16
Gunnë́ꞌ caꞌ Jesús:
―Yuguꞌ didzaꞌ ni chigudxaꞌ libíꞌiliꞌ,
para cabí gaca chopa ládxiꞌliꞌ.
2 Yuguꞌ bönniꞌ judío uluꞌbéajëꞌ libíꞌiliꞌ tsaz ga tuꞌdubëꞌ tuꞌsëdëꞌ queëꞌ Dios,
ateꞌ idxín dza cateꞌ nu bönniꞌ gútiëꞌ libíꞌiliꞌ guéquinëꞌ dxin queëꞌ Dios runëꞌ.
3 Caní ilunëꞌ,
tuꞌ cabí núnbëꞌgaquiëꞌ Dios Xuz,
en cabí núnbëꞌgaquiëꞌ nedaꞌ.
4 Reaꞌ libíꞌiliꞌ yuguꞌ didzaꞌ ni,
para cateꞌ idxín dza naꞌ,
tsöjnéliꞌ didzaꞌ ni chigudxi cazaꞌ libíꞌiliꞌ.
Le gunëꞌ Dios Böꞌ Láꞌayi
Gunnë́ꞌ caꞌ Jesús:
―Yuguꞌ didzaꞌ ni bitiꞌ gudxaꞌ libíꞌiliꞌ dza niꞌte,
tuꞌ niꞌ zóalen cazaꞌ libíꞌiliꞌ.
5 Naꞌa huöjaꞌ,
tsöjsóalenaꞌ-nëꞌ Dios Xuz,
nasö́l-lëꞌë nedaꞌ.
Bitiꞌ inábiliꞌ nedaꞌ nituliꞌ libíꞌiliꞌ,
bitiꞌ innaliꞌ:
¿Gazxi tsejuꞌ?
Más enseñanza sobre el Espíritu Santo (Juan 16.5-33)
6 Naꞌa,
tuꞌ reaꞌ libíꞌiliꞌ yuguꞌ didzaꞌ ni,
risëbi ládxiꞌliꞌ.
7 Nedaꞌ reaꞌ libíꞌiliꞌ le naca idútë li.
Gácarö dxiꞌa queë́liꞌ huöjaꞌ,
tuꞌ channö cabí huöjaꞌ,
bitiꞌ idisóalenëꞌ Dios Böꞌ Láꞌayi libíꞌiliꞌ,
Bönniꞌ naꞌ gácalenëꞌ libíꞌiliꞌ,
en utipëꞌ ládxiꞌliꞌ,
pero channö huöjaꞌ,
isö́l-laꞌa-nëꞌ,
naꞌ idisóalenëꞌ libíꞌiliꞌ.
8 Cateꞌ guídëꞌ Lëꞌ,
gunëꞌ ga iléquibeꞌe bönachi yödzölió ni nabágaꞌgaca dul-laꞌ,
en bitiꞌ núnbëꞌgaca le naca tsahuiꞌ,
ateꞌ ichúguiëꞌ Dios quéguequi ilátigaca.
9 Nabágaꞌgaquiëꞌ dul-laꞌ tuꞌ cabí taꞌyéajlëꞌë nedaꞌ.
10 Bitiꞌ núnbëꞌgaquiëꞌ le naca tsahuiꞌ tuꞌ ilútiëꞌ nedaꞌ,
ateꞌ huöjaꞌ ga zoëꞌ Dios Xuz,
Bönniꞌ naꞌ náquiëꞌ tsahuiꞌ,
ateꞌ bítiꞌrö ilaꞌléꞌenëꞌ nedaꞌ.
11 Ichúguiëꞌ Dios quégaquiëꞌ ilátiëꞌ tuꞌ chiguchúguiëꞌ que tuꞌ xihuiꞌ nu rinná beꞌe bönachi yödzölió ni.
12 ’Iaꞌzicaꞌ zián didzaꞌ rë́ꞌëndaꞌ güíꞌilenaꞌ libíꞌiliꞌ,
pero bitiꞌ gaca tséajniꞌiliꞌ naꞌa.
13 Cateꞌ guídëꞌ Dios Böꞌ Láꞌayi,
Bönniꞌ naꞌ ruꞌë didzaꞌ idútë li,
Lëꞌ usedinëꞌ libíꞌiliꞌ yúguꞌtë le naca idútë li naꞌ,
tuꞌ cabí guꞌë didzaꞌ rácasö queëꞌ,
pero guꞌë yúguꞌtë didzaꞌ naꞌ yönnëꞌ ruꞌë Xuzaꞌ,
en gunëꞌ ga inö́ziliꞌ yúguꞌtë le ral-laꞌ gaca.
14 Lëꞌ gunëꞌ nedaꞌ bal,
tuꞌ siꞌë le nequi quiaꞌ,
en gunëꞌ ga inö́ziliꞌ le.
15 Yúguꞌtë le nequi queëꞌ Dios Xuz nequi quiaꞌ.
Que lë ni naꞌ gunníaꞌ siꞌë le nequi quiaꞌ,
en gunëꞌ ga inö́ziliꞌ le.
Yöl-laꞌ risëbi ladxiꞌ queë́liꞌ huöáca yöl-laꞌ rudzeja
16 Gunnë́ꞌ caꞌ Jesús:
―Yetú chíꞌidoꞌosö,
en bítiꞌrö iléꞌeliꞌ nedaꞌ,
ateꞌ iaꞌtú chíꞌidoꞌosö caꞌ uléꞌeliꞌ nedaꞌ,
tuꞌ huöjaꞌ ga zoëꞌ Dios Xuz.
17 Níꞌirö bönniꞌ usëda queëꞌ gulë́ luzáꞌagaquiëꞌ tuëꞌ iaꞌtúëꞌ,
taꞌnnë́ꞌ:
―¿Bizxi rnna didzaꞌ ni rëꞌ rëꞌu?
Rnnëꞌ:
“Iaꞌtú chíꞌidoꞌosö,
en bítiꞌrö iléꞌeliꞌ nedaꞌ,
ateꞌ iaꞌtú chíꞌidoꞌosö caꞌ uléꞌeliꞌ nedaꞌ,
en naca tuꞌ huöjaꞌ ga zoëꞌ Dios Xuz.”
18 Níꞌirö gulaꞌnnë́ꞌ:
―¿Bizxi caz rë́ꞌëni inná didzaꞌ ni,
gunnë́ꞌ:
“Iaꞌtú chíꞌidoꞌosö”?
Bitiꞌ réajniꞌituꞌ didzaꞌ ni ruꞌë.
19 Réquibeꞌenëꞌ Jesús të́ꞌënnëꞌ ilaꞌnábinëꞌ Lëꞌ,
ateꞌ rëꞌ légaquiëꞌ:
―¿Naruꞌ rinábitsö luzáꞌaliꞌ ca naca que didzaꞌ naꞌ bëꞌa,
gunníaꞌ:
Iaꞌtú chíꞌidoꞌosö,
en bítiꞌrö iléꞌeliꞌ nedaꞌ,
ateꞌ iaꞌtú chíꞌidoꞌosö caꞌ uléꞌeliꞌ nedaꞌ?
20 Le nácatë reaꞌ libíꞌiliꞌ:
Cö́dxiliꞌ,
en isëbi ládxiꞌliꞌ,
pero bönachi yödzölió ni uluꞌdzeja cateꞌ iluti nedaꞌ.
Níꞌirö sal-laꞌ isëbi ládxiꞌliꞌ,
yöl-laꞌ risëbi ladxiꞌ queë́liꞌ huöáca yöl-laꞌ rudzeja cateꞌ uléꞌeliꞌ nedaꞌ.
21 Tu nigula cateꞌ chizóa gáljabiꞌ bíꞌidoꞌ queë́nu,
riguíꞌi rizácaꞌnu,
tuꞌ chibidxín dza queë́nu,
pero cateꞌ chizóabiꞌ tubiꞌ biꞌi bö́nniꞌdoꞌ queë́nu,
bítiꞌrö röjnenu lë naꞌ butságanu,
tuꞌ rudzéjanu tuꞌ chigúlajbiꞌ tubiꞌ biꞌi bö́nniꞌdoꞌ yödzölió ni.
22 Lëscaꞌ caní raca queë́liꞌ,
risëbi ládxiꞌliꞌ naꞌa,
pero huödaꞌ uduyúaꞌ libíꞌiliꞌ,
ateꞌ níꞌirö udzeja ládxiꞌliꞌ,
ateꞌ bitiꞌ séquiꞌnëꞌ nu bönniꞌ ugǘëꞌ yöl-laꞌ rudzeja queë́liꞌ naꞌ.
23 ’Dza níꞌirö bitiꞌ bi inábiliꞌ nedaꞌ.
Le nácatë reaꞌ libíꞌiliꞌ:
Yúguꞌtë le inábiliꞌ Dios Xuz,
en ugunliꞌ dxin Laꞌ nedaꞌ,
Lëꞌ gunnëꞌ queë́liꞌ.
24 Ga ridxintë naꞌa dza bitiꞌ rugunliꞌ dxin Laꞌ nedaꞌ cateꞌ bi rinábiliꞌ-nëꞌ Dios Xuz.
Guliꞌnaba caní,
ateꞌ idéliꞌliꞌ lë naꞌ inábaliꞌ,
para gaca idú yöl-laꞌ rudzeja queë́liꞌ.
Ridéliꞌnëꞌ Jesucristo lu le raca yödzölió ni
25 Gunnë́ꞌ caꞌ Jesús:
―Yuguꞌ lë naꞌ chibë́ꞌlenaꞌ libíꞌiliꞌ didzaꞌ bucúdzuꞌa didzaꞌ.
Huadxín dza cateꞌ bítiꞌrö güíꞌilenaꞌ libíꞌiliꞌ didzaꞌ le rucúdzuꞌa didzaꞌ,
pero yálajdoꞌ güíꞌilenaꞌ libíꞌiliꞌ didzaꞌ ca naca queëꞌ Dios Xuz.
26,27 Dza naꞌ inábiliꞌ-nëꞌ Dios, en ugunliꞌ dxin Laꞌ nedaꞌ, ateꞌ reaꞌ libíꞌiliꞌ, bitiꞌ gun bayudxi gátaꞌyuaꞌ lahuëꞌ Dios Xuz uláz queë́liꞌ, tuꞌ nadxíꞌinëꞌ Lë cazëꞌ Dios Xuz libíꞌiliꞌ. Nadxíꞌinëꞌ libíꞌiliꞌ tuꞌ nadxíꞌiliꞌ nedaꞌ, en réajlëꞌëliꞌ birúajaꞌ ga zoëꞌ Dios. 28 Birúajaꞌ ga zoëꞌ Dios Xuz,
en bidxinaꞌ yödzölió ni.
Iaꞌtú caꞌ,
ucáꞌanaꞌ yödzölió ni,
ateꞌ huöjaꞌ ga zoëꞌ Dios Xuz.
29 Níꞌirö yuguꞌ bönniꞌ usëda queëꞌ gulë́ꞌ Lëꞌ,
taꞌnnë́ꞌ:
―Naꞌa ruꞌu didzaꞌ yálajdoꞌ,
en bítiꞌrö rucúdzuꞌu didzaꞌ.
30 Naꞌa réquibeꞌetuꞌ nöz quézinuꞌ Liꞌ yúguꞌtë,
en bitiꞌ run bayudxi nu bi inabi yudxi Liꞌ,
tuꞌ riguíxjöiꞌinuꞌ netuꞌ le siꞌ inábatuꞌ.
Que lë ni naꞌ réajlëꞌëtuꞌ birúajuꞌ ga zoëꞌ Dios.
31 Bubiꞌë didzaꞌ Jesús,
rëꞌ légaquiëꞌ:
―¿Naruꞌ réajlëꞌtsaliꞌ nedaꞌ naꞌa?
32 Buliꞌyú,
huadxín dza,
en chiridxín dza naꞌ,
cateꞌ gásilasiliꞌ que queë́liꞌ,
en ucáꞌanaliꞌ nedaꞌ tuzaꞌ,
pero bitiꞌ soaꞌ tuzaꞌ,
tuꞌ zóalen cazëꞌ Dios Xuz nedaꞌ.
33 Yuguꞌ didzaꞌ ni chigudxaꞌ libíꞌiliꞌ para cuéqui dxi ládxiꞌliꞌ,
tuꞌ nácaliꞌ quiaꞌ nedaꞌ.
Lu yödzölió ni gaca queë́liꞌ le usacaꞌ ziꞌ libíꞌiliꞌ,
pero buliꞌtipa ládxiꞌliꞌ.
Nedaꞌ chibidéliꞌdaꞌ lu le raca yödzölió ni.