Ruhuöáquiëꞌ tu bönniꞌ bitiꞌ raca sëꞌë
3
Tu dza niꞌ gulaꞌbenëꞌ Pedro,
en Juan,
söjáquiëꞌ tsözxö́n lu chila yudoꞌ,
cateꞌ tuꞌdubi bönachi tuꞌlidza Dios niꞌ,
le naca idú ridödi xihuö́.
2 Ga niꞌ taꞌdödëꞌ zoëꞌ tu bönniꞌ bitiꞌ raca sëꞌë dza niꞌte niꞌ náquiëꞌ bíꞌidoꞌ.
Yuguꞌ dza röjuáꞌgaquiëꞌ lëꞌ niꞌ,
en taꞌbéquiëꞌ lëꞌ raꞌ yudoꞌ ga nazíꞌi le Raꞌ Yuꞌu Lachi,
para inábinëꞌ nu bi unö́dzjasö queëꞌ ladaj nupa niꞌ taꞌyaza löꞌa yudoꞌ.
3 Bönniꞌ ni,
cateꞌ biléꞌenëꞌ Pedro,
en Juan,
söjáquiëꞌ taꞌyáziëꞌ löꞌa yudoꞌ,
gútaꞌyuëꞌ lógaquiëꞌ bi uluꞌnö́dzjasëꞌ queëꞌ.
4 Níꞌirö buluꞌyúëꞌ Pedro,
en Juan lëꞌ,
ateꞌ Pedro gudxëꞌ lëꞌ:
―Buyú netuꞌ.
5 Níꞌirö bönniꞌ naꞌ buzëdaꞌ náguiëꞌ légaquiëꞌ tuꞌ runëꞌ löza bi uluꞌnö́dzjasëꞌ queëꞌ.
6 Pedro gudxëꞌ lëꞌ:
―Bitiꞌ dë dumí plata,
dumí oro quiaꞌ,
pero le dësö quiaꞌ gunnaꞌ quiuꞌ.
Niꞌa que yöl-laꞌ huáca que Lëꞌ Jesucristo,
bönniꞌ Nazaret,
guyasa,
en guzëꞌe.
7 Níꞌirö gudélëꞌë Pedro nëꞌë ibëla bönniꞌ huëꞌ naꞌ,
en buchisëꞌ lëꞌ,
ateꞌ laꞌ böácatë niꞌë,
en buguitaj bëchaj niꞌë bönniꞌ naꞌ.
8 Níꞌirö guzuínëꞌ bönniꞌ naꞌ,
ateꞌ guxítiꞌë,
en guzë́ꞌë.
Guyázalenëꞌ tsözxö́n Pedro,
en Juan,
löꞌa yudoꞌ,
rizëꞌe niꞌë,
en rixítiꞌë,
en riguꞌë Dios yöl-laꞌ ba.
9 Yúguꞌtë bönachi nacuáꞌ niꞌ taꞌléꞌe lëꞌ rizëꞌe niꞌë,
en riguꞌë Dios yöl-laꞌ ba.
10 Caní guca,
guládxinëꞌ,
en buluꞌbáninë ca naca lë naꞌ guca,
tuꞌ buluꞌúnbëꞌë lëꞌ,
náquiëꞌ bönniꞌ naꞌ riböꞌë raꞌ yudoꞌ ga nazíꞌi le Raꞌ Yuꞌu Lachi,
rinabëꞌ nu bi unö́dzjasö queëꞌ.
Didzaꞌ bëꞌë Pedro chila yudoꞌ
11 Tsanni niꞌ bönniꞌ naꞌ bitiꞌ guca sëꞌë,
ateꞌ böáquiëꞌ,
zönëꞌ náꞌagaquiëꞌ Pedro,
en Juan,
buluꞌdubi yúguꞌtë bönachi ga naꞌ nacuꞌë chila yudoꞌ nazíꞌi le:
Chila Queëꞌ Salomón,
ateꞌ gulaꞌnáꞌ badxëꞌ.
12 Cateꞌ biléꞌenëꞌ Pedro lë ni,
gudxëꞌ bönachi naꞌ:
―Libiꞌiliꞌ,
bönniꞌ Israel,
¿bizx que rubániliꞌ ca naca lë ni?
¿Bizx que ruyuliꞌ netuꞌ,
en réquitseliꞌ nétuꞌsö buntuꞌ-nëꞌ bönniꞌ ni,
en bentuꞌ ga rizëꞌe niꞌë len yöl-laꞌ huáca queë́ztuꞌ,
o niꞌa que le reaj ládxiꞌtuꞌ-nëꞌ Dios?
13 Naca lë ni le benëꞌ Dios.
Náquiëꞌ Dios quégaquiëꞌ xuz gudödi queë́ruꞌ Abraham,
en Isaac,
en Jacob.
Lë cazëꞌ béntërëꞌ bal Jesús,
Zxíꞌinëꞌ.
Jesús ni,
libíꞌi cázaliꞌ bë́tiliꞌ-nëꞌ lu náꞌagaquiëꞌ bönniꞌ taꞌnná béꞌenëꞌ libíꞌiliꞌ.
Cateꞌ gúꞌunnëꞌ Pilato usanëꞌ Jesús,
gudáꞌbagaꞌliꞌ-nëꞌ.
14 Buzóaliꞌ tsöláꞌalö Bönniꞌ Tsahuiꞌ,
en Láꞌayi,
ateꞌ gunábiliꞌ-nëꞌ Pilato usanëꞌ queë́liꞌ tu bönniꞌ rútiëꞌ bönachi.
15 Caní guca,
bë́tiliꞌ-nëꞌ Bönniꞌ runna cazëꞌ yöl-laꞌ naꞌbán idú queë́ruꞌ.
Níꞌirö Dios busubanëꞌ Lëꞌ lu yöl-laꞌ guti,
ateꞌ ca naca lë ni runtuꞌ ba nalí que.
16 Tuꞌ guyéajlëꞌë bönniꞌ ni Jesús,
böáca niꞌë.
Riléꞌeliꞌ-nëꞌ,
en núnbëꞌëliꞌ-nëꞌ.
Tuꞌ réajlëꞌë Jesús,
Lëꞌ bunëꞌ dxíꞌadoꞌ bönniꞌ ni,
ateꞌ riléꞌeliꞌ yúguꞌtëliꞌ le nácatë naꞌ.
17 ’Naꞌa,
bö́chaꞌa,
nözdaꞌ benliꞌ caní,
bë́tiliꞌ-nëꞌ Jesús tuꞌ cabí guyéajniꞌiliꞌ,
en bitiꞌ gulaꞌyéajniꞌinëꞌ bönniꞌ taꞌnná béꞌenëꞌ libíꞌiliꞌ.
18 Caní busudxinëꞌ Dios didzaꞌ naꞌ bëꞌë zíꞌalö,
le gulaꞌnnë́ꞌ bönniꞌ guluꞌë didzaꞌ uláz queëꞌ ca ral-laꞌ quiꞌi sáquëꞌë Cristo.
19 Que lë ni naꞌ,
buliꞌbíꞌi ládxiꞌliꞌ,
en buliꞌhuöáca queëꞌ Dios,
para ugǘëꞌ dul-laꞌ nabágaꞌliꞌ,
en gunëꞌ ga huöáca ládxiꞌliꞌ.
20 Níꞌirö isö́l-lëꞌë leyúbölö Jesús,
Bönniꞌ naꞌ buzóëꞌ dza niꞌte para gáquiëꞌ Cristo,
Bönniꞌ Rö queëꞌ,
Bönniꞌ naꞌ inná béꞌenëꞌ libíꞌiliꞌ.
21 Naꞌa,
run bayudxi ugáꞌanëꞌ yehuaꞌ yubá niꞌ cateꞌ idxinrö dza uduhuénëꞌ tsahuiꞌ yúguꞌtë le raca,
en gaca ca naꞌ chigunná cazëꞌ Dios,
lë naꞌ gulaꞌnnë́ꞌ bönniꞌ guluꞌë didzaꞌ uláz queëꞌ,
bönniꞌ niꞌ gulaꞌcuꞌë dza niꞌte.
22 Lëscaꞌ caní Moisés gudxëꞌ xuz xtóꞌoruꞌ,
gunnë́ꞌ:
“Xanruꞌ Dios isö́l-lëꞌë queë́liꞌ tu bönniꞌ galjëꞌ ládjagaca diꞌa dza queë́liꞌ.
Gáquiëꞌ bönniꞌ guꞌë didzaꞌ uláz queëꞌ Dios.
Isö́l-lëꞌë Lëꞌ queë́liꞌ ca naꞌ gusö́l-lëꞌë nedaꞌ.
Run bayudxi uzë́ nágaliꞌ-nëꞌ ca naca yúguꞌtë le guíëꞌ libíꞌiliꞌ.
23 Yúguꞌtë nupa bitiꞌ uluꞌzë́ nágagaca bönniꞌ niꞌ guꞌë didzaꞌ uláz queëꞌ Dios ilaꞌniti,
en uluꞌláꞌalen bönachi queëꞌ Dios.”
24 ’Ca naca dza ni zóaruꞌ naꞌa,
gulaꞌguíxjöꞌë yúguꞌtë bönniꞌ guluꞌë didzaꞌ uláz queëꞌ Dios ga gudélaꞌtë zoëꞌ Samuel,
en gudödi niꞌ.
25 Libíꞌiliꞌ nácaliꞌ zxíꞌini xiꞌsóagaquiëꞌ bönniꞌ guluꞌë didzaꞌ uláz queëꞌ Dios,
ateꞌ nequi queë́liꞌ didzaꞌ rucáꞌana tsahuiꞌ,
le bénlenëꞌ Dios xuz xtóꞌoruꞌ,
cateꞌ niꞌ gudxëꞌ Abraham:
“Niꞌa que le gunëꞌ zxíꞌini xiꞌsúꞌ ilaca bicaꞌ ba yúguꞌtë bönachi yödzölió.”
26 Cateꞌ Dios busubanëꞌ Zxíꞌinëꞌ lu yöl-laꞌ guti,
gusö́l-lëꞌë Lëꞌ zíꞌalö queë́liꞌ para gunëꞌ ga gácaliꞌ bicaꞌ ba,
en ucáꞌanaliꞌ le cabí naca dxiꞌa runliꞌ.