Wxengakeꞌ beḻ zan
5
To shii bllin Jesúzaꞌ choꞌa nisdoꞌ c̱he Genesaretaꞌ naꞌ bllin beṉꞌ zan wal ax̱t bdakwyillgakeꞌneꞌ, daa cheengakileꞌ wzenaggakeꞌ choꞌa xtillꞌ Chiozaꞌ.
Lucas 5.1-39
2 Naꞌ bleꞌi Jesúzaꞌ c̱hop barkw chiꞌgakan choꞌa nisdoꞌnaꞌ. Ba bichej beṉꞌ wxen beḻkaꞌ naꞌ ba chiyibgakeꞌ yix̱j c̱heꞌkaꞌ.
3 Naꞌch wyoo Jesúzaꞌ ḻoo barkw c̱he Simónnaꞌ, naꞌ wṉabileꞌneꞌ wlligꞌ zilateen ḻoo nisdoꞌnaꞌ. Naꞌ wcheꞌ Jesúzaꞌ ḻoo barkwaꞌ naꞌ wzoloeꞌ bliꞌ bsedileꞌ beṉꞌkaꞌ.
4 Naꞌ ka biyoll bliꞌ bsedileꞌ ḻegakeꞌ, naꞌch chiꞌe Simónnaꞌ:
―Wyajlen barkwi ganaꞌ zitj naꞌ wzaḻꞌle yix̱j c̱helenaꞌ kwenc̱he senle beḻkaꞌ.
5 Naꞌch cheꞌ Simónnaꞌ:
―Maestro, do yel ba benntoꞌ llinnaꞌ naꞌ ni tlishꞌb bi bdoḻintoꞌ, per shi kanꞌ noꞌ, wzaḻꞌchntoꞌ yix̱jki.
6 Naꞌ ka bzaḻꞌgakeꞌ yix̱j c̱heꞌkaꞌ, wxenan beḻ zan inlleb. Naꞌ ka nan yibejgakeꞌ yix̱jaꞌ wzolo chchezaꞌn.
7 Naꞌ blaa neekaꞌ beṉꞌkaꞌ lleꞌ ḻoo barkwaꞌ sto kwenc̱he jaklengakeꞌ ḻegakeꞌ. Naꞌ ka bllin beṉꞌkaꞌ, naꞌch bisshaꞌchagakeꞌ c̱hopte barkwkaꞌ ax̱t ba chakgakan ka dii kweꞌ yel.
8 Ka bleꞌi Simón Pédronaꞌ ka gok, bc̱hekꞌ xibeꞌnaꞌ lao Jesúzaꞌ naꞌ chiꞌeneꞌ:
―Bikwasgach kwitii X̱anꞌ, ḻaꞌ beṉꞌ saaxyaz nadꞌ.
9 Golleꞌneꞌ kaꞌ daa bibanileꞌ, naꞌ kaꞌkzə beṉꞌkaꞌ leneꞌ bibangakileꞌ daa bdoḻꞌ beḻ zan inlleb.
10 Naꞌ ḻekzkaꞌ bibani Jacóbonaꞌ len Juannaꞌ xiiṉ Zebedewaꞌ, ḻaꞌ lengakenꞌ nakgakeꞌ txen Simónnaꞌ. Naꞌ cheꞌ Jesúzaꞌ Simónnaꞌ:
―Bi illeboꞌ. Kon ka chonoꞌ ṉaa chbejoꞌ beḻki ḻoo nisi, kaꞌkzan gonoꞌ yibejoꞌ beṉꞌ lao dii malaꞌ.
11 Naꞌ ka billinlengakeꞌ barkwkaꞌ choꞌa nisdoꞌnaꞌ, naꞌzə bkwaaṉgakeꞌn len xshinḻazeꞌkaꞌ naꞌch janogakeꞌ Jesúzaꞌ.
Biyon Jesúzaꞌ to beṉꞌ chakeꞌ yillweꞌ daa le lepra
12 Naꞌ shlak zoa Jesúzaꞌ to yell, bllin to beṉꞌ laweꞌnaꞌ chak doxen kwerp c̱heꞌnaꞌ yillweꞌ daa le lepra. Naꞌ ka bleꞌileꞌ Jesúzaꞌ, bc̱hekꞌ xibeꞌnaꞌ laweꞌnaꞌ naꞌ bc̱hekꞌ yic̱hjeꞌnaꞌ ax̱t lo yonaꞌ naꞌ gotꞌyoileꞌneꞌ, chiꞌeneꞌ:
―X̱anꞌ, ṉezidꞌ wak yikwasoꞌ yillweꞌni chakꞌ shi cheeniloꞌ.
13 Naꞌch Jesúzaꞌ bx̱oa neenaꞌ yic̱hj beenaꞌ, naꞌ chiꞌeneꞌ:
―Cheenidꞌx. Naꞌ ṉaate yikwasaꞌn.
―Kono yoo ka ba benꞌ c̱hoꞌ. Ḻete wyaj lao bx̱ozaꞌ kwenc̱he ileꞌileꞌ ba biyakiloꞌ, naꞌ jwaꞌ daa chiyaḻꞌ lljoo c̱he Chiozaꞌ daa nllia dii Moisézaꞌ biaꞌ kwenc̱he iṉezi beṉꞌ ba biyakiloꞌ.
15 Naꞌ ḻaꞌkzi golleꞌneꞌ kaꞌ, zizikchli wzeyi c̱heꞌ, naꞌ beṉꞌ zan bdop bllaggakeꞌ kwenc̱he bzenaggakeꞌ choꞌa xtilleenaꞌ naꞌ kwenc̱he biyoneꞌ bittezə yillweꞌ dii chakgakeꞌ.
16 Per Jesúzaꞌ yooloeꞌ chajeꞌ ga kono beṉꞌ chak kwenc̱he chjeḻwilleꞌ Chiozaꞌ.
Biyon Jesúzaꞌ to beṉꞌ net ṉiꞌa neenaꞌ
17 To lla ka chliꞌ chsedi Jesúzaꞌ, x̱oṉj fariseokaꞌ naꞌ beṉꞌkaꞌ chliꞌ chsedi leyaꞌ, naꞌ beṉꞌkaꞌ zaꞌ yogꞌ yellkaꞌ daa mbani Galileanaꞌ naꞌch daa mbani Judeanaꞌ naꞌ ḻekzkaꞌ beṉꞌ zaꞌ yell Jerusalénnaꞌ, chiꞌgakeꞌ chzenaggakeꞌ dillꞌ daa choꞌe. Naꞌ yeḻꞌ wak c̱he Chiozaꞌ wzoalenan Jesúzaꞌ kwenc̱he gok biyoneꞌ beṉꞌkaꞌ bi shaoꞌ.
18 Naꞌch bllin to c̱hop beṉꞌ nḻengakeꞌ to beṉꞌ net ṉiꞌa neenaꞌ nx̱oagakeꞌneꞌ to lo daa. Goklallꞌgakeꞌ shoꞌlengakeꞌneꞌ ḻoo yoonaꞌ kwenc̱he lljwaꞌgakeꞌneꞌ lao Jesúzaꞌ,
19 per bi gok shoꞌlengakeꞌneꞌ daa nyichachga beṉꞌkaꞌ ḻoo yoonaꞌ. Naꞌch wyepgakeꞌ kollꞌ yoonaꞌlə naꞌ bkwasgakeꞌ dexkaꞌ kwenc̱he gok bḻetjgakeꞌneꞌ do daa c̱heꞌnaꞌ ladj beṉꞌkaꞌ lleꞌ naꞌ kwenc̱he bllineꞌ lao Jesúzaꞌ.
20 Naꞌ bleꞌi Jesúzaꞌ ḻe nx̱enilallꞌgakeꞌneꞌ, naꞌch chiꞌe beṉꞌ weꞌnaꞌ:
―Bishꞌdawaa, ba biyakxen saaxya c̱hoꞌkaꞌ.
21 Naꞌch beṉꞌkaꞌ chliꞌ chsedi leyaꞌ naꞌ fariseokaꞌ wzaꞌlallꞌgakeꞌ, chakgakileꞌ: “¿Nora beeni chonz kwineꞌ ka Chiozaꞌ? ¡Ḻaꞌ toz Chiozanꞌ chak chiziꞌxeneꞌ saaxya c̱he beṉꞌ!”
22 Naꞌ gokbeꞌi Jesúzaꞌ daa wzaꞌlallꞌgakeꞌ, naꞌch golleꞌ ḻegakeꞌ:
―¿Berac̱he chzaꞌlallꞌzle kaꞌ?
23 ¿Achakile chyalljchidꞌ yeḻꞌ wak xench yepꞌ beeni: “Ba biziꞌxenꞌ saaxya c̱hoꞌnaꞌ”, ka daa yepee: “Biyas naꞌ bigoo nez”?
24 Naꞌ wliidꞌ leꞌ, nadꞌ, Beṉꞌ Bseḻꞌ Chiozaꞌ, napꞌ yeḻꞌ wṉabiaꞌ yell-lioni kwenc̱he yiziꞌxenꞌ saaxya c̱he beṉꞌ.
Naꞌch golleꞌ beenaꞌ net ṉiꞌa neenaꞌ:
―Ṉaa niaꞌ liꞌ, biyas, bitob daa c̱hoꞌnaꞌ naꞌ biyaj lilloꞌnaꞌ.
25 Naꞌ lii biyaste beenaꞌ chwiate beṉꞌkaꞌ lleꞌ naꞌ, bitobeꞌ daa c̱heꞌnaꞌ bizee ziyajeꞌ lill-leꞌ choeꞌlawee Chiozaꞌ.
26 Naꞌ yogꞌḻoḻ beṉꞌkaꞌ bibangakileꞌ naꞌ beꞌlaꞌogakeꞌ Chiozaꞌ, naꞌ do chllebzgakeꞌ cheꞌgakeꞌ:
―Ṉaanlla ba bleꞌicho dga chonan ka chibanicho.
Gox Jesúzaꞌ Levínaꞌ
27 Ka bizaꞌ Jesúzaꞌ, naꞌ bleꞌileꞌ to beṉꞌ wic̱hixj lieꞌ Leví, chiꞌe ganaꞌ chc̱hixjgakeꞌ. Naꞌ chiꞌeneꞌ:
―Da, dino nadꞌ.
28 Naꞌch lii wzollaꞌte Levínaꞌ, wlej yic̱hjeꞌ xshineꞌnaꞌ naꞌ janoeꞌ Jesúzaꞌ.
29 Naꞌ Levínaꞌ beneꞌ to lṉi xen c̱he Jesúzaꞌ lilleꞌnaꞌ. Naꞌ wyaj beṉꞌ zan beṉꞌ wic̱hixjkaꞌ naꞌ zi baḻ beṉꞌ yoblə wdaogakeꞌ txen.
30 Naꞌ fariseokaꞌ naꞌ beṉꞌkaꞌ chliꞌ chsedi leyaꞌ wzologakeꞌ chakdiḻ-lengakeꞌ beṉꞌkaꞌ nak Jesúzaꞌ txen, cheꞌgakeꞌ:
―¿Berac̱he cheej chaolenle beṉꞌ wic̱hixjkaꞌ naꞌ beṉꞌ malkaꞌ?
31 Naꞌch cheꞌ Jesúzaꞌ ḻegakeꞌ:
―Beenaꞌ zoa shiꞌa shaoꞌ aga no wen rmech chyalljileꞌ, san beenaꞌ bi shawaan chyalljileꞌneꞌ.
32 Aga bidꞌ ni c̱he beṉꞌkaꞌ nak beṉꞌ ḻi beṉꞌ shaoꞌ, san bidꞌ kwenc̱he yepꞌ beṉꞌ saaxyakaꞌ chiyaḻꞌ yiyaj yilengakileꞌ.
Wṉabgakileꞌ Jesúzaꞌ c̱he wbasaa
33 Naꞌ wṉabgakileꞌ Jesúzaꞌ, cheꞌgakeꞌneꞌ:
―Beṉꞌkaꞌ nak Juannaꞌ txen naꞌ beṉꞌkaꞌ nak fariseokaꞌ txen zekizezi chzoagakeꞌ wbasꞌ naꞌ choeꞌḻwillgakeꞌ Chiozaꞌ. Naꞌ ¿berac̱he beṉꞌki nakgakeꞌ liꞌ txen bi chzoagakeꞌ wbasꞌ?
34 Naꞌ chiꞌe ḻegakeꞌ:
―Katꞌ de to yeḻꞌ wishagnaꞌ, aga wak gonle byen beṉꞌkaꞌ chdop chllag soagakeꞌ wbasaa shlak zoalengakeꞌ biꞌnaꞌ chshagnaꞌ. Naꞌ kaꞌkzan beṉꞌki nakgakeꞌ nadꞌ txen, cheej chaogakeꞌ ṉaa zoalenꞌ ḻegakeꞌ.
35 Per wllin lla wkwas beṉꞌ nadꞌ ladjeꞌkaꞌ, kanaꞌchan soagakeꞌ wbasaa.
36 Naꞌ ḻekzkaꞌ bzoeꞌ sto jempl, chiꞌe ḻegakeꞌ:
―Ni to beṉꞌ bi chc̱hogueꞌ xa kobeꞌnaꞌ naꞌ chideen ḻee xeꞌ dii golaꞌ. Ḻaꞌ shi goneꞌn kaꞌ, naꞌ wlliayee dii kobaꞌ, naꞌ dii golaꞌ aga wṉelebin lechꞌ kobaꞌ.
37 Naꞌ ni kono chgaa vinonaꞌ daa ziꞌ chchejte to ḻoo yid golə. Ḻaꞌ shi no gon kaꞌ, vino kobaꞌ wc̱hezaan yid golaꞌ naꞌ c̱hopten kwiayiꞌ.
38 San vino kobaꞌ chiyaḻꞌ shollan ḻoo yid kobaꞌ.
39 Naꞌ ḻekzkaꞌ to beṉꞌ ba yooloeꞌ cheejeꞌ vino golaꞌ aga weenileꞌ yeejeꞌ dii kobaꞌ, daa chziachileꞌ dii golaꞌ.