Jesúzaꞌ wlejeꞌ shlliṉ beṉꞌkaꞌ gakgakeꞌ postl c̱heꞌ
10
Naꞌch bitiꞌa Jesúzaꞌ beṉꞌkaꞌ shlliṉ wlejeꞌ naꞌ biꞌe ḻegakeꞌ yeḻꞌ wṉabiaꞌ kwenc̱he gak yibejgakeꞌ dii x̱iwꞌkaꞌ yoo beṉꞌ, naꞌ yiyongakeꞌ beṉꞌ cheꞌi bittezə yillweꞌ.
2 Naꞌ kin le postlkaꞌ shlliṉ: zigaate wlejeꞌ Simónnaꞌ, beenaꞌ ḻekzkaꞌ cheꞌgakeꞌ Pedro, len beṉꞌ bishee Andrézaꞌ, naꞌtech Jacóbonaꞌ len beṉꞌ bishee Juannaꞌ, beṉꞌkaꞌ nak xiiṉ Zebedewaꞌ,
3 naꞌch Felípenaꞌ, Bartoloménaꞌ, Tomázaꞌ, Mateo, beṉꞌ wic̱hixjaꞌ, Jacobo xiiṉ Alfewaꞌ, Tadewaꞌ,
4 Simón, beenaꞌ bsiꞌgakeꞌ Zelote, naꞌ Jud Scariotaꞌ, beenaꞌ beneꞌ Jesúzaꞌ lo naꞌ beṉꞌ malkaꞌ.
Bseḻꞌ Jesúzaꞌ postlkaꞌ shlliṉ jeꞌgakeꞌ choꞌa xtillꞌ Chiozaꞌ
5 Naꞌch bseḻꞌ Jesúzaꞌ beṉꞌkaꞌ shlliṉ jeꞌgakeꞌ choꞌa xtillꞌ Chiozaꞌ, naꞌ chiꞌe ḻegakeꞌ:
―Bi shajle yellkaꞌ ganaꞌ zoa beṉꞌkaꞌ bi nak beṉꞌ Israel, ni bi shajle yellkaꞌ llia ganaꞌ mbani Samárianaꞌ.
6 San ḻi shaj ganaꞌ lleꞌ beṉꞌ Israelkaꞌ, beṉꞌkaꞌ nak ka xilꞌ ba wnit.
7 Ḻi shaj ḻi lljtix̱jee ba zoa gaoshosh iṉabiaꞌ Chiozaꞌ beenaꞌ zoa yabanaꞌ ḻoo yic̱hjlallꞌdoꞌ beṉꞌ.
8 Ḻi yiyon beṉꞌkaꞌ bi shaoꞌ naꞌ beṉꞌkaꞌ cheꞌi lepra, ḻi yisban beṉꞌ ba wit, naꞌ ḻi yibej dii x̱iwꞌkaꞌ yoo beṉꞌ. Naꞌ ka beṉ Chiozaꞌ, beṉeꞌ leꞌ yeḻꞌ wakaꞌ kaꞌz, kaꞌkzan leꞌ bibi wc̱hixjle yiyonle beṉꞌ.
9 ’Naꞌ bi waꞌle mech de or, de plat ni de cobre.
10 Naꞌ ni bi gaḻꞌle no yix̱j les, ni bi gox̱ꞌle zi shkweꞌ xale, ni zi shkweꞌ xel-le, ni bi gox̱ꞌle yag bar, ḻaꞌ to wen llin chidoḻee yeej gaweꞌ.
11 ’Naꞌ katꞌ illinle to to yell xen wa yelldoꞌzə, c̱hiljle to beṉꞌ nsaꞌ c̱heꞌ wen, naꞌ yigaaṉle lilleꞌnaꞌ naꞌ naꞌtezə soale ax̱t ka illinch lla yizaꞌle.
12 Naꞌ ka shoꞌle lilleꞌnaꞌ yeꞌleneꞌ: “Chiozaꞌ wzoeꞌ leꞌ mbalaz.”
13 Naꞌ shi dii ḻi beṉꞌkaꞌ lleꞌ naꞌ nakgakeꞌ beṉꞌ wen, wakkzə daa yeꞌle ḻegakeꞌ; san shi bi nakgakeꞌ beṉꞌ wen, naꞌ aga wakan.
14 Naꞌ gattezə illinle shi kono wleb leꞌ naꞌ ni bi wzenaggakeꞌ c̱hele, naꞌ yizaꞌle lill beenaꞌ wa yellaꞌ ganaꞌ gongakileꞌ leꞌ kaꞌ naꞌ yishible bishtenaꞌ llia ṉiꞌalekaꞌ.
15 Dii ḻi niaꞌ leꞌ, katꞌ illin lla wc̱hoglo Chiozaꞌ c̱he beṉꞌ, yeḻꞌ zakꞌziꞌ xench ileꞌchi beṉꞌ yellkaꞌ ganaꞌ gongakileꞌ leꞌ kaꞌ aga ka beṉꞌ yell Sodómanaꞌ naꞌ yell Gomórranaꞌ.
Yeḻꞌ zakꞌziꞌkaꞌ yen ileꞌi beṉꞌkaꞌ nak Jesucrístonaꞌ txen
16 ’Nadꞌ chseḻaa leꞌ ka xildoꞌ ladj ba zṉiakaꞌ. Naꞌ chiyaḻꞌ gakle beṉꞌ sinꞌ naꞌ beṉꞌ wen.
17 Wsakꞌgale, ḻaꞌ wchej beṉꞌ lljwee leꞌ lao beṉꞌkaꞌ chṉabiaꞌ naꞌ wit c̱hingakeꞌ leꞌ ganaꞌ chdop chllagcho choeꞌḻwillcho Chiozaꞌ.
18 Naꞌ lljwaꞌgakeꞌ leꞌ lao beṉꞌ wṉabiaꞌ xenkaꞌ daa chonḻilallꞌle nadꞌ, naꞌ kaꞌ gak weꞌlenle ḻegakeꞌ choꞌa xtillaanaꞌ naꞌ kaꞌkzə beṉꞌkaꞌ bi nakgakeꞌ beṉꞌ Israel.
19 Naꞌ katꞌ gongakeꞌ leꞌ lo naꞌ beṉꞌkaꞌ, bi sele wṉeyi naklə iṉale wa bi iṉale, ḻaꞌ ka gaḻꞌ iṉele, Chiozaꞌ wx̱oeꞌ dillaa choꞌa ḻollꞌlekaꞌ.
20 Ḻaꞌ aga lenꞌ iṉele, san Espíritu c̱he X̱acho Chiozanꞌ goneꞌ ka iṉele.
21 ’Beenaꞌ zoa beṉꞌ bishee ḻetezeꞌ goneꞌneꞌ lo naꞌ beṉꞌkaꞌ witgakeꞌneꞌ, naꞌ beenaꞌ zoa xiiṉeꞌ goneꞌbꞌ lo naꞌ beṉꞌ witeꞌbꞌ. Naꞌ soa beṉꞌ yizoshyiꞌe x̱axṉeenaꞌ naꞌ goneꞌ ḻegakeꞌ lo naꞌ beṉꞌkaꞌ witgakeꞌ ḻegakeꞌ.
22 Yogꞌḻoḻ beṉꞌ gakzbangakileꞌ leꞌ daa nonḻilallꞌle nadꞌ, per beenaꞌ so sakileꞌ bittezə daa yen ileꞌileꞌ ax̱t katꞌ gueteꞌ, beenanꞌ gatꞌ yeḻꞌ mban c̱heꞌ zejḻi kaṉi.
23 Shi to yell yilaggakeꞌ leꞌ, ḻi yiyaj yell yoblə. Ḻaꞌ dii ḻi niaꞌ leꞌ bilaṉꞌ yiyoll tale yogꞌḻoḻ yellki mbani Israeli katꞌ illin lla yiyedꞌ nadꞌ, Beṉꞌ Bseḻꞌ Chiozaꞌ.
24 ’To beṉꞌ chsed aga zakꞌcheꞌ ka beenaꞌ chliꞌ chsedi ḻeꞌ, naꞌ kaꞌkzə to wen llin aga zakꞌcheꞌ ka x̱aneꞌnaꞌ.
25 Naꞌ beenaꞌ ni chsed yibaileꞌ gakeꞌ ka beenaꞌ chliꞌ chsedi ḻeꞌ, naꞌ kaꞌkzə wen llinnaꞌ, yibaileꞌ gakeꞌ ka x̱aneꞌnaꞌ. Nadꞌ nakꞌ x̱anle, naꞌ shi nagakeꞌ c̱haꞌ nonꞌ txen dii x̱iwaa daa le Bezlo, ¿alelə ki iṉagakeꞌ c̱hele kaꞌ?
¿Non chiyaḻꞌ illebcho?
26 Bi illeble beṉꞌkaꞌ biya dii wc̱hiꞌ wsakꞌgakeꞌ leꞌ. Ḻaꞌ daa kono ṉezi ṉaa, wllin lla ilaꞌlawin, naꞌ aga ga de to dii ngashꞌ dii bi illin lla ilaꞌlawin.
27 Diikaꞌ chliꞌ chsedidꞌ leꞌ do ngashꞌzə, ḻi weꞌn dillꞌ ladj lkweꞌ beṉꞌ. Naꞌ diikaꞌ niaꞌ leꞌ to leꞌzə, ḻi wzenin yogꞌḻoḻ beṉꞌ.
28 Bi illeble beṉꞌkaꞌ cheengakileꞌ witgakeꞌ leꞌ, ḻaꞌ kwerp c̱hele naꞌzan witgakeꞌ, aga bi gak gongakileꞌ yic̱hjlallꞌdoꞌlenaꞌ. San Chiozanꞌ chiyaḻꞌ illeble, ḻaꞌ ḻenꞌ wakə wlliayee kwerp c̱helenaꞌ len yic̱hjlallꞌdoꞌlenaꞌ lo yiꞌ gabiḻaꞌ.
29 ’Ḻaꞌkzi wak siꞌcho c̱hop byiṉdoꞌ kon to sintabdoꞌ, ni tob bi guet shi X̱acho Chiozaꞌ bi wiꞌe latj.
30 Naꞌ ka nakle leꞌ, ax̱t yishꞌ yic̱hjlenaꞌ nḻabeꞌ.
31 Daan bi chiyaḻꞌ illeble, ḻaꞌ zakꞌch leꞌ aga ka ba zan byiṉdoꞌkaꞌ.
Beṉꞌkaꞌ chc̱hebgakeꞌ lao beṉꞌ nan nombiaꞌgakeꞌ Jesúzaꞌ
32 ’Beenaꞌ weꞌ dillꞌ lao beṉꞌ iṉeꞌ nakeꞌ nadꞌ txen, kaꞌkzə nadꞌ yepꞌ X̱aꞌnaꞌ zoa yabanaꞌ nakeꞌ nadꞌ txen.
33 Naꞌ beenaꞌ bi chc̱heb lao beṉꞌ nan nakeꞌ nadꞌ txen, kaꞌkzə nadꞌ yepꞌ X̱aꞌnaꞌ zoa yabanaꞌ bi nakeꞌ nadꞌ txen.
Ni c̱he Jesúzaꞌ gak beṉꞌ c̱hoplə
34 ’Bi gakzile bidꞌ lo yell-lioni kwenc̱he gonꞌ ka soalen ljwell beṉꞌ mbalaz. Aga daan bidꞌ, san bidꞌ kwenc̱he wx̱iaꞌ wdiḻ.
35 Daa bidꞌ naꞌ yidiḻ-len beṉꞌ byonaꞌ x̱eꞌnaꞌ naꞌ noolaꞌ yidiḻ-leneꞌ xṉeenaꞌ, naꞌ beenaꞌ zoa xoolilleꞌ yidiḻ-leneꞌ ḻeꞌ.
36 Naꞌ beṉꞌkaꞌ zoa toz yoo gakzbani ljwelleꞌ.
37 ’Beenaꞌ chakchileꞌ x̱eꞌnaꞌ wa xṉeenaꞌ aga ka nadꞌ, bi chidoḻee gakeꞌ nadꞌ txen, naꞌ kaꞌkzə shi chaktechileꞌ xiiṉeꞌnaꞌ ka nadꞌ, ḻekzkaꞌ bi chidoḻee gakeꞌ nadꞌ txen.
38 Beenaꞌ bi chzani yeḻꞌ mban c̱heꞌnaꞌ yen ileꞌileꞌ bittezə kwenc̱he goneꞌ ka niaꞌ, bi chidoḻee gakeꞌ nadꞌ txen.
39 Naꞌ beenaꞌ chakileꞌ sheḻꞌ kono wc̱hiꞌ wsakꞌ ḻeꞌ, beenanꞌ kwiayee. San beenaꞌ chzani yeḻꞌ mban c̱heꞌnaꞌ yen ileꞌileꞌ bittez daa nonḻilallee nadꞌ, beenanꞌ gatꞌ to yeḻꞌ mban c̱heꞌ zejḻi kaṉi.
Beṉꞌkaꞌ soagakeꞌ mbalaz yabanaꞌ
(Mr. 9:41)
40 ’Beenaꞌ wlebeꞌ leꞌ, nadꞌkzan chlebeꞌ. Naꞌ beenaꞌ wlebeꞌ nadꞌ ḻekzkaꞌ Chiozaꞌ, beenaꞌ bseḻꞌ nadaan, chlebeꞌ.
41 Beenaꞌ wlebeꞌ to beṉꞌ chyix̱jee daa cheꞌ Chiozaꞌneꞌ, lenkzenꞌ ikee ka laxj beenaꞌ chyix̱jee daa cheꞌ Chiozaꞌneꞌ. Naꞌ ḻekzkaꞌ beenaꞌ wlebeꞌ to beṉꞌ choneꞌ daa nak shḻi daa chibaileꞌ nakeꞌ beṉꞌ ḻi beṉꞌ shaoꞌ, ḻekzkaꞌ leneꞌn ikee ka laxj beenaꞌ chon daa nak shḻi.
42 Naꞌ beenaꞌ weꞌ ḻaꞌc̱hꞌ latꞌ nis yeej beṉꞌki nakgakeꞌ nadꞌ txen, dii ḻi niaꞌ leꞌ, de laxjeꞌ.