꞌzícaꞌrëꞌ bönniꞌ gubáz queëꞌ Cristo,
taꞌnnë́ꞌ:
―Bö́chiꞌruꞌ,
¿nacxi gúntsatuꞌ?
38 Níꞌirö Pedro gudxëꞌ légaquiëꞌ:
―Buliꞌbíꞌi ládxiꞌliꞌ,
en guliꞌdila nisa tu tuliꞌ lu Lëꞌ Jesucristo para uniti lahuëꞌ Dios dul-laꞌ nabágaꞌliꞌ,
ateꞌ Dios Böꞌ Láꞌayi idisóalenëꞌ libíꞌiliꞌ,
Nu naꞌ isö́l-lëꞌë Dios.
39 Queë́liꞌ nequi le guzxíꞌ lu nëꞌë Dios,
en quégaca zxíꞌiniliꞌ,
encaꞌ quégaca yúguꞌtë bönachi izáꞌa,
yúguꞌtë bönniꞌ niꞌ ulidzëꞌ Xanruꞌ Dios légaquiëꞌ.
40 Yuguꞌ didzaꞌ ni,
en iaꞌbal-la zián didzaꞌ benëꞌ ba nalí Pedro,
le guchíziëꞌ icja nágagaquiëꞌ,
gunnë́ꞌ:
―Guliꞌgún ga uláliꞌ,
irúajliꞌ ládjagaca bönachi tuáꞌ döꞌ nacuáꞌ dza ni zóaruꞌ naꞌa.
41 Caní guca,
gulaꞌdila nisa nupa niꞌ gulaꞌzíꞌ lu në́ꞌeguequi didzaꞌ naꞌ bëꞌë Pedro.
Dza naꞌ ca chi uruáꞌ gayuáꞌ bönachi gulún légaquiëꞌ tuz.
42 Gulunëꞌ yúguꞌtëꞌ idútë le buluꞌsédinëꞌ gubáz nasö́l-lëꞌë Cristo légaquiëꞌ.
Guláquiëꞌ tuz tuëꞌ len iaꞌtúëꞌ,
en gulahuëꞌ tsözxö́n le rusáꞌ ládxiꞌruꞌ ca gútiëꞌ Jesús,
ateꞌ gulunëꞌ tsözxö́n,
buluꞌlidzëꞌ Dios.
Ca tun bönachi queëꞌ Cristo
43 Gulunëꞌ gubáz queëꞌ Cristo zián le run ga rubániruꞌ,
en zián le taca bëꞌ,
pero guladxi gulaꞌdzöbi iaꞌzícaꞌrö bönachi.
44 Yúguꞌtë nupa naꞌ taꞌyéajlëꞌ Cristo gulaca tuz,
ateꞌ buluꞌún tuz yúguꞌtë le dë quéguequi.
45 Cateꞌ bilaꞌléꞌenëꞌ taꞌyadzaj nupa nútsaꞌgaca ládjagaquiëꞌ,
níꞌirö yuguꞌ bönniꞌ bi dë quégaquiëꞌ gulútiꞌë le,
ateꞌ gulaꞌguísiëꞌ dumí naꞌ que queë́gaca nupa niꞌ bi taꞌyadzaj.
46 Buluꞌdubëꞌ tsözxö́n chila yudoꞌ yuguꞌ dza,
ateꞌ gulahuëꞌ le rusáꞌ ládxiꞌruꞌ ca gútiëꞌ Xanruꞌ.
Caní gulunëꞌ gapa naca lu yuꞌu lídxigaquiëꞌ.
Gulahuëꞌ tsözxö́n,
ateꞌ buluꞌdzéjanëꞌ,
en gulaca idú ládxiꞌgaquiëꞌ.
47 Gulaꞌguꞌë Dios yöl-laꞌ ba,
ateꞌ yúguꞌtë bönachi gulún légaquiëꞌ bal.
Buzanëꞌ Xanruꞌ nupa tuꞌdubi queëꞌ,
nupa naꞌ tuꞌlá tu tu dza.