11
Naꞌ ka biyoll goll Jesúzaꞌ beṉꞌkaꞌ shlliṉ bin chiyaḻꞌ gongakeꞌ, naꞌch bizee naꞌ, naꞌ jaliꞌ jasedileꞌ beṉꞌ naꞌ jtix̱jeꞌileꞌ ḻegakeꞌ choꞌa xtillꞌ Chiozaꞌ yellkaꞌ llia ganaꞌ mbani Galileanaꞌ.
Beṉꞌkaꞌ bseḻꞌ Juan wichoa nisaꞌ
2 Naꞌ Juannaꞌ beenaꞌ chchoa beṉꞌ nisaꞌ, ba dieꞌ lillyanaꞌ. Ka wṉezileꞌ daa chon Crístonaꞌ, naꞌch bseḻee c̱hop beṉꞌkaꞌ nakgakeꞌneꞌ txen ganaꞌ zoeꞌ.
3 Naꞌ jaṉabgakileꞌneꞌ cheꞌgakeꞌ:
―¿Alinꞌ beenaꞌ ba llia biaꞌ yid?, ¿anti chiyaḻꞌ kwezntoꞌ sto beṉꞌ yoblə?
4 Naꞌch cheꞌ Jesúzaꞌ ḻegakeꞌ:
―Ḻi yiyaj naꞌ ḻi lljayell Juannaꞌ daa chenile niaꞌ naꞌ daa chleꞌile chonꞌ.
5 Ḻi lljayelleꞌ chonꞌ ka chleꞌi beṉꞌ lc̱hoḻkaꞌ, naꞌ chizaꞌ beṉꞌkaꞌ bi chak saꞌ, naꞌ chiyaki beṉꞌka cheꞌi lepra, naꞌ chiyeni beṉꞌ kwellkaꞌ, naꞌ chisbanꞌ beṉꞌkaꞌ ba wit, naꞌ chyix̱jeꞌidꞌ beṉꞌ yeshꞌkaꞌ dillꞌ wen dillꞌ kob c̱he Chiozaꞌ.
6 Chakomba beenaꞌ chajḻeꞌ c̱haꞌ naꞌ bi chakc̱hoplallee.
7 Naꞌ ka bizaꞌ beṉꞌkaꞌ bseḻꞌ Juannaꞌ, naꞌch wzolo Jesúzaꞌ beꞌleneꞌ beṉꞌkaꞌ lleꞌ naꞌ xtillꞌ Juannaꞌ, chiꞌe ḻegakeꞌ:
―¿Nakran nsaꞌ c̱he beenaꞌ jawiale latjaꞌ ganaꞌ bibi chashj chḻeb? ¿Anakeꞌ to beṉꞌ chakc̱hoplallii c̱he dillꞌkaꞌ choꞌe?
8 Shi bi nakan kaꞌ, ¿nakran nak beenaꞌ jawiale? ¿Ato beṉꞌ nakw xalaaneꞌ dii ḻe nakə? Bi nakan kaꞌ. Ḻaꞌ ṉezkzile beṉꞌkaꞌ nakw xalaangakeꞌ dii ḻe nak zoagakeꞌ ḻoo yoo lill beṉꞌ wṉabiaꞌkaꞌ.
9 ¿Nakrakzan nak beenaꞌ jawiale? ¿Ato beṉꞌ chyix̱jee daa cheꞌ Chiozaꞌneꞌ? Dii ḻi kanꞌ choneꞌ, naꞌ chontechleꞌ ka beṉꞌkaꞌ chyix̱jee daa cheꞌ Chiozaꞌ ḻegakeꞌ.
10 Ḻaꞌ c̱he beenin choꞌe Choꞌa Xtillꞌ Chiozaꞌ dillꞌ daa nan:
Wseḻaa beenaꞌ kwialo lawoꞌnaꞌ,
naꞌ c̱hix̱jiꞌe xtilloonaꞌ kwenc̱he soa beṉꞌ wzenaggakeꞌ c̱hoꞌ katꞌ illinoꞌ.
11 Dii ḻi niaꞌ leꞌ, ladj yogꞌ beṉꞌ yell-lioki, ni toeꞌ biṉꞌ ichej gakeꞌ beṉꞌ zakꞌchiꞌ aga ka Juannaꞌ beenaꞌ chchoa beṉꞌ nisaꞌ. Per nottezə beenaꞌ choeꞌ latj iṉabiaꞌ Chiozaꞌ yic̱hjlallꞌdoꞌenaꞌ, zakꞌtecheꞌ aga ka Juannaꞌ.
12 ’Kon ka wzolo Juannaꞌ bchoeꞌ beṉꞌ nisaꞌ ax̱t ṉaanlla, zoa beṉꞌ chsej chllongakeꞌ kono wleb yeḻꞌ wṉabiaꞌ c̱he Chiozaꞌ.a
13 Librkaꞌ daa bzej dii beṉꞌkaꞌ wdix̱jee daa goll Chiozaꞌ ḻegakeꞌ naꞌ leyaꞌ bzej dii Moisézaꞌ wdix̱jeegakan c̱he yeḻꞌ wṉabiaꞌ c̱he Chiozaꞌ, naꞌ ḻekzannanꞌ choꞌe Juannaꞌ dillꞌ ṉaa blee.
14 Naꞌ shi cheenile shajḻeꞌle dga niaꞌ leꞌ, ḻekzenꞌ Elíazaꞌ, beenaꞌ nagakeꞌ yid kwenc̱he c̱hix̱jiꞌe choꞌa xtillꞌ Chiozaꞌ.
15 Ka leꞌ chenile dga niaꞌ, ḻi sen wṉeyi.
16 ’¿Bera ka wsaklebidꞌ leꞌ mbanle ṉaa? Leꞌ chonle ka biꞌdoꞌkaꞌ lleꞌ ganaꞌ chak yaanaꞌ naꞌ chosyaagakbꞌ cheꞌ ljwellbꞌ:
17 “Bkwellntoꞌ bllejaꞌ naꞌ bi byaale, naꞌ beḻntoꞌ daa chon nyeshꞌ naꞌ ni bi wchellkzle.”
18 Ḻaꞌ Juannaꞌ bi weej wdaweꞌ dii wen dii shaoꞌ, naꞌ wnagakeꞌ c̱heꞌ: “Dii x̱iwaan yoꞌe.”
19 Naꞌch wdenaꞌ bidꞌ nadꞌ nakꞌ Beṉꞌ Bseḻꞌ Chiozaꞌ Yell-lioni, naꞌ cheej chawꞌ, naꞌ nagakeꞌ nakꞌ to beṉꞌ waox̱at naꞌ to weezo, naꞌ ḻekzkaꞌ nagakeꞌ nonꞌ txen beṉꞌ wen dii malkaꞌ naꞌ beṉꞌ wic̱hixjkaꞌ. Per yeḻꞌ sinꞌ c̱he Chiozaꞌ chliꞌlawin ka chsaꞌ c̱he beṉꞌkaꞌ chzenaggakeꞌ c̱heꞌ.
Yellkaꞌ ganaꞌ bi bzenaggakeꞌ c̱he Jesúzaꞌ
20 Naꞌch wzolo Jesúzaꞌ bsheshleneꞌ beṉꞌ yellkaꞌ ganaꞌ bliꞌcheꞌ yeḻꞌ wakaꞌ, daa bi biyaj bilengakileꞌ xtoḻeekaꞌ. Naꞌ wneꞌ:
21 ―¡Nyeshꞌlaz gak c̱hele, leꞌ beṉꞌ yell Corazín! ¡Nyeshꞌlaz gak c̱hele, leꞌ beṉꞌ yell Betsaida! Ḻaꞌ sheḻꞌ beṉꞌkaꞌ lleꞌ yell Tíronaꞌ naꞌ yell Sidónnaꞌ bleꞌgakileꞌ yeḻꞌ wakkaꞌ ba bleꞌile, lii biyaj bilenteljagakileꞌ xtoḻeekaꞌ, naꞌ gokwljagakeꞌ lechꞌ zeshaa naꞌ bllaagakeꞌ denaꞌ yic̱hjeꞌkaꞌ daa ḻe gokyeshꞌgakileꞌ, sheḻꞌkaꞌ.
22 Naꞌ daa bi biyaj bilenile, ba niaꞌ leꞌ, llanaꞌ wc̱hoglo Chiozaꞌ c̱he benꞌ, dii walch sakꞌziꞌle aga ka beṉꞌ Tírokaꞌ naꞌ beṉꞌ Sidónkaꞌ.
23 Naꞌ leꞌ beṉꞌ Capernaúm, ¿achakile willinle yabanaꞌ? Aga willinle naꞌ, san latj ganaꞌ sakꞌziꞌlen yillinle. Ḻaꞌ sheḻꞌ beṉꞌ Sodómakaꞌ bleꞌgakileꞌ yeḻꞌ wakkaꞌ daa ba bleꞌile, balja biyaj bilengakileꞌ saaxya c̱heꞌkaꞌ naꞌ ni ndia yellaꞌ, sheḻꞌkaꞌ.
24 Daan niaꞌ leꞌ, katꞌ illin lla wc̱hoglo Chiozaꞌ c̱he beṉꞌ, dii walch sakꞌziꞌle aga ka beṉꞌ Sodómakaꞌ.
Mbalaz soa beṉꞌkaꞌ gonḻilallꞌgakeꞌ Jesúzaꞌ
25 Naꞌ lo goraꞌ wṉe Jesúzaꞌ, chiꞌe:
―X̱a, liꞌ nakoꞌ x̱an yabanaꞌ naꞌ yell-lioni, choeꞌlawaa liꞌ daa bkwashiloꞌ beṉꞌ sinꞌkaꞌ diikaꞌ ba bliiloꞌ beṉꞌkaꞌ bibi chajnii.
26 Benoꞌ kaꞌ, X̱a, ḻaꞌ kanꞌ wyazlalloo.
27 Naꞌch goll Jesúzaꞌ beṉꞌkaꞌ:
―X̱aꞌnaꞌ beneꞌ lallꞌ naꞌ yogꞌḻoḻ daa chonꞌ. Naꞌ ni to kono nombiaꞌyeṉꞌ nadꞌ ḻete X̱aꞌnaꞌ, naꞌ ḻekzkaꞌ kono nombiaꞌyeṉꞌ X̱aꞌnaꞌ ḻete nadꞌ nakꞌ Xiiṉeꞌ len beṉꞌkaꞌ cheenidꞌ gonꞌ ka gombiaꞌgakeꞌneꞌ.
28 Ḻi gonḻilallꞌ nadꞌ, yogꞌle leꞌ ba chjshiaile naꞌ nakle ka beṉꞌ ntakw nc̱hej to dii zii dii zshab, naꞌ nadꞌ gonꞌ ka yiziꞌlallꞌle.
29 Ḻi gon ka niaꞌ, naꞌ ḻi wzenag daa chzajniidꞌ leꞌ, ḻaꞌ nadꞌ nakꞌ beṉꞌ gax̱jlallꞌ naꞌ gonꞌ ka gatꞌ yeḻꞌ wixiꞌlallꞌ c̱hele.
30 Daa niaꞌ leꞌ gonle aga nakan dii bi gak gonle, naꞌ daa chliꞌ chsedidꞌ leꞌ bi nakan dii bi so sakile.