Fariseokaꞌ naꞌ saduceokaꞌ wṉabgakileꞌ Jesúzaꞌ goneꞌ to yeḻꞌ wak
16
Fariseokaꞌ len saduceokaꞌ jawiagakeꞌ Jesúzaꞌ naꞌ wṉabgakileꞌneꞌ goneꞌ to yeḻꞌ wak dii ileꞌgakileꞌ kwenc̱he wliꞌn shi Chiozanꞌ bseḻeeneꞌ.
2 Naꞌ goll Jesúzaꞌ ḻegakeꞌ:
―Shlleꞌnaꞌ chwiale xan yabanaꞌ naꞌ nale: “Ḻe yillaa wx̱e, ḻaꞌ ḻe nḻatjcha.”
3 Naꞌ shi chibeꞌcha shzilaꞌ naꞌ nale: “Wak yejaꞌ ḻaꞌ ba bibeꞌcha.” Leꞌ chakbeꞌile shi gak zeyꞌ wa gak yej daa chwiale ka nak xan yabanaꞌ, per aga chakbeꞌile bin zeji diikaꞌ chon Chiozaꞌ llaki zoacho ṉaa.
4 Leꞌ nakle beṉꞌ mal naꞌ beṉꞌ bi chzenag c̱he Chiozaꞌ, chṉable ileꞌileꞌ to yeḻꞌ wak kwenc̱he wliꞌn shi Chiozaꞌ bseḻee nadꞌ, per bi wliidꞌ leꞌ daa chṉable. Ḻete ileꞌile sto yeḻꞌ wak ka daa ben Chiozaꞌ c̱he dii Jonázaꞌ.
Naꞌ wde goll Jesúzaꞌ ḻegakeꞌ kaꞌ, naꞌ bizee kwiteꞌkaꞌ ziyajeꞌ.
Dillꞌ wxiyeꞌ c̱he fariseokaꞌ zaklebin levadúranaꞌ
5 Naꞌ ka bllingakeꞌ shḻaa nisdoꞌnaꞌ, beṉꞌkaꞌ nakgakeꞌneꞌ txen goḻ-lallꞌgakeꞌ waꞌgakeꞌ yetxtilaꞌ.
6 Naꞌ goll Jesúzaꞌ ḻegakeꞌ:
―Wsakꞌgale bi shajḻeꞌle dillꞌ wxiyeꞌ c̱he fariseokaꞌ naꞌ saduceokaꞌ, daa zaklebi levadúranaꞌ.
7 Naꞌ cheꞌ ljwellgakeꞌ:
―Daa goḻ-lallꞌcho waꞌcho yetxtilanꞌ neꞌ choꞌ kaꞌ.
8 Naꞌ gokbeꞌi Jesúzaꞌ daa cheꞌ ljwellgakeꞌ naꞌ golleꞌ ḻegakeꞌ:
―¿Bic̱he nazle bibi yetxtilaꞌ biaꞌle? ¿Bic̱he bi nx̱enilallꞌle nadꞌ kwasḻoḻ?
9 ¿Abikzaṉꞌ shajniile ka nak diikaꞌ chonꞌ? ¿Abi chjadinile kanaꞌ wdao gayaa mil beṉꞌ kon gayꞌzə yetxtilkaꞌ naꞌ baḻ xetꞌ dii bixjkaꞌ bitople?
10 Naꞌ ¿shera kanaꞌ wdao tapa mil beṉꞌ kon gallzə yetxtilkaꞌ? ¿Abi chjadinile baḻ xetꞌ dii bixjkaꞌ bitople?
11 ¿Bic̱he c̱he yetxtilaꞌlə wyajnizile ka wniaꞌ wsakꞌgale c̱he levadura c̱he fariseokaꞌ len saduceokaꞌ?
12 Naꞌ kanaꞌch wyajniꞌgakileꞌ nan aga c̱he levadura c̱he yetxtilanꞌ chiꞌe ḻegakeꞌ wsakꞌgakeꞌ san diikaꞌ chliꞌ chsedi fariseokaꞌ len saduceokaꞌlan.
Pédronaꞌ chiꞌe Jesúzaꞌn nakeꞌ Crístonaꞌ
13 Naꞌ ka bllin Jesúzaꞌ len beṉꞌkaꞌ nakgakeꞌneꞌ txen ganaꞌ mbani yell Cesarea c̱he Filíponaꞌ, naꞌch chiꞌe ḻegakeꞌ:
―¿Non na beṉꞌ yell-lionaꞌ nakꞌ, nadꞌ, Beṉꞌ Bseḻꞌ Chiozaꞌ Yell-lioni?
14 Naꞌ cheꞌgakeꞌneꞌ:
―Baḻeꞌ nagakeꞌ nakoꞌ dii Juannaꞌ, beenaꞌ bchoa beṉꞌ nisaꞌ, naꞌ zi baḻeꞌ nagakeꞌ nakoꞌ Elíazaꞌ, naꞌ zi baḻeꞌ nagakeꞌ nakoꞌ dii Jeremíazaꞌ, naꞌ baḻeꞌ nagakeꞌ nakoꞌ sto beṉꞌ chyix̱jee daa cheꞌ Chiozaꞌneꞌ.
15 Naꞌch chiꞌe ḻegakeꞌ:
―¿Shera leꞌ? ¿Nora nale nakꞌ?
16 Naꞌ Simón Pédronaꞌ chiꞌeneꞌ:
―Linꞌ Crístonaꞌ, Xiiṉ Chios yaa Chios bannaꞌ.
17 Naꞌ Jesúzaꞌ chiꞌeneꞌ:
―Chakomba liꞌ Simón, xiiṉ Jonás, ḻaꞌ aga nochlan bzajnii liꞌ daa ba wnoꞌ. X̱aꞌnaꞌ zoa yabananꞌ ba bzajniileꞌn liꞌ.
18 Naꞌ nadꞌ niaꞌ liꞌ, linꞌ lioꞌ Pedro, daa zeji yaj, naꞌ gakoꞌ ka to yaj wal naꞌ linꞌ wc̱hinꞌ kwenc̱he gonoꞌ ka shanch beṉꞌkaꞌ gonḻilallꞌgakeꞌ nadꞌ, naꞌ ni yeḻꞌ witaꞌ bi yizoin wlliayiꞌn beṉꞌkaꞌ ba wlejꞌ kwenc̱he nakgakeꞌ lallꞌ naꞌ.
19 Naꞌ goṉꞌ liꞌ yeḻꞌ wṉabiaꞌ daa zaklebi to xiiṉya dii chsaljan yabanaꞌ ganaꞌ chṉabiaꞌ Chiozaꞌ. Naꞌ diikaꞌ iṉoꞌ bi chiyaḻꞌ gon beṉꞌ yell-lioni, ḻekzkaꞌ iṉa Chiozaꞌ zoa yabanaꞌ, naꞌ diikaꞌ iṉoꞌ wak gongakeꞌ, ḻekzkaꞌ iṉa Chiozaꞌ zoa yabanaꞌ.
20 Naꞌ goll Jesúzaꞌ beṉꞌkaꞌ nakgakeꞌneꞌ txen ni to kono yeꞌgakeꞌ ḻenꞌ Crístonaꞌ, beenaꞌ bseḻꞌ Chiozaꞌ iṉabiꞌe.
Jesúzaꞌ biꞌe dillꞌ witgakeꞌneꞌ
21 Naꞌ lo llanaꞌ wzolo Jesúzaꞌ bzajniileꞌ beṉꞌkaꞌ nakgakeꞌneꞌ txen daa llia biaꞌ gak c̱heꞌ. Golleꞌ ḻegakeꞌ chonan byen yiyajeꞌ Jerusalénnaꞌ kwenc̱he gakeꞌ lo naꞌ beṉꞌ golkaꞌ chṉabiaꞌ naꞌ lo naꞌ bx̱ozkaꞌ chṉabiaꞌ naꞌ lo naꞌ beṉꞌkaꞌ chliꞌ chsedi leyaꞌ, naꞌ ḻe wsakꞌziꞌgakeꞌneꞌ, naꞌ chonan byen witgakeꞌneꞌ naꞌ ka gak shoṉ lla yibaneꞌ ladj beṉꞌ wetkaꞌ.
22 Naꞌch Pédronaꞌ wlejeꞌ Jesúzaꞌ ladj beṉꞌkaꞌ chiꞌeneꞌ:
―X̱anꞌ, ¡bat gak c̱hoꞌ ka ba wnoꞌ!
23 Naꞌ biyec̱hj Jesúzaꞌ chiꞌe Pédronaꞌ:
―Kwas kaꞌlə, Satanás. Cheenziloꞌ bi gonꞌ daa llia biaꞌ gonꞌ daa bi yoo yic̱hjoꞌ daa cheeni Chiozaꞌ, san daa nak c̱he yell-liozan yoo yic̱hjoꞌ.
24 Naꞌ cheꞌ Jesúzaꞌ beṉꞌkaꞌ nakgakeꞌneꞌ txen:
―Shi no cheeni gon nadꞌ txen, chiyaḻꞌ wsanlallꞌ kwineꞌ, naꞌ izani yeḻꞌ mban c̱heꞌnaꞌ yen ileꞌileꞌ bittez ni c̱haꞌ, naꞌ goneꞌ ka chazlallaa.
25 Ḻaꞌ beenaꞌ bi chzani yeḻꞌ mban c̱heꞌnaꞌ, beenanꞌ kwiayiꞌ, san beenaꞌ chzani yeḻꞌ mban c̱heꞌnaꞌ yen ileꞌileꞌ bittez ni c̱haꞌ, beenanꞌ gatꞌ to yeḻꞌ mban c̱heꞌ zejḻi kaṉi.
26 ¿Bera zjanayin gap beṉꞌ yogꞌte dii de yell-lioni, shi ḻeꞌ kwiayee? Aga bi de wiꞌe lo laz yeḻꞌ mban c̱heꞌnaꞌ kwenc̱he bi kwiayee.
27 Ḻaꞌ nadꞌ, Beṉꞌ Bseḻꞌ Chiozaꞌ Yell-lioni, yiyedꞌ len anjl c̱haꞌkaꞌ zinsaꞌ balaaṉ xen c̱he X̱aꞌ Chiozaꞌ. Kanaꞌchan c̱hixjꞌ to to beṉꞌ kon ka dii beneꞌ.
28 Dii ḻi niaꞌ leꞌ, baḻ-le lleꞌle ni, ni mbanle ileꞌile yeḻꞌ wṉabiaꞌ c̱haꞌnaꞌ, nadꞌ, Beṉꞌ Bseḻꞌ Chiozaꞌ Yell-lioni.