Dii x̱iwaa goklalliin kooyeḻaꞌn Jesúzaꞌ goneꞌ ka cheenin
4
Ka bizaꞌ Jesúzaꞌ choꞌa yao Jordannaꞌ, Espíritu Sántonaꞌ, beenaꞌ chṉabiaꞌ ḻoo yic̱hjlallꞌdoꞌenaꞌ, bc̱hiꞌeneꞌ latjaꞌ ganaꞌ bibi chashj chḻeb.
2 Naꞌ naꞌ wzoeꞌ c̱hoa lla, naꞌ dii x̱iwaa goklalliin kooyeḻaꞌn ḻeꞌ goneꞌ ka cheenin. Naꞌ shlak wzoeꞌ naꞌ ni latꞌ bibi wdaweꞌ, naꞌ ka gok c̱hoa lla, wdoneꞌ.
3 Naꞌch cheꞌ dii x̱iwaaneꞌ:
―Shi leiloꞌ nakoꞌ Xiiṉ Chios, goll yaji yiyakan yetxtil.
4 Naꞌch cheꞌ Jesúzaꞌ:
―Choꞌa Xtillꞌ Chiozaꞌ nan: “Aga toz yeḻꞌ wawaꞌ choeꞌn yeḻꞌ mban c̱he beṉec̱haꞌ, san ḻekzkaꞌ Choꞌa Xtillꞌ Chiozaꞌ choeꞌn yeḻꞌ mban c̱hegakeꞌ.”
5 Naꞌch ka wde, bc̱heꞌ dii x̱iwaa Jesúzaꞌ to lo yaa sib wal, naꞌ tolbeꞌdoꞌ bliin ḻeꞌ yogꞌ yellkaꞌ llia yell-lioni.
6 Naꞌch cheꞌn ḻeꞌ:
―Goṉꞌ liꞌ doxen yeḻꞌ wṉabiaꞌnaꞌ naꞌ yeḻꞌ zakiinaꞌ daa de c̱he yogꞌ yellki, ḻaꞌ ba nakin c̱haꞌ naꞌ wak wiꞌan kon no cheenidꞌ.
7 Naꞌ goṉaꞌn liꞌ shi wc̱hekꞌ xiboꞌnaꞌ weꞌlawoo nadꞌ.
8 Naꞌ cheꞌ Jesúzaꞌ:
―Choꞌa Xtillꞌ Chiozaꞌ nan: “Beꞌlaꞌo toz X̱anoꞌ Chiozaꞌ naꞌ kon daa iṉeꞌ, ḻennanꞌ gonoꞌ.”
9 Naꞌch ka wde, bizc̱heꞌ dii x̱iwaa Jesúzaꞌ Jerusalénnaꞌ naꞌ bḻepan ḻeꞌ yic̱hj yoodoꞌnaꞌ ganaꞌ nakch sib wal, naꞌ gollan ḻeꞌ:
Chiozaꞌ wseḻee anjl c̱heꞌkaꞌ gap wwiagakeꞌ liꞌ,
11 naꞌ gox̱ꞌgakeꞌ liꞌ
kwenc̱he ki koo wc̱hewoꞌ yajkaꞌ.
12 Naꞌch cheꞌ Jesúzaꞌ:
―Ḻekzkaꞌ na Choꞌa Xtillꞌ Chiozaꞌ: “Bi wzoꞌ Chiozaꞌ goneꞌ daa nazan c̱hoꞌ kwenc̱he x̱enlalloo shi goneꞌ ka ba wneꞌ.”
13 Naꞌ ka bi gok kooyeḻꞌ dii x̱iwaa Jesúzaꞌ goneꞌ ka cheenin, naꞌch bkwasan kwiteꞌnaꞌ shloll.
Wzolo Jesúzaꞌ biꞌe Choꞌa Xtillꞌ Chiozaꞌ Galileanaꞌ
14 Jesúzaꞌ billineꞌ ganaꞌ mbani Galileanaꞌ ziyoochgueꞌ yeḻꞌ wak c̱he Espíritu Sántonaꞌ, naꞌ doxenzə naꞌ wze dillꞌ daa choneꞌ.
Lucas 4.14-44
15 Naꞌ chjaliꞌ chjasedileꞌ beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ, naꞌ yogꞌ beṉꞌ nagakeꞌ ḻe xochi choꞌe dillꞌ.
Billin Jesúzaꞌ yell Nazaretaꞌ
16 Naꞌch biyajeꞌ Nazaretaꞌ, yellaꞌ ganaꞌ bgoleꞌ. Naꞌ ka bllin lla sabdaꞌ, llanaꞌ chombaaṉ beṉꞌ Israelkaꞌ, wyajeꞌ ganaꞌ chdop chllaggakeꞌ choeꞌḻwillgakeꞌ Chiozaꞌ kon ka yooloeꞌ choneꞌ. Naꞌch wzollee laweꞌkaꞌ kwenc̱he blabeꞌ Choꞌa Xtillꞌ Chiozaꞌ.
17 Naꞌ beꞌgakeꞌneꞌ yishaꞌ daa bzej dii Isaíazaꞌ, beenaꞌ wdix̱jee daa goll Chiozaꞌneꞌ, naꞌ ka bzesheꞌn blabeꞌ ganaꞌ na:
18 Espíritu c̱he X̱ancho Chiozaꞌ zoaleneꞌ nadꞌ,
naꞌ Chiozaꞌ ba bzoeꞌ nadꞌ zidyeꞌlenꞌ beṉꞌ yeshꞌkaꞌ dillꞌ wen dillꞌ kob c̱heꞌnaꞌ.
Ba bseḻee nadꞌ kwenc̱he zidtipꞌ lallꞌ beṉꞌkaꞌ chakyeshii yic̱hjlallꞌdoꞌekaꞌ,
naꞌ zidtix̱jeꞌidꞌ beṉꞌ wak yisell yiḻaagakeꞌ,
naꞌ gonꞌ ka ileꞌi beṉꞌ lc̱hoḻkaꞌ,
naꞌ gaklenꞌ beṉꞌkaꞌ chc̱hiꞌ chsakꞌ beṉꞌ ḻegakeꞌ,
19 naꞌ wiꞌa dillꞌ ba bllin lla gaklen X̱anchonaꞌ beṉꞌ yell-lioki.
20 Ka biyoll blabeꞌ yishaꞌ naꞌch bitobeꞌn naꞌ biyoꞌen beenaꞌ ngoo lallꞌ neen, naꞌ bibiꞌe. Naꞌ yogꞌ beṉꞌkaꞌ lleꞌ naꞌ shin chizozgakileꞌ chwiagakeꞌneꞌ.
21 Naꞌ wzoloeꞌ choꞌe dillꞌ, chiꞌe:
―Ṉaa billinin ka na Choꞌa Xtillꞌ Chiozaꞌ dga ba benile.
22 Naꞌ yogꞌ beṉꞌkaꞌ lleꞌ naꞌ cheꞌ ljwellgakeꞌ ḻe chon beeni, naꞌ chibangakileꞌ ka xochi choꞌe dillꞌ. Naꞌ cheꞌ ljwellgakeꞌ:
―¿Aaga beenin xiiṉ Josénaꞌ?
23 Naꞌch cheꞌ Jesúzaꞌ ḻegakeꞌ:
―Wnaljale c̱haꞌ ka dillaa de: “Wen rmech, biyon kwinoꞌ.” Naꞌ ḻekzkaꞌ wnaljale nadꞌ: “Daa benintoꞌ benoꞌ Capernaúmaꞌ ḻekzkaꞌ benshkin lallchoni.”
24 Naꞌ beꞌcheꞌ dillꞌ chiꞌe ḻegakeꞌ:
―Dii ḻi niaꞌ leꞌ, to beṉꞌ chyix̱jee daa cheꞌ Chiozaꞌneꞌ aga no shajḻeꞌ c̱heꞌ yell c̱heꞌnaꞌ.
25 Naꞌ niaꞌ leꞌ, zan nool wizeb wlleꞌ gani mbani Israeli kanaꞌ wzoa Elíazaꞌ, beenaꞌ wdix̱jee daa goll Chiozaꞌneꞌ, kanaꞌ aga bi yej gok shoṉ yiz yoo gashjə naꞌ wcheꞌchga wbinnaꞌ doxen gani mbani Israeli.
26 Naꞌ bi bseḻꞌ Chiozaꞌ Elíazaꞌ kwenc̱he gakleneꞌ nool wizebkaꞌ lleꞌ ni, san bseḻeeneꞌ to yell zitꞌ daa le Sarepta, daa llia gaozə yell Sidónnaꞌ, ganaꞌ gokleneꞌ to nool wizeb zoa naꞌ.
27 Naꞌ ḻekzkaꞌ gok kanaꞌ wzoa dii Elisewaꞌ, beenaꞌ wdix̱jee daa goll Chiozaꞌneꞌ. Beṉꞌ zan beṉꞌ Israelkaꞌ cheꞌgakileꞌ yillweꞌ daa le lepra, per ni toeꞌ bi biyoneꞌ. Toz beṉꞌ Sírianaꞌ biyoneꞌ, beenaꞌ le Naamán.
28 Naꞌ yogꞌ beṉꞌkaꞌ lleꞌ ganaꞌ chdop chllaggakeꞌ ḻe bllaagakeꞌ daa wna Jesúzaꞌ kaꞌ.
29 Naꞌ lii wzollaꞌtegakeꞌ bibejgakeꞌ Jesúzaꞌ yellaꞌ, naꞌ bc̱heꞌgakeꞌneꞌ to ga ze bdiṉj xen wal, goklallꞌgakeꞌ lljachix̱gakeꞌneꞌ.
30 Per Jesúzaꞌ bichejeꞌ ladjeꞌkaꞌ naꞌ ziyajeꞌ.
Bibej Jesúzaꞌ dii x̱iwaa yoo to beṉꞌ
31 Jesúzaꞌ wyajeꞌ Capernaúmaꞌ, sto yell daa llia ganaꞌ mbani Galileanaꞌ, naꞌ bliꞌ bsedileꞌ beṉꞌkaꞌ lla sabdaꞌ, llanaꞌ chombaaṉ beṉꞌ Israelkaꞌ.
32 Naꞌ bibangakileꞌ ka chliꞌ chsedi Jesúzaꞌ, ḻaꞌ bliꞌ bsedileꞌ ḻegakeꞌ ḻega beṉꞌ nap yeḻꞌ wṉabiaꞌ.
33 Naꞌ ganaꞌ chdop chllaggakeꞌ, len to beṉꞌ yoo dii x̱iwaa naꞌ bgosyaan ḻeꞌ zillj wal, chiꞌe:
34 ―¡Jwayi netoꞌ, Jesús, beṉꞌ Nazaret! ¿Abidoꞌ kwenc̱he wlliayoo netonꞌ? Nadꞌ nombiꞌa liꞌ, naꞌ ṉezidꞌ nakoꞌ ḻiizelozi beṉꞌ ḻi beṉꞌ shaoꞌ c̱he Chios.
35 Naꞌch bsheshlen Jesúzaꞌ dii x̱iwaa, golleꞌn:
―¡Llizə wzoa! ¡Bichej!
Naꞌ chwiate beṉꞌkaꞌ bchix̱ btoḻ dii x̱iwaa beenaꞌ, naꞌ bichejan naꞌ bikzə gayileꞌ bi goki.
36 Naꞌ yogꞌ beṉꞌkaꞌ lleꞌ naꞌ bibangakileꞌ, naꞌ cheꞌ ljwellgakeꞌ:
―¿Naktekan nak choꞌa xtillꞌ beeni, lla? Ka chṉezeꞌ chillesh dii x̱iwꞌkaꞌ yoo beṉꞌ daa napchgueꞌ yeḻꞌ wṉabiaꞌ naꞌ yeḻꞌ wak.
37 Naꞌ doxen naꞌ wze dillꞌ ka nak daa chon Jesúzaꞌ.
Biyon Jesúzaꞌ tobiiṉ c̱he Simón Pédronaꞌ
38 Naꞌ bizaꞌ Jesúzaꞌ ganaꞌ chdop chllaggakeꞌ naꞌ biyajeꞌ lill Simónnaꞌ. Naꞌ tobiiṉ c̱he Simónnaꞌ bi shawee, yoochgueꞌ dii ḻanaꞌ, naꞌ wṉabgakileꞌ Jesúzaꞌ gakleneꞌneꞌ.
39 Naꞌch wbigꞌ Jesúzaꞌ kwiteꞌnaꞌ ganaꞌ dieꞌ naꞌ bsheshleneꞌ dii ḻanaꞌ naꞌ bichejan. Naꞌ lii biyaste noolaꞌ wzoloeꞌ beneꞌ dii weej wdaogakeꞌ.
Jesúzaꞌ biyoneꞌ beṉꞌ zan
40 Naꞌ ka ba chxoa wbillaꞌ, beṉꞌkaꞌ lleꞌ naꞌ jwaꞌgakeꞌ lao Jesúzaꞌ beṉꞌkaꞌ chak wde wdeli yillweꞌ. Naꞌ bx̱oa neenaꞌ to togakeꞌ naꞌ biyakgakileꞌ.
41 Naꞌ bibejeꞌ dii x̱iwaa yoo beṉꞌ zan, naꞌ ka bichejgakan chosyaagakan zillj inlleb, cheꞌgakan:
―Linꞌ nakoꞌ Xiiṉ Chiozaꞌ.
Naꞌch bsheshlen Jesúzaꞌ ḻegakan. Bi biꞌe latj iṉegakan ḻaꞌ ṉezgakin ḻenꞌ nakeꞌ Crístonaꞌ, beenaꞌ chbez beṉꞌ Israelkaꞌ wseḻꞌ Chiozaꞌ iṉabiꞌe.
Wda Jesúzaꞌ biꞌe Choꞌa Xtillꞌ Chiozaꞌ Galileanaꞌ
42 Ka wyeeniꞌ, bchej Jesúzaꞌ yellaꞌ naꞌ wyajeꞌ ga kono lleꞌ. Per beṉꞌ yellkaꞌ biyiljgakeꞌneꞌ, naꞌ ka bllingakeꞌ kwiteꞌnaꞌ, goklallꞌgakeꞌ wzagꞌgakeꞌneꞌ kwenc̱he yigaaṉleneꞌ ḻegakeꞌ.
43 Naꞌch goll Jesúzaꞌ ḻegakeꞌ:
―Ḻekzkaꞌ chiyaḻꞌ c̱hix̱jeꞌidꞌ beṉꞌkaꞌ lleꞌ yell yoblə ka nak yeḻꞌ wṉabiaꞌ c̱he Chiozaꞌ, ḻaꞌ daan bseḻee nadꞌ.
44 Naꞌ wda Jesúzaꞌ wdix̱jiꞌe choꞌa xtillꞌ Chiozaꞌ to to ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ.