Goki dii x̱iwaa gonan ka wzenag Jesúzaꞌ c̱heyin
4
Naꞌch Espíritu c̱he Chiozaꞌ bc̱hiꞌe Jesúzaꞌ to latj ga bibi chashj chḻeb naꞌ dii x̱iwaa goklalliin kooyeḻaꞌn ḻeꞌ goneꞌ ka cheenin.
2 Naꞌ ka wde c̱hoa lla c̱hoa yel bibi wdaweꞌ, naꞌ wdoneꞌ.
3 Naꞌch bllin dii x̱iwaa kwiteꞌnaꞌ gollan ḻeꞌ:
―Shi leiloꞌ nakoꞌ Xiiṉ Chios, ben ka yiyak yajki yetxtil.
4 Naꞌch goll Jesúzaꞌ:
―Choꞌa xtillꞌ Chiozaꞌ nan: “Aga toz yeḻꞌ wawaꞌ choeꞌn yeḻꞌ mban c̱he beṉec̱haꞌ, san ḻekzkaꞌ Choꞌa Xtillꞌ Chiozaꞌ choeꞌn yeḻꞌ mban.”
5 Naꞌch dii x̱iwaa bc̱heꞌn ḻeꞌ Jerusalénnaꞌ daa nak yell c̱he Chiozaꞌ naꞌ bḻepan ḻeꞌ yic̱hj yoodoꞌnaꞌ ganaꞌ nak sib wal.
6 Naꞌch gollan ḻeꞌ:
―Shi leiloꞌ nakoꞌ Xiiṉ Chios, lla bixitꞌshki ni. Ḻaꞌ Choꞌa Xtillꞌ Chiozaꞌ nan:
Wseḻee anjl c̱heꞌkaꞌ gap wwiagakeꞌ liꞌ,
naꞌ gox̱ꞌgakeꞌ liꞌ kwenc̱he ki koo wc̱hewoꞌ yajkaꞌ.
7 Naꞌ goll Jesúzaꞌ ḻen:
―Ḻekzkaꞌ na Choꞌa Xtillꞌ Chiozaꞌ: “Bi wzoꞌ Chiozaꞌ goneꞌ daa nazan c̱hoꞌ kwenc̱hezə x̱enlalloo shi goneꞌ ka ba wneꞌ.”
8 Naꞌch stokzə bizc̱heꞌ dii x̱iwaaneꞌ to lo yaa sib wal naꞌ bliin ḻeꞌ yogꞌ yellkaꞌ lleꞌ yell-lioni naꞌ yeḻꞌ zakii c̱heyinkaꞌ.
9 Naꞌ gollan ḻeꞌ:
―Yogꞌ diiki chleꞌiloꞌ goṉꞌ liꞌ shi wc̱hekꞌ xiboꞌnaꞌ weꞌlawoo nadꞌ.
10 Naꞌch goll Jesúzaꞌ ḻen:
―Biyaj, Satanás, ḻaꞌ Choꞌa Xtillꞌ Chiozaꞌ nan: “Beꞌlaꞌo toz X̱anoꞌ Chiozaꞌ naꞌ kon daa iṉeꞌ, ḻennanꞌ gonoꞌ.”
11 Naꞌch bizaꞌ dii x̱iwaa kwit Jesúzaꞌ naꞌ bllin baḻ anjlkaꞌ beꞌgakeꞌneꞌ kon bi byalljileꞌ.
Wzolo Jesúzaꞌ choeꞌ choꞌa xtillꞌ Chiozaꞌ ganaꞌ mbani Galileanaꞌ
12 Ka beni Jesúzaꞌ wloogakeꞌ Juannaꞌ lillyanaꞌ, bizee biyajeꞌ ganaꞌ mbani Galileanaꞌ.
13 Naꞌ bizee yell Nazaretaꞌ naꞌ jazoeꞌ yell Capernaúmaꞌ, to yell xen dii llia choꞌa nisdoꞌnaꞌ ganaꞌ mbani yell-lio c̱he dia c̱he dii Zabulónnaꞌ naꞌ dii Neftalínaꞌ.
14 Naꞌ daa jazoeꞌ naꞌ, gok ka wna dii Isaíazaꞌ, beenaꞌ wdix̱jee daa goll Chiozaꞌneꞌ, daa wneꞌ:
15 Ka nak yell-lio daa naki c̱he dia c̱he dii Zabulónnaꞌ naꞌ dii Neftalínaꞌ,
daa llia shḻaa yao Jordánnaꞌ,
ganaꞌ xoa nez daa zej choꞌa nisdoꞌnaꞌ
daa llia ganaꞌ mbani Galileanaꞌ,
ganaꞌ lleꞌ zan beṉꞌkaꞌ bi nak beṉꞌ Israel,
16 beṉꞌkaꞌ lleꞌ naꞌ gok yic̱hjlallꞌdoꞌekaꞌ shgasj shc̱hoḻ,
naꞌ Chiozaꞌ ba bseḻee to beeniꞌ xen laweꞌkaꞌ.
Lao beṉꞌkaꞌ lleꞌ ganaꞌ chṉabiaꞌ yeḻꞌ witaꞌ
ba chzeeniꞌ beeniꞌ c̱he Chiozaꞌ.
17 Naꞌ wzolo Jesúzaꞌ chyix̱jeꞌileꞌ beṉꞌ choꞌa xtillꞌ Chiozaꞌ, chiꞌe:
―Ḻi yiyaj yileni dii malkaꞌ chonle, ḻaꞌ ba bllin lla Chiozaꞌ, beenaꞌ zoa yabanaꞌ, iṉabiꞌe ḻoo yic̱hjlallꞌdoꞌlenaꞌ.
Wlej Jesúzaꞌ tap beṉꞌ wxen beḻ kwenc̱he gongakeꞌneꞌ txen
18 Naꞌ ka zej Jesúzaꞌ choꞌa nisdoꞌ c̱he Galileanaꞌ bleꞌileꞌ c̱hop bishꞌ beṉꞌ wxen beḻ chzaḻꞌgakeꞌ yix̱jaꞌ ḻoo nisaꞌ chzengakeꞌ beḻaꞌ. Toeꞌ le Simón naꞌ ḻekzkaꞌ nsiꞌgakeꞌneꞌ Pedro, naꞌ beenaꞌ sto lieꞌ Andrés.
19 Naꞌch Jesúzaꞌ chiꞌe ḻegakeꞌ:
―Ḻi da, dino nadꞌ, naꞌ kon ka chonle ṉaa chbejle beḻki ḻoo nisi, kaꞌkzan gonle yibejle beṉꞌ lao dii malaꞌ.
20 Naꞌ ka golleꞌ ḻegakeꞌ kaꞌ, lii bkwaaṉꞌtegakeꞌ yix̱j c̱heꞌkaꞌ naꞌ zejlengakeꞌneꞌ.
21 Naꞌ zi latꞌchga wzaꞌgakeꞌ bizleꞌi Jesúzaꞌ zi c̱hop bishꞌ beṉꞌ, beenaꞌ to lieꞌ Jacobo naꞌ beenaꞌ sto lieꞌ Juan, beṉꞌkaꞌ nak xiiṉ Zebedewaꞌ, lleꞌgakeꞌ to ḻoo barkw chiyonshaoꞌgakeꞌ yix̱jaꞌ daa chzengakileꞌ beḻkaꞌ. Naꞌ ḻekzkaꞌ goll Jesúzaꞌ Jacóbonaꞌ len Juannaꞌ shajlengakeꞌneꞌ.
22 Naꞌ lii bkwaaṉꞌtegakeꞌ barkwaꞌ len x̱eꞌkaꞌ naꞌ janogakeꞌ Jesúzaꞌ.
Jesúzaꞌ chliꞌ chsedileꞌ beṉꞌ zan
23 Naꞌ wda Jesúzaꞌ yogꞌ yellkaꞌ llia doxen ganaꞌ mbani Galileanaꞌ, chliꞌ chsedileꞌ beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ, choꞌe dillꞌ wen dillꞌ kob c̱he yeḻꞌ wṉabiaꞌ c̱he Chiozaꞌ, naꞌ biyoneꞌ yogꞌ beṉꞌ cheꞌi wde wdeli yillweꞌ.
24 Naꞌ doxen ganaꞌ mbani Sírianaꞌ wze dillꞌ daa chon Jesúzaꞌ, naꞌ jwaꞌgakeꞌ yogꞌḻoḻ beṉꞌkaꞌ cheꞌi wde wdeli yillweꞌ, beṉꞌ chey chla, beṉꞌ yoo dii x̱iwꞌ, beṉꞌ chaz shoṉ, naꞌ beṉꞌ net ṉiꞌa nee. Naꞌ Jesúzaꞌ biyoneꞌ ḻegakeꞌ.
25 Naꞌ beṉꞌ zan inlleb jano ḻeꞌ, beṉꞌkaꞌ lleꞌ yellkaꞌ mbani Galileanaꞌ naꞌ yellkaꞌ mbani Decápolizaꞌ, naꞌ beṉꞌkaꞌ lleꞌ yell Jerusalénnaꞌ naꞌ yellkaꞌ sto mbani Judeanaꞌ, naꞌ beṉꞌkaꞌ lleꞌ yellkaꞌ llia shḻaa yao Jordánnaꞌ.