Jesúzaꞌ bseḻee guiyon shlliṉ beṉꞌ jtix̱jeꞌgakeꞌ choꞌa xtilleenaꞌ
10
Naꞌ ka wde dga, Jesúzaꞌ wlejeꞌ zi guiyon shi beṉꞌa naꞌ bseḻee c̱hop wejeꞌ wllialogakeꞌ laweꞌnaꞌ kwenc̱he lljeꞌgakeꞌ choꞌa xtilleenaꞌ yellkaꞌ ganaꞌ llia biaꞌ shajeꞌ.
Lucas 10.1-42
―Dii ḻi niaꞌ leꞌ, dii xen wal daa yiziꞌ yilaple de, naꞌ to c̱hoptgui wen llinkaꞌ zoa. Naꞌ ḻi iṉabi Chiozaꞌ, beenaꞌ nak x̱an llinnaꞌ wseḻꞌstoeꞌ wen llinkaꞌ kwenc̱he yiziꞌ yilapgakeꞌn.
3 Ḻi shajshki ṉaa, nadꞌ chseḻaa leꞌ ka xilꞌdoꞌ ba zej ladj ba zṉia.
4 Bi waꞌle ga koo xshinḻazle, ni mech, ni zi shkweꞌ xel-le; naꞌ bi shazile wwaple beṉꞌ chiox tnezaꞌ.
5 Naꞌ ka shoꞌle to lill beṉꞌ, zigaate wwapleneꞌ chiox, yeꞌleneꞌ: “Soashgale mbalaz, leꞌ zoale yooni.”
6 Naꞌ shi zoa beṉꞌ cheenileꞌ soeꞌ mbalaz, naꞌ yeḻꞌ mbalazaꞌ yigaaṉlenan ḻeꞌ. Naꞌ shi bi cheenileꞌ, naꞌ yibiilenan leꞌ.
7 Naꞌ yoonaꞌ ganaꞌ illinle naꞌtezə yigaaṉle naꞌ yeej gaole kon bi goṉgakeꞌ leꞌ, ḻaꞌ to wen llin chiyaḻꞌ ikaa laxjeꞌ. Naꞌ bi lljsoale to to yoo.
8 Katꞌ illinle to yell ga wlebgakeꞌ leꞌ, yeej gaotezle bittezə dii goṉgakeꞌ leꞌ.
9 Naꞌ yiyonle beṉꞌkaꞌ bi shaoꞌ yellaꞌ, naꞌ yeꞌle ḻegakeꞌ: “Yeḻꞌ wṉabiaꞌ c̱he Chiozaꞌ ba blaꞌn laoleni.”
10 Naꞌ shi illinle to yell ga bi wlebgakeꞌ leꞌ, ḻi yide lyell, ḻi yeꞌgakeꞌ:
11 “Ax̱t bishte c̱he yell c̱heleni wllia ṉiꞌantoꞌni chibibntoꞌn kwenc̱he gakbeꞌile aga wenan chonle bi chleble choꞌa xtillꞌ Chiozaꞌ. Naꞌ ḻi koosha yic̱hjle dga iṉantoꞌ leꞌ, yeḻꞌ wṉabiaꞌ c̱he Chiozaꞌn ba blaꞌn laoleni.”
12 Naꞌ niaꞌ leꞌ, beṉꞌkaꞌ lleꞌ yellkaꞌ ganaꞌ bi wlebgakeꞌ leꞌ, dii xench nak yeḻꞌ zakꞌziꞌnaꞌ ileꞌgakileꞌ aga ka beṉꞌ yell Sodómakaꞌ llanaꞌ wc̱hoglo Chiozaꞌ c̱he beṉꞌ.
Beṉꞌkaꞌ bi bzenag xtillꞌ Jesúzaꞌ
13 ’¡Nyeshꞌlaz gak c̱hele, leꞌ beṉꞌ yell Corazín naꞌ leꞌ beṉꞌ yell Betsaida! Ḻaꞌ sheḻꞌ gok yeḻꞌ wakkaꞌ yell Tíronaꞌ naꞌ Sidónnaꞌ ka diikaꞌ ba gok ladjlenaꞌ, kanaꞌtelja biyaj bilengakileꞌ saaxya c̱heꞌkaꞌ, naꞌ ba wcheꞌgakeꞌ bwazjgakeꞌ denaꞌ yic̱hjlaogakeꞌ naꞌ gokwgakeꞌ lechꞌ zeshaa, kwenc̱he wliꞌgakeꞌ nan ba biyaj bilengakileꞌ daa chongakeꞌ, sheḻꞌkaꞌ.
14 Katꞌ illin lla wc̱hoglo Chiozaꞌ c̱he beṉꞌ, yeḻꞌ ziꞌ xench ileꞌile aga ka beṉꞌ yell Tírokaꞌ naꞌ beṉꞌ yell Sidonkaꞌ.
15 Naꞌ leꞌ beṉꞌ yell Capernaúm, bi gonle lez yillinle yabanaꞌ, ḻaꞌ Chiozaꞌ wzaḻee leꞌ ganaꞌ sakꞌziꞌle.
16 Naꞌch cheꞌ Jesúzaꞌ beṉꞌkaꞌ bseḻee:
―Beṉꞌkaꞌ chzenaggakeꞌ c̱hele, c̱haꞌkzan chzenaggakeꞌ. Naꞌ beṉꞌkaꞌ bi chlebgakeꞌ leꞌ, nadꞌkzan bi chlebgakeꞌ. Naꞌ beenaꞌ bi chlebeꞌ nadꞌ, ḻekzkaꞌ bi chlebeꞌ Chiozaꞌ, beenaꞌ bseḻꞌ nadꞌ.
Billin beṉꞌkaꞌ guiyon shi
17 Naꞌ beṉꞌkaꞌ guiyon shib ḻe chibagakileꞌ ka billingakeꞌ kwit Jesúzaꞌ, naꞌ cheꞌgakeꞌneꞌ:
―X̱anꞌ, ax̱t dii x̱iwꞌkaꞌ chilleshgakan ka chzetjntoꞌ lioꞌnaꞌ.
18 Naꞌch cheꞌ Jesúzaꞌ ḻegakeꞌ:
―Bleꞌidꞌ Satanázaꞌ daa chṉabiaꞌ dii x̱iwꞌkaꞌ bxopan yabanaꞌ ka chxop to yiꞌ wziwꞌ.
19 Nadꞌ ba beṉꞌ leꞌ yeḻꞌ wakaꞌ kwenc̱he ḻaꞌkzi gadꞌ no beḻ zṉia wa no bex̱joniꞌ leꞌ aga bi gakileꞌ, naꞌ wlej wshoshjtele yogꞌ daa chon dii x̱iwaa.
20 Per bi yibaile daa chisheshle dii x̱iwꞌkaꞌ, san ḻi yibayi daa ba daꞌ lelenaꞌ ḻee libraꞌ de yabanaꞌ.
Jesúzaꞌ bibaileꞌ
21 Naꞌ katenaꞌ Espíritu Sántonaꞌ beneꞌ ka bibachgayi Jesúzaꞌ, naꞌ wneꞌ:
― X̱a, liꞌ nakoꞌ X̱an yabanaꞌ naꞌ yell-lioni, naꞌ choeꞌlawaa liꞌ daa ba bliiloꞌ beṉꞌkaꞌ bibi chajnii daa bi bliiloꞌ beṉꞌ sinꞌkaꞌ naꞌ beṉꞌkaꞌ nteyi. Kanꞌ ba wyazlalloo gonoꞌ, X̱a.
22 ’X̱aꞌnaꞌ ba noneꞌ lallꞌ naꞌ yogꞌte dii de. Naꞌ ni to kono ṉezi noyeṉꞌanꞌ nakꞌ nadꞌ Xiiṉeꞌ; toz X̱aꞌnaꞌ ṉezileꞌn. Naꞌ ni to kono ṉezi noyeṉꞌanꞌ nak X̱aꞌnaꞌ; toz nadꞌ Xiiṉeꞌ ṉezidꞌ, naꞌ chonꞌ ka iṉezi beṉꞌkaꞌ cheenidꞌ iṉezgakileꞌn.
23 Naꞌch biyec̱hjeꞌ bwieꞌ beṉꞌkaꞌ nakgakeꞌneꞌ txen, chiꞌe ḻegakeꞌ:
―Chakomba beṉꞌkaꞌ chleꞌgakileꞌ diikaꞌ chleꞌile ṉaa.
24 Niaꞌ leꞌ kaꞌ, ḻaꞌ zan beṉꞌkaꞌ wdix̱jee daa goll Chiozaꞌ ḻegakeꞌ naꞌ zan beṉꞌ wṉabiaꞌkaꞌ goklallꞌgakeꞌ ileꞌgakileꞌ diiki chleꞌile ṉaa, naꞌ bi bleꞌgakileꞌn. Goklallꞌgakeꞌ yengakileꞌ dga chenile ṉaa, naꞌ bi bengakileꞌn.
To beṉꞌ Samaria beneꞌ to dii wen
25 Naꞌch wbigꞌ to beṉꞌ chliꞌ chsedi leyaꞌ wṉabileꞌ Jesúzaꞌ kwenc̱hezə iṉezileꞌ shi wak yillii Jesúzaꞌ xtilleenaꞌ, naꞌ wṉabileꞌneꞌ:
―Maestro, ¿bin chiyaḻꞌ gonꞌ kwenc̱he gatꞌ to yeḻꞌ mban c̱haꞌ zejḻi kaṉi?
26 Naꞌch cheꞌ Jesúzaꞌneꞌ:
―¿Bin na leyaꞌ chiyaḻꞌ goncho? ¿Bi na daa chlaboꞌ?
27 Naꞌch beenaꞌ chliꞌ chsedi leyaꞌ chiꞌe:
―“Chiyaḻꞌ gakicho X̱ancho Chiozaꞌ do yic̱hj do lallꞌcho, do ka nak fuerz c̱hechonaꞌ, naꞌ ax̱t ga zeelo chajniicho; naꞌ gaki bishꞌ ljwellcho ka chaki kwincho.”
28 Naꞌch cheꞌ Jesúzaꞌneꞌ:
―Kayeṉꞌnan nakan ka ba wnoꞌ. Shi gonoꞌ ka nan, naꞌ gatꞌ to yeḻꞌ mban c̱hoꞌ zejḻi kaṉi.
29 Naꞌ beenaꞌ bi goklallꞌ wṉit kwineꞌ, naꞌch chiꞌeneꞌ:
―¿Noran bishꞌ ljwellꞌ?
30 Naꞌch cheꞌ Jesúzaꞌneꞌ:
―To beṉꞌ ziyoꞌe nez daa zizaꞌ Jerusalénnaꞌ daa ziyaj Jericólə, naꞌ bchej wbankaꞌ tnezaꞌ wlangakeꞌ yogꞌte diikaꞌ zinoꞌe ax̱t len xeꞌnaꞌ daa nakweꞌ goljgakeꞌ, naꞌ bet wdingakeꞌneꞌ, sto chdoazeꞌ bengakeꞌ, naꞌ bixoṉjgakeꞌ.
31 Naꞌ shintk gok kaꞌ ka wde to bx̱oz lo nezaꞌ. Naꞌ ka bleꞌileꞌ beenaꞌ de naꞌ, to wdezeꞌ kaꞌlə.
32 Naꞌ ḻekzkaꞌ wde to beṉꞌ nakeꞌ xiiṉ dia c̱he dii Levínaꞌ. Naꞌ ka bleꞌileꞌ chtoḻ beenaꞌ naꞌ, ḻekzkaꞌ to wdezeꞌ kaꞌlə.
33 Naꞌ sto beṉꞌ Samaria ḻekzkaꞌ zejeꞌ tnezaꞌ ka bleꞌileꞌ beenaꞌ chtoḻ naꞌ, naꞌ biyeshileꞌneꞌ.
34 Naꞌ jabiguee kwiteꞌnaꞌ, naꞌch bllieꞌ lo weꞌnaꞌ set naꞌch vino, naꞌ bc̱hejeꞌn. Naꞌ biḻepeꞌneꞌ kollꞌ bayix̱ꞌ c̱heꞌnaꞌ, bic̱hiꞌeneꞌ to yoo ganaꞌ wdapeꞌneꞌ.
35 Naꞌ betiyo, ka ba zoa yizaꞌ beṉꞌ Samárianaꞌ, wlejeꞌ c̱hop mech platc, naꞌ biꞌen x̱an yoonaꞌ kwenc̱he gap wwieꞌneꞌ zan lla, naꞌ chiꞌeneꞌ: “Wdap bwiagach beeni, naꞌ shi bi gaki mechi chkwaaṉꞌ, naꞌ yiyixjaꞌn katꞌ zizaa dii yoblə.”
36 Naꞌ ¿nora beṉꞌki shoṉ chakiloꞌ beni bishꞌ ljwell beenaꞌ wlan beṉꞌ wbankaꞌ?
37 Naꞌ beenaꞌ chliꞌ chsedi leyaꞌ chiꞌeneꞌ:
―Beenaꞌ biyeshileꞌneꞌ.
Naꞌ cheꞌ Jesúzaꞌneꞌ:
―Ḻekzkaꞌ liꞌ, kanꞌ chiyaḻꞌ gonoꞌ.
Jesúzaꞌ jawieꞌ Mártanaꞌ naꞌ Maríanaꞌ
38 Naꞌ shlak ngoo Jesúzaꞌ nez, bllineꞌ to yelldoꞌ naꞌ to noolə le Marta blebeꞌneꞌ lilleꞌnaꞌ.
39 Naꞌ zoa to beṉꞌ bil Mártanaꞌ lieꞌ María, naꞌ Maríanaꞌ wchiꞌe lao Jesúzaꞌ chzenagueꞌ dillaa choꞌe.
40 Naꞌ Mártanaꞌ, dechga daa goneꞌ naꞌ wzecheꞌ wṉeyi c̱heyin, naꞌch wyajeꞌ kwit Jesúzaꞌ, chiꞌeneꞌ:
―X̱anꞌ, goll-latꞌ beṉꞌ bilaꞌni gakleneꞌ nadꞌ. Tozꞌ ndakwꞌ yogꞌ mandadkaꞌ.
41 Naꞌ cheꞌ Jesúzaꞌneꞌ: