Jesús rinábinëꞌ Dios gácalenëꞌ nupa dáꞌgaca Lëꞌ
17
Cateꞌ budxi bëꞌë Jesús yuguꞌ didzaꞌ ni,
guchisa lahuëꞌ,
ruyúëꞌ yehuaꞌ yubálö,
ateꞌ rnnëꞌ:
―Dios Xuz,
chibidxín dza.
Ben ga iláꞌ lahui yöl-laꞌ zxön quiaꞌ nedaꞌ,
Zxíꞌinuꞌ,
para gaca gunaꞌ ga iláꞌ lahui yöl-laꞌ zxön quiuꞌ Liꞌ.
2 Ben caní tuꞌ chinudöduꞌ lu naꞌa yöl-laꞌ unná bëꞌ para inná béꞌedaꞌ yúguꞌtë bönachi,
en guꞌa yöl-laꞌ naꞌbán idú quégaca yúguꞌtë nupa naꞌ chibennuꞌ quiaꞌ.
Jesús ora por sus seguidores (Juan 17.1-26)
3 Lë ni naca yöl-laꞌ naꞌbán idú naꞌ,
tuꞌ núnbëꞌgaquiëꞌ Liꞌ,
nacuꞌ laꞌs dui Dios idú,
en tuꞌ núnbëꞌgaquiëꞌ caꞌ nedaꞌ,
Jesucristo,
ateꞌ Liꞌ nasö́l-luꞌu nedaꞌ.
4 ’Nedaꞌ chibenaꞌ ga naláꞌ lahui yöl-laꞌ zxön quiuꞌ yödzölió ni,
en chibudxi benaꞌ dxin naꞌ budöduꞌ lu naꞌa.
5 Naꞌa,
Xuz,
ben ga iláꞌ lahui yöl-laꞌ zxön napaꞌ tsözxö́n len Liꞌ,
para gaca quiaꞌ yöl-laꞌ zxön gutaꞌ quiaꞌ tsözxö́n len Liꞌ dza niꞌte quez cateꞌ siꞌ gataꞌ yödzölió.
6 ’Chibuluꞌa lahui le nacuꞌ Liꞌ lógaquiëꞌ bönniꞌ ni bennuꞌ quiaꞌ,
nupa naꞌ gurö́ cazuꞌ Liꞌ ladaj bönachi yödzölió.
Guléquinëꞌ bönniꞌ ni quiuꞌ,
ateꞌ bénnagacuꞌ-nëꞌ quiaꞌ,
ateꞌ tunëꞌ ca rnna xtídzuꞌu.
7 Naꞌa nö́zguequinëꞌ yúguꞌtë lë naꞌ bennuꞌ quiaꞌ záꞌgaca lu noꞌo Liꞌ,
8 tuꞌ chibudödaꞌ lu náꞌagaquiëꞌ didzaꞌ naꞌ budöduꞌ Liꞌ lu naꞌa nedaꞌ,
ateꞌ légaquiëꞌ nazíꞌ lu náꞌagaquiëꞌ le,
en téquibeꞌenëꞌ birúajaꞌ ga zuꞌ Liꞌ,
ateꞌ taꞌyéajlëꞌë Liꞌ nasö́l-luꞌu nedaꞌ.
9 ’Nedaꞌ rátaꞌyuaꞌ Loꞌ gácalenuꞌ légaquiëꞌ.
Rátaꞌyuaꞌ Loꞌ,
calëga gácalenuꞌ yúguꞌtë bönachi yödzölió,
pero gácalengacuꞌ-nëꞌ bönniꞌ ni chibénnagacuꞌ-nëꞌ quiaꞌ,
tuꞌ néquiguequinëꞌ quiuꞌ.
10 Yúguꞌtë nupa néquiguequi quiaꞌ néquiguequi caꞌ quiuꞌ,
ateꞌ nupa naꞌ néquiguequi quiuꞌ néquiguequi caꞌ quiaꞌ,
ateꞌ ca nácagaca nupa naꞌ ruluíꞌi lahui yöl-laꞌ zxön quiaꞌ.
11 ’Naꞌa,
bítiꞌrö ugáꞌanaꞌ yödzölió ni,
pero yuguꞌ bönniꞌ ni uluꞌgáꞌanëꞌ yödzölió,
ateꞌ nedaꞌ udusóalenaꞌ Liꞌ.
Xuz Láꞌayi,
len yöl-laꞌ huáca quiuꞌ ben chiꞌi nupa ni chibennuꞌ quiaꞌ,
para ilácagaca tuz,
ca naꞌ nácaruꞌ rëꞌu tuz.
12 Cateꞌ niꞌ guzóalenaꞌ légaquiëꞌ yödzölió ni,
ben chíꞌigacaꞌ-nëꞌ,
bugunaꞌ dxin yöl-laꞌ huáca naꞌ bennuꞌ quiaꞌ.
Nupa naꞌ bennuꞌ quiaꞌ,
ben chíꞌigacaꞌ-nëꞌ,
ateꞌ nitúëꞌ bitiꞌ bunítiaꞌ-nëꞌ,
pero tuzëꞌ bönniꞌ naꞌ náquiëꞌ ca zxíꞌini tuꞌ xihuiꞌ,
en narugu queëꞌ gátiëꞌ tsaz.
Caní raca ca nazúaj lu guichi láꞌayi.
13 ’Naꞌa udusóalenaꞌ Liꞌ,
ateꞌ tsanni ni zoaꞌ yödzölió ni,
ruáꞌa yuguꞌ didzaꞌ ni para gaca idú yöl-laꞌ rudzeja quégaquiëꞌ ca naꞌ raca quiaꞌ nedaꞌ yöl-laꞌ rudzeja.
14 Nedaꞌ chibudödaꞌ lu náꞌagaquiëꞌ xtídzuꞌu,
ateꞌ bönachi yödzölió ni tuꞌzóa légaquiëꞌ tsöláꞌalö tuꞌ cabí nácagaquiëꞌ tuz len léguequi,
ca naꞌ naca quiaꞌ nedaꞌ,
bitiꞌ nacaꞌ tuz len bönachi yödzölió ni.
15 Rátaꞌyuaꞌ Loꞌ,
calëga cúagacuꞌ-nëꞌ yödzölió ni,
pero gun chíꞌigacuꞌ-nëꞌ,
para cabí ilaꞌdzunëꞌ lu naꞌ tuꞌ xihuiꞌ.
16 Bitiꞌ nácagaquiëꞌ tuz len bönachi yödzölió ni ca naꞌ naca quiaꞌ nedaꞌ,
bitiꞌ nacaꞌ tuz len bönachi yödzölió.
17 Guléaj quez quiuꞌ légaquiëꞌ,
ugunuꞌ dxin le naca idútë li.
Le naca idútë li naꞌ naca xtídzuꞌu.
18 Ca naꞌ benuꞌ Liꞌ,
gusö́l-luꞌu nedaꞌ ladaj bönachi yödzölió ni,
lëscaꞌ caní runaꞌ nedaꞌ,
risö́l-laꞌgacaꞌ-nëꞌ ladaj bönachi yödzölió.
19 Tuꞌ nadxíꞌigacadaꞌ-nëꞌ rudödi cuinaꞌ quiuꞌ,
para uluꞌrúajëꞌ caꞌ légaquiëꞌ quez quiuꞌ tuꞌ nazíꞌ lu náꞌagaquiëꞌ le naca idútë li.
20 ’Rátaꞌyuaꞌ Loꞌ,
calëga quégacasëꞌ bönniꞌ ni,
pero lëscaꞌ quégaquiëꞌ bönniꞌ niꞌ ilaꞌyéajlëꞌë nedaꞌ niꞌa que didzaꞌ iluꞌë bönniꞌ ni.
21 Rátaꞌyuaꞌ Loꞌ gunuꞌ ga ilácagaquiëꞌ tuz yúguꞌtëꞌ,
en ilácagaquiëꞌ caꞌ tuz len rëꞌu,
ca naꞌ nacuꞌ Liꞌ,
Xuzaꞌ,
nacuꞌ tuz len nedaꞌ,
ateꞌ nedaꞌ caꞌ,
nacaꞌ tuz len Liꞌ.
Caní ral-laꞌ ilácagaquiëꞌ para ilaꞌyéajlëꞌ iaꞌzícaꞌrö bönachi yödzölió ni,
Liꞌ caz gusö́l-luꞌu nedaꞌ.
22 Yöl-laꞌ zxön naꞌ bennuꞌ quiaꞌ,
nedaꞌ bëꞌa caꞌ quégaquiëꞌ,
para ilácagaquiëꞌ tuz,
ca naꞌ nácaruꞌ tuz rëꞌu.
23 Liꞌ nacuꞌ tuz len nedaꞌ,
ateꞌ nedaꞌ nacaꞌ tuz len légaquiëꞌ,
para gaca idú ca nácagaquiëꞌ tuz,
en caní iléquibeꞌe iaꞌzícaꞌrö bönachi yödzölió ni,
Liꞌ caz gusö́l-luꞌu nedaꞌ,
ateꞌ nadxíꞌigacanuꞌ-nëꞌ ca naꞌ nadxíꞌinuꞌ nedaꞌ.
24 ’Xúzaꞌdoꞌ,
rë́ꞌëndaꞌ ilaꞌcuáꞌlenëꞌ nedaꞌ bönniꞌ ni bénnagacuꞌ-nëꞌ quiaꞌ ga naꞌ tsöjsóaꞌ,
para ilaꞌléꞌenëꞌ yöl-laꞌ zxön naꞌ bennuꞌ quiaꞌ dza niꞌte cateꞌ siꞌ gunuꞌ yödzölió tuꞌ nadxíꞌinuꞌ nedaꞌ.
25 Xuzaꞌ tsahuiꞌ,
bönachi yödzölió ni bitiꞌ núnbëꞌgaca Liꞌ,
pero nedaꞌ nunbëꞌ cazaꞌ Liꞌ,
ateꞌ yuguꞌ bönniꞌ ni chinö́ziguequinëꞌ Liꞌ caz gusö́l-luꞌu nedaꞌ.
26 Benaꞌ ga nö́ziguequinëꞌ le nacuꞌ Liꞌ,
en gunraꞌ caꞌ ga ilaꞌnö́zinëꞌ lë ni para ca naꞌ nadxíꞌinuꞌ Liꞌ nedaꞌ,
lëscaꞌ caní ilaꞌdxíꞌi luzáꞌagaquiëꞌ,
ateꞌ gaca cazaꞌ tuz len légaquiëꞌ.