Jesúzaꞌ biyoneꞌ to beṉꞌ net tḻaa kwerp c̱heꞌnaꞌ
9
Naꞌ biyoo Jesúzaꞌ to ḻoo barkw, naꞌch biḻagꞌgakeꞌ shḻaa nisdoꞌnaꞌ naꞌ billineꞌ yell c̱heꞌnaꞌ ganaꞌ wzee.
2 Naꞌ bllinlengakeꞌ to beṉꞌ net ṉiꞌa neenaꞌ laweꞌnaꞌ, nx̱oagakeꞌneꞌ to lo daa. Naꞌ gokbeꞌi Jesúzaꞌ ḻe nonḻilallꞌgakeꞌneꞌ, naꞌch golleꞌ beṉꞌ weꞌnaꞌ:
―Btiplalloo, xiiṉꞌ, ba biyakxen xtoḻoonaꞌ.
3 Naꞌch baḻ beṉꞌkaꞌ chliꞌ chsedi leyaꞌ cheꞌ ljwellgakeꞌ: “Ba chonz kwin beeni ka Chiozaꞌ daa neꞌ kaꞌ.”
4 Naꞌ gokbeꞌi Jesúzaꞌ daa wzaꞌlallꞌgakeꞌ, naꞌ chiꞌe ḻegakeꞌ:
―¿Bic̱he chzaꞌlallꞌzle kaꞌ?
5 ¿Achakile chyalljchidꞌ yeḻꞌ wak xench yepꞌ beeni: “Ba biziꞌxenꞌ saaxya c̱hoꞌnaꞌ”, ka daa yepee: “Biyas naꞌ bigoo nez”?
6 Naꞌ wliidꞌ leꞌ, nadꞌ, Beṉꞌ Bseḻꞌ Chiozaꞌ, napꞌ yeḻꞌ wṉabiaꞌ yell-lioni kwenc̱he yiziꞌxenꞌ saaxya c̱he beṉꞌ.
Naꞌch golleꞌ beenaꞌ net ṉiꞌa neenaꞌ:
―Biyas, bitob daa c̱hoꞌnaꞌ, naꞌ biyaj lilloꞌnaꞌ.
7 Naꞌch biyas beenaꞌ net ṉiꞌa neenaꞌ naꞌ ziyajeꞌ lilleꞌnaꞌ.
8 Naꞌ ka bleꞌi beṉꞌkaꞌ ka gok, bibangakileꞌ, naꞌ beꞌlaꞌogakeꞌ Chiozaꞌ daa biꞌe yeḻꞌ wak xennaꞌ to beṉꞌ yell-lio.
Wlej Jesúzaꞌ Matewaꞌ kwenc̱he goneꞌneꞌ txen
9 Ka bizaꞌ Jesúzaꞌ naꞌ, bleꞌileꞌ to beṉꞌ wic̱hixj, lieꞌ Mateo, chiꞌe ganaꞌ chc̱hixjeꞌ. Naꞌ chiꞌeneꞌ:
―Da, dino nadꞌ.
Naꞌch lii wzollaꞌte Matewaꞌ janoeꞌneꞌ.
10 Naꞌ shlak chiꞌ Jesúzaꞌ lill Matewaꞌ, bllin beṉꞌ zan wic̱hixjkaꞌ naꞌ zan beṉꞌ zeyi c̱heyi bi nsaꞌ c̱hegakeꞌ wen, wcheꞌgakeꞌ choꞌa mesaꞌ wdaolengakeꞌ Jesúzaꞌ len beṉꞌkaꞌ nakgakeꞌneꞌ txen.
11 Naꞌch ka bleꞌi fariseokaꞌ chaolen Jesúzaꞌ beṉꞌkaꞌ, naꞌch wṉabgakileꞌ beṉꞌkaꞌ nakgakeꞌneꞌ txen, cheꞌgakeꞌ:
―¿Bic̱he chaolenz maestro c̱heleni beṉꞌ wic̱hixjki len beṉꞌki bi nsaꞌ c̱heyin wen?
12 Naꞌ beni Jesúzaꞌ daa goll fariseokaꞌ, naꞌch chiꞌe ḻegakeꞌ:
―Aga beṉꞌkaꞌ shawaan chyalljgakileꞌ wen rmechaꞌ san beṉꞌkaꞌ bi shawaan chyalljgakileꞌneꞌ.
13 Ḻi yiyaj naꞌ ḻi lljased bin zeji Choꞌa Xtillꞌ Chiozaꞌ ganaꞌ nan: “Nadꞌ cheenchidꞌ yiyeshii ljwell-le, aga ka daa witle bayix̱ꞌkaꞌ kwenc̱he weꞌlaꞌole nadꞌ.” Aga bidꞌ ni c̱he beṉꞌkaꞌ nak beṉꞌ ḻi beṉꞌ shaoꞌ, san bidꞌ ni c̱he beṉꞌ saaxyakaꞌ.
Wṉabgakileꞌ Jesúzaꞌ bic̱he bi chzoa beṉꞌkaꞌ nakgakeꞌneꞌ txen wbasꞌ
14 Naꞌch beṉꞌkaꞌ nak Juannaꞌ txen jabigꞌgakeꞌ kwit Jesúzaꞌ naꞌ wṉabgakileꞌneꞌ cheꞌgakeꞌ:
―Netoꞌ naꞌ fariseokaꞌ zeyi c̱hentoꞌ chzoantoꞌ wbasꞌ. Naꞌ ¿bic̱he beṉꞌkaꞌ nakgakeꞌ liꞌ txen bi chzoagakeꞌ wbasꞌ?
15 Naꞌch cheꞌ Jesúzaꞌ ḻegakeꞌ:
―Katꞌ chak to wishagnaꞌ beṉꞌkaꞌ chdiꞌa chllag lill beṉꞌ byonaꞌ aga chdagakeꞌ nyeshꞌ, san cheej chaogakeꞌ. Naꞌ kaꞌkzan beṉꞌki nakgakeꞌ nadꞌ txen, cheej chaogakeꞌ ṉaa zoalenꞌ ḻegakeꞌ, per wllin lla wkwas beṉꞌ nadꞌ kwiteꞌkaꞌ, kanaꞌchan soagakeꞌ wbasaa.
16 ’Ni to kono chidaꞌ latꞌ lechꞌ kob ḻee lechꞌ golaꞌ, ḻaꞌ katꞌ shechan naꞌ yibeꞌ lechꞌ kobaꞌ naꞌ wshoꞌchan dii golaꞌ naꞌ ganaꞌ nlloꞌ gakchan dii xench.
17 Naꞌ aga no chgaa vino daa ziꞌ bchejte ḻoo yid golaꞌ, ḻaꞌ wchezꞌ yid golaꞌ naꞌ ḻaljə vinonaꞌ, naꞌ ka vinonaꞌ ka yidaꞌ kwiayiꞌgakan. San chiyaḻꞌ sholl vino daa ziꞌ bchejte ḻoo yid kobaꞌ kwenc̱he ni ton bi kwiayiꞌ.
Jesúzaꞌ biyoneꞌ xiiṉ Jaironaꞌ len noolaꞌ jex̱ee xeꞌnaꞌ
18 Naꞌ ni choeꞌte Jesúzaꞌ dillꞌ, ka bllin to beṉꞌ wṉabiaꞌ naꞌ bc̱hekꞌ xibeꞌnaꞌ lao Jesúzaꞌ, chiꞌeneꞌ:
―Shintg wit to biꞌ nool c̱haꞌ; per shi liꞌ saꞌgachoꞌ naꞌ wx̱oa noonaꞌbꞌ naꞌ yibamꞌ.
19 Naꞌch lii wzollaꞌte Jesúzaꞌ zejleneꞌ beṉꞌkaꞌ nakgakeꞌneꞌ txen lill beṉꞌ wṉabiaꞌnaꞌ.
20 Naꞌ ka zejgakeꞌ lill beṉꞌ wṉabiaꞌnaꞌ jano to noolə ḻegakeꞌ, naꞌ ba gok shlliṉ yiz chzoeꞌ wbaa. Naꞌch wbiguee kollꞌ Jesúzaꞌ bex̱ee xeꞌnaꞌ,
21 ḻaꞌ chakileꞌ: “Kon sheḻꞌ ba bex̱aa xeꞌnaꞌ wiyakkzidꞌ.”
22 Naꞌ biyec̱hj Jesúzaꞌ naꞌ ka bleꞌileꞌ noolaꞌ chiꞌeneꞌ:
―Btiplalloo, xiiṉꞌ, ba biyakiloꞌ daa chonḻilalloo nadꞌ.
Naꞌ lii biyakteyi noolaꞌ.
23 Naꞌ ka bllin Jesúzaꞌ lill beṉꞌ wṉabiaꞌnaꞌ ba lleꞌ beṉꞌkaꞌ chkwell bllejaꞌ naꞌ beṉꞌ zan ba chosyaagakeꞌ chbellgakeꞌ.
24 Naꞌch cheꞌ Jesúzaꞌ beṉꞌkaꞌ:
―Ḻi yillesh ni. Aga witbaꞌn san cheszbaan.
Per bxill-ligakeꞌneꞌ.
25 Naꞌ ben Jesúzaꞌ byen billeshgakeꞌ, naꞌ wyoꞌe naꞌ bex̱ee naꞌ biꞌ nool wetaꞌ naꞌ lii biyastebꞌ.
26 Naꞌ yogꞌ yellkaꞌ llia gaoz wze dillꞌ daa beneꞌ.
Biyon Jesúzaꞌ c̱hop beṉꞌ lc̱hoḻ
27 Naꞌ ka bizaꞌ Jesúzaꞌ, c̱hop beṉꞌ lc̱hoḻ janogakeꞌneꞌ. Naꞌ chosyaagakeꞌ zilljə cheꞌgakeꞌ:
―¡Biyeshꞌlallꞌgachi netoꞌ, xiiṉ dia c̱he dii Daví!
28 Ka biyoo Jesúzaꞌ ḻoo yoonaꞌ, beṉꞌ lc̱hoḻkaꞌ jabigꞌgakeꞌ kwiteꞌnaꞌ. Naꞌch cheꞌ Jesúzaꞌ ḻegakeꞌ:
―¿Achajḻeꞌle wak gonꞌ ka ileꞌile?
Naꞌch goll beṉꞌ lc̱hoḻkaꞌneꞌ:
―Awe, X̱anntoꞌ, wak gonoꞌ ka ileꞌintoꞌ.
29 Naꞌch bex̱ꞌ Jesúzaꞌ jalaweꞌkaꞌ naꞌ golleꞌ ḻegakeꞌ:
―Daa chonḻilallꞌle nadꞌ naꞌ gak ka cheenile.
30 Naꞌch bileꞌgakileꞌ. Naꞌ Jesúzaꞌ golleꞌ ḻegakeꞌ:
―Ḻi gon byen kono yeꞌle kaꞌ.
31 Per ka bizaꞌgakeꞌ kwiteꞌnaꞌ lii wzolotegakeꞌ choeꞌgakeꞌ dillꞌ doxen ganaꞌ mbani yellaꞌ daa ben Jesúzaꞌ c̱hegakeꞌ.
Biyon Jesúzaꞌ to beṉꞌ bi chak iṉe
32 Shlak chizaꞌ beṉꞌkaꞌ gok beṉꞌ lc̱hoḻ, bllin beṉꞌ yoblə lao Jesúzaꞌ nc̱heꞌgakeꞌ to beṉꞌ bi chak iṉe daa yoꞌe dii x̱iwaa.
33 Naꞌ kon ka bibej Jesúzaꞌ dii x̱iwaa yoo beenaꞌ naꞌ biṉieꞌ. Naꞌ bibani beṉꞌkaꞌ lleꞌ naꞌ, nagakeꞌ:
―Ni shlin biṉꞌ ileꞌicho yell Israeli to yeḻꞌ wak ka dga ba ben beeni.
34 Per fariseokaꞌ cheꞌgakeꞌ:
―Beeni chibejeꞌ dii x̱iwꞌkaꞌ kon yeḻꞌ wak c̱he daa chṉabiaꞌ ḻegakan.
Chyallj beṉꞌ zan gongakeꞌ xshin Chiozaꞌ
35 Naꞌ wda Jesúzaꞌ yogꞌ yellkaꞌ, ka yell xen ka yelldoꞌ, chliꞌ chsedileꞌ to to ganaꞌ chdop chllag beṉꞌ Israelkaꞌ choeꞌḻwillgakeꞌ Chiozaꞌ. Wdix̱jeꞌileꞌ ḻegakeꞌ dillꞌ wen dillꞌ kob c̱he yeḻꞌ wṉabiaꞌ c̱he Chiozaꞌ naꞌ biyoneꞌ beṉꞌ cheꞌi bittezə yillweꞌ.
36 Naꞌ bleꞌi Jesúzaꞌ beṉꞌ zan zejlengakeꞌneꞌ naꞌ biyeshileꞌ ḻegakeꞌ, ḻaꞌ gokbeꞌileꞌ ka nyeshꞌlazan chak c̱hegakeꞌ, ka xilꞌ ba kono x̱anin zoa.
37 Naꞌch golleꞌ beṉꞌkaꞌ nakgakeꞌneꞌ txen: