Juannaꞌ, beenaꞌ bchoa beṉꞌ nisaꞌ
3
Naꞌ do kanaꞌ, Juan, beenaꞌ bchoa beṉꞌ nisaꞌ, wyajeꞌ to latj ganaꞌ bibi chashj chḻeb ganaꞌ mbani Judeanaꞌ, naꞌ wdix̱jeꞌileꞌ beṉꞌkaꞌ chdiꞌa chllag naꞌ,
2 chiꞌe:
―Ḻi yiyaj yileni dii malkaꞌ chonle, ḻaꞌ ba bllin lla iṉabiaꞌ Chiozaꞌ, beenaꞌ zoa yabanaꞌ, ḻoo yic̱hjlallꞌdoꞌlenaꞌ.
3 Naꞌ dii Isaíazaꞌ, beenaꞌ wdix̱jee daa goll Chiozaꞌneꞌ, wneꞌ c̱he Juannaꞌ:
To beṉꞌ gosyee to lo latj ga bibi chashj chḻeb, naꞌ iṉeꞌ:
“Ḻi se kwas wzenagle c̱he X̱anchonaꞌ
naꞌ wsalj yic̱hjlallꞌdoꞌlekaꞌ katꞌ zee.”
4 Naꞌ Juannaꞌ beneꞌ xeꞌnaꞌ de xa kamey, naꞌ nc̱hej lsineenaꞌ to yid. Naꞌ wdaweꞌ bishꞌzo len shin baser daa de lyix̱aa.
5 Naꞌ beṉꞌkaꞌ lleꞌ yell Jerusalénnaꞌ, naꞌ doxen ganaꞌ mbani Judeanaꞌ naꞌ yellkaꞌ llia gaoz yao Jordánnaꞌ jazenaggakeꞌ dillaa choꞌe.
6 Naꞌ bix̱oadoḻꞌgakeꞌ saaxya c̱heꞌkaꞌ, naꞌ bchoa Juannaꞌ ḻegakeꞌ nisaꞌ ḻoo yao Jordánnaꞌ.
7 Naꞌ ka bleꞌi Juannaꞌ zan fariseokaꞌ naꞌ saduceokaꞌ bllingakeꞌ laweꞌnaꞌ kwenc̱he wchoeꞌ ḻegakeꞌ nisaꞌ, naꞌ golleꞌ ḻegakeꞌ:
―¡Leꞌ naklikzle ka beḻ zṉia! ¿Achakile wak wxoṉjileꞌ yeḻꞌ zakꞌziꞌ daa wseḻꞌ Chiozaꞌ?
8 Ḻi gon ka gakbeꞌi beṉꞌ nan dii ḻi ba biyaj bilenile.
9 Naꞌ bi gakzile bibi yeḻꞌ zakꞌziꞌ ileꞌile daa iṉazle: “Netoꞌ nakntoꞌ xiiṉ dia c̱he dii Abrahamaꞌ.” Dii ḻi niaꞌ leꞌ, ax̱t yajki wak gon Chiozaꞌ xiiṉ dia c̱he dii Abrahamaꞌ.
10 Yogꞌḻoḻ-le shi bi chonle ka chiyoolallii Chiozaꞌ naꞌ gak c̱hele ka chak c̱he to yag dii chbia dii zix̱ dii bi chak wen, naꞌ lii chc̱hogtegakeꞌ ax̱t xanin naꞌ chzaḻꞌgakeꞌn lo yiꞌnaꞌ.
11 Dii ḻi nadꞌ chchoaꞌ leꞌ nisaꞌ daa chiyaj chilenile, per beenaꞌ ziꞌ zaꞌ kollaanaꞌ napcheꞌ yeḻꞌ wak xench ka nadꞌ, naꞌ ni bi zakaa gakꞌ xmoseꞌ kwenc̱he galjꞌ xeleꞌnaꞌ. Ḻenꞌ goneꞌ ka yidsoa Espíritu Sántonaꞌ ḻoo yic̱hjlallꞌdoꞌlenaꞌ, ka leꞌ chiyaj chilenileꞌ, naꞌ beṉꞌkaꞌ bi chiyaj chileni wzaḻee ḻegakeꞌ lo yiꞌ gabiḻaꞌ.
12 Naꞌ goneꞌ c̱he beṉꞌ yell-lioni ka chon beenaꞌ nox̱ꞌ yag xozaa daa chpaꞌileꞌ trígonaꞌ naꞌ kooshawee trígonaꞌ naꞌ wzeyeꞌ beb c̱heyinnaꞌ lo yiꞌnaꞌ daa biga yiyolkzə.
Jesúzaꞌ wchoeꞌ nisaꞌ
(Mr. 1:9-11; Lc. 3:21-22; Jn 1:31-34)
13 Naꞌch wzaꞌ Jesúzaꞌ ganaꞌ mbani Galileanaꞌ wyajeꞌ choꞌa yao Jordánnaꞌ kwenc̱he wchoa Juannaꞌneꞌ nisaꞌ.
14 Naꞌ ka bllineꞌ, bi nan cheeni Juannaꞌ wchoeꞌneꞌ nisaꞌ, san chiꞌeneꞌ:
―Liꞌlan chiyaḻꞌ wchoꞌ nadꞌ nisaꞌ, naꞌ liꞌlə zaꞌzoꞌ kwenc̱he wchoaꞌ liꞌ nisaꞌ.
15 Per Jesúzaꞌ golleꞌneꞌ:
―Ben goklen bchoaꞌ nadꞌ nisaꞌ ḻaꞌ chiyaḻꞌ goncho ka nak daa nllia Chiozaꞌ biaꞌ goncho. Naꞌch bchoeꞌneꞌ nisaꞌ.
16 Naꞌ kon ka biyoll bchoeꞌneꞌ nisaꞌ lii bichejte Jesúzaꞌ ḻoo nisaꞌ naꞌ lii byaljte yabanaꞌ naꞌ bleꞌileꞌ Espíritu c̱he Chiozaꞌ chetjeꞌ ka to palom naꞌ jsoaleneꞌ ḻeꞌ.
17 Naꞌch bengakileꞌ shii Chiozaꞌ zoa yabanaꞌ chiꞌe:
―Beenin nakeꞌ Xiiṉꞌ, beenaꞌ chakidꞌ, naꞌ ḻe chibaidꞌ ḻeꞌ.