Beṉꞌkaꞌ nak Jesúzaꞌ txen wdishjgakeꞌ trígonaꞌ llanaꞌ chombaaṉgakeꞌ
12
To lla sabd, llanaꞌ chombaaṉ beṉꞌ Israelkaꞌ, wdelen Jesúzaꞌ beṉꞌkaꞌ nakgakeꞌneꞌ txen to ga naz to beṉꞌ trígonaꞌ, naꞌ beṉꞌkaꞌ zejlengakeꞌneꞌ wzolo wdishjgakeꞌ trígonaꞌ naꞌ wdaogakeꞌn.
2 Naꞌ ka bleꞌi fariseokaꞌ daa chon beṉꞌkaꞌ, naꞌch cheꞌgakeꞌneꞌ:
―Bwia ka chon beṉꞌki nakgakeꞌ liꞌ txen, chongakeꞌ daa bi chiyaḻꞌ goncho llani chombaaṉcho.
3 Naꞌch cheꞌ Jesúzaꞌ ḻegakeꞌ:
―¿Abiṉꞌ wlable ka ben dii Davinaꞌ len beṉꞌkaꞌ nakgakeꞌneꞌ txen ka wdongakeꞌ?
4 Wyoꞌe ḻoo lill xḻatj Chiozaꞌ naꞌ wdoyoeꞌ yetxtilkaꞌ daa naki c̱he Chiozaꞌ daa toz bx̱ozkaꞌ de lsens gaogakeꞌ.
5 ¿Abiṉꞌ wlable leyaꞌ ganaꞌ nan aga bi xya nakan c̱he bx̱ozkaꞌ ḻaꞌkzi chongakeꞌ llinnaꞌ ḻoo yoodoꞌnaꞌ llakaꞌ chombaaṉcho?
6 Naꞌ niaꞌ leꞌ, ladjleni zoa to beṉꞌ zakꞌcheꞌ aga ka yoodoꞌnaꞌ.
7 Bilja wyajniile bi zeji Choꞌa Xtillꞌ Chiozaꞌ daa na: “Nadꞌ cheenchidꞌ yiyeshii ljwell-le, aga ka daa witle bayix̱ꞌkaꞌ kwenc̱he weꞌlaꞌole nadꞌ.” Ḻaꞌ sheḻꞌ leꞌ wyajniilen, aga waole xya c̱he beṉꞌ bi nap doḻꞌ, sheḻꞌkaꞌ.
8 Nadꞌ, Beṉꞌ Bseḻꞌ Chiozaꞌ Yell-lioni, chṉabiꞌa lao llani chombaaṉcho.
Jesúzaꞌ biyoneꞌ to beṉꞌ llanaꞌ chombaaṉ beṉꞌ Israelkaꞌ
9 Naꞌch bizaꞌ Jesúzaꞌ latjaꞌ, naꞌ biyajeꞌ ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ.
10 Naꞌ ladj beṉꞌkaꞌ len to beṉꞌ net tḻaa neenaꞌ. Naꞌ fariseokaꞌ chwiagakeꞌ naklə ka siꞌ sengakeꞌ kwenc̱he gaogakeꞌ xya c̱he Jesúzaꞌ, naꞌch wṉabgakileꞌneꞌ, cheꞌgakeꞌ:
―¿Beran na leyaꞌ? ¿Ade lsens yiyoncho to beṉꞌ bi shaoꞌ llani chombaaṉcho?
11 Naꞌch cheꞌ Jesúzaꞌ ḻegakeꞌ:
―Shi nole zoa to xilꞌ c̱hele naꞌ ixopb to ḻoo yech llaki chombaaṉcho, ¿abi yibejleb?
12 Naꞌ ¡zakꞌtechlə beṉec̱haꞌ aga ka xilaa! Daan de lsens goncho daa nak wen llaki chombaaṉcho.
13 Naꞌch golleꞌ beenaꞌ net tḻaa neenaꞌ:
―Bḻi noonaꞌ.
Naꞌ ka bḻi neenaꞌ lii biyakten ka nak daa zi shḻaa.
14 Naꞌ ka bizaꞌ fariseokaꞌ ganaꞌ chdop chllaggakeꞌ, beꞌgakeꞌ dillꞌ nak shoꞌ xṉezi witgakeꞌ Jesúzaꞌ.
Daa wna dii Isaíazaꞌ c̱he Jesúzaꞌ
15 Ka gokbeꞌi Jesúzaꞌ daa cheengakileꞌ gongakeꞌ, naꞌ bizee ziyajeꞌ gan yoblə. Naꞌ beṉꞌ zan inlleb janoeꞌneꞌ naꞌ biyoneꞌ yogꞌ beṉꞌkaꞌ bi shaoꞌ.
16 Naꞌ golleꞌ beṉꞌkaꞌ biyoneꞌ bi weꞌgakeꞌ dillꞌ daa choneꞌ.
17 Daa beneꞌ kaꞌ, billinin ka wna dii Isaíazaꞌ, beenaꞌ wdix̱jee daa goll Chiozaꞌneꞌ, kanaꞌ wneꞌ:
18 Beenin nakeꞌ wen llin c̱haꞌ, beenaꞌ ba wlejꞌ,
naꞌ ḻe chakidee naꞌ chazlallaa ka choneꞌ.
Naꞌ wzoaꞌ Espíritu c̱haꞌnaꞌ ḻoo yic̱hjlallꞌdoꞌenaꞌ,
naꞌ c̱hix̱jeꞌileꞌ beṉꞌkaꞌ lleꞌ yell-lioni ka cheenidꞌ gongakeꞌ.
19 Bi gakdiḻ-leneꞌ beṉꞌ,
naꞌ ni bi gosyee wiꞌe dillꞌ yawi nez.
20 Aga wisyoll wistoeꞌ c̱hishjeꞌ yax̱tilaꞌ daa ba chashjə.
naꞌ aga wisoleꞌ meshaꞌ daa ba chiyol,
ax̱t ki goneꞌ gan wliꞌlao yeḻꞌ ḻi yeḻꞌ shaoꞌ c̱heꞌnaꞌ.
21 Naꞌ beṉꞌ lleꞌ doxen yell-lioni gongakeꞌ lez ḻenꞌ gakleneꞌ ḻegakeꞌ.
Nagakeꞌ c̱he Jesúzaꞌ chibejeꞌ dii x̱iwꞌkaꞌ kon yeḻꞌ wak c̱heyinnaꞌ
22 Jwaꞌgakeꞌ lao Jesúzaꞌ to beṉꞌ yoꞌe dii x̱iwꞌ naꞌ bi chleꞌileꞌ ni bi chak iṉieꞌ. Naꞌ bibej Jesúzaꞌ dii x̱iwaa yoꞌe, naꞌ bileꞌileꞌ naꞌ gokte biṉieꞌ.
23 Yogꞌḻoḻ beṉꞌkaꞌ bibangakileꞌ ka nak daa beneꞌ, naꞌ chisneꞌ:
―¿Aaga beenin xiiṉ dia c̱he dii Davinaꞌ, beenaꞌ chbezcho, lla?
24 Ka beni fariseokaꞌ dillaa choeꞌ beṉꞌkaꞌ, naꞌ cheꞌgakeꞌ:
―Aga bi yeḻꞌ wak nap beeni. San yeḻꞌ wak c̱he Bezlonaꞌ,a daa chṉabiaꞌ dii x̱iwꞌkaꞌzan, chibejileꞌ diikaꞌ.
25 Naꞌ gokbeꞌi Jesúzaꞌ daa chzaꞌlallꞌ fariseokaꞌ, naꞌch chiꞌe ḻegakeꞌ:
―Shi ganaꞌ chṉabiaꞌ to beṉꞌ naꞌ tiḻgakeꞌ to ḻezgakeꞌ naꞌ gakgakeꞌ c̱hoplə, naꞌ kwiayiꞌ ganaꞌ chṉabiꞌe, naꞌ kaꞌkzə shi to yell wa beṉꞌ lleꞌ toz yoo gakgakeꞌ c̱hoplə aga wdiagakeꞌ.
26 Kaꞌkzə Satanázaꞌ, shi yibej ljwell dii x̱iwiinkaꞌ yoo beṉꞌ, aga wdia yeḻꞌ wṉabiaꞌ c̱heyinnaꞌ, sheḻꞌkaꞌ, ḻaꞌ to ḻezgakannanꞌ chidiḻ-len kwingakin.
27 Leꞌ nale chibejꞌ dii x̱iwaa yoo beṉꞌ kon yeḻꞌ wak c̱he Bezlonaꞌb daa chṉabiaꞌ ḻegakan. ¿Shera beṉꞌkaꞌ nakle txen? ¿Aḻekzkaꞌ ḻennanꞌ chibejlengakeꞌ dii x̱iwꞌkaꞌ yoo beṉꞌ? Daa bi nakan kaꞌ, naꞌ chliꞌn nakllejile.
28 Naꞌ shi nadꞌ chibejꞌ dii x̱iwꞌkaꞌ kon yeḻꞌ wak c̱he Espíritu c̱he Chiozaꞌ zejin ladjleni ba blaꞌ yeḻꞌ wṉabiaꞌ c̱he Chiozaꞌ.
29 ’Aga no gak shoꞌ lill to beṉꞌ wal naꞌ kwaneꞌ dii de c̱heꞌ shi bi wc̱hejeꞌneꞌ zigaate. Naꞌchan gak kwaneꞌ lilleꞌnaꞌ.
30 ’Beenaꞌ bi choneꞌ nadꞌ txen, ḻenꞌ chakzbanileꞌ nadꞌ; naꞌ beenaꞌ bi chakleneꞌ nadꞌ kwenc̱he wzenag beṉꞌ c̱he Chiozaꞌ, ḻenꞌ chsej chlloneꞌ wzenaggakeꞌ.
31 ’Naꞌ niaꞌ leꞌ, wiziꞌxen Chiozaꞌ yogꞌ saaxya c̱helenaꞌ naꞌ yogꞌte dii malaꞌ daa chbell chṉele, san shi iṉele zban c̱he Espíritu Sántonaꞌ naꞌ c̱heyi diikaꞌ choneꞌ, aga wiziꞌxen Chiozaꞌ c̱hele.
32 Naꞌ shi no iṉe c̱haꞌ, nadꞌ, Beṉꞌ Bseḻꞌ Chiozaꞌ Yell-lioni, ḻekzkaꞌ wiziꞌxen Chiozaꞌ c̱heꞌ, san beenaꞌ iṉe c̱he Espíritu Sántonaꞌ, aga wiziꞌxeneꞌ c̱heꞌ ṉaa zoeꞌ yell-lioni ni katꞌ illin llanaꞌ wc̱hogloeꞌ c̱he beṉꞌ.
Kon ka nak yagaꞌ, kaꞌte nak daa chbian
33 ’Ṉezicho yagaꞌ daa nak wen chbian dii wen, naꞌ yagaꞌ daa bi nak wen aga bi dii wen chbian. Kon ka nak yagaꞌ, kaꞌte nak daa chbian.
34 ¡Leꞌ beṉꞌ wen dii mal! ¿Nakra gonle iṉele daa nak dii wen daa nakle beṉꞌ mal? Ḻaꞌ yogꞌ dillꞌ daa chchej choꞌa ḻollꞌchonaꞌ zaꞌn ḻoo yic̱hjlallꞌdoꞌchonaꞌ.
35 Beenaꞌ nak beṉꞌ wen choꞌe dillꞌ wen, daa yoo dii wennaꞌ ḻoo yic̱hjlallꞌdoꞌenaꞌ; naꞌ beenaꞌ nak beṉꞌ michian bi choꞌe dillꞌ yejniꞌalallii, daa yoo dii michiannaꞌ ḻoo yic̱hjlallꞌdoꞌenaꞌ.
36 Naꞌ nadꞌ niaꞌ leꞌ, katꞌ illin lla yiziꞌ Chiozaꞌ kwent c̱he yogꞌ beṉꞌ, kananꞌ yidele kwent c̱he yogꞌte dillꞌkaꞌ konteḻe wṉele.
37 Ḻaꞌ shi leꞌ choeꞌle dillꞌ wen, naꞌch iṉa Chiozaꞌ bibi doḻꞌ naple; per shi leꞌ bi choeꞌle dillꞌ wen, naꞌ wc̱hogloeꞌ c̱hele sakꞌziꞌle.
Wṉabi beṉꞌ malkaꞌ Jesúzaꞌ wliꞌe to yeḻꞌ wak
38 Naꞌch baḻ fariseokaꞌ naꞌ beṉꞌkaꞌ chliꞌ chsedi leyaꞌ cheꞌgakeꞌ Jesúzaꞌ:
―Maestro, cheenintoꞌ ileꞌintoꞌ gonoꞌ to yeḻꞌ wak kwenc̱he gakbeꞌintoꞌ shi Chiozanꞌ bseḻee liꞌ.
39 Naꞌ cheꞌ Jesúzaꞌ ḻegakeꞌ:
―Leꞌ nakle beṉꞌ mal naꞌ beṉꞌ bi chzenag c̱he Chiozaꞌ chṉable ileꞌileꞌ yeḻꞌ wakaꞌ kwenc̱he wliꞌn shi Chiozanꞌ bseḻee nadꞌ, per aga wliidꞌ leꞌ daa cheenile. Ḻete ileꞌile to dii nak ka yeḻꞌ wak daa ben Chiozaꞌ c̱he dii Jonázaꞌ.
40 Ḻaꞌ Jonázaꞌ wyoꞌe shoṉə lla shoṉə yel ḻoo ḻee beḻ xennaꞌ, naꞌ kaꞌkzə nadꞌ, Beṉꞌ Bseḻꞌ Chiozaꞌ Yell-lioni, shoṉ lla shoṉ yel igaaṉaꞌ ḻoo banaꞌ.
41 Katꞌ illin lla wc̱hoglo Chiozaꞌ c̱he beṉꞌ yell-lioni, kananꞌ dii beṉꞌ Nínivekaꞌ gaogakeꞌ xya c̱hele, leꞌ zoale ṉaa, ḻaꞌ ḻegakeꞌ biyaj bileni saaxya c̱heꞌkaꞌ kanaꞌ wdix̱jeꞌi dii Jonázaꞌ ḻegakeꞌ choꞌa xtillꞌ Chiozaꞌ. Naꞌ nadꞌ, zakꞌtechidꞌ aga ka dii Jonázaꞌ naꞌ bi chzenagle c̱haꞌ.
42 Naꞌ ḻekzkaꞌ llanaꞌ katꞌ wc̱hoglo Chiozaꞌ c̱he beṉꞌ yell-lioni, noolaꞌ wṉabiaꞌ yellkaꞌ lleꞌ do lliꞌlə gaweꞌ xya c̱hele, leꞌ zoale ṉaa, ḻaꞌ ḻenꞌ wzee zitꞌ nlleb bidzenagueꞌ dillꞌ sinꞌ daa wṉe dii Salomónnaꞌ. Naꞌ nadꞌ, zakꞌtechidꞌ aga ka dii Salomónnaꞌ naꞌ bi chzenagle c̱haꞌ.
Dii x̱iwaa daa chiyoo beṉꞌ
43 ’Katꞌ chichej dii x̱iwaa yoo beṉꞌ, naꞌ chdan ganaꞌ bibi chashj chḻeb chyiljan ganaꞌ yiziꞌlalliin. Naꞌ katꞌ bi chllelin ganaꞌ yiziꞌlalliin,
44 naꞌch chakin: “Yiyaachꞌ dii yoblə ganaꞌ bichejkzꞌ.” Naꞌ katꞌ yillinan ganaꞌ bichejan, nakan ka to yoo desh dii nxi nḻoa.
45 Naꞌch lljaxiꞌn zi gall dii x̱iwꞌkaꞌ nakch dii malch aga ka ḻen, naꞌ shoꞌgakan beenaꞌ. Naꞌ gaktech mal c̱he beenaꞌ aga ka gok c̱heꞌ dii nech. Kaꞌkzan gak c̱he beṉꞌ malkaꞌ lleꞌ ṉaa.
Bllin xṉaꞌ Jesúzaꞌ len beṉꞌ bisheekaꞌ ganaꞌ zoeꞌ
46 Ni choeꞌlente Jesúzaꞌ beṉꞌkaꞌ dillaa ka bllin xṉeenaꞌ len beṉꞌ bisheekaꞌ goklallꞌgakeꞌ wshaljlengakeꞌneꞌ naꞌ wzegakeꞌ leshꞌ chyoonaꞌ.
47 Naꞌ goll to beṉꞌ Jesúzaꞌ:
―Xṉoonaꞌ len beṉꞌ bishookaꞌ zegakeꞌ leshꞌ chyoonaꞌ cheengakileꞌ wshaljlengakeꞌ liꞌ.
48 Naꞌ cheꞌ Jesúzaꞌ beenaꞌ golleꞌneꞌ kaꞌ:
―¿Noran xṉaꞌnaꞌ naꞌ noran beṉꞌ bishaakaꞌ?
49 Naꞌch bliꞌe beṉꞌkaꞌ nakgakeꞌneꞌ txen naꞌ chiꞌe: