Beṉꞌkaꞌ shlliṉ jtix̱jeꞌgakeꞌ choꞌa xtillꞌ Chiozaꞌ
9
Naꞌ bitop Jesúzaꞌ beṉꞌkaꞌ shlliṉ, naꞌ biꞌe ḻegakeꞌ yeḻꞌ wak naꞌ yeḻꞌ wṉabiaꞌ kwenc̱he yibejgakeꞌ yogꞌḻoḻ dii x̱iwꞌkaꞌ yoo beṉꞌ naꞌ yiyongakeꞌ beṉꞌ cheꞌi yillweꞌ.
2 Naꞌ bseḻee ḻegakeꞌ kwenc̱he lljeꞌgakeꞌ dillꞌ ka nak yeḻꞌ wṉabiaꞌ c̱he Chiozaꞌ, naꞌ yiyongakeꞌ beṉꞌkaꞌ bi shaoꞌ.
3 Naꞌ chiꞌe ḻegakeꞌ:
―To ka chazlen ḻi shaj. Bi gox̱ꞌle yag bar, bi waꞌzle yix̱j ga koo xshinḻazle, bi waꞌle dii gaole, ni mech, naꞌ ni zi shkweꞌ xale.
4 Naꞌ yoonaꞌ ganaꞌ illinle, naꞌtezə soale ax̱t ka illinch lla yizaꞌle.
5 Naꞌ yellaꞌ ganaꞌ bi wlebgakeꞌ leꞌ, katꞌ yizaꞌle, yishible bishtenaꞌ llia ṉiꞌalekaꞌ kwenc̱he gakbeꞌgakileꞌ aga wenan chongakeꞌ bi chlebgakeꞌ choꞌa xtillꞌ Chiozaꞌ.
6 Naꞌch wzaꞌ beṉꞌkaꞌ nakgakeꞌneꞌ txen naꞌ wyajgakeꞌ to to yell wdix̱jeꞌgakeꞌ dillꞌ wen dillꞌ kob c̱he Chiozaꞌ naꞌ biyongakeꞌ beṉꞌkaꞌ bi shaoꞌ.
Wit Juannaꞌ, beenaꞌ bchoa beṉꞌ nisaꞌ
7 Heródezaꞌ, beenaꞌ wṉabiaꞌ ganaꞌ mbani Galileanaꞌ, benileꞌ yogꞌ daa chon Jesúzaꞌ. Naꞌ chakileꞌ nora beenaꞌ, ḻaꞌ baḻ beṉꞌ nagakeꞌ dii Juan wichoa nisanꞌ ba bibaneꞌ dii yoblə.
8 Naꞌ zi baḻeꞌ nagakeꞌ Elíazanꞌ ba bilaꞌ dii yoblə. Naꞌ zi baḻeꞌ nagakeꞌ nochodꞌ dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyin ba biban ladj beṉꞌ wetkaꞌ.
9 Naꞌ Heródezaꞌ wneꞌ:
―Nadꞌ benꞌ mandad wchog yen dii Juannaꞌ. ¿Noraz beenaꞌ chenzidꞌ nagakeꞌ chiya dii choneꞌ, lla?
Naꞌ ḻe goklallꞌ Heródezaꞌ ileꞌileꞌ Jesúzaꞌ.
Jesúzaꞌ bwaweꞌ gayaa mil beṉꞌ
10 Naꞌ ka billin postlkaꞌ shlliṉ, naꞌ gollgakeꞌ Jesúzaꞌ yogꞌḻoḻ diikaꞌ jengakeꞌ. Naꞌch bc̱hiꞌe to ḻezgakeꞌ yellaꞌ le Betsaida.
11 Naꞌ ka wṉezi beṉꞌkaꞌ ba zej Jesúzaꞌ, naꞌch wloogakeꞌ nez zjanogakeꞌneꞌ naꞌ ka bllingakeꞌ laweꞌnaꞌ, blebeꞌ ḻegakeꞌ naꞌ bzajniileꞌ ḻegakeꞌ ka nak yeḻꞌ wṉabiaꞌ c̱he Chiozaꞌ, naꞌ biyoneꞌ beṉꞌkaꞌ bi shaoꞌ.
12 Naꞌ ka ba wlleꞌ, beṉꞌkaꞌ shlliṉ jabigꞌgakeꞌ kwit Jesúzaꞌ naꞌ gollgakeꞌneꞌ:
―Goll beṉꞌki yiyajgakeꞌ yellkaꞌ wa no ranshdoꞌkaꞌ llia gaozə lljadiljgakeꞌ dii gaogakeꞌ naꞌ ga guesgakeꞌ, ḻaꞌ ga ni zoacho bikzə bi de.
13 Naꞌ cheꞌ Jesúzaꞌ ḻegakeꞌ:
―Lenꞌ, ḻi weꞌ dii gaogakeꞌ.
Naꞌch cheꞌgakeꞌneꞌ:
―Gayꞌlishꞌtgui yetxtilki napcho naꞌ zi c̱hopchga beḻ, ḻechozə shi willjx̱iꞌchntoꞌ c̱he yoguee.
14 Gollgakeꞌneꞌ kaꞌ ḻaꞌ ka do gayaa mil beṉꞌ byokaꞌ lleꞌ naꞌ. Naꞌch cheꞌ Jesúzaꞌ beṉꞌkaꞌ shlliṉ:
―Ḻi yeꞌgakeꞌ kweꞌ shiyon wejgakeꞌ.
15 Naꞌ bzoagakeꞌ xtillee naꞌ wlekgakeꞌ beṉꞌkaꞌ.
16 Naꞌch bex̱ꞌ Jesúzaꞌ yetxtilkaꞌ gayꞌ naꞌ beḻkaꞌ c̱hop. Naꞌ bḻis jalaweꞌnaꞌ yabanaꞌ biꞌe Chiozaꞌ yeḻꞌ chox̱ken, naꞌ bxoxjeꞌn naꞌ biꞌen beṉꞌkaꞌ nakgakeꞌneꞌ txen naꞌch beꞌgakeꞌ c̱he c̱he beṉꞌkaꞌ.
17 Naꞌ yogꞌgakeꞌ wdao ka beljgakileꞌ, naꞌ diikaꞌ bichooṉan bitopgakeꞌn biyakten shlliṉ xetꞌ.
Pédronaꞌ biꞌe dillꞌ nan Jesúzaꞌn beenaꞌ wlej Chiozaꞌ iṉabiꞌe
18 To shii ka choeꞌḻwill Jesúzaꞌ Chiozaꞌ, naꞌ lleꞌ beṉꞌkaꞌ nakgakeꞌneꞌ txen, naꞌ wṉabileꞌ ḻegakeꞌ:
―¿Non na beṉꞌkaꞌ nakꞌ?
19 Naꞌ cheꞌgakeꞌneꞌ:
―Baḻeꞌ nagakeꞌ nakoꞌ dii Juan wichoa nisaꞌ, naꞌ zi baḻeꞌ nagakeꞌ nakoꞌ Elíazaꞌ, naꞌ zi baḻeꞌ nagakeꞌ nakoꞌ to beṉꞌ wdix̱jee daa goll Chiozaꞌneꞌ kaniꞌyi, naꞌ ba bibaneꞌ ladj beṉꞌ wetkaꞌ.
20 Naꞌch chiꞌe ḻegakeꞌ:
―Shera leꞌ, ¿nora nale nakꞌ?
Naꞌch cheꞌ Pédronaꞌneꞌ:
―Linꞌ Crístonaꞌ, beenaꞌ nc̱heb Chiozaꞌ wseḻee.
21 Naꞌch goll Jesúzaꞌ ḻegakeꞌ ni to kono yeꞌgakeꞌ kaꞌ.
Goll Jesúzaꞌ postl c̱heꞌkaꞌ wit beṉꞌ ḻeꞌ
22 Naꞌ chiꞌe ḻegakeꞌ:
―Kon ka nchogbiaꞌ c̱haꞌ, nadꞌ, Beṉꞌ Bseḻꞌ Chiozaꞌ Yell-lioni, biya dii wc̱hiꞌ wsakꞌgakeꞌ nadꞌ. Naꞌ beṉꞌ golkaꞌ chṉabiaꞌ wzoagakeꞌ nadꞌ kaꞌlə naꞌ kaꞌkzə bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ. Naꞌ chonan byen witgakeꞌ nadꞌ, naꞌ ka gak shoṉ lla yibanꞌ ladj beṉꞌ wetkaꞌ.
23 Naꞌch golleꞌ yogꞌḻoḻeꞌ:
―Shi no cheeni gon nadꞌ txen, chiyaḻꞌ wsanlallꞌ kwineꞌ naꞌ izanileꞌ yeḻꞌ mban c̱heꞌnaꞌ yen ileꞌileꞌ bittez ni c̱haꞌ, naꞌ goneꞌ ka chazlallaa.
24 Ḻaꞌ beenaꞌ bi chzani yeḻꞌ mban c̱heꞌnaꞌ yen ileꞌileꞌ bittez ni c̱haꞌ, beenanꞌ kwiayiꞌ. San beenaꞌ chzani yeḻꞌ mban c̱heꞌnaꞌ ni c̱haꞌ, beenanꞌ gatꞌ to yeḻꞌ mban c̱heꞌ zejḻi kaṉi.
25 Bibi zjanayin gap beṉꞌ yogꞌḻoḻ daa de yell-lioni, shi ḻeꞌ kwiayee.
26 Nottezə beṉꞌ chiyii chidoꞌi nadꞌ naꞌ c̱he choꞌa xtillaanaꞌ, kaꞌkz nadꞌ, Beṉꞌ Bseḻꞌ Chiozaꞌ Yell-lioni, yiyii yidoꞌidꞌ ḻeꞌ katꞌ yiyedꞌ kon balaaṉ xen c̱haꞌnaꞌ, naꞌ c̱he X̱aꞌ Chiozaꞌ naꞌ c̱he anjl c̱heꞌkaꞌ.
27 Naꞌ dii ḻi niaꞌ leꞌ, baḻ-le lleꞌle ni, ni mbanle katꞌ wliꞌ Chiozaꞌ yeḻꞌ wṉabiaꞌ c̱heꞌnaꞌ.
Jesúzaꞌ biyakeꞌ nllaꞌlə
28 Ka gok do to xman wna Jesúzaꞌ kaꞌ, naꞌch wyajeꞌ to lo yaa kwenc̱he jeḻwilleꞌ Chiozaꞌ naꞌ bc̱hiꞌe Pédronaꞌ, Juannaꞌ naꞌ Jacóbonaꞌ.
29 Naꞌ shlak choeꞌḻwilleꞌ Chiozaꞌ, biyak choꞌalaweꞌnaꞌ nllaꞌlə, naꞌ biyak xeꞌnaꞌ xtil ax̱t chey cheeniꞌn.
30 Naꞌ gokx̱e c̱hop beṉꞌ bshaljlengakeꞌneꞌ, toeꞌ dii Moisézaꞌ naꞌ beenaꞌ sto Elíazaꞌ.
31 Naꞌ yeḻꞌ chey cheeniꞌnaꞌ nec̱hjan ḻegakeꞌ. Naꞌ chshaljlengakeꞌneꞌ c̱he ka nak yeḻꞌ witaꞌ ileꞌileꞌ Jerusalénnaꞌ.
32 Naꞌ Pédronaꞌ len Juannaꞌ naꞌ Jacóbonaꞌ ḻe chakxwesgakeꞌ, per bendiplallꞌgakeꞌ bi wtesgakeꞌ, naꞌch bleꞌgakileꞌ yeḻꞌ chey cheeniꞌ c̱he Jesúzaꞌ naꞌ c̱he beṉꞌkaꞌ zi c̱hop bllin kwiteꞌnaꞌ.
33 Naꞌ ka ba chikwas dii Moisézaꞌ naꞌ Elíazaꞌ kwit Jesúzaꞌ, Pédronaꞌ golleꞌ Jesúzaꞌ:
―Maestro, ¡ḻe wen zoacho nizə! Gonntoꞌ shoṉə ransh, to c̱hoꞌ, to c̱he dii Moisézaꞌ naꞌ sto c̱he Elíazaꞌ.
Naꞌ ni bi gokbeꞌi Pédronaꞌ bin golleꞌ.
34 Naꞌ ni choeꞌtieꞌ dillꞌ, ka wze to bej ganaꞌ lleꞌgakeꞌ naꞌ bkwashaan ḻegakeꞌ. Naꞌ ḻe bllebgakeꞌ ka gokbeꞌgakileꞌ ba yoogakeꞌ ḻoo bejaꞌ.
35 Naꞌ ḻoo bejaꞌ bengakileꞌ shii Chiozaꞌ, chiꞌe ḻegakeꞌ:
―Beenin xiiṉaa, naꞌ ḻe chakidee. Ḻi wzenag c̱heꞌ.
36 Naꞌ ka wde goll Chiozaꞌ ḻegakeꞌ kaꞌ, naꞌ bleꞌgakileꞌ stozə Jesúzaꞌ ze. Naꞌ ni to kono gollgakeꞌ daa ben bleꞌgakileꞌ.
Biyon Jesúzaꞌ to biꞌ wewꞌ yoo dii x̱iwaa
37 Betiyo, ka biyetjgakeꞌ lo yaanaꞌ, beṉꞌ zan wal jatiḻgakeꞌ ḻegakeꞌ.
38 Naꞌch ladj beṉꞌkaꞌ wṉe to beṉꞌ byo zillj, chiꞌe Jesúzaꞌ:
―Maestro, ben goklen bwiagach biꞌ c̱haꞌni, ḻaꞌ tlishꞌ tyajchgabaan zoa.
39 Dii x̱iwaa chox̱aꞌn ḻebꞌ naꞌ tokonganz chosyaabꞌ, naꞌ chonan ka chazbꞌ shoṉ ax̱t chbia bllinꞌ choꞌabaa. Naꞌ chiya dii chonin ḻebꞌ, naꞌ aga cheenin wsanan ḻebꞌ.
40 Ba gotꞌyoidꞌ beṉꞌki nakgakeꞌ liꞌ txen yibejgachgakeꞌ dii x̱iwaa yoobꞌ, naꞌ bi gokgakeꞌ yibejgakeꞌn.
41 Naꞌch cheꞌ Jesúzaꞌ:
―¡Ziꞌtegalə c̱helenaꞌ, leꞌ beṉꞌ mal naꞌ beṉꞌ bi chajḻeꞌ! ¿Zi kaꞌkꞌtek chiyaḻꞌ soalenꞌ leꞌ? Naꞌ ¿zi kaꞌkꞌtek chiyaḻꞌ soidꞌ leꞌ? Da diwaꞌ biꞌ c̱hoꞌnaꞌ ni.
42 Naꞌ ka zej biꞌnaꞌ kwit Jesúzaꞌ naꞌ wchooṉ dii x̱iwaa ḻebꞌ lo yonaꞌ naꞌ wyazbꞌ shoṉaꞌ sto shii. Naꞌch bsheshlen Jesúzaꞌ dii x̱iwaa naꞌ bichejan, naꞌ biyakibꞌ. Naꞌ biyoneꞌbꞌ lallꞌ naꞌ x̱abaa.
43 Naꞌ yogꞌ beṉꞌkaꞌ lleꞌ naꞌ bibangakileꞌ daa bleꞌgakileꞌ yeḻꞌ wak xen c̱he Chiozaꞌ.
Sto shii wdix̱jee Jesúzaꞌ witgakeꞌneꞌ
Naꞌ shlak chibani yogꞌ beṉꞌkaꞌ bleꞌi daa ben Jesúzaꞌ, naꞌ golleꞌ beṉꞌkaꞌ nakgakeꞌneꞌ txen:
44 ―Ḻi wzeyeṉꞌ nagle dga iṉiaꞌ leꞌ: gongakeꞌ nadꞌ, Beṉꞌ Bseḻꞌ Chiozaꞌ Yell-lioni, lallꞌ naꞌ beṉꞌkaꞌ chakziꞌ chakzbani nadꞌ.
45 Naꞌ bi wyajniꞌgakileꞌ bin golleꞌ, ḻaꞌ ni ngashaan laweꞌkaꞌ kwenc̱he bi shajniꞌgakileꞌn. Naꞌ bllebgakeꞌ iṉabgakileꞌneꞌ bi zejin daa golleꞌ ḻegakeꞌ.
¿Noran zakꞌchi?
46 Naꞌ wzolo chakdiḻ-len ljwellgakeꞌ nogakenꞌ nak beṉꞌ zakꞌchi.
47 Ka gokbeꞌi Jesúzaꞌ daa chzaꞌlallꞌgakeꞌ, naꞌch wdoyoeꞌ to biꞌdoꞌ naꞌ bzieꞌbꞌ kwiteꞌnaꞌ.
48 Naꞌ chiꞌe ḻegakeꞌ:
―Nottezə beṉꞌ wlebeꞌ ḻaa to biꞌdoꞌzə ka biꞌdoꞌni daa chonḻilallee nadꞌ, nadꞌkzan chlebeꞌ. Naꞌ beenaꞌ chlebeꞌ nadꞌ, ḻekzkaꞌ chlebeꞌ Chiozaꞌ, beenaꞌ bseḻꞌ nadꞌ. Naꞌ beenaꞌ chaki bibi zakee lao yogꞌle, ḻenꞌ nakeꞌ beṉꞌ zakꞌchi ladjlenaꞌ.
Beenaꞌ bi chakileꞌ choꞌ ziꞌ, txenkzan nakeꞌ choꞌ
49 Naꞌch goll Juannaꞌneꞌ:
―Maestro, ba bleꞌintoꞌ to beṉꞌ chzetjeꞌ lioꞌnaꞌ kwenc̱he chibejeꞌ dii x̱iwꞌkaꞌ yoo beṉꞌ. Naꞌ bllonntoꞌ goneꞌ kaꞌ, ḻaꞌ bi nakeꞌ choꞌ txen.
50 Naꞌ cheꞌ Jesúzaꞌ ḻegakeꞌ:
―Bi wllonle goneꞌ kaꞌ, ḻaꞌ beenaꞌ bi chakileꞌ choꞌ ziꞌ, txenkzan nakeꞌ choꞌ.
Jesúzaꞌ bsheshleneꞌ Jacóbonaꞌ len Juannaꞌ
51 Naꞌ ka ba zoa yiyaj Jesúzaꞌ yabanaꞌ, naꞌch btoblallee yiyajeꞌ Jerusalénnaꞌ.
52 Naꞌ bseḻee beṉꞌ wllialozegagakeꞌ naꞌ wyajgakeꞌ to yell daa mbani Samárianaꞌ jtiljgakeꞌ ganaꞌ yigaaṉeꞌ.
53 Naꞌ beṉꞌ Samáriakaꞌ bi blebgakeꞌneꞌ daa ṉezgakileꞌ Jerusalénnaꞌlan yiyajeꞌ.
54 Naꞌ c̱hop beṉꞌkaꞌ nakgakeꞌneꞌ txen, Jacóbonaꞌ len Juannaꞌ, ka bleꞌgakileꞌ ka ben beṉꞌ Samáriakaꞌ, naꞌ cheꞌgakeꞌ Jesúzaꞌ:
―X̱anꞌ, ¿acheeniloꞌ iṉabintoꞌ Chiozaꞌ wseḻee yiꞌnaꞌ kwenc̱he sheytega beṉꞌki?
55 Naꞌ biyec̱hj Jesúzaꞌ bsheshleneꞌ ḻegakeꞌ, chiꞌe:
―Aga ṉezile non chṉabiaꞌ yic̱hjlallꞌdoꞌlenaꞌ nazle kaꞌ.
56 Nadꞌ, Beṉꞌ Bseḻꞌ Chiozaꞌ Yell-lioni, aga zaa kwenc̱he wlliayaa yeḻꞌ mban c̱he beṉꞌ, san zaa kwenc̱he yislaꞌ yeḻꞌ mban c̱heꞌkanꞌ.
Naꞌch biyajgakeꞌ yell yoblə.
Beṉꞌkaꞌ goklallꞌ lljano Jesúzaꞌ
57 Naꞌ ka zejgakeꞌ tnezaꞌ, to beṉꞌ chiꞌe Jesúzaꞌ:
―X̱anꞌ, cheenidꞌ saꞌlenꞌ liꞌ gattezə shajoꞌ.
58 Naꞌ cheꞌ Jesúzaꞌneꞌ:
―Zoa yech ga chiyoo bezꞌkaꞌ, naꞌ byiṉdoꞌkaꞌ non lilldoꞌgakb, san nadꞌ, Beṉꞌ Bseḻꞌ Chiozaꞌ Yell-lioni, biga de yigaaṉꞌ.
59 Naꞌch cheꞌ Jesúzaꞌ sto beṉꞌ:
―Da dino nadꞌ.
Naꞌ beenaꞌ chiꞌeneꞌ:
―X̱anꞌ, ben goklen beꞌ latj zigaate lljakwashaa x̱aꞌnaꞌ.
60 Naꞌch cheꞌ Jesúzaꞌneꞌ:
―Bibi gakiloꞌ, wikwashꞌkzə ljwell beṉꞌ wetkaꞌ. San liꞌ, jtix̱jeꞌi beṉꞌ ka nak yeḻꞌ wṉabiaꞌ c̱he Chiozaꞌ.
61 Naꞌch sto beṉꞌ yoblə chiziꞌe Jesúzaꞌ:
―X̱anꞌ, cheenidꞌ saꞌlenꞌ liꞌ per zigaate beꞌ latj lljaḻaachꞌ dillꞌ bishꞌ ljwellꞌkaꞌ.
62 Naꞌ cheꞌ Jesúzaꞌneꞌ:
―To beṉꞌ chwaaṉeꞌ gooṉ, aga wak wwieꞌ gozkollꞌlə. Naꞌ kaꞌkzan nakan c̱he beenaꞌ noeꞌ nadꞌ, shi bi nc̱hoglallee aga wak goneꞌ ka cheeni Chiozaꞌ.