Jesúzaꞌ biyoneꞌ to beṉꞌ cheꞌi lépranaꞌ
8
Naꞌ ka biyetj Jesúzaꞌ lo yaanaꞌ, beṉꞌ zan zinogakeꞌneꞌ.
2 Naꞌ kwiteꞌnaꞌ bllin to beṉꞌ cheꞌileꞌ lepraꞌ, naꞌch bc̱hekꞌ xibeꞌ laweꞌnaꞌ, chiꞌeneꞌ:
―X̱anꞌ, ṉezidꞌ wak yikwasoꞌ yillweꞌni chakꞌ sheḻꞌ gueeniloꞌ.
3 Naꞌch Jesúzaꞌ bx̱oa neenaꞌ yic̱hjeꞌnaꞌ, chiꞌeneꞌ:
―Cheenidꞌx. Naꞌ ṉaate yikwasaꞌn.
―Ni to kono yoo ka nak daa ba benꞌ c̱hoꞌ. Ḻete wyaj lao bx̱ozaꞌ kwenc̱he ileꞌileꞌ ba biyakiloꞌ, naꞌ jwaꞌ daa chiyaḻꞌ lljoo lao Chiozaꞌ ka nllia dii Moisézaꞌ biaꞌ goncho kwenc̱he iṉezi beṉꞌ ba biyakiloꞌ.
Biyon Jesúzaꞌ xmos x̱an soldadkaꞌ
5 Ka billin Jesúzaꞌ yell Capernaúmaꞌ lii bllinte to x̱an soldad laweꞌnaꞌ, naꞌ gotꞌyoileꞌneꞌ,
6 chiꞌeneꞌ:
―X̱anꞌ, xmosaa dieꞌ lillaa, naꞌ net tḻaa kwerp c̱heꞌnaꞌ naꞌ ḻe chey chleꞌ.
7 Naꞌch cheꞌ Jesúzaꞌneꞌ:
―Naꞌ saꞌ yiyonee.
8 Naꞌ cheꞌ x̱an soldadkaꞌneꞌ:
―X̱anꞌ, aga zakii nadꞌ kwenc̱he shoo ḻoo yoo lillaa. Kon ben mandad yiyakileꞌ naꞌ wiyakkzileꞌ.
9 Niaꞌ kaꞌ ḻaꞌ zoa beṉꞌ chṉabiaꞌ nadꞌ, naꞌ nadꞌ ḻekzkaꞌ chṉabiaꞌ soldad c̱haꞌkaꞌ. Katꞌ chepꞌ toeꞌ: “Wyaj niꞌ”, naꞌ chajeꞌ; naꞌ katꞌ chepꞌ stoeꞌ: “Da ni”, naꞌ chideꞌ; naꞌ katꞌ chizepꞌ xmosaa: “Ben dga”, naꞌ choneꞌn.
10 Ka beni Jesúzaꞌ choꞌa xtilleenaꞌ, bibanileꞌ naꞌ chiꞌe beṉꞌkaꞌ nogakeꞌ ḻeꞌ:
―Dii ḻi niaꞌ leꞌ, bigaṉꞌ lljtiaꞌ to beṉꞌ Israel beṉꞌ gonḻilallee nadꞌ ka chonḻilallꞌ beeni nadꞌ.
11 Naꞌ nadꞌ niaꞌ leꞌ, beṉꞌ zan beṉꞌ zaak doxen yell-lioni gonḻilallꞌgakeꞌ nadꞌ naꞌ lljazoalengakeꞌ txen dii Abrahamaꞌ, dii Isaacaꞌ naꞌ dii Jacobaꞌ yabanaꞌ ganaꞌ chṉabiaꞌ Chiozaꞌ.
12 Naꞌ ka nak beṉꞌkaꞌ wlej Chiozaꞌ nan lljazoagakeꞌ ganaꞌ chṉabiꞌe, zaneꞌ wzaḻee ganaꞌ shgasj shc̱hoḻ, ganaꞌ kwellyeshꞌgakeꞌ naꞌ gaoyaax̱ax̱j ḻeyeꞌkaꞌ daa ḻe gakshejlallꞌgakeꞌ, daa bi goongakileꞌ iṉabiꞌe ḻegakeꞌ.
13 Naꞌch cheꞌ Jesúzaꞌ x̱an soldadkaꞌ:
―Biyaj lilloꞌnaꞌ, naꞌ gak ka cheeniloꞌ daa chajḻiꞌo c̱haꞌ.
Naꞌ lo lla lo gorzə biyaki xmoseꞌnaꞌ.
Biyon Jesúzaꞌ tobiiṉ c̱he Pédronaꞌ
14 Naꞌch wyaj Jesúzaꞌ lill Pédronaꞌ, naꞌ bleꞌileꞌ de tobiiṉ c̱heꞌnaꞌ yoꞌe dii ḻanaꞌ.
15 Naꞌ bex̱ꞌ Jesúzaꞌ neenaꞌ naꞌ bichejeꞌ dii ḻanaꞌ. Naꞌ lii wyastieꞌ beneꞌ dii wdaogakeꞌ.
Jesúzaꞌ biyoneꞌ zan beṉꞌkaꞌ bi shaoꞌ
16 Naꞌch ka ba chxoa wbillaꞌ, jwaꞌgakeꞌ beṉꞌ zan ganaꞌ zoa Jesúzaꞌ, beṉꞌ yoo dii x̱iwꞌkaꞌ, naꞌ shchoꞌazə dillaa biꞌe bichejgakan. Naꞌ ḻekzkaꞌ biyoneꞌ yogꞌ beṉꞌ bi shaoꞌ.
17 Gok kaꞌ kwenc̱he gok ka wna dii Isaíazaꞌ, beenaꞌ wdix̱jee daa goll Chiozaꞌneꞌ, daa wneꞌ: “Ḻeꞌ bikee yillweꞌkaꞌ cheꞌicho naꞌ beneꞌ ka bigaa yeḻꞌ chey chla c̱hechonaꞌ.”
Beṉꞌkaꞌ cheengakileꞌ lljanogakeꞌ Jesúzaꞌ
18 Naꞌ ka bleꞌi Jesúzaꞌ beṉꞌ zan inlleb ba nec̱hjgakeꞌneꞌ, beneꞌ mandad teleneꞌ beṉꞌkaꞌ nakgakeꞌneꞌ txen shḻaa nisdoꞌnaꞌlə.
19 Naꞌ wbigꞌ to beṉꞌ chliꞌ chsedi leyaꞌ, chiꞌeneꞌ:
―Maestro, cheenidꞌ saꞌlenꞌ liꞌ gattezə shajoꞌ.
20 Naꞌch cheꞌ Jesúzaꞌneꞌ:
―Bezꞌkaꞌ nongakb yech ga chiyoogakb, naꞌ byiṉdoꞌkaꞌ non lilldoꞌgakb, san nadꞌ, Beṉꞌ Bseḻꞌ Chiozaꞌ Yell-lioni, bibi lillꞌ de.
21 Naꞌ bchej sto beṉꞌ nakeꞌ Jesúzaꞌ txen naꞌ chiꞌeneꞌ:
―X̱anꞌ, wzaꞌlenꞌ liꞌ gattezə shajoꞌ ka yiyoll guet x̱aꞌnaꞌ.
22 Naꞌch goll Jesúzaꞌneꞌ:
―Da, dino nadꞌ. Wikwashꞌkzə ljwell beṉꞌ wetkaꞌ.
Jesúzaꞌ bkwezeꞌ beꞌnaꞌ lo nisdoꞌnaꞌ
23 Naꞌch wyoo Jesúzaꞌ ḻoo barkwaꞌ len beṉꞌkaꞌ ba nakgakeꞌneꞌ txen.
24 Naꞌ shlak zej barkwaꞌ wteseꞌ. Naꞌ wzolo wzechga beꞌnaꞌ lo nisdoꞌnaꞌ, naꞌ wzolo chas chataan naꞌ biyoll nisaꞌ ḻoo barkwaꞌ.
25 Naꞌch beṉꞌkaꞌ nak Jesúzaꞌ txen jasbangakeꞌneꞌ, naꞌ cheꞌgakeꞌ:
―¡X̱anꞌ, bisla choꞌ! ¡Ba chbeꞌcho yel!
26 Naꞌch cheꞌ Jesúzaꞌ:
―¿Berac̱he chlleblikzle? ¿Bic̱he bi nx̱enilallꞌle nadꞌ kwasḻoḻ?
Naꞌch wyaseꞌ bsheshleneꞌ beꞌnaꞌ len nisdoꞌnaꞌ, naꞌ wlezgakan.
27 Naꞌ beṉꞌkaꞌ lleꞌlen Jesúzaꞌ ḻoo barkwaꞌ bibangakileꞌ ka beneꞌ, naꞌch cheꞌ ljwellgakeꞌ:
―¿Noran nak beeni, lla? Ax̱t beꞌnaꞌ naꞌ nisdoꞌnaꞌ chzenaggakan c̱heꞌ.
C̱hop beṉꞌ Gadara yoogakeꞌ dii x̱iwaa
28 Naꞌ ka bllin Jesúzaꞌ yell-lionaꞌ mbani Gadáranaꞌ daa llia shḻaa nisdoꞌnaꞌ, c̱hop beṉꞌ yoogakeꞌ dii x̱iwꞌkaꞌ bchejgakeꞌ ḻoo kapsantaꞌ jatiḻgakeꞌneꞌ. Naꞌ daa ḻe zṉiagakeꞌ aga no chak te lo nezaꞌ chde ganaꞌ zoagakeꞌ.
29 Naꞌ besyaagakan cheꞌgakan Jesúzaꞌ:
―¿Bic̱he zaꞌzoꞌ gani zoantoꞌ, Jesús, Xiiṉ Chios? ¿Aba zaꞌzeloꞌ zidsakꞌziꞌo netoꞌ ḻaꞌkzi biṉꞌ illin lla sakꞌziꞌntoꞌ?
―Shi yibejoꞌ netoꞌ ḻoo yic̱hjlallꞌdoꞌ beṉꞌki, weꞌgachoꞌ latj yiyoontoꞌ kushkaꞌ.
32 Naꞌch goll Jesúzaꞌ ḻegakan:
―Wakkzan. Ḻi yiyoo shkaꞌ.
Naꞌch bichej dii x̱iwꞌkaꞌ naꞌ biyoogakan kushkaꞌ, naꞌ kushkaꞌ lii bxoṉjtegakb naꞌ jabix̱gakb to choꞌa yaa naꞌ bxoptegakb ḻoo nisdoꞌnaꞌ naꞌ wcheꞌgakb yel.