Dillꞌ wen dillꞌ kob daa bzej Márconaꞌ
Juannaꞌ, beenaꞌ bchoa beṉꞌ nis
1
Ki wzolo dillꞌ wen dillꞌ kob c̱he Jesucrístonaꞌ, beenaꞌ nak Xiiṉ Chiozaꞌ.
San Marcos 1:1-20
2 Gok ka wna dii Isaíazaꞌ, beenaꞌ wdix̱jee daa goll Chiozaꞌneꞌ:
Wseḻaa to beṉꞌ kwialoeꞌ lawoꞌnaꞌ,
wiꞌe xtilloonaꞌ kwenc̱he ba lleꞌ beṉꞌ wzenagueꞌ c̱hoꞌ katꞌ illinoꞌ.
3 To beṉꞌ wṉieꞌ zilljə to lo latj ganaꞌ bibi chashj chḻeb, chiꞌe:
“Ḻi se kwas wzenagle c̱he X̱anchonaꞌ naꞌ wsalj yic̱hjlallꞌdoꞌlekaꞌ katꞌ zee.”
4 Naꞌ bllin Juannaꞌ latjaꞌ ganaꞌ bibi chashj chḻeb. Bchoeꞌ beṉꞌ nis, naꞌ wdix̱jeꞌileꞌ beṉꞌ chiyaḻꞌ yiyaj yilengakileꞌ naꞌ c̱hoagakeꞌ nis kwenc̱he yiziꞌxen Chiozaꞌ saaxya c̱heꞌkaꞌ.
5 Naꞌ yogꞌ beṉꞌkaꞌ lleꞌ ganaꞌ mbani Judeanaꞌ naꞌ beṉꞌkaꞌ lleꞌ yell Jerusalénnaꞌ jazenaggakeꞌ dillaa choꞌe. Naꞌ bix̱oadoḻꞌgakeꞌ saaxya c̱heꞌkaꞌ, naꞌ bchoa Juannaꞌ ḻegakeꞌ nis ḻoo yao Jordánnaꞌ.
6 Naꞌ xa Juannaꞌ gokan de xa kamey naꞌ bc̱hej lsineenaꞌ to yid. Naꞌ wdaweꞌ bishꞌzo naꞌch shin baser dii de lyix̱aa.
7 Naꞌ wdix̱jeꞌileꞌ beṉꞌkaꞌ choꞌa xtillꞌ Chiozaꞌ, chiꞌe:
―Ziꞌ zaꞌlə beenaꞌ napch yeḻꞌ wak xench ka nadꞌ, naꞌ ni bi zakaa gakꞌ xmoseꞌ kwenc̱he wḻec̱hjꞌ xeleꞌnaꞌ.
8 Nadꞌ ba bchoaꞌ leꞌ nisaꞌ, san ḻeꞌ, goneꞌ ka yidsoa Espíritu c̱he Chiozaꞌ ḻoo yic̱hjlallꞌdoꞌlenaꞌ.
Jesúzaꞌ wchoeꞌ nisaꞌ
9 Naꞌ kanaꞌyeṉꞌ Jesúzaꞌ wzee yell Nazaretaꞌ daa llia ganaꞌ mbani Galileanaꞌ naꞌ wyajeꞌ choꞌa yao Jordánnaꞌ ganaꞌ bchoa Juannaꞌneꞌ nisaꞌ.
10 Naꞌ shlak chichej Jesúzaꞌ ḻoo nisaꞌ, bleꞌileꞌ byalj yabanaꞌ naꞌ betj Espíritu c̱he Chiozaꞌ jsoaleneꞌneꞌ naꞌ bleꞌileꞌ Espíritunaꞌ ka to palom.
11 Naꞌ bengakileꞌ wṉe Chiozaꞌ yabanaꞌ, chiꞌe Jesúzaꞌ:
―Linꞌ nakoꞌ Xiiṉꞌ, chakchgaidꞌ liꞌ naꞌ ḻe chibaidꞌ liꞌ.
Dii x̱iwaa goklalliin kooyeḻaꞌn Jesúzaꞌ goneꞌ ka cheenin
12 Naꞌ lii bc̱heꞌte Espíritu c̱he Chiozaꞌ ḻeꞌ latjaꞌ ganaꞌ bibi chashj chḻeb.
13 Naꞌ wzoeꞌ naꞌ c̱hoa lla ladj ba zṉiakaꞌ, naꞌ Satanázaꞌ daa chṉabiaꞌ dii x̱iwꞌkaꞌ goklalliin kooyeḻaꞌn ḻeꞌ goneꞌ ka cheenin. Naꞌ ka wde, jaklen anjlkaꞌ ḻeꞌ.
Wzolo Jesúzaꞌ choeꞌleneꞌ beṉꞌ xtillꞌ Chiozaꞌ ganaꞌ mbani Galileanaꞌ
14 Biyoll wloogakeꞌ Juannaꞌ lillyanaꞌ, Jesúzaꞌ wyajeꞌ ganaꞌ mbani Galileanaꞌ naꞌ jeꞌleneꞌ beṉꞌ dillꞌ wen dillꞌ kob c̱he Chiozaꞌ,
15 chiꞌe:
―Ba bllin lla iṉabiaꞌ Chiozaꞌ ḻoo yic̱hjlallꞌdoꞌlenaꞌ. Ḻi yiyaj yileni dii malkaꞌ chonle naꞌ ḻi shajḻeꞌ dillꞌ wen dillꞌ kob c̱heꞌnaꞌ.
Jesúzaꞌ goxeꞌ tap beṉꞌ wxen beḻ
16 Shlak ngoo Jesúzaꞌ nez choꞌa nisdoꞌ c̱he Galileanaꞌ, bleꞌileꞌ Simónnaꞌ len beṉꞌ bishee Andrézaꞌ, chzaḻꞌgakeꞌ yix̱j daa chzengakileꞌ beḻkaꞌ ḻoo nisdoꞌnaꞌ, ḻaꞌ ḻennanꞌ noni xshingakeꞌ.
17 Naꞌ goll Jesúzaꞌ ḻegakeꞌ:
―Ḻi da, dino nadꞌ. Naꞌ ka chonle chbejle beḻkaꞌ ḻoo nisi, kaꞌkzan gonle yibejle beṉꞌ lao dii malaꞌ.
18 Naꞌ ka biyoll golleꞌ ḻegakeꞌ kaꞌ, lii bkwaaṉꞌtegakeꞌ yix̱jaꞌ daa chzengakileꞌ beḻkaꞌ naꞌ zejlengakeꞌneꞌ.
19 Ka ba wzaꞌgakeꞌ zi latꞌ, bleꞌi Jesúzaꞌ Jacóbonaꞌ len beṉꞌ bishee Juannaꞌ, beṉꞌkaꞌ nak xiiṉ Zebedewaꞌ, lleꞌgakeꞌ ḻoo barkwaꞌ chiyonshaoꞌgakeꞌ yix̱jaꞌ daa chzengakileꞌ beḻkaꞌ.
20 Naꞌ lii wṉetieꞌ ḻegakeꞌ, naꞌ bkwaaṉꞌgakeꞌ x̱eꞌkaꞌ, beenaꞌ le Zebedeo, len beṉꞌkaꞌ chaklen ḻegakeꞌ ḻoo barkwaꞌ, naꞌ wyajlengakeꞌ Jesúzaꞌ.
Jesúzaꞌ bibejeꞌ dii x̱iwaa yoo to beṉꞌ
21 Naꞌ bllingakeꞌ yell Carpernaúmaꞌ. Naꞌ lla sabdaꞌ, llanaꞌ chombaaṉ beṉꞌ Israelkaꞌ, wyaj Jesúzaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ naꞌ wzoloeꞌ chliꞌ chsedileꞌ ḻegakeꞌ.
San Marcos 1:21-45
22 Naꞌ bibani beṉꞌkaꞌ lleꞌ naꞌ ka chliꞌ chsedi Jesúzaꞌ, ḻaꞌ bliꞌ bsedileꞌ ḻegakeꞌ ḻega beṉꞌ nap yeḻꞌ wṉabiaꞌ, naꞌ bi chliꞌ chsedileꞌ ka beṉꞌkaꞌ chliꞌ chsedi leyaꞌ.
23 Naꞌ ladj beṉꞌkaꞌ chdop chllag ganaꞌ chliꞌ chsedileꞌ ḻegakeꞌ, len to beṉꞌ yoꞌe dii x̱iwaa, naꞌ besyaan, cheꞌn:
24 ―¡Jwayi netoꞌ, Jesús, beṉꞌ Nazaret! ¿Abidoꞌ kwenc̱he wlliayoo netonꞌ? Nadꞌ nombiꞌa liꞌ naꞌ ṉezidꞌ nakoꞌ dowalj beṉꞌ ḻi beṉꞌ shaoꞌ c̱he Chios.
25 Naꞌ Jesúzaꞌ bsheshleneꞌn, chiꞌe:
―¡Llizə wzoa! ¡Bichej ḻoo yic̱hjlallꞌdoꞌ beeni!
26 Naꞌ dii x̱iwaa wchooṉan beenaꞌ naꞌ bchix̱ btoḻan ḻeꞌ naꞌ bichejan chosyaadian.
27 Naꞌ yogꞌ beṉꞌkaꞌ lleꞌ naꞌ bibangakileꞌ, naꞌ cheꞌ ljwellgakeꞌ:
―¿Bi dii kob dga chliꞌ chsedi beeni, lla? ¡Nakbiaꞌ napeꞌ yeḻꞌ wṉabiaꞌ, ḻaꞌ ax̱t len dii x̱iwꞌkaꞌ chsheshleneꞌ naꞌ chzoagakan xtillee!
28 Naꞌ lii wzete dillꞌ doxen ganaꞌ mbani Galileanaꞌ ka nak daa chon Jesúzaꞌ.
Jesúzaꞌ biyoneꞌ tobiiṉ c̱he Simón Pédronaꞌ
29 Naꞌ bizaꞌ Jesúzaꞌ ganaꞌ chdop chllaggakeꞌ naꞌ biyajleneꞌ Jacóbonaꞌ len Juannaꞌ lill Simónnaꞌ naꞌ Andrézaꞌ.
30 Naꞌ tobiiṉ c̱he Simónnaꞌ dieꞌ yoꞌe dii ḻa. Naꞌ gollgakeꞌ Jesúzaꞌ daa chak c̱heꞌ.
31 Naꞌ wbiguee ganaꞌ dieꞌ naꞌ bex̱ee neenaꞌ bḻiseꞌneꞌ. Naꞌ lii bichejte dii ḻanaꞌ naꞌ wzoloeꞌ beneꞌ daa wdaogakeꞌ.
Jesúzaꞌ biyoneꞌ beṉꞌ zan
32 Naꞌ ka ba wxoa wbillaꞌ, jwaꞌgakeꞌ lao Jesúzaꞌ yogꞌ beṉꞌkaꞌ bi shaoꞌ naꞌ beṉꞌkaꞌ yoo dii x̱iwaa.
33 Naꞌ yogꞌ beṉꞌkaꞌ lleꞌ yellaꞌ bdiꞌa bllaggakeꞌ choꞌa yoonaꞌ ganaꞌ zoeꞌ.
34 Naꞌ Jesúzaꞌ biyoneꞌ beṉꞌ chak wde wdeli yillweꞌ. Naꞌ ḻekzkaꞌ bibejeꞌ dii x̱iwꞌkaꞌ yoo beṉꞌ, naꞌ bi biꞌe latj iṉegakan daa nombiaꞌgakan ḻeꞌ.
Jesúzaꞌ choꞌe choꞌa xtillꞌ Chiozaꞌ ganaꞌ mbani Galileanaꞌ
35 Naꞌ Jesúzaꞌ wyaseꞌ ni baḻ, naꞌ bchejeꞌ yellaꞌ jeḻwilleꞌ Chiozaꞌ ga kono beṉꞌ lleꞌ.
36 Naꞌ wyaj Simónnaꞌ len beṉꞌkaꞌ nakgakeꞌneꞌ txen jadiljgakeꞌneꞌ,
37 naꞌ ka billelgakileꞌneꞌ naꞌch gollgakeꞌneꞌ:
―Yogꞌz beṉꞌ chiyiljgakeꞌ liꞌ.
38 Naꞌ cheꞌ Jesúzaꞌ ḻegakeꞌ:
―Ḻi shoꞌ yellkaꞌ sto, diikaꞌ llia gaozə, kwenc̱he ḻekzkaꞌ lljeꞌlenꞌ choꞌa xtillꞌ Chiozaꞌ beṉꞌkaꞌ lleꞌ naꞌ, ḻaꞌ ni c̱heyinnanꞌ bidꞌ.
39 Naꞌ wda Jesúzaꞌ yogꞌ yellkaꞌ llia doxen ganaꞌ mbani Galileanaꞌ choeꞌleneꞌ beṉꞌkaꞌ choꞌa xtillꞌ Chiozaꞌ yogꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ, naꞌ bibejeꞌ dii x̱iwꞌkaꞌ yoo beṉꞌ.
Jesúzaꞌ biyoneꞌ to beṉꞌ chak yillweꞌ daa le lepra
40 To beṉꞌ chak yillweꞌ daa le lepra bllineꞌ laweꞌnaꞌ naꞌ bc̱hekꞌ xibeꞌnaꞌ laweꞌnaꞌ, chiꞌe:
―Shi cheeniloꞌ, wak yikwasoꞌ yillweꞌni chakꞌ.
41 Naꞌ biyeshꞌlallii Jesúzaꞌneꞌ, naꞌ bx̱oa neenaꞌ yic̱hjeꞌnaꞌ chiꞌe:
―Cheenidꞌx. Naꞌ ṉaate yikwasaꞌn.
44 ―Kono yoo dga ba benꞌ c̱hoꞌ. San wyaj jaliꞌlawoꞌ lao bx̱ozaꞌ, naꞌ jwaꞌ daa chiyaḻꞌ lljoo lao Chiozaꞌ ka nllia dii Moisézaꞌ biaꞌ goncho kwenc̱he iṉezileꞌ ba biyakiloꞌ.
45 Per ka bizee, wzoloeꞌ biꞌe dillꞌ lao yogꞌḻoḻ beṉꞌ daa gokə. Naꞌ daa beneꞌ kaꞌ, bich gok shoꞌ Jesúzaꞌ ka nḻaꞌzə yellkaꞌ, san bigaaṉeꞌ ga kono beṉꞌ lleꞌ. Per biaꞌkzə wyaj beṉꞌ zaꞌ wde wdeli yell jawiagakeꞌneꞌ.