Jempl c̱he to beṉꞌ goz gooṉ
13
Naꞌ lo llanaꞌtezə wzaꞌ Jesúzaꞌ yoonaꞌ ganaꞌ zoeꞌ naꞌ jc̱hiꞌe choꞌa nisdoꞌnaꞌ.
2 Naꞌ daa bdop beṉꞌ zan ganaꞌ chiꞌe, naꞌ wyepeꞌ jshieꞌ to ḻoo barkw. Naꞌ yogꞌ beṉꞌkaꞌ bdop bllag wzegakeꞌ choꞌa nisdoꞌnaꞌzə.
3 Naꞌch bseesee zan jemplkaꞌ kwenc̱he bliꞌ bsedileꞌ ḻegakeꞌ, chiꞌe:
―To beṉꞌ goz gooṉ wzee zejeꞌ gozaꞌ.
4 Naꞌ ka zej chzaḻee biṉnaꞌ, bxop baḻan choꞌa nezaꞌ naꞌ bllin byiṉkaꞌ wdaogakban.
5 Naꞌ zi baḻan bxop ladj yajkaꞌ ganaꞌ bitek chiꞌ yonaꞌ, naꞌ ḻobeꞌ bilaan daa bi wyazan zitj.
6 Naꞌ ka wṉaꞌn wbillaꞌ, bkwedan naꞌ wbillten daa bitek bde loinnaꞌ.
7 Naꞌ zi baḻan bxop ladj yag yeshꞌkaꞌ, naꞌ bgol yag yeshꞌkaꞌ naꞌ bi beꞌgakan latj igolgakan.
8 Naꞌ zi baḻan bxop lo yo wennaꞌ, naꞌ wlliachgan. Baḻan wllia to guiyoa, naꞌ zi baḻan wllia guiyon naꞌ zi baḻan wllia shichoa.
9 Ka leꞌ chenile dga niaꞌ, ḻi sen wṉeyi.
Jesúzaꞌ bzajniileꞌ bic̱he chzoeꞌ jemplkaꞌ
10 Naꞌ beṉꞌkaꞌ nak Jesúzaꞌ txen jabigꞌgakeꞌ kwiteꞌnaꞌ, wṉabgakileꞌneꞌ:
―¿Bic̱he chseesoo jemplkaꞌ katꞌ chliꞌ chsediloꞌ beṉꞌ?
11 Naꞌ cheꞌ Jesúzaꞌ ḻegakeꞌ:
―Chiozaꞌ choꞌe latj iṉezile ka nak yeḻꞌ wṉabiaꞌ c̱heꞌnaꞌ daa kono ṉezi. Naꞌ beṉꞌkaꞌ bi nak nadꞌ txen, bi choꞌe latj iṉezgakileꞌn.
12 Ḻaꞌ beenaꞌ ze wṉeyi shajniileꞌ Choꞌa Xtillꞌ Chiozaꞌ, zizikli shajniꞌchileꞌn. Naꞌ beenaꞌ bi se wṉeyi shajniileꞌn, naꞌ gaḻ-lallee daa ba wyajniileꞌ latꞌ.
13 Daan chseesaa jemplkaꞌ katꞌ chzajniidꞌ ḻegakeꞌ. Ḻaꞌ beṉꞌkaꞌ chwiategakeꞌ naꞌ bi chakbeꞌgakileꞌ bin zeji daa chonꞌ, naꞌ chengakileꞌ daa chṉiaꞌ naꞌ bi chajniꞌgakileꞌ bin zejin, daa bi chajḻeꞌgakeꞌ c̱haꞌ.
14 Naꞌ daa chongakeꞌ kaꞌ, chillinin ka wna dii Isaíazaꞌ ka wdix̱jiꞌe daa goll Chiozaꞌneꞌ, daa na:
Ḻaꞌkzi yengakileꞌ, aga wyajniꞌgakileꞌ bi zeji daa yengakileꞌ.
Naꞌ ḻaꞌkzi ileꞌgakileꞌ, aga wakbeꞌgakileꞌ bi zeji daa ileꞌgakileꞌ.
15 Ḻaꞌ yic̱hjlallꞌdoꞌekaꞌ nc̱hoḻ nnitin,
naꞌ chongakeꞌ ka beṉꞌ ndap naguin
naꞌ ka beṉꞌ nshodꞌ jalawin.
Sheḻꞌ bi chongakeꞌ kaꞌ, naꞌ shajniꞌgakileꞌ daa chzajniidꞌ ḻegakeꞌ
naꞌ c̱hazan ḻoo yic̱hjlallꞌdoꞌekaꞌ
naꞌ yiyaj yilengakileꞌ dii malkaꞌ chongakeꞌ,
naꞌ yiyongakee sto beṉꞌ wen.
16 ’Per chakomba leꞌ chakbeꞌile bi zeji diikaꞌ chleꞌile chonꞌ naꞌ chajniile diikaꞌ chliꞌ chsedidꞌ.
17 Dii ḻi niaꞌ leꞌ, zan dii beṉꞌkaꞌ wdix̱jee daa goll Chiozaꞌ ḻegakeꞌ naꞌ zan dii beṉꞌkaꞌ bsaꞌ c̱heyin wen lao Chiozaꞌ goklallꞌgakeꞌ ileꞌgakileꞌ ka dga chleꞌile ṉaa, naꞌ bi bleꞌgakileꞌn. Naꞌ goklallꞌgakeꞌ yengakileꞌ ka dga chenile ṉaa naꞌ bi bengakileꞌn.
Bizajnii Jesúzaꞌ ḻegakeꞌ bi zeji jempl c̱he beṉꞌ goz gooṉaꞌ
18 ’Ḻi wzenag bin zeji jempl c̱he beṉꞌ goz gooṉaꞌ.
19 Beenaꞌ cheni choꞌa xtillꞌ Chiozaꞌ daa chzajniin ḻeꞌ c̱he yeḻꞌ wṉabiaꞌ c̱heꞌnaꞌ, naꞌ bi chajniileꞌn, nakeꞌ ka choꞌa nezaꞌ ganaꞌ bxop binṉaꞌ daa wdao byiṉdoꞌkaꞌ, ḻaꞌ dii x̱iwaa chikwasan choꞌa xtillꞌ Chiozaꞌ daa wyoo ḻoo yic̱hjlallꞌdoꞌenaꞌ.
20 Naꞌ beenaꞌ cheni choꞌa xtillꞌ Chiozaꞌ naꞌ ḻe chibaileꞌ chlebeꞌn, nakeꞌ ka ladj yajkaꞌ ganaꞌ bxop biṉnaꞌ
21 daa bitek bi loin bde naꞌ bi bdian. Ḻaꞌ katꞌ bi chak c̱heꞌ wa chc̱hiꞌ chsakꞌ beṉꞌ ḻeꞌ ni c̱he choꞌa xtillꞌ Chiozaꞌ, naꞌ lii chbejte yic̱hjeꞌn.
22 Naꞌ beenaꞌ cheni choꞌa xtillꞌ Chiozaꞌ per chiꞌ yic̱hjeꞌ diikaꞌ chak c̱heꞌ naꞌ chzelallꞌtieꞌ yeḻꞌ wniꞌanaꞌ, naꞌ chsej chllongakan gon xshin choꞌa xtillꞌ Chiozaꞌ lo yeḻꞌ mban c̱heꞌnaꞌ. Beenanꞌ nakeꞌ ka daa blaꞌ ladj yag yeshꞌkaꞌ daa bi beꞌgakan latj igolan.
23 Per beenaꞌ cheni choꞌa xtillꞌ Chiozaꞌ naꞌ chajniileꞌn naꞌ choneꞌ ka nan, nakeꞌ ka yo wennaꞌ ganaꞌ bxop biṉnaꞌ, naꞌ baḻan wllian to guiyoa, baḻan do guiyon, naꞌ zi baḻan wllian shichoa.
Jempl c̱he yix̱aa daa blaꞌ ladj trígonaꞌ
24 Naꞌ bseesꞌ Jesúzaꞌ sto jempl, chiꞌe ḻegakeꞌ:
―Yeḻꞌ wṉabiaꞌ c̱he Chiozaꞌ nakan ka to beṉꞌ gozeꞌ biṉ wennaꞌ lo yell-lio c̱heꞌnaꞌ.
25 Per waḻ chelaꞌ shlak cheseꞌ, wyaj to beṉꞌ chakzbanileꞌneꞌ jezeꞌ ladj trígonaꞌ daa nak x̱enin, naꞌ ka biyoll beneꞌ kaꞌ bizee.
26 Naꞌ ka bgol trígonaꞌ naꞌ wllian, naꞌ ḻekzkaꞌ bgolte x̱eninnaꞌ ladjinnaꞌ.
27 Naꞌ wyaj wen llinkaꞌ jellgakeꞌ x̱aninnaꞌ: “Beṉꞌdoꞌ, ¿aaga biṉ wennan jezoꞌ lo c̱hoꞌnaꞌ? ¿Gara wzaꞌ x̱eninnaꞌ lenzan ladjinnaꞌ, lla?”
28 Naꞌ cheꞌ x̱aninnaꞌ ḻegakeꞌ: “Nochodꞌ beṉꞌ chakzbanileꞌ nadꞌ jeneꞌ kaꞌ.” Naꞌ goll wen llinkaꞌ ḻeꞌ: “¿Acheeniloꞌ shajntoꞌ lljaḻallꞌntoꞌn?”
29 Naꞌ chiꞌe ḻegakeꞌ: “Bi lljaḻallꞌlen, ḻaꞌ nxoll lente trígonaꞌ wḻallꞌle.
30 San igol-lenchan trígonaꞌ, naꞌ katꞌ illin lla yic̱hoggakeꞌn, naꞌ yepꞌ beṉꞌkaꞌ zigaate yiḻallꞌgakeꞌ x̱eninnaꞌ naꞌ gongakeꞌn shḻen wej kwenc̱he sheyan, naꞌtech yitopgakeꞌ trígonaꞌ naꞌ yigooshaoꞌgakeꞌn ḻoo lillinnaꞌ.”
Jempl c̱he sa mostásanaꞌ
31 Naꞌ ḻekzkaꞌ bzoa Jesúzaꞌ sto jempl, chiꞌe:
―Yeḻꞌ wṉabiaꞌ c̱he Chiozaꞌ nakan ka sa mostásanaꞌ daa goz to beṉꞌ lo yell-lio c̱heꞌnaꞌ.
32 Ḻaꞌkzi sa mostásanaꞌ nakan ḻiizelozi diidoꞌ yid lao bichlə sa yix̱ꞌ kwan, katꞌ chḻaꞌn naꞌ chgolan naꞌ chakan dii xench aga ka yix̱ꞌ kwankaꞌ sto, naꞌ ax̱t byiṉdoꞌkaꞌ chon lillbkaꞌ lo xoziinnaꞌ.
Jempl c̱he levadúranaꞌ
33 Naꞌ ḻekzkaꞌ bzoeꞌ sto jempl, chiꞌe:
―Yeḻꞌ wṉabiaꞌ c̱he Chiozaꞌ nakan ka levadúranaꞌ daa chc̱hix̱ to noolə shoṉa rob yezjaꞌ kwenc̱he yisgolan kwa c̱he yetxtilaꞌ.
Jesúzaꞌ bc̱hineꞌ jemplkaꞌ
34 Jesúzaꞌ toshiizi bc̱hineꞌ jemplkaꞌ ka biꞌe dillꞌ ladj lao lkweꞌ beṉꞌ.
35 Naꞌ daa ben Jesúzaꞌ kaꞌ, billinin daa wdix̱jee to beṉꞌ daa goll Chiozaꞌneꞌ, ka wneꞌ:
Wc̱hinꞌ jemplkaꞌ ka weꞌlenꞌ beṉꞌ dillꞌ.
Weꞌlenꞌ beṉꞌ dillꞌ c̱heyi daa konoṉꞌ iṉezi dezd kanaꞌ bx̱e bsilte Chiozaꞌ yell-lioni.
Bizajnii Jesúzaꞌ bi zeji jempl c̱he yix̱aa daa blaꞌ ladj trígonaꞌ
36 Naꞌ bisaꞌ Jesúzaꞌ beṉꞌkaꞌ lleꞌ naꞌ, naꞌ biyoꞌe ḻoo yoonaꞌ. Naꞌ beṉꞌkaꞌ nakgakeꞌneꞌ txen jabigꞌgakeꞌ kwiteꞌnaꞌ cheꞌgakeꞌneꞌ:
―Bizajnii netoꞌ bi zeji jempl c̱he x̱en trígonaꞌ
37 Naꞌ goll Jesúzaꞌ ḻegakeꞌ:
―Kin zejin: Nadꞌ, Beṉꞌ Bseḻꞌ Chiozaꞌ Yell-lioni, zaklebidꞌ beenaꞌ goz trígonaꞌ.
38 Naꞌ doxen yell-lioni zaklebin ganaꞌ goz beenaꞌ trígonaꞌ. Naꞌ beṉꞌkaꞌ choeꞌgakeꞌ latj chṉabiaꞌ Chiozaꞌ yic̱hjlallꞌdoꞌekaꞌ zaklebgakileꞌ trígonaꞌ. Naꞌ beṉꞌkaꞌ choeꞌgakeꞌ latj chṉabiaꞌ dii x̱iwaa yic̱hjlallꞌdoꞌekaꞌ zaklebgakileꞌ x̱en trígonaꞌ.
39 Naꞌ dii x̱iwaa zaklebin beṉꞌ malaꞌ, beenaꞌ jez ladj trígonaꞌ daa nak x̱enin. Naꞌ llanaꞌ chilapgakeꞌ, zaklebin llanaꞌ kwiayiꞌ yell-lioni. Naꞌ anjlkaꞌ zaklebgakileꞌ beṉꞌkaꞌ chiziꞌ chilap trígonaꞌ.
40 Naꞌ ka chitopgakeꞌ daa nak x̱en trígonaꞌ kwenc̱he wzeygakeꞌn, kaꞌkzan gak c̱he beṉꞌkaꞌ chṉabiaꞌ dii x̱iwaa yic̱hjlallꞌdoꞌekaꞌ ka illin lla kwiayiꞌ yell-lioni.
41 Nadꞌ, Beṉꞌ Bseḻꞌ Chiozaꞌ Yell-lioni, wseḻaa anjl c̱haꞌkaꞌ kwenc̱he yitopgakeꞌ beṉꞌ wen dii malkaꞌ naꞌ beṉꞌkaꞌ chzechgakeꞌ beṉꞌ yoblə gongakeꞌ dii malaꞌ.
42 Naꞌ wzaḻꞌgakeꞌ ḻegakeꞌ lo yiꞌ gabiḻaꞌ ganaꞌ kwellyeshꞌgakeꞌ naꞌ gaox̱ax̱j ḻeyeꞌkaꞌ daa ḻe gakshejlallꞌgakeꞌ.
43 Naꞌ beṉꞌ ḻi beṉꞌ shaoꞌkaꞌ shoꞌgakeꞌ balaaṉ choo balaaṉ xen yabanaꞌ ganaꞌ chṉabiaꞌ X̱acho Chiozaꞌ. Ka leꞌ chenile dga niaꞌ, ḻi sen wṉeyi.
Jempl c̱he mechaꞌ ngashꞌ
44 ’Yeḻꞌ wṉabiaꞌ c̱he Chiozaꞌ nakan ka to mech xen dii ngashꞌ to lo yell-lio c̱he beṉꞌ ganaꞌ to beṉꞌ jadiꞌen. Naꞌ naꞌtezə bikwasheen, naꞌ chibaileꞌ jayetꞌ jadieꞌ yogꞌ dii de c̱heꞌ kwenc̱he biziꞌe yell-lionaꞌ ganaꞌ ngashꞌ mechaꞌ.
Jempl c̱he to perla dii zakꞌchga
45 ’Yeḻꞌ wṉabiaꞌ c̱he Chiozaꞌ zaklebin to beṉꞌ choneꞌ delgens c̱he perla dii zakꞌchga.
46 Naꞌ ka bllelileꞌ to dii ḻiizelozi zakii, naꞌch jayetꞌ jadieꞌ yogꞌ dii de c̱heꞌ kwenc̱he wxiꞌen.
Jempl c̱he yix̱j c̱he beḻaꞌ
47 ’Yeḻꞌ wṉabiaꞌ c̱he Chiozaꞌ zaklebin to yix̱j c̱he beḻ. Beṉꞌkaꞌ chzen beḻaꞌ chzaḻꞌgakeꞌ yix̱jaꞌ ḻoo nisdoꞌnaꞌ naꞌ chzenan zan kwen beḻ.
48 Naꞌ katꞌ chillaꞌ yix̱jaꞌ naꞌ chibejgakeꞌn choꞌa nisdoꞌnaꞌ naꞌ chbeꞌgakeꞌ chibegakeꞌ beḻkaꞌ nak wen naꞌ chgooshaoꞌgakeꞌb to ḻoo llom, naꞌ bakaꞌ bi nak wen, chchooṉgakeꞌb.
49 Kanꞌ gak c̱he beṉec̱haꞌ ka illin lla kwiayiꞌ yell-lioni. Anjlkaꞌ yibegakeꞌ beṉꞌ wenkaꞌ ladj beṉꞌ malkaꞌ,
50 naꞌ wzaḻꞌgakeꞌ beṉꞌ malkaꞌ lo yiꞌ gabiḻaꞌ naꞌ kwellyeshꞌgakeꞌ naꞌ gaox̱ax̱j ḻeyeꞌkaꞌ daa ḻe gakshejlallꞌgakeꞌ.
Dii kobaꞌ naꞌ dii golaꞌ
51 Naꞌch cheꞌ Jesúzaꞌ beṉꞌkaꞌ nakgakeꞌneꞌ txen:
―¿Azajniile yogꞌ daa ba bliꞌ bsedidꞌ leꞌ?
Naꞌch cheꞌgakeꞌneꞌ:
―Awe, zajniintoꞌn.
52 Naꞌ chiꞌe ḻegakeꞌ:
―Beenaꞌ chliꞌ chsedi leyaꞌ naꞌ nzedileꞌ c̱he yeḻꞌ wṉabiaꞌ c̱he Chios, beenaꞌ zoa yabanaꞌ, zaklebileꞌ to x̱an yoo beṉꞌ ngooshawee dii zan dii zakii, ka dii kob naꞌ ka dii gol, naꞌ chbejeꞌgakan chc̱hineꞌgakan.
Jesúzaꞌ biyajeꞌ Nazaretaꞌ
53 Ka biyoll bseesꞌ Jesúzaꞌ jemplkaꞌ, naꞌ bizee.
54 Naꞌ ka billineꞌ yell Nazaretaꞌ ganaꞌ bgoleꞌ, naꞌ bliꞌ bsedileꞌ beṉꞌ Israelkaꞌ chdop chllag ganaꞌ choeꞌḻwillgakeꞌ Chiozaꞌ. Naꞌ bibani beṉꞌkaꞌ, cheꞌgakeꞌ:
―¿Gara jx̱iꞌ beeni yeḻꞌ sinꞌ c̱heꞌnaꞌ, naꞌ nak chak choneꞌ yeḻꞌ wakkaꞌ?
55 ¿Aaga xiiṉ karpinteraꞌzan naꞌ xṉeenaꞌ lieꞌ María? Naꞌ ¿aaga beṉꞌ bishee Jacóbonaꞌ, Josénaꞌ, Simónnaꞌ naꞌ Júdazaꞌ?
56 Naꞌ beṉꞌ zaneꞌkaꞌ zoagakeꞌ lallchoni. ¿Gara jasedeꞌ yogꞌḻoḻ diiki chliꞌ chsedileꞌ, lla?
57 Naꞌ daa bi wyajḻeꞌgakeꞌ c̱he Jesúzaꞌ, naꞌ golleꞌ ḻegakeꞌ:
―To beṉꞌ chyix̱jee daa cheꞌ Chiozaꞌneꞌ, gattez chgoogakeꞌneꞌ balaaṉ san lall lilleꞌnaꞌ aga no chgoo ḻeꞌ balaaṉ.
58 Naꞌ aga bitek yeḻꞌ wak ben Jesúzaꞌ yell Nazaretaꞌ daa bi wyajḻeꞌgakeꞌ c̱heꞌ.