Biyon Jesúzaꞌ to beṉꞌ net ṉiꞌa neenaꞌ
2
Wde to c̱hop lla, Jesúzaꞌ billineꞌ sto shii yell Capernaúmaꞌ. Naꞌ ka wṉezi beṉꞌkaꞌ lleꞌ naꞌ ba billineꞌ yoonaꞌ ganaꞌ wzoeꞌ,
San Marcos 2:1-12
2 naꞌ bdiꞌa bllag beṉꞌ zan inlleb ḻoo yoonaꞌ ax̱t bich chaki leshꞌ chyoonaꞌ sheꞌgakeꞌ. Naꞌ bliꞌ bsedileꞌ ḻegakeꞌ choꞌa xtillꞌ Chiozaꞌ.
3 Naꞌ bllin tap beṉꞌ nḻengakeꞌ to beṉꞌ net ṉiꞌa neenaꞌ.
4 Naꞌ daa bi gok illingakeꞌ ganaꞌ zete Jesúzaꞌ daa lleꞌ beṉꞌ zan inlleb, naꞌ wzologakeꞌ bsaljgakeꞌ kollꞌ yoonaꞌ naꞌ bḻetjgakeꞌneꞌ do daa c̱heꞌnaꞌ.
5 Naꞌ ka gokbeꞌi Jesúzaꞌ chajḻeꞌgakeꞌ c̱heꞌ, golleꞌ beṉꞌ weꞌnaꞌ:
―Xiiṉ, ba biyakxen saaxya c̱hoꞌkaꞌ.
6 Naꞌ chiꞌ baḻ beṉꞌkaꞌ chliꞌ chsedi leyaꞌ, naꞌ wzaꞌlallꞌgakeꞌ:
7 “¿Berac̱he naz beeni kaꞌ? Chonz kwineꞌ ka Chiozaꞌ. Kono zoa sto beṉꞌ gak yiziꞌxen saaxya c̱he beṉꞌ, san toz Chiozaꞌ gak yiziꞌxeneꞌn.”
8 Naꞌ lii gokbeꞌteyi Jesúzaꞌ daa chzaꞌlallꞌgakeꞌ, naꞌ wṉabileꞌ ḻegakeꞌ, chiꞌe:
―¿Berac̱he chzaꞌlallꞌzle kaꞌ?
9 ¿Achakile chyalljchidꞌ yeḻꞌ wak xench yepꞌ beeni: “Ba biziꞌxenꞌ saaxya c̱hoꞌnaꞌ”, ka daa yepee: “Biyas naꞌ bigoo nez”?
10 Naꞌ wliidꞌ leꞌ, nadꞌ Beṉꞌ Bseḻꞌ Chiozaꞌ napꞌ yeḻꞌ wṉabiaꞌ yell-lioni kwenc̱he yiziꞌxenꞌ saaxya c̱he beṉꞌ.
Naꞌch golleꞌ beenaꞌ net ṉiꞌa neenaꞌ:
11 ―Niaꞌ liꞌ, biyas, bitob daa c̱hoꞌnaꞌ, naꞌ biyaj lilloꞌnaꞌ.
12 Naꞌ lii biyastieꞌ bitobeꞌ daa c̱heꞌnaꞌ naꞌ bizee chwiate beṉꞌkaꞌ lleꞌ naꞌ. Naꞌ yogꞌzgakeꞌ bibani naꞌ beꞌlaꞌogakeꞌ Chiozaꞌ, cheꞌgakeꞌ:
―Bigaṉꞌ ileꞌicho ka dga.
Jesúzaꞌ goxeꞌ Levínaꞌ kwenc̱he gakeꞌneꞌ txen
13 Naꞌ wyaj Jesúzaꞌ sto shii choꞌa nisdoꞌnaꞌ naꞌ beṉꞌ zan janogakeꞌneꞌ, naꞌ bliꞌ bsedileꞌ ḻegakeꞌ.
San Marcos 2:13-28
14 Naꞌ wde Jesúzaꞌ ganaꞌ chiꞌ Levínaꞌ, xiiṉ Alfewaꞌ, chc̱hixjeꞌ daa chkaa beṉꞌ Rómakaꞌ. Naꞌ chiꞌeneꞌ:
―Da, dino nadꞌ.
Naꞌ wzollaꞌ Levínaꞌ janoeꞌneꞌ.
15 Naꞌ to shii Jesúzaꞌ len beṉꞌkaꞌ nakgakeꞌneꞌ txen cheej chaogakeꞌ lill Levínaꞌ, naꞌ zan beṉꞌ wic̱hixjkaꞌ naꞌ beṉꞌkaꞌ zeyi c̱hegakeꞌ nakgakeꞌ beṉꞌ mal cheej chaolengakeꞌneꞌ, ḻaꞌ beṉꞌ zan ba nak beṉꞌkaꞌ no ḻeꞌ.
16 Naꞌ baḻ fariseokaꞌ, beṉꞌkaꞌ ḻekzkaꞌ chliꞌ chsedi leyaꞌ, ka bleꞌgakileꞌ cheej chaolen Jesúzaꞌ beṉꞌkaꞌ, naꞌ gollgakeꞌ beṉꞌkaꞌ nakgakeꞌneꞌ txen:
―¿Berac̱he cheej chaolenz beenaꞌ chliꞌ chsedi leꞌ beṉꞌ wic̱hixjkaꞌ naꞌ beṉꞌ malkaꞌ?
17 Naꞌ ka beni Jesúzaꞌ cheꞌgakeꞌ kaꞌ, naꞌch chiꞌe:
―Beṉꞌkaꞌ zoa shiꞌa shaoꞌ aga no wen rmech chyalljgakileꞌ, san beṉꞌkaꞌ bi shawaan chyalljgakileꞌneꞌ. Kaꞌkzə nadꞌ, aga bidꞌ ni c̱he beṉꞌkaꞌ nak beṉꞌ ḻi beṉꞌ shaoꞌ, san ni c̱he beṉꞌ malkanꞌ bidꞌ.
Wṉabgakileꞌ Jesúzaꞌ bic̱he bi chon beṉꞌkaꞌ nakgakeꞌneꞌ txen wbasaa
18 To shii beṉꞌkaꞌ nak Juannaꞌ txen naꞌ beṉꞌkaꞌ nak fariseokaꞌ txen chzoagakeꞌ wbasꞌ. Naꞌ baḻ beṉꞌ wyajgakeꞌ lao Jesúzaꞌ naꞌ cheꞌgakeꞌneꞌ:
―Beṉꞌkaꞌ nak Juannaꞌ txen naꞌ beṉꞌkaꞌ nak fariseokaꞌ txen chzoagakeꞌ wbasꞌ. ¿Berac̱he beṉꞌkaꞌ nakgakeꞌ liꞌ txen bi chongakeꞌn?
19 Naꞌ cheꞌ Jesúzaꞌ ḻegakeꞌ:
―¿Awak soa beṉꞌkaꞌ chaxeꞌ to ga chak wishagnaꞌ wbasaa shlak chak lṉinaꞌ? Bi gakan, ḻaꞌ shlak zoalen beenaꞌ chshagnaꞌ ḻegakeꞌ aga wak soagakeꞌ wbasaa.
20 San wllin lla katꞌ yikwas beṉꞌ beenaꞌ chshagnaꞌ ladjeꞌkaꞌ, kanaꞌchan soagakeꞌ wbasaa.
21 ’Ni to beṉꞌ bi chidaꞌ chichollee ḻee lechꞌ golaꞌ latꞌ lechꞌ kob, ḻaꞌ lechꞌ kobaꞌ yibeꞌn katꞌ c̱hibeꞌn naꞌ zizikli wc̱hezꞌchan lechꞌ golaꞌ, naꞌ dii xench gak ganaꞌ nchezꞌ.
22 Ni biga zoa beṉꞌ chguee vino kobaꞌ ḻoo yid golkaꞌ, ḻaꞌ vino kobaꞌ wc̱hezaan yid golaꞌ naꞌ kwiayiꞌ vino kobaꞌ lente yid golaꞌ. Naꞌ daan, chiyaḻꞌ sholl vino kobaꞌ ḻoo yid kobaꞌ.
Beṉꞌkaꞌ non Jesúzaꞌ txen chyishjgakeꞌ do c̱he trígonaꞌ llanaꞌ chombaaṉgakeꞌ
23 Naꞌ to lla sabd, llanaꞌ chombaaṉ beṉꞌ Israelkaꞌ, wdelen Jesúzaꞌ beṉꞌkaꞌ nakgakeꞌneꞌ txen to ga naz to beṉꞌ trigo, naꞌ wzolo beṉꞌkaꞌ nakgakeꞌneꞌ txen wdishjgakeꞌ trígonaꞌ wdaogakeꞌn.
24 Naꞌ goll fariseokaꞌneꞌ:
―¿Berac̱he chonz beṉꞌki nakoꞌ txen daa bi chiyaḻꞌ gongakeꞌ llani chombaaṉcho?
25 Naꞌ golleꞌ ḻegakeꞌ:
―¿Ani shlin biṉꞌ wlable daa ben dii Davinaꞌ to shii kon beṉꞌkaꞌ nakgakeꞌneꞌ txen ka byallj daa gaogakeꞌ?
26 Kanaꞌ nak Abiataraꞌ bx̱oz choo bx̱oz xen, wyoo Davinaꞌ ganaꞌ nongakeꞌ lill xḻatjə Chiozaꞌ naꞌ wdoyoeꞌ yetxtilaꞌ daa naki c̱he Chiozaꞌ naꞌ wdaoleneꞌn beṉꞌkaꞌ nakgakeꞌneꞌ txen, ḻaꞌkzi toz bx̱ozkanꞌ chiyaḻꞌ gaogakeꞌn.
27 Naꞌ ḻekzkaꞌ golleꞌ ḻegakeꞌ: