Juannaꞌ, beenaꞌ bchoa beṉꞌ nis
3
Naꞌ ka gok shinꞌ yiz chṉabiaꞌ César Tibérionaꞌ, naꞌ Poncio Pilátonaꞌ chṉabiꞌe ganaꞌ mbani Judéanaꞌ, naꞌ Heródezaꞌ chṉabiꞌe ganaꞌ mbani Galileanaꞌ, naꞌ beṉꞌ bishee Felípenaꞌ chṉabiꞌe ganaꞌ mbani Ituréanaꞌ len Traconítenaꞌ, naꞌ Lisániazaꞌ chṉabiꞌe ganaꞌ mbani Abilínianaꞌ,
Lucas 3.1-4.13
2 naꞌ Anázaꞌ len Caifázaꞌ nakgakeꞌ bx̱oz choo bx̱oz xen c̱he beṉꞌ Israelkaꞌ. Naꞌ kanaꞌyeṉꞌ wṉe Chiozaꞌ Juannaꞌ, xiiṉ Zacaríazaꞌ, kanaꞌ zoeꞌ to latj ganaꞌ bibi chashj chḻeb.
3 Naꞌch wyaj Juannaꞌ jteꞌ doxen yell-lionaꞌ de choꞌa yao Jordánnaꞌ naꞌ wdix̱jeꞌileꞌ beṉꞌ chiyaḻꞌ yiyaj yilengakileꞌ naꞌ c̱hoagakeꞌ nis kwenc̱he yiziꞌxen Chiozaꞌ c̱hegakeꞌ.
4 Beneꞌ kon ka bzej dii Isaíazaꞌ ganaꞌ nan:
To beṉꞌ gosyee latjaꞌ ganaꞌ bibi chashj chḻeb, naꞌ iṉeꞌ:
“Ḻi se kwas wzenagle c̱he X̱anchonaꞌ
naꞌ wsalj yic̱hjlallꞌdoꞌlekaꞌ katꞌ zee.
5 Ḻaꞌ ḻeꞌ goneꞌ ka chon beṉꞌ chillee ga nak xitj yao,
naꞌ ka beṉꞌ chc̱hiṉj yaa kwenc̱he chiḻesheꞌn.
Naꞌ chiḻieꞌ yogꞌḻoḻ nez dii nyok nḻew,
naꞌ chillee xitjkaꞌ chiꞌ lo nezaꞌ.
6 Naꞌ yogꞌḻoḻ beṉꞌ ileꞌgakileꞌ ka gon Chiozaꞌ yisleꞌ beṉꞌ lawi dii malaꞌ.”
7 Naꞌ beṉꞌ zan chllin lao Juannaꞌ kwenc̱he wchoeꞌ ḻegakeꞌ nisaꞌ, naꞌch katꞌ chllingakeꞌ laweꞌnaꞌ, chiꞌe ḻegakeꞌ:
―¡Leꞌ naklikzle ka beḻ zṉia! ¿Achakile wak wxoṉjileꞌ yeḻꞌ zakꞌziꞌ daa wseḻꞌ Chiozaꞌ?
8 Ḻi gon ka gakbeꞌi beṉꞌ nan dii ḻi ba biyaj bilenileꞌ. Naꞌ bi gakzile bibi yeḻꞌ zakꞌziꞌ ileꞌile daa iṉazle: “Netoꞌ nakntoꞌ xiiṉ dia c̱he dii Abrahamaꞌ.” Ni iṉiaꞌ leꞌ ax̱t yajki wak gon Chiozaꞌ xiiṉ dia c̱he dii Abrahamaꞌ.
9 Yogꞌḻoḻ-le shi bi chonle ka chiyoolallii Chiozaꞌ naꞌ gak c̱hele ka chak c̱he to yag dii choeꞌ dii zix̱ dii bi nak wen, naꞌ lii chc̱hogtegakeꞌn naꞌ chzaḻꞌgakeꞌn lo yiꞌnaꞌ.
10 Naꞌ beṉꞌkaꞌ chzenag xtillꞌ Juannaꞌ cheꞌgakeꞌneꞌ:
―¿Beran chiyaḻꞌ gonntoꞌ, shkaꞌ?
11 Naꞌch cheꞌ Juannaꞌ ḻegakeꞌ:
―Beenaꞌ de c̱hop kweꞌ xeꞌ, chiyaḻꞌ wiꞌe shkweꞌ c̱he beenaꞌ bi de c̱heꞌ. Naꞌ beenaꞌ de dii cheej chaweꞌ, chiyaḻꞌ gaoleneꞌn beenaꞌ bi de c̱heyin.
12 Naꞌ ḻekzkaꞌ bllin baḻ beṉꞌ wic̱hixjkaꞌ kwenc̱he wchoa Juannaꞌ ḻegakeꞌ nisaꞌ, naꞌ wṉabgakileꞌneꞌ:
―Maestro, ¿beran chiyaḻꞌ gonntoꞌ, shkaꞌ?
13 Naꞌch cheꞌ Juannaꞌ ḻegakeꞌ:
―Bi wc̱hixjle dii xenchlə ka to daa chiyaḻꞌ wc̱hixjle.
14 Naꞌ ḻekzkaꞌ baḻ beṉꞌkaꞌ nak soldad wṉabgakileꞌneꞌ:
―¿Shera netoꞌ, beran chiyaḻꞌ gonntoꞌ shkaꞌ?
Naꞌch cheꞌ Juannaꞌ ḻegakeꞌ:
―Bi wwall wsheble beṉꞌ kwenc̱he ikaazle bi de c̱heꞌ, ni bi wtobileneꞌ dii bi nak kaꞌ. Ḻi gon banez laxjlenaꞌ.
15 Naꞌ beṉꞌ zan yoo yic̱hjgakeꞌ ilaꞌ Crístonaꞌ, beenaꞌ wseḻꞌ Chiozaꞌ kwenc̱he iṉabiꞌe, naꞌ yogꞌzeꞌ gokgakileꞌ Juannaꞌljan Crístonaꞌ.
16 Naꞌ Juannaꞌ golleꞌ ḻegakeꞌ:
―Ziꞌ zaꞌ beenaꞌ napch yeḻꞌ wak xench ka nadꞌ. Naꞌ nadꞌ ni bi zakaa gakꞌ xmoseꞌ kwenc̱he wḻec̱hjꞌ xeleꞌnaꞌ. Nadꞌ chchoaꞌ leꞌ nis daa chiyaj chilenile, san ḻenꞌ goneꞌ ka yidsoa Espíritu Sántonaꞌ ḻoo yic̱hjlallꞌdoꞌlenaꞌ, naꞌ beṉꞌkaꞌ bi chiyaj chileni, wseḻee ḻegakeꞌ lo yiꞌ gabiḻaꞌ.
17 Naꞌ daa gon Crístonaꞌ c̱he beṉꞌ chzaklebin ka daa chon beenaꞌ nox̱ꞌ yag xozꞌ daa chpaꞌileꞌ trígonaꞌ, naꞌ yitopeꞌ trígonaꞌ kooshaween naꞌ wzeyeꞌ beb c̱heyinnaꞌ lo yiꞌnaꞌ daa biga yiyolkzə.
18 Kanꞌ nak diikaꞌ bzajnii Juannaꞌ beṉꞌkaꞌ, naꞌ dii zanch dillꞌ dii beꞌleneꞌ ḻegakeꞌ kanaꞌ biꞌe dillꞌ wen dillꞌ kob c̱he Chiozaꞌ.
19 Naꞌ Juannaꞌ ḻekzkaꞌ bsheshleneꞌ Heródezaꞌ, beenaꞌ wṉabiaꞌ Galileanaꞌ, daa bikee Herodíazaꞌ, xool beṉꞌ bishee Felípenaꞌ, naꞌ c̱he bichlə dii malkaꞌ ba beneꞌ.
20 Naꞌch Heródezaꞌ bencheꞌ bishꞌ ljwell dii malkaꞌ ba beneꞌ daa wloꞌe Juannaꞌ lillyanaꞌ.
Wchoa Jesúzaꞌ nisaꞌ
21 Kanaꞌ chchoa Juannaꞌ beṉꞌ nisaꞌ, len Jesúzaꞌ bchoeꞌn. Naꞌ shlak choeꞌḻwill Jesúzaꞌ Chiozaꞌ, byalj yabanaꞌ
22 naꞌ betj Espíritu Sántonaꞌ jsoaleneꞌneꞌ, naꞌ bleꞌgakileꞌ Espíritunaꞌ ka to palom. Naꞌ bengakileꞌ shii Chiozaꞌ zaꞌn yabanaꞌ, chiꞌe:
―Linꞌ nakoꞌ Xiiṉꞌ, chakchgaidꞌ liꞌ naꞌ ḻe chibaidꞌ liꞌ.
Beṉꞌkaꞌ nak dia c̱he Jesucrístonaꞌ
23 Naꞌ do shichoa yizi Jesúzaꞌ ka wzoloeꞌ beneꞌ yogꞌ daa llia biaꞌ goneꞌ. Naꞌ yogꞌ beṉꞌ wnagakeꞌ xiiṉ Josénanꞌ. Naꞌ Josénaꞌ gokeꞌ xiiṉ Elínaꞌ,
24 Elínaꞌ gokeꞌ xiiṉ Matataꞌ, Matataꞌ gokeꞌ xiiṉ Levínaꞌ, Levínaꞌ gokeꞌ xiiṉ Mélquinaꞌ, Mélquinaꞌ gokeꞌ xiiṉ Jánanaꞌ, Jánanaꞌ gokeꞌ xiiṉ Josénaꞌ.
25 Josénaꞌ gokeꞌ xiiṉ Matatíazaꞌ, Matatíazaꞌ gokeꞌ xiiṉ Amózaꞌ, Amózaꞌ gokeꞌ xiiṉ Nahumaꞌ, Nahumaꞌ gokeꞌ xiiṉ Éslinaꞌ, Éslinaꞌ gokeꞌ xiiṉ Nagainaꞌ.
26 Nagainaꞌ gokeꞌ xiiṉ Maataꞌ, Maataꞌ gokeꞌ xiiṉ Matatíazaꞌ, Matatíazaꞌ gokeꞌ xiiṉ Semeinaꞌ, Semeinaꞌ gokeꞌ xiiṉ Josénaꞌ, Josénaꞌ gokeꞌ xiiṉ Judánaꞌ.
27 Judánaꞌ gokeꞌ xiiṉ Joánanaꞌ, Joánanaꞌ gokeꞌ xiiṉ Résanaꞌ, Résanaꞌ gokeꞌ xiiṉ Zorobabelaꞌ, Zorobabelaꞌ gokeꞌ xiiṉ Salatielaꞌ, Salatielaꞌ gokeꞌ xiiṉ Nérinaꞌ.
28 Nérinaꞌ gokeꞌ xiiṉ Mélquinaꞌ, Mélquinaꞌ gokeꞌ xiiṉ Ádinaꞌ, Ádinaꞌ gokeꞌ xiiṉ Cosamaꞌ, Cosamaꞌ gokeꞌ xiiṉ Elmodamaꞌ, Elmodamaꞌ gokeꞌ xiiṉ Eraꞌ.
29 Eraꞌ gokeꞌ xiiṉ Josuénaꞌ, Josuénaꞌ gokeꞌ xiiṉ Eliezeraꞌ, Eliezeraꞌ gokeꞌ xiiṉ Jorimaꞌ, Jorimaꞌ gokeꞌ xiiṉ Matataꞌ.
30 Matataꞌ gokeꞌ xiiṉ Levínaꞌ, Levínaꞌ gokeꞌ xiiṉ Simeónnaꞌ, Simeónnaꞌ gokeꞌ xiiṉ Judánaꞌ, Judánaꞌ gokeꞌ xiiṉ Josénaꞌ, Josénaꞌ gokeꞌ xiiṉ Jonánnaꞌ, Jonánnaꞌ gokeꞌ xiiṉ Eliaquimaꞌ.
31 Eliaquimaꞌ gokeꞌ xiiṉ Meleanaꞌ, Meleanaꞌ gokeꞌ xiiṉ Mainánaꞌ, Mainánaꞌ gokeꞌ xiiṉ Matátanaꞌ, naꞌ Matátanaꞌ gokeꞌ xiiṉ Natánnaꞌ.
32 Natánnaꞌ gokeꞌ xiiṉ Davinaꞌ, Davinaꞌ gokeꞌ xiiṉ Isaínaꞌ, Isaínaꞌ gokeꞌ xiiṉ Obedaꞌ, Obedaꞌ gokeꞌ xiiṉ Boozaꞌ, naꞌ Boozaꞌ gokeꞌ xiiṉ Salmónnaꞌ, Salmónnaꞌ gokeꞌ xiiṉ Naasónnaꞌ.
33 Naasónnaꞌ gokeꞌ xiiṉ Aminadabaꞌ, Aminadabaꞌ gokeꞌ xiiṉ Aramaꞌ, Aramaꞌ gokeꞌ xiiṉ Ezromaꞌ, Ezromaꞌ gokeꞌ xiiṉ Fárezaꞌ, Fárezaꞌ gokeꞌ xiiṉ Judánaꞌ.
34 Judánaꞌ gokeꞌ xiiṉ Jacobaꞌ, Jacobaꞌ gokeꞌ xiiṉ Isaacaꞌ, Isaacaꞌ gokeꞌ xiiṉ Abrahamaꞌ, Abrahamaꞌ gokeꞌ xiiṉ Tarénaꞌ, Tarénaꞌ gokeꞌ xiiṉ Nacoraꞌ.
35 Nacoraꞌ gokeꞌ xiiṉ Serugaꞌ, Serugaꞌ gokeꞌ xiiṉ Ragaunaꞌ, Ragaunaꞌ gokeꞌ xiiṉ Pelegaꞌ, Pelegaꞌ gokeꞌ xiiṉ Heberaꞌ, Heberaꞌ gokeꞌ xiiṉ Sálanaꞌ.
36 Sálanaꞌ gokeꞌ xiiṉ Cainánnaꞌ, Cainánnaꞌ gokeꞌ xiiṉ Arfaxadaꞌ, Arfaxadaꞌ gokeꞌ xiiṉ Semaꞌ, Semaꞌ gokeꞌ xiiṉ Noénaꞌ, Noénaꞌ gokeꞌ xiiṉ Lamecaꞌ.
37 Lamecaꞌ gokeꞌ xiiṉ Matusalénnaꞌ, Matusalénnaꞌ gokeꞌ xiiṉ Enocaꞌ, Enocaꞌ gokeꞌ xiiṉ Jaredaꞌ, Jaredaꞌ gokeꞌ xiiṉ Mahalaleelaꞌ, Mahalaleelaꞌ gokeꞌ xiiṉ Cainánnaꞌ.
38 Cainánnaꞌ gokeꞌ xiiṉ Enózaꞌ, Enózaꞌ gokeꞌ xiiṉ Setaꞌ, Setaꞌ gokeꞌ xiiṉ Adánnaꞌ, naꞌ Adánnaꞌ gokeꞌ xiiṉ Chiozaꞌ.