Yöl-laꞌ unná bëꞌ dë lu nëꞌë Jesús
20
Tu dza,
cateꞌ niꞌ rusédinëꞌ Jesús bönachi ga naca chila yudoꞌ,
en riguíxjöꞌë didzaꞌ dxiꞌa,
bilaꞌdxinëꞌ yuguꞌ bixúz unná bëꞌ,
en bönniꞌ yudoꞌ tuꞌsédinëꞌ,
len bönniꞌ gula tuꞌzéajniꞌinëꞌ,
ga naꞌ zoëꞌ,
San Lucas 20:1-26
―Gudixjöiꞌi netuꞌ.
¿Bizxi yöl-laꞌ unná bëꞌ dë lu noꞌo runuꞌ caní?
¿Nuzxi caz budödi lu noꞌo yöl-laꞌ unná bëꞌ ni?
3 Bubiꞌë didzaꞌ Jesús,
rëꞌ légaquiëꞌ:
―Inábidaꞌ caꞌ libíꞌiliꞌ tu didzaꞌ,
ateꞌ ubíꞌiliꞌ innaliꞌ.
4 ¿Nuzxi gusö́l-laꞌ Juan ruquilëꞌ bönachi nisa?
¿Naruꞌ Dios,
o bönachi?
5 Gulún xtídzaꞌgaquiëꞌ laꞌ légacasëꞌ bönniꞌ yudoꞌ naꞌ,
taꞌnnë́ꞌ:
―Channö innaruꞌ:
Gusö́l-lëꞌë Dios lëꞌ,
guíëꞌ rëꞌu:
“¿Bizx que bitiꞌ guyéajlëꞌëliꞌ-nëꞌ?”
6 Channö guië́ruꞌ-nëꞌ:
Gulaꞌsö́l-lëꞌë yuguꞌ bönniꞌ lëꞌ,
bönachi lu yödzö ni uluꞌladxiꞌ rëꞌu guiö́j,
tuꞌ nö́ziguequi bëꞌë didzaꞌ Juan naꞌ uláz queëꞌ Dios.
7 Níꞌirö buluꞌbiꞌë didzaꞌ,
taꞌnnë́ꞌ:
―Bitiꞌ nöztuꞌ nuzxi naꞌ gusö́l-laꞌ Juan.
8 Níꞌirö Jesús rëꞌ légaquiëꞌ:
―Nedaꞌ caꞌ bitiꞌ guíaꞌ libíꞌiliꞌ bi yöl-laꞌ unná bëꞌ rúnidaꞌ caní.
Yuguꞌ bönniꞌ huen dxin bitiꞌ nácagaquiëꞌ tsahuiꞌ
9 Níꞌirö laꞌ gusí lotëꞌ Jesús ruíꞌilenëꞌ bönachi nacuáꞌ niꞌ didzaꞌ.
Rucúdzuꞌë didzaꞌ,
rnnëꞌ:
―Zoëꞌ tu bönniꞌ budë́ꞌë yuguꞌ lubá uva lu xiyúëꞌ,
ateꞌ budödëꞌ luyú naꞌ lu náꞌagaquiëꞌ bönniꞌ huen dxin para ilún gatsjëꞌ len lëꞌ le uluꞌziꞌë,
ateꞌ guyijëꞌ ziꞌtuꞌ ga niꞌ bugáꞌanëꞌ xidzé.
10 Cateꞌ bidxín dza uluꞌchibëꞌ uva luyú naꞌ,
gusö́l-lëꞌë tuëꞌ bönniꞌ gubáz queëꞌ ga naꞌ nacuꞌë huen dxin naꞌ para siꞌë uláz queëꞌ que le uluꞌziꞌë,
pero huen dxin naꞌ gulúndëꞌë lëꞌ ziꞌ,
en buluꞌsö́l-lëꞌë lëꞌ cáꞌasö.
11 Leyúbölö gusö́l-lëꞌë iaꞌtúëꞌ gubáz queëꞌ,
ateꞌ légaquiëꞌ gulúndëꞌë lëꞌ caꞌ ziꞌ,
en guluꞌë döꞌ queëꞌ,
ateꞌ buluꞌsö́l-lëꞌë lëꞌ cáꞌasö.
12 Leyúbölö gusö́l-lëꞌë quégaquiëꞌ bönniꞌ bunni gubáz queëꞌ,
ateꞌ buluꞌdxíëꞌ caꞌ lëꞌ huëꞌ,
en buluꞌbéajëꞌ lëꞌ níꞌilö luyú naꞌ.
13 ’Níꞌirö guzáꞌ ládxëꞌë xani luyú naꞌ,
gunnë́ꞌ:
“¿Nacxi guntsaꞌ?
Isö́l-laꞌa zxíꞌini cazaꞌ nadxíꞌidaꞌ-biꞌ quégaquiëꞌ.
Cateꞌ ilaꞌléꞌenëꞌ-biꞌ,
nadxi caꞌ ilunëꞌ-biꞌ bal.”
14 Níꞌirö,
cateꞌ yuguꞌ bönniꞌ huen dxin naꞌ bilaꞌléꞌenëꞌ-biꞌ,
gulún xtídzaꞌgaquiëꞌ laꞌ légacasëꞌ,
taꞌnnë́ꞌ:
“Biꞌi ni guequi queë́biꞌ luyú ni.
Guliꞌdá,
gútiruꞌ-biꞌ,
para guequi queë́ruꞌ le ral-laꞌ guequi queë́biꞌ.”
15 Buluꞌbéajëꞌ-biꞌ níꞌilö luyú naꞌ,
en gulútiëꞌ-biꞌ.
’Naꞌa,
¿nacxi caz gunëꞌ xani luyú naꞌ quégaquiëꞌ?
16 Guídëꞌ,
en gútiëꞌ yuguꞌ huen dxin naꞌ,
ateꞌ udödëꞌ luyú queëꞌ lu náꞌagaca bönachi yúbölö.
Cateꞌ bönachi nacuáꞌ niꞌ bilaꞌyöni lë ni,
gulaꞌnnë́ꞌ:
―¡Inná Dios bitiꞌ gaca caní!
17 Níꞌirö buyúëꞌ Jesús légaquiëꞌ,
rnnëꞌ:
―¿Bizxi saꞌyéaj lë naꞌ nazúaj lu guichi láꞌayi,
rnna:
Guiö́j naꞌ gulaꞌrúꞌunëꞌ bönniꞌ huen zöꞌö,
guiö́j ni chinaca guiö́jlen squin zöꞌö?
18 Nútiꞌtës nu ibixi lahui guiö́j ni,
quitsaj nu naꞌ,
ateꞌ nu bönniꞌ tsöjbágaꞌ guiö́j ni lëꞌ,
uzxuzxaj lëꞌ.
Ca naca dumí taꞌguizxaj lázagaca bönachi
19 Laꞌ dza níꞌisö,
yuguꞌ bixúz unná bëꞌ len bönniꞌ yudoꞌ tuꞌsédinëꞌ gulaꞌzóa gulaꞌböꞌë ilaꞌzönëꞌ Jesús,
tuꞌ téquibeꞌenëꞌ gunnë́ꞌ quégaquiëꞌ lë naꞌ bucúdzuꞌë didzaꞌ,
pero guládxinëꞌ bi ilún bönachi zián nacuáꞌ niꞌ.
20 Níꞌirö buluꞌyúyeniëꞌ Jesús,
en gulaꞌsö́l-lëꞌë yuguꞌ bönniꞌ para uluꞌbéajëꞌ Lëꞌ didzaꞌ,
bönniꞌ uluꞌluíꞌi cuíngaquiëꞌ ca bönniꞌ tsahuiꞌ,
para ilunëꞌ ga bi innë́ꞌ Jesús,
para gaca uluꞌdödëꞌ Lëꞌ lu nëꞌë bönniꞌ rinná béꞌenëꞌ uláz queëꞌ César.
21 Para ilunëꞌ caní,
gulaꞌnábinëꞌ Jesús,
taꞌnnë́ꞌ:
―Bönniꞌ Usedi,
nöztuꞌ rnnoꞌ le nácatë,
en rusédinuꞌ le nácatë,
en bitiꞌ ruchiꞌa rusörö́uꞌ ca naca le tuꞌluíꞌisö lahui bönachi,
pero idútë li naca ca rusédinuꞌ xibá queëꞌ Dios.
22 Gudíxjöiꞌi netuꞌ.
¿Naruꞌ run bayudxi quizxaj laztuꞌ queëꞌ César,
bönniꞌ Roma rinná bëꞌë,
o cabí?
23 Réquibeꞌenëꞌ Jesús le të́ꞌënnëꞌ ilunëꞌ queëꞌ,
ateꞌ rëꞌ légaquiëꞌ:
―¿Bizx que rizíꞌ bë́ꞌëliꞌ nedaꞌ?
24 Buliꞌluíꞌitsöquiꞌ nedaꞌ tu dumí ridá.
¿Nuzxi lahui daꞌ lëꞌe ni,
en nuzxi le nazúaj ni?
Buluꞌbiꞌë didzaꞌ,
taꞌnnë́ꞌ:
―Queëꞌ César naꞌ.
25 Níꞌirö Jesús rëꞌ légaquiëꞌ:
―Buliꞌnö́dzaj queëꞌ César le nequi queëꞌ César,
ateꞌ queëꞌ Dios le nequi queëꞌ Dios.
26 Bitiꞌ guca ilunëꞌ ga bi innë́ꞌ Jesús para gaca uluꞌzéguiëꞌ Lëꞌ didzaꞌ lógaca bönachi zián naꞌ,
pero buluꞌbáninëꞌ ca naca didzaꞌ bubiꞌë,
ateꞌ buluꞌsayaj ruáꞌagaquiëꞌ.
Ca gaca quégaca nupa uluꞌbán lu yöl-laꞌ guti
27 Níꞌirö yuguꞌ bönniꞌ yudoꞌ saduceo,
nupa naꞌ taꞌnná bitiꞌ uluꞌbán nupa chinátigaca,
bilaꞌdxinëꞌ niꞌ,
ateꞌ gulaꞌnábinëꞌ Jesús,
taꞌnnë́ꞌ:
San Lucas 20:27-47
28 ―Bönniꞌ Usedi,
Moisés buzúajëꞌ queë́ruꞌ lu guichi,
le rnna:
“Channö gátiëꞌ nu bönniꞌ,
ateꞌ ugáꞌananu nigula queëꞌ,
en channö cuntu nu zoa biꞌi queëꞌ,
níꞌirö biꞌi bö́chiꞌbiꞌ ral-laꞌ síꞌibiꞌ-nu nigula queëꞌ naꞌ,
para uzóabiꞌ biꞌi queëbiꞌ bö́chiꞌbiꞌ naꞌ gútibiꞌ.”
29 Gulaꞌcuáꞌabiꞌ gadxi biꞌi bönniꞌ nácagacabiꞌ bö́chiꞌbiꞌ,
ateꞌ biꞌi zíꞌalö naꞌ butsaga náꞌalenbiꞌ biꞌi nigula,
en gútibiꞌ,
bitiꞌ zóabiꞌ biꞌi queë́biꞌ.
30 Níꞌirö biꞌi buropi naꞌ butsaga náꞌalenbiꞌ-nu nigula naꞌ,
ateꞌ gútibiꞌ caꞌ biꞌi ni,
bitiꞌ zóabiꞌ biꞌi queë́biꞌ.
31 Butsaga náꞌalenbiꞌ-nu biꞌi bunni naꞌ,
ateꞌ laꞌ tuz ca gulunbiꞌ igádxitëbiꞌ,
ateꞌ gulátibiꞌ,
bitiꞌ zóabiꞌ biꞌi quégacabiꞌ.
32 Ga búdxitë,
gútinu caꞌ nigula naꞌ.
33 Naꞌa,
cateꞌ uluꞌbán nupa chinátigaca,
¿núzxilöbiꞌ guéquinu nigula naꞌ queë́biꞌ,
tuꞌ buluꞌtsaga náꞌalenbiꞌ-nu igádxitëbiꞌ?
34 Níꞌirö bubiꞌë didzaꞌ Jesús,
rëꞌ légaquiëꞌ:
―Tuꞌtsága náꞌagaca bönachi dza ni zóaruꞌ naꞌa,
en tuꞌnödzjëꞌ-biꞌ zxíꞌinigaquiëꞌ para uluꞌtsaga náꞌagacabiꞌ.
35 Naꞌa,
nupa nácagaca lesacaꞌ uluꞌbán lu yöl-laꞌ guti,
en tsöjcuáꞌ yödzölió siꞌ gataꞌ,
bitiꞌ ilún yöl-laꞌ rizóalen nigula,
en bitiꞌ uluꞌtsaga náꞌagaca.
36 Caní gaca,
tuꞌ cabirö ilati nupa naꞌ uluꞌbán lu yöl-laꞌ guti,
pero ilácagaca ca nácagaquiëꞌ gubáz láꞌayi queëꞌ Dios,
en ilácagaca zxíꞌini cazëꞌ Dios.
37 Ca naꞌ ral-laꞌ uluꞌbán nupa chinátigaca,
ruluíꞌinëꞌ rëꞌu Moisés caz ga naꞌ nazúaj lu guichi ca naca que yaga yötsiꞌ régui,
ga niꞌ ruꞌë didzaꞌ Xanruꞌ,
rnnëꞌ náquiëꞌ Dios queëꞌ Abraham,
en Dios queëꞌ Isaac,
en Dios queëꞌ Jacob.
38 Dios náquiëꞌ Dios,
calëga quégaca nupa nátigaca tsaz,
pero quégaca nupa nabángaca,
tuꞌ nabángaca lahuëꞌ Lëꞌ yúguꞌtë bönachi,
sal-laꞌ gulati luyú ni.
39 Níꞌirö buluꞌbiꞌë didzaꞌ bal-lëꞌ bönniꞌ yudoꞌ usedi,
taꞌnnë́ꞌ:
―Bönniꞌ Usedi,
dxíꞌadoꞌ gunnóꞌ.
40 Bítiꞌrö buluꞌrúguinëꞌ ilaꞌnábinëꞌ Lëꞌ didzaꞌ.
¿Nuzxi zxíꞌini náquiëꞌ Cristo?
41 Níꞌirö Jesús rëꞌ légaquiëꞌ:
―¿Nacxi caz naꞌ taꞌnnë́ꞌ:
“Cristo náquiëꞌ zxíꞌinëꞌ David”?
42 David caz bëꞌë didzaꞌ le nazúaj lu guichi láꞌayi ga nazúajgaca salmo,
le rnna:
Xanruꞌ Dios gudxëꞌ Xanaꞌ:
“Guröꞌi cuita lëꞌa ibëla
43 cateꞌ gunraꞌ ga uluꞌzechu zxíbigaca loꞌ nupa taꞌdáꞌbagaꞌ Liꞌ.”
44 David caz naꞌ gunnë́ꞌ queëꞌ náquiëꞌ Xanëꞌ.
¿Nacxi caz naca,
rnnaliꞌ libíꞌiliꞌ náquiëꞌ zxíꞌinëꞌ?
Jesús ruzéguiꞌë dizaꞌ bönniꞌ yudoꞌ tuꞌsédinëꞌ
45 Tsanni niꞌ yúguꞌtë bönachi nacuáꞌ niꞌ tuꞌzë́ nágagaca Jesús,
rëꞌ yuguꞌ bönniꞌ usëda queëꞌ:
46 ―Guliꞌgún chiꞌi cuinliꞌ quégaquiëꞌ bönniꞌ yudoꞌ tuꞌsédinëꞌ,
tuꞌ taꞌyaza ládxiꞌgaquiëꞌ taꞌdë́ꞌ nácugaquiëꞌ lariꞌ tunna,
en të́ꞌënnëꞌ uluꞌlidza bönachi légaquiëꞌ zxön gapa naca lu yë́ꞌëyi,
en taꞌyaza ládxiꞌgaquiëꞌ caꞌ taꞌböꞌë lataj lo gapa tuꞌdubëꞌ tuꞌsëdëꞌ queëꞌ Dios,
en gapa taꞌböꞌë tahuëꞌ.
47 Taꞌgǘëꞌ lídxigacanu nigula uzë́bidoꞌ,
ateꞌ para uluꞌluíꞌi tsahuiꞌ cuíngaquiëꞌ,
xidzé tuꞌlidzëꞌ Dios.
Yuguꞌ bönniꞌ ni,
yénniꞌtërö gunëꞌ Dios ga ilaꞌguíꞌi ilaꞌzáquiëꞌ.