Rë́ꞌëni Satanás tuꞌ xihuiꞌ ibagaꞌ Jesús dul-laꞌ
4
Níꞌirö laꞌ guchëꞌtëꞌ Dios Böꞌ Láꞌayi Jesús lu lataj cáꞌasö para gataꞌ lataj siꞌ bëꞌ Satanás tuꞌ xihuiꞌ Lëꞌ.
2 Idú choáꞌ dza choáꞌ yëla bitiꞌ bi gudahuëꞌ Jesús,
ateꞌ gudödi niꞌ ridunëꞌ.
3 Níꞌirö tuꞌ xihuiꞌ,
nu naꞌ run ga táꞌbagaꞌ bönachi dul-laꞌ,
bidxín ga zoëꞌ Jesús,
en rë Lëꞌ:
―Channö nacuꞌ idú Zxíꞌinëꞌ Dios,
gunná naꞌa uluꞌhuöáca guiö́j nacuáꞌ ni yöta xtila.
4 Bubiꞌë didzaꞌ Jesús,
rëꞌ le:
―Nazúaj lu guichi láꞌayi le rnna:
“Calë́gasö yöta xtila nabánigaca bönachi,
pero lëscaꞌ yúguꞌtë didzaꞌ ruꞌë Dios nabánigaca bönachi.”
5 Níꞌirö tuꞌ xihuiꞌ guchë́ꞌ Jesús lu yödzö láꞌayi Jerusalén,
ateꞌ budxía Lëꞌ ga naca xitsáꞌ ícjoꞌolö yudoꞌ.
6 Níꞌirö tuꞌ xihuiꞌ rë Lëꞌ,
rnna:
―Channö nacuꞌ Liꞌ idú Zxíꞌinëꞌ Dios,
busuladzuꞌ cuinuꞌ ni,
tuꞌ nazúaj lu guichi láꞌayi le rnna:
Dios isö́l-lëꞌë gubáz láꞌayi queëꞌ para ilún chiꞌë Liꞌ,
ateꞌ uluꞌchisëꞌ Liꞌ lu náꞌagaquiëꞌ,
para cabí tsöjchéguꞌu guiö́j,
en cabí gunuꞌ ziꞌ niꞌu.
7 Bubiꞌë didzaꞌ Jesús,
rëꞌ le:
―Iaꞌstú nazúaj lu guichi láꞌayi,
le rë bönachi,
rnna:
“Bitiꞌ ugunuꞌ dxin Xanuꞌ Dios.”
8 Níꞌirö tuꞌ xihuiꞌ guchë́ꞌ Jesús ga naca tu lu guíꞌa sibi,
ateꞌ niꞌ buluíꞌi Lëꞌ yúguꞌtë yödzö nacuáꞌ yödzölió ni,
en yúguꞌtë yöl-laꞌ tsahuiꞌ quéguequi.
9 Níꞌirö rë Lëꞌ:
―Yúguꞌtë lë ni udödaꞌ lu noꞌo channö uzóa zxibuꞌ lahuaꞌ,
en gunuꞌ nedaꞌ zxön.
10 Jesús rëꞌ le:
―Böaj quiuꞌ liꞌ,
Satanás tuꞌ xihuiꞌ,
tuꞌ nazúaj lu guichi láꞌayi le rë netuꞌ,
rnna:
“Xanuꞌ Dios tseaj ládxuꞌu,
en udödi cuinuꞌ lu naꞌ tuzëꞌ Lëꞌ.”
11 Níꞌirö buzáꞌ Satanás tuꞌ xihuiꞌ ga naꞌ zoëꞌ Jesús,
ateꞌ gubáz láꞌayi queëꞌ Dios bilaꞌdxinëꞌ ga zoëꞌ,
en gulácalenëꞌ Lëꞌ,
en gulaꞌguꞌë le gudahuëꞌ.
Risí lahuëꞌ Jesús runëꞌ libán luyú Galilea
12 Cateꞌ biyönnëꞌ Jesús nadzunëꞌ Juan lidxi guíë,
guyijëꞌ luyú Galilea.
13 Buzë́ꞌë yödzö Nazaret,
ateꞌ yöjsóëꞌ lu yödzö Capernaum ga naca raꞌ nísadoꞌ,
lu buzáꞌ quégaca bönachi Zabulón,
en bönachi Neftalí.
14 Caní guca,
bidxín lë naꞌ gunnë́ꞌ Isaías,
bönniꞌ bëꞌë didzaꞌ uláz queëꞌ Dios,
gunnë́ꞌ:
15 Luyú Zabulón,
en luyú Neftalí,
laꞌ nöza raꞌ nísadoꞌ iaꞌtsöláꞌa yegu Jordán sacaꞌ ga rilén gubidza.
Luyú Galilea,
ga nacuáꞌ bönachi bitiꞌ nácagaca judío.
16 Bönachi chul-la niti niꞌ bilaꞌléꞌe beníꞌ,
ateꞌ bönniꞌ niꞌ nácagaquiëꞌ ca nupa chinátigaca,
gulén quégaquiëꞌ beníꞌ.
17 Cateꞌ níꞌirö gusí lahuëꞌ Jesús runëꞌ libán,
en rëꞌ bönachi niꞌ:
―Buliꞌbíꞌi ládxiꞌliꞌ,
tuꞌ chizóa idxín dza idinná bëꞌ Nu naꞌ zoa yehuaꞌ yubá luyú ni.
Jesús rulidzëꞌ tapëꞌ bönniꞌ uzxö́n böla para tsöjtáꞌgaquiëꞌ Lëꞌ
18 Cateꞌ gudë́ꞌ Jesús raꞌ nísadoꞌ que Galilea,
biléꞌenëꞌ chopëꞌ bönniꞌ.
Tuëꞌ lëꞌ Simón,
en zoa iaꞌtú lëꞌ Pedro,
ateꞌ dzáguiëꞌ Andrés,
bönniꞌ bö́chëꞌë,
lëꞌ.
Chopëꞌ ni taꞌchiljëꞌ yöxaj böla quégaquiëꞌ lu nísadoꞌ naꞌ tuꞌ nácagaquiëꞌ uzxö́n böla.
19 Jesús rëꞌ légaquiëꞌ:
―Guliꞌdutáꞌ nedaꞌ,
ateꞌ gunaꞌ ga ichë́ꞌëliꞌ bönachi quiaꞌ,
gunliꞌ ca runliꞌ rizönliꞌ-baꞌ böla.
20 Chopëꞌ ni laꞌ buluꞌcáꞌanatëꞌ yuguꞌ yöxaj böla quégaquiëꞌ,
ateꞌ söjácalenëꞌ Jesús.
21 Cateꞌ gudödëꞌ Jesús iaꞌlatiꞌ níꞌilö,
biléꞌenëꞌ iaꞌchopëꞌ bönniꞌ.
Tuëꞌ lëꞌ Jacobo,
ateꞌ dzáguiëꞌ Juan,
bönniꞌ bö́chëꞌë lëꞌ.
Nácagaquiëꞌ zxíꞌinëꞌ Zebedeo.
Nacuꞌë lëꞌe bárcodoꞌ dzágagaquiëꞌ Zebedeo,
xúzgaquiëꞌ,
en tuꞌúnëꞌ yöxaj böla quégaquiëꞌ.
Níꞌirö Jesús bulidzëꞌ chopëꞌ ni para tsöjtáꞌgaquiëꞌ Lëꞌ.
22 Laꞌ buluꞌcáꞌanatëꞌ bárcodoꞌ naꞌ,
encaꞌ xúzgaquiëꞌ,
ateꞌ söjácalenëꞌ Jesús.
Jesús rusédinëꞌ bönachi zián
23 Gudë́ꞌ Jesús idú luyú Galilea,
rusédinëꞌ bönachi gapa naca lu yuꞌu ga tuꞌdubëꞌ bönniꞌ judío,
en tuꞌsëdëꞌ queëꞌ Dios.
Benëꞌ libán niꞌ que didzaꞌ dxiꞌa ca siꞌ idinná bëꞌë Dios luyú niꞌ,
en bunëꞌ yúguꞌtë nupa teꞌe tsca naca yödzöhuë́ꞌ téꞌeguequi.
24 Guzë́ didzaꞌ que yöl-laꞌ huáca queëꞌ Jesús,
ateꞌ bilaꞌyöni bönachi idú luyú Siria,
ateꞌ dujuáꞌgaquiëꞌ yúguꞌtë bönniꞌ téꞌenëꞌ zián yödzöhuë́ꞌ que queë́gaquiëꞌ,
en taꞌguíꞌi taꞌzaquiëꞌ,
ga zoëꞌ Jesús.
Dujuáꞌgaquiëꞌ caꞌ yuguꞌ bönniꞌ yúꞌugaquiëꞌ böꞌ xihuiꞌ,
en yuguꞌ bönniꞌ téꞌenëꞌ huëꞌ xjoteꞌ,
en yuguꞌ bönniꞌ nacúꞌunigaquiëꞌ bin niꞌa náꞌagaquiëꞌ,
ateꞌ Jesús bunëꞌ yúguꞌtë bönniꞌ naꞌ.
25 Bönachi zián bilaꞌrúajgaca luyú Galilea,
en yuguꞌ yödzö Decápolis,
en yödzö Jerusalén,
encaꞌ luyú Judea,
en yuguꞌ yödzö nacuáꞌ iaꞌtsöláꞌalö yegu Jordán sacaꞌ ga rilén gubidza,
ateꞌ röjácalen Jesús.