Jesúzaꞌ bwaweꞌ tapa mil beṉꞌ
8
Do kanaꞌ, beṉꞌ zan inlleb bdop bllag. Naꞌ daa bibi de yeej gaogakeꞌ, wṉe Jesúzaꞌ beṉꞌkaꞌ nakgakeꞌneꞌ txen chiꞌe ḻegakeꞌ:
San Marcos 8:1-26
2 ―Chiyeshidꞌ beṉꞌki, ḻaꞌ ba gok shoṉ lla zoalengakeꞌ nadꞌ naꞌ bibi de yeej gaogakeꞌ.
3 Naꞌ shi yiseḻaa ḻegakeꞌ bi neej naogakeꞌ, xoll ic̱hoḻ-lallꞌgakeꞌ tnezaꞌ, ḻaꞌ baḻgakeꞌ zaꞌgakeꞌ zitꞌ.
4 Naꞌ beṉꞌkaꞌ nakgakeꞌneꞌ txen cheꞌgakeꞌneꞌ:
―¿Gatg lljx̱iꞌcho dii gao yogꞌ beṉꞌki?, ḻaꞌ gani lleꞌcho kono zoa witꞌ dii gaocho.
5 Naꞌ cheꞌ Jesúzaꞌ ḻegakeꞌ:
―¿Kaꞌkꞌ yetxtilkaꞌ noaꞌle?
Naꞌ cheꞌgakeꞌneꞌ:
―Gallan.
6 Naꞌ beneꞌ mandad kweꞌ beṉꞌkaꞌ lo yonaꞌ, naꞌ bex̱ee gallte yetxtilkaꞌ, naꞌ ka biyoll biꞌe Chiozaꞌ yeḻꞌ chox̱ken, naꞌ bxoxjeꞌn naꞌ biꞌen beṉꞌkaꞌ nakgakeꞌneꞌ txen kwenc̱he c̱hisgakeꞌ c̱he c̱he beṉꞌkaꞌ.
7 Naꞌ ḻekzkaꞌ nox̱ꞌgakeꞌ zto c̱hop beḻ. Naꞌ biꞌe Chiozaꞌ yeḻꞌ chox̱ken, naꞌ golleꞌ beṉꞌkaꞌ nakgakeꞌneꞌ txen weꞌgakeꞌ c̱he c̱he beṉꞌkaꞌ.
8 Naꞌ yogꞌḻoḻgakeꞌ weej wdaogakeꞌ ax̱t ka beljgakileꞌ, naꞌ bitopgakeꞌ zi gall xetꞌ diikaꞌ bichooṉan.
9 Beṉꞌkaꞌ weej wdao gokgakeꞌ ka tapa mil. Naꞌ Jesúzaꞌ bisee ḻegakeꞌ
10 naꞌ bizee biyooleneꞌ beṉꞌkaꞌ nakgakeꞌneꞌ txen ḻoo barkwaꞌ naꞌ ziyajgakeꞌ ganaꞌ mbani Dalmanútanaꞌ.
Fariseokaꞌ goklallꞌgakeꞌ gon Jesúzaꞌ to yeḻꞌ wak laweꞌkaꞌ
11 Naꞌ bllin fariseokaꞌ naꞌ wzologakeꞌ chakguedlengakeꞌ Jesúzaꞌ. Naꞌ daa goklallꞌgakeꞌ wchix̱gakeꞌneꞌ, wṉabgakileꞌneꞌ goneꞌ to yeḻꞌ wak laweꞌkaꞌ kwenc̱he gakbiaꞌ shi Chiozaꞌkzan bseḻeeneꞌ.
12 Naꞌ Jesúzaꞌ ax̱t wkaalallee, golleꞌ:
―¿Berac̱he leꞌ zoale ṉaa chṉabzle gonꞌ to yeḻꞌ wak dii ileꞌileꞌ? Dii ḻi niaꞌ leꞌ, aga bi yeḻꞌ wak gonꞌ ileꞌileꞌ.
13 Naꞌ bizee kwiteꞌkaꞌ, naꞌ biyoꞌe ḻoo barkwaꞌ sto shii ziyajeꞌ shḻaa nisdoꞌnaꞌ.
Dillꞌ wxiyeꞌ c̱he fariseokaꞌ zaklebin levadúranaꞌ
14 Naꞌ beṉꞌkaꞌ nak Jesúzaꞌ txen goḻ-lallꞌgakeꞌ waꞌgakeꞌ yetxtil c̱heꞌkaꞌ, naꞌ tlishꞌchga dii noaꞌgakeꞌ ḻoo barkw c̱heꞌkaꞌ.
15 Naꞌ cheꞌ Jesúzaꞌ ḻegakeꞌ:
―Wsakꞌgale bi shajḻeꞌle dillꞌ wxiyeꞌ c̱he fariseokaꞌ naꞌ c̱he Heródezaꞌ, daa zaklebi levadúranaꞌ.
16 Naꞌ beṉꞌkaꞌ nakgakeꞌneꞌ txen cheꞌ ljwellgakeꞌ:
―Daa bi biꞌacho yetxtilanꞌ neꞌ kaꞌ.
17 Naꞌ gokbeꞌi Jesúzaꞌ dillaa choeꞌgakeꞌ, naꞌ golleꞌ ḻegakeꞌ:
―¿Berac̱he chakzile daa bi biꞌale yetxtilanꞌ niaꞌ kaꞌ? ¿Abiṉꞌ shajniꞌkzileꞌ ni biṉꞌ gakbeꞌile ka nak diikaꞌ chonꞌ? ¿Abiṉꞌ iyalj yic̱hjlallꞌdoꞌlenanꞌ?
18 Zoate jalaolekaꞌ naꞌ bi chleꞌile, naꞌ zoate naglekaꞌ naꞌ bi chenileꞌ. ¿Abi chjadinile ka benꞌ?
19 Kanaꞌ bxoxjꞌ gayꞌ yetxtilkaꞌ naꞌ wdao beṉꞌkaꞌ gayaꞌ mil, ¿baḻ xetꞌ diikaꞌ bichooṉan?
Naꞌ gollgakeꞌneꞌ:
― Shlliṉan.
20 ―Naꞌ kanaꞌ bxoxjꞌ gall yetxtilkaꞌ naꞌ wdao beṉꞌkaꞌ tapa mil, ¿baḻ xetꞌ diikaꞌ bichooṉan?
Naꞌ cheꞌgakeꞌneꞌ:
―Zi gallan.
21 Naꞌ cheꞌ Jesúzaꞌ ḻegakeꞌ:
―¿Anaꞌ ni kaꞌ biṉꞌ shajniꞌkzile?
Jesúzaꞌ biyoneꞌ to beṉꞌ lc̱hoḻ yell Betsáidanaꞌ
22 Naꞌ bllingakeꞌ yellaꞌ le Betsaida, naꞌ beṉꞌkaꞌ lleꞌ yellaꞌ jwaꞌgakeꞌ to beṉꞌ lc̱hoḻ lao Jesúzaꞌ naꞌ gotꞌyogakileꞌneꞌ gox̱ꞌgacheꞌneꞌ.
23 Naꞌ bex̱ꞌ Jesúzaꞌ naꞌ beṉꞌ lc̱hoḻaꞌ naꞌ wlejeꞌneꞌ yellaꞌ. Naꞌ blleꞌ x̱eneenaꞌ jalaweꞌnaꞌ naꞌ bx̱oa neenaꞌ yic̱hjeꞌnaꞌ, naꞌ wṉabileꞌneꞌ shi ba chleꞌileꞌ.
24 Naꞌ cheꞌ beṉꞌ lc̱hoḻaꞌ:
―Chleꞌidꞌ x̱oṉj beṉꞌ, naꞌ nakgakeꞌ ka yag dii chzaꞌ.
25 Naꞌ Jesúzaꞌ bex̱ee jalaweꞌnaꞌ sto shii, naꞌ biyakileꞌ. Naꞌ bleꞌileꞌ kwasḻoḻ yogꞌḻoḻte.
26 Naꞌ biseḻꞌ Jesúzaꞌneꞌ shḻicha lilleꞌnaꞌ, chiꞌeneꞌ:
―Bi lljayoo dillꞌ yellaꞌ.
Pédronaꞌ biꞌe dillꞌ Jesúzanꞌ nakeꞌ Crístonaꞌ
27 Naꞌ bizaꞌlen Jesúzaꞌ beṉꞌkaꞌ nakgakeꞌneꞌ txen wyajgakeꞌ yellkaꞌ mbani Cesarea de Filíponaꞌ. Naꞌ shlak ngoogakeꞌ nez, wṉabileꞌ ḻegakeꞌ, chiꞌe:
―¿Non na beṉꞌ nakꞌ?
San Marcos 8:27-38
28 Naꞌ cheꞌgakeꞌneꞌ:
―Baḻgakeꞌ nagakeꞌ linꞌ dii Juannaꞌ, beenaꞌ bchoa beṉꞌ nisaꞌ, naꞌ zi baḻgakeꞌ nagakeꞌ linꞌ Elíazaꞌ, naꞌ zi baḻgakeꞌ nagakeꞌ nakoꞌ sto beṉꞌ wdix̱jee daa goll Chiozaꞌneꞌ kaniꞌyi.
29 Naꞌ chiꞌe ḻegakeꞌ:
―Shera leꞌ, ¿nora nale nakꞌ?
Naꞌ cheꞌ Pédronaꞌ:
―Linꞌ Crístonaꞌ, beenaꞌ nc̱heb Chiozaꞌ wseḻee.
30 Naꞌ cheꞌ Jesúzaꞌ ḻegakeꞌ kono yeꞌgakeꞌ kaꞌ.
Jesúzaꞌ choꞌe dillꞌ gueteꞌ
31 Naꞌ wzolo Jesúzaꞌ bliꞌ bsedileꞌ ḻegakeꞌ nan ḻeꞌ, Beṉꞌ Bseḻꞌ Chiozaꞌ Yell-lioni, chonan byen sakꞌziꞌe dii xen, naꞌ beṉꞌ golkaꞌ chṉabiaꞌ naꞌ bx̱ozkaꞌ chṉabiaꞌ naꞌch beṉꞌkaꞌ chliꞌ chsedi leyaꞌ gakzbangakileꞌneꞌ, naꞌ chonan byen witgakeꞌneꞌ naꞌ yibaneꞌ ka gak shoṉ lla.
32 Naꞌ bshaljleneꞌ ḻegakeꞌ kwasḻoḻ daa gak c̱heꞌ. Naꞌch wlej Pédronaꞌneꞌ kaꞌlə naꞌ wzolo golleꞌneꞌ bi koo choꞌe daa.
33 Naꞌ biyec̱hj Jesúzaꞌ chwieꞌ beṉꞌkaꞌ nakgakeꞌneꞌ txen, naꞌ bsheshleneꞌ Pédronaꞌ, chiꞌeneꞌ:
―¡Kwas kaꞌlə, Satanás!, ḻaꞌ bi chajniiloꞌ daa cheeni Chiozaꞌ goneꞌ, san de yell-liozan chajniiloꞌ.
34 Naꞌ wṉe Jesúzaꞌ beṉꞌkaꞌ nakgakeꞌneꞌ txen len beṉꞌkaꞌ lleꞌ naꞌ, naꞌ chiꞌe:
―Shi no cheeni gakeꞌ nadꞌ txen, chiyaḻꞌ wsanlallꞌ kwineꞌ naꞌ izanileꞌ yeḻꞌ mban c̱heꞌnaꞌ yen ileꞌileꞌ bittez ni c̱haꞌ, naꞌ goneꞌ ka chazlallaa.
35 Ḻaꞌ beenaꞌ bi chzanileꞌ yeḻꞌ mban c̱heꞌnaꞌ, beenanꞌ kwiayiꞌ, san beenaꞌ chzanileꞌ yeḻꞌ mban c̱heꞌnaꞌ ni c̱haꞌ naꞌ ni c̱he dillꞌ wen dillꞌ kob c̱haꞌnaꞌ, beenanꞌ gatꞌ to yeḻꞌ mban c̱heꞌ zejḻi kaṉi.
36 Bibi zjanayin gap beṉꞌ yogꞌḻoḻ daa de yell-lioni, shi ḻeꞌ kwiayee.
37 Naꞌ aga zakii c̱hixjeꞌ kwenc̱he yisla yeḻꞌ mban c̱heꞌnaꞌ.
38 Nottezə beenaꞌ chidoꞌi wc̱hebeꞌ nombiꞌe nadꞌ wa wiꞌe choꞌa xtillaanaꞌ lao beṉꞌ saaxyakaꞌ beṉꞌkaꞌ bi chonḻilallꞌ nadꞌ, kaꞌkzə nadꞌ, Beṉꞌ Bseḻꞌ Chiozaꞌ Yell-lioni, yiyii yidoꞌidꞌ ḻeꞌ katꞌ yiyedlenꞌ anjl c̱haꞌkaꞌ naꞌ zinsaꞌ balaaṉ xen c̱he X̱aꞌ Chiozaꞌ.