Wyaj beṉꞌ sinꞌkaꞌ jawiagakeꞌ Jesúzaꞌ
2
Jesúzaꞌ goljeꞌ yell Belénnaꞌ, daa llia ganaꞌ mbani Judeanaꞌ, kanaꞌ chṉabiaꞌ Heródezaꞌ. Naꞌch baḻ beṉꞌ sinꞌ, beṉꞌ nsed c̱he beljkaꞌ, zaꞌgakeꞌ ka de ganaꞌ chlaꞌlə wbillaꞌ, bllintegakeꞌ Jerusalénnaꞌ.
2 Naꞌ cheꞌgakeꞌ:
―¿Gaṉi rey c̱he beṉꞌ Israelkaꞌ, biꞌnaꞌ ba golj? Ṉezintoꞌ ba goljbꞌ ḻaꞌ ka de ganaꞌ chlaꞌlə wbillaꞌ bleꞌintoꞌ to belj dii bzajniin netoꞌ nan ba goljbꞌ, daan ba zaꞌntoꞌ kwenc̱he weꞌlaꞌontoꞌbꞌ.
3 Naꞌ ka beni Heródezaꞌ daa wnagakeꞌ, gokshejlallee, naꞌ ḻekzkaꞌ yogꞌḻoḻ beṉꞌ Jerusalénkaꞌ.
4 Naꞌch Heródezaꞌ goxeꞌ yogꞌḻoḻ bx̱ozkaꞌ chṉabiaꞌ, naꞌ beṉꞌkaꞌ chliꞌ chsedi ley c̱he dii Moisézaꞌ, naꞌ wṉabileꞌ ḻegakeꞌ gan chiyaḻꞌ galj Crístonaꞌ, beenaꞌ wseḻꞌ Chiozaꞌ iṉabiꞌe.
5 Naꞌch gollgakeꞌneꞌ:
―Yell Belénnaꞌ daa mbani Judeananꞌ galjeꞌ, ḻaꞌ kanꞌ bzej to beṉꞌ wdix̱jee daa goll Chiozaꞌ ḻeꞌ, chiꞌe:
6 Naꞌ liꞌ, yell Belén llioꞌ gani mbani Judeani,
aga iṉacho nakoꞌ dii ḻiizelozi bibi zakii ladj yellkaꞌ zakii llia Judeani;
ḻaꞌ lawoꞌni ichej to beṉꞌ iṉabiꞌe,
naꞌ gap wwieꞌ beṉꞌ Israelkaꞌ, beṉꞌkaꞌ nak yell c̱haꞌ.
7 Naꞌch Heródezaꞌ, ka kono gokbeꞌzi goxeꞌ beṉꞌ sinꞌkaꞌ naꞌ wṉabileꞌ ḻegakeꞌ batyeṉꞌan bleꞌgakileꞌ beljaꞌ.
8 Naꞌch bseḻee ḻegakeꞌ Belénnaꞌ naꞌ golleꞌ ḻegakeꞌ:
―Ḻi shaj, naꞌ ḻi lljadiljyoll biꞌdoꞌnaꞌ, naꞌ katꞌ yillelilebꞌ naꞌ yidṉale nadꞌ kwenc̱he lenꞌ shaꞌ lljeꞌlawaabꞌ.
9 Naꞌ ka biyoll goll Heródezaꞌ kaꞌ, naꞌch wzaꞌgakeꞌ. Naꞌ beljaꞌ daa bleꞌgakileꞌ kanaꞌ ziꞌ saꞌgakeꞌ, zejan xan yabanaꞌ llialon laweꞌkaꞌ, naꞌ ka bllinan ganaꞌ zoa biꞌdoꞌnaꞌ, naꞌ naꞌzə wzoan.
10 Naꞌ ka bizleꞌi beṉꞌ sinꞌkaꞌ beljaꞌ, ḻe bibagakileꞌ.
11 Naꞌch ka wyoogakeꞌ ḻoo yoonaꞌ bleꞌgakileꞌ biꞌdoꞌnaꞌ len xṉaꞌbꞌ Maríanaꞌ. Naꞌch bc̱hekꞌ xibeꞌkaꞌ naꞌ beꞌlaꞌogakeꞌbꞌ. Naꞌ wlejgakeꞌ or, naꞌ yal zix̱, naꞌ ḻekzkaꞌ len nillꞌ c̱he to yag dii chḻaꞌ zix̱ daa le mirra, naꞌ beꞌgakeꞌn c̱hebꞌ.
12 Ka biyoll beꞌlaꞌogakeꞌbꞌ, Chiozaꞌ bsiꞌnileꞌ ḻegakeꞌ lo yel bishgal c̱heꞌkaꞌ kwenc̱he bich yidegakeꞌ ganaꞌ zoa Heródezaꞌ. Daan, bikaagakeꞌ nez yoblə ziyajgakeꞌ lalleꞌkaꞌ.
Bxoṉjgakeꞌ wzaꞌgakeꞌ Egíptonaꞌ
13 Ka wde bizaꞌ beṉꞌ sinꞌkaꞌ, to anjl c̱he X̱ancho Chiozaꞌ bliꞌlaweꞌ Josénaꞌ lo bishgal c̱heꞌnaꞌ chiꞌeneꞌ:
―Wyas, naꞌ bc̱heꞌ bdoꞌnaꞌ len xṉaꞌbaa naꞌ ḻi shaj ganaꞌ mbani Egíptonaꞌ. Naꞌ naꞌz soale ax̱t katꞌch iṉiaꞌ liꞌ yizaꞌle. Ḻaꞌ Heródezaꞌ yiyiljeꞌ bdoꞌnaꞌ kwenc̱he witeꞌbꞌ.
14 Naꞌch lii wyaste Josénaꞌ naꞌ bc̱hiꞌe bdoꞌnaꞌ len xṉaꞌbaa, naꞌ waḻ-lə wzaꞌgakeꞌ zejlengakeꞌbꞌ ganaꞌ mbani Egíptonaꞌ.
15 Naꞌ wzoagakeꞌ naꞌzə ax̱t ka bllin lla wit Heródezaꞌ. Naꞌ daa gok kaꞌ, gok ka goll X̱ancho Chiozaꞌ to beṉꞌ wdix̱jee daa golleꞌneꞌ, kanaꞌ wneꞌ: “Nadꞌ biṉiaꞌ biꞌ c̱haꞌnaꞌ kwenc̱he bizaꞌbꞌ ganaꞌ mbani Egíptonaꞌ.”
Ben Heródezaꞌ mandad witgakeꞌ biꞌdoꞌkaꞌ
16 Naꞌ ka gokbeꞌi Heródezaꞌ bi ben beṉꞌ sinꞌkaꞌ ka golleꞌ ḻegakeꞌ, ḻe bllee. Naꞌ beneꞌ mandad witgakeꞌ yogꞌḻoḻ biꞌ byodoꞌkaꞌ lleꞌ yell Belénnaꞌ len yellkaꞌ ndiḻ nllagan, bdoꞌ cheeṉkaꞌ ax̱t biꞌ c̱hop yizi, bsakee ka to yizkaꞌ ba gok bleꞌi beṉꞌ sinꞌkaꞌ beljaꞌ.
17 Naꞌ daa bengakeꞌ kaꞌ, gok daa wna dii Jeremíazaꞌ, beenaꞌ wdix̱jee daa goll Chiozaꞌ ḻeꞌ, ka wneꞌ:
18 Kweꞌ wbell naꞌ gakyeshii beṉꞌkaꞌ lleꞌ yellaꞌ le Ramá.
Noolkaꞌ nak xiiṉ dia c̱he dii Raquelaꞌ
ni to kono cheengakileꞌ gonxenlallꞌ ḻegakeꞌ,
daa wit biꞌdoꞌ c̱heꞌkaꞌ.
19 Naꞌch ka wde wit Heródezaꞌ, to anjl c̱he X̱ancho Chiozaꞌ bliꞌlaweꞌ Josénaꞌ lo yel bishgal c̱heꞌnaꞌ shlak ni zoeꞌ Egíptonaꞌ, naꞌ chiꞌeneꞌ:
20 ―Wyas, bic̱heꞌ biꞌdoꞌnaꞌ len xṉaꞌbaa naꞌ ḻi yiyaj ganaꞌ mbani Israelaꞌ, ḻaꞌ ba wit beṉꞌkaꞌ cheengakileꞌ witgakeꞌbꞌ.
21 Naꞌch wyas Josénaꞌ naꞌ bic̱hiꞌe biꞌdoꞌnaꞌ len xṉaꞌbaa naꞌ biyajgakeꞌ ganaꞌ mbani Israelaꞌ.
22 Naꞌ ka wṉezi Josénaꞌ Arquelawaꞌ ba chṉabiꞌe lo laz dii x̱eꞌ Heródezaꞌ, naꞌ bllebeꞌ yiyajgakeꞌ Judéanaꞌ. Naꞌ Chiozaꞌ wdix̱jeꞌileꞌneꞌ lo yel bishgal c̱heꞌnaꞌ yiyajgakeꞌ ganaꞌ mbani Galileanaꞌ.
23 Naꞌ ka billingakeꞌ Galileanaꞌ jazoagakeꞌ yell Nazaretaꞌ. Naꞌ daa jazoagakeꞌ naꞌ, gok ka wna dii beṉꞌkaꞌ wdix̱jee daa goll Chiozaꞌ ḻegakeꞌ kaniꞌyi c̱he Jesúzaꞌ, wnagakeꞌ wsiꞌgakeꞌneꞌ beṉꞌ Nazaret.