Le guca cateꞌ gúlajbiꞌ Jesús
2
Lu dza naꞌ gunná bëꞌë Augusto César,
bönniꞌ Roma,
ilaꞌyaza lu guichi yúguꞌtë bönachi nacuáꞌ yödzölió.
San Lucas 2:1-24
2 Cateꞌ gusí lo taꞌyaza lu guichi caní,
rinná bëꞌë bönniꞌ lëꞌ Cirenio luyú Siria.
3 Yúguꞌtë bönachi yöjaca yödzö que queë́guequi ga naꞌ zeaj nababa para ilaꞌyaza lu guichi.
4 Guzë́ꞌë José yödzö Nazaret luyú Galilea,
saꞌyéajëꞌ luyú Judea,
en bidxinëꞌ yödzö Belén,
ga niꞌ guljëꞌ David,
tuꞌ guljëꞌ José ládajgaca diꞌa dza queëꞌ David naꞌ.
5 Guyijëꞌ José niꞌ para tsáziëꞌ lu guichi,
ateꞌ dzágabiꞌ-nëꞌ María,
biꞌi nigula nazíꞌ lu náꞌabiꞌ utsaga náꞌalenbiꞌ lëꞌ,
en chizóa sóabiꞌ bíꞌidoꞌ queë́biꞌ.
6 Cateꞌ niꞌ nacuꞌë lu yödzö Belén,
bidxín dza sóabiꞌ bíꞌidoꞌ queë́biꞌ.
7 Buzóanu-biꞌ tubiꞌ biꞌi bö́nniꞌdoꞌ,
biꞌi huáca queë́nu.
Buchö́linu-biꞌ yuguꞌ láriꞌdoꞌ,
ateꞌ gudíxjanu-biꞌ tu lu yúꞌudoꞌ ga tun chiꞌi le tágubaꞌ böaꞌ quégaca bönachi yúꞌugaca nöza.
Caní guca,
tuꞌ cabí bidzöli lataj ilaꞌcuꞌë lu yuꞌu ga niꞌ taꞌdxín bönachi yúꞌugaca nöza.
Tuꞌluíꞌi lahuëꞌ gubáz láꞌayi queëꞌ Dios ga nacuꞌë bönniꞌ tuꞌyúëꞌ-baꞌ böꞌcuꞌ zxilaꞌ
8 Galaꞌ raꞌ yödzö Belén nacuꞌë bönniꞌ tuꞌyúgaquiëꞌ-baꞌ böꞌcuꞌ zxilaꞌ laꞌ guixiꞌ,
tapa chíꞌigaquiëꞌ-baꞌ chiꞌi dzö́ꞌölö.
9 Laꞌ buluíꞌitë lahuëꞌ gubáz láꞌayi queëꞌ Xanruꞌ ga naꞌ nacuꞌë.
Yöl-laꞌ beníꞌ queëꞌ Xanruꞌ buzeníꞌ ga naꞌ nacuꞌë,
ateꞌ guládxinëꞌ.
10 Níꞌirö gubáz láꞌayi naꞌ gudxëꞌ légaquiëꞌ,
rnnëꞌ:
―Bitiꞌ gádxiliꞌ.
Naꞌa rusiyöndaꞌ libíꞌiliꞌ didzaꞌ le gun ga udzéjadeꞌeliꞌ,
le uluꞌzíꞌ caꞌ xibé yúguꞌtë bönachi.
11 Naꞌa chigúlajbiꞌ lu ladzëꞌ David Nu usölá libíꞌiliꞌ.
Nu ni naca Cristo,
Xanruꞌ.
12 Lë ni gaca bë́ꞌëbiꞌ.
Udzö́liliꞌ-biꞌ Bíꞌidoꞌ naꞌ,
narö́libiꞌ yuguꞌ láriꞌdoꞌ,
en dëbiꞌ tu lu yúꞌudoꞌ ga tun chiꞌi le tágubaꞌ böaꞌ quégaca bönachi yúꞌugaca nöza.
13 Ga naꞌ zoëꞌ gubáz láꞌayi naꞌ,
tsálidoꞌos buluꞌluíꞌi lógaquiëꞌ ziánrö caꞌ gubáz láꞌayi queëꞌ Dios,
narúajgaquiëꞌ yehuaꞌ yubá,
en taꞌguꞌë Dios yöl-laꞌ ba,
taꞌnnë́ꞌ:
14 ¡Yöl-laꞌ ba Dios zoëꞌ xitsáꞌ,
ateꞌ luyú gaca le cuéqui dxi ládxiꞌdoꞌgaquiëꞌ
bönniꞌ raza ládxëꞌë Dios légaquiëꞌ!
15 Cateꞌ buluꞌzë́ꞌë gubáz láꞌayi naꞌ ga niꞌ nacuꞌë,
söjhuö́jgaquiëꞌ yehuaꞌ yubá,
níꞌirö gulë́ luzë́ꞌë tuëꞌ iaꞌtúëꞌ bönniꞌ uyú böꞌcuꞌ zxilaꞌ naꞌ,
taꞌnnë́ꞌ:
―Uyéajtsöcaꞌruꞌ Belén para iléꞌeruꞌ lë ni chiguca ca naꞌ chibusiyönnëꞌ Xanruꞌ rëꞌu.
16 Laꞌ yöjácatiëꞌ,
ateꞌ yöjxácaꞌgaquiëꞌ María len José,
encaꞌ bíꞌidoꞌ naꞌ,
dëbiꞌ tu lu yúꞌudoꞌ ga tun chiꞌi le tágubaꞌ böaꞌ quégaca bönachi yúꞌugaca nöza.
17 Cateꞌ bilaꞌléꞌenëꞌ lëbiꞌ,
gulaꞌguíxjöꞌë lë naꞌ siꞌ busiyönnëꞌ gubáz láꞌayi naꞌ légaquiëꞌ ca naca queë́biꞌ bíꞌidoꞌ naꞌ.
18 Buluꞌbani yúguꞌtë nupa bilaꞌyöni didzaꞌ guluꞌë bönniꞌ tuꞌyúëꞌ böꞌcuꞌ zxilaꞌ naꞌ.
19 María gulúꞌusö icja náganu didzaꞌ ni,
ateꞌ guzáꞌ ládxiꞌnu ca naca que.
20 Söjhuö́jgaquiëꞌ bönniꞌ naꞌ tuꞌyúëꞌ-baꞌ böꞌcuꞌ zxilaꞌ,
tunëꞌ zxön Dios,
en taꞌguꞌë Lëꞌ yöl-laꞌ ba niꞌa que yúguꞌtë lë naꞌ bilaꞌyönnëꞌ,
en bilaꞌléꞌenëꞌ,
le guca ca naꞌ busiyönnëꞌ gubáz láꞌayi naꞌ légaquiëꞌ.
Taꞌguꞌë-biꞌ bíꞌidoꞌ Jesús lu nëꞌë Dios
21 Cateꞌ chiguca xunuꞌ dza zóabiꞌ bíꞌidoꞌ naꞌ,
gulaꞌchúguiëꞌ lu xipë́laꞌbiꞌ lë naꞌ naca bëꞌ néquibiꞌ queëꞌ Dios,
ateꞌ guluꞌë labiꞌ Jesús ca naꞌ chibë́ꞌ cazëꞌ labiꞌ gubáz láꞌayi naꞌ zíꞌalö cateꞌ siꞌ tsúꞌubiꞌ lë́ꞌënu xináꞌabiꞌ.
22 Cateꞌ chibizáꞌa dza que le tuꞌpáꞌa cuíngacanu nigula ca rinná bëꞌ xibá queëꞌ Moisés,
gulaꞌchë́ꞌë-biꞌ bíꞌidoꞌ Jesús yödzö Jerusalén para ilaꞌguꞌë-biꞌ lu nëꞌë Xanruꞌ Dios.
23 Caní gulunëꞌ,
tuꞌ nazúaj lu guichi lu xibá queëꞌ Xanruꞌ le rnna:
“Yúguꞌtëbiꞌ biꞌi bö́nniꞌdoꞌ nácagacabiꞌ biꞌi zíꞌalö queë́nu xináꞌagacabiꞌ,
uluꞌbéajëꞌ-biꞌ quez queëꞌ Xanruꞌ Dios.”
24 Que lë ni naꞌ yöjáquiëꞌ niꞌ para ilútiëꞌ-baꞌ,
en ilaꞌgúꞌë-baꞌ lahuëꞌ Dios chópabaꞌ gúgudoꞌ o chópabaꞌ budöduꞌ ca naꞌ rinná bëꞌ xibá queëꞌ Xanruꞌ Dios.
25 Dza níꞌisö zoëꞌ tu bönniꞌ lëꞌ Simeón lu yödzö Jerusalén.
Bönniꞌ ni náquiëꞌ tsahuiꞌ,
en reaj ládxëꞌë Dios.
Ribözëꞌ Bönniꞌ naꞌ isö́l-lëꞌë Dios,
Bönniꞌ naꞌ gácalenëꞌ bönachi Israel.
Dios Böꞌ Láꞌayi zóalenëꞌ Simeón naꞌ,
San Lucas 2:25-52
26 en chibuluíꞌinëꞌ lëꞌ bitiꞌ gátiëꞌ cateꞌ iléꞌerönëꞌ Cristo,
Bönniꞌ naꞌ isö́l-lëꞌë Xanruꞌ Dios.
27 Bidxinëꞌ Simeón naꞌ chila yudoꞌ tuꞌ guchë́ꞌë Dios Böꞌ Láꞌayi lëꞌ niꞌ.
Cateꞌ xuz xináꞌabiꞌ gulaꞌchë́ꞌë-biꞌ bíꞌidoꞌ Jesús chila yudoꞌ para ilunëꞌ queë́biꞌ ca rinná bëꞌ xibá naꞌ,
28 níꞌirö bunidëꞌ-biꞌ Simeón naꞌ,
en guyéaj ládxëꞌë Dios,
rnnëꞌ:
29 Xanaꞌ,
naꞌa huáca gunnuꞌ nedaꞌ lataj gátiaꞌ,
soa dxi ládxaꞌa
tuꞌ chiguca le gudxuꞌ nedaꞌ,
huen dxin quiuꞌ.
30 Chibiléꞌedaꞌ Nu naꞌ buzóa cazuꞌ,
Nu usölá bönachi,
31 Nu naꞌ ulúꞌu lahui lógaca yúguꞌtë bönachi.
32 Lëbiꞌ nácabiꞌ beníꞌ le uzeníꞌ bönachi izáꞌa,
en nácabiꞌ caꞌ beníꞌ quégaca bönachi Israel quiuꞌ.
33 Buluꞌbáninëꞌ José,
en María,
xináꞌabiꞌ bíꞌidoꞌ Jesús,
ca naca lë naꞌ gunnë́ꞌ Simeón ca naca queë́biꞌ Jesús.
34 Simeón naꞌ gunábinëꞌ Dios gunëꞌ ga gaca dxiꞌa quégaquiëꞌ,
ateꞌ gudxëꞌ-nu María,
xináꞌabiꞌ Jesús,
rnnëꞌ:
―Buyútsöcaꞌ.
Biꞌi ni nuzóëꞌ-biꞌ Dios para gunbiꞌ ga ilaꞌchixi bönachi zián,
ateꞌ uluꞌhuöása bönachi zián ladaj bönachi Israel.
Gácabiꞌ tu le naca bëꞌ,
ateꞌ ilaꞌnnë́ bönachi queë́biꞌ.
35 Gaca caní para ilaꞌláꞌ lahui le taꞌzáꞌ ládxiꞌgaca bönachi zián.
Yuguꞌ lë ni ilaca quiuꞌ ca tu guíë tuchiꞌ le tsaza ládxiꞌdoꞌo.
36 Ana,
nigula ruíꞌinu didzaꞌ uláz queëꞌ Dios,
zóanu caꞌ niꞌ.
Nácanu zxíꞌinëꞌ Fanuel,
bönniꞌ nababëꞌ diꞌa dza queëꞌ Aser.
Chinagúladaꞌanu Ana naꞌ,
tuꞌ guzóalennu bönniꞌ queë́nu idú gadxi iz gudödi gúcanu raꞌbandoꞌ,
37 ateꞌ bugáꞌananu tuzi cateꞌ bidxintë dza chiyúꞌunu idú ca tápalalaj yuꞌ tapa iz.
Bitiꞌ caꞌ rubíꞌi ruzáꞌanu ga naca chila yudoꞌ.
Rëla,
en te dza reaj ládxiꞌnu-nëꞌ Dios,
runnu gubasa,
en rulídzanu-nëꞌ Dios.
38 Laꞌ náꞌasö bidxíntënu niꞌ,
rënu-nëꞌ Dios:
“Xclenuꞌ.”
Gudíxjöiꞌinu yúguꞌtë bönachi ca naca queë́biꞌ bíꞌidoꞌ Jesús,
bönachi naꞌ nacuáꞌ Jerusalén,
nupa taꞌböza dza idxín Nu naꞌ isö́l-lëꞌë Dios para gácalen bönachi.
Söjhuö́jgaquiëꞌ José, en María yödzö Nazaret
39 Gudödi gulunëꞌ José,
en María yúguꞌtë le rinná bëꞌ xibá queëꞌ Xanruꞌ Dios,
yöjhuö́jgaquiëꞌ ládzagaquiëꞌ Nazaret luyú Galilea.
40 Guzxönbiꞌ bíꞌidoꞌ Jesús,
en bidipa ládxiꞌbiꞌ.
Gutaꞌ queë́biꞌ yöl-laꞌ réajniꞌi,
ateꞌ zxön naca le ruzáꞌ ládxëꞌë queë́biꞌ Dios.
Rudxinbiꞌ bíꞌidoꞌ Jesús chila yudoꞌ
41 Yuguꞌ iz röjáquiëꞌ xuz xináꞌabiꞌ Jesús Jerusalén cateꞌ raca Laní Pascua,
laní tuꞌsubanëꞌ bönniꞌ judío ca benëꞌ Dios,
bubéajëꞌ xuz xtóꞌogaquiëꞌ luyú Egipto.
42 Cateꞌ chiyúꞌubiꞌ chinnu iz biꞌi Jesús,
yöjáquiëꞌ Jerusalén ca tun cazëꞌ cateꞌ raca laní naꞌ.
43 Cateꞌ gudödi laní,
söjhuö́jgaquiëꞌ,
ateꞌ bugáꞌanabiꞌ bíꞌidoꞌ Jesús Jerusalén,
pero bitiꞌ téquibeꞌenëꞌ José,
en María,
xináꞌabiꞌ Jesús.
44 Tuꞌ téquinëꞌ nútsaꞌbiꞌ ladaj bönachi zián yúꞌulengaca légaquiëꞌ nöza,
tu dza nayáꞌ gulaꞌzë́ꞌë.
Níꞌirö cateꞌ buluꞌguiljëꞌ-biꞌ gapa nacuáꞌ diꞌa dza quégaquiëꞌ,
en gapa nacuáꞌ nupa núnbëꞌgaquiëꞌ
45 bitiꞌ buluꞌdzö́linëꞌ-biꞌ.
Que lë ni naꞌ yöjhuö́jgaquiëꞌ Jerusalén,
söjdíljagaquiëꞌ-biꞌ.
46 Cateꞌ chiguca dza bunni,
buluꞌdzö́linëꞌ-biꞌ ga naca chila yudoꞌ,
rö́ꞌöbiꞌ gatsaj láhuiꞌlëꞌ bönniꞌ yudoꞌ tuꞌsédinëꞌ.
Ruzë́ nágabiꞌ didzaꞌ tuꞌë,
en rinaba yúdxibiꞌ légaquiëꞌ.
47 Buluꞌbani yúguꞌtë nupa bilaꞌyöni didzaꞌ bë́ꞌëbiꞌ ca naca yöl-laꞌ réajniꞌi queë́biꞌ,
en ca nácagaca didzaꞌ bubíꞌibiꞌ.
48 Cateꞌ bilaꞌléꞌenëꞌ-biꞌ xuz xináꞌabiꞌ,
buluꞌbáninëꞌ,
ateꞌ gúdxinu-biꞌ xináꞌabiꞌ,
rnnanu:
―Zxiꞌinaꞌ,
¿bizx que benuꞌ caní queë́tuꞌ?
Buyútsöcaꞌ,
len yöl-laꞌ ruúbi ruguíꞌi nedaꞌ,
en xuzuꞌ buguíljatuꞌ liꞌ.
49 Níꞌirö gúdxibiꞌ Jesús légaquiëꞌ,
rnnabiꞌ:
―¿Bizx que buguíljaliꞌ nedaꞌ?
¿Naruꞌ cabí nö́ziliꞌ run bayudxi gunaꞌ xichinëꞌ Xuzaꞌ?
50 Bitiꞌ gulaꞌyéajniꞌinëꞌ xuz xináꞌabiꞌ didzaꞌ naꞌ gúdxibiꞌ légaquiëꞌ.