Bi chiyaḻꞌ yiya yiyiljcho beṉꞌ
(Lc. 6:37-38, 41-42)
7
’Bi yiya yiyiljle beṉꞌ, kwenc̱he bi yiya yiyilj Chiozaꞌ leꞌ.
2 Ḻaꞌ kon ka chiya chiyiljle beṉꞌ, kaꞌkzan yiya yiyilj Chiozaꞌ leꞌ, naꞌ kon ka gonile beṉꞌ, kaꞌkzan goni Chiozaꞌ leꞌ.
3 ¿Bic̱he chwiazoꞌ bic̱haꞌ yoo ḻoo jalao bishꞌ ljwelloꞌnaꞌ naꞌ bi chileꞌiloꞌ kwagaa yoo ḻoo jalawoꞌnaꞌ?
4 Shi bi chleꞌiloꞌ kwagaa yoo ḻoo jalawoꞌnaꞌ, ¿nakra gonoꞌ yoo bishꞌ ljwelloꞌnaꞌ: “Beṉshki yibejꞌ bic̱haꞌ yoo ḻoo jalawoꞌnaꞌ”?
5 ¡Beṉꞌ wxiyeꞌ! Zigaate bwia c̱hoꞌnaꞌ naꞌtech wwioꞌ c̱he bishꞌ ljwelloꞌnaꞌ.
6 ’Naꞌ bi gonzle byen weꞌlenle xtillꞌ Chiozaꞌ beṉꞌkaꞌ bi chazlallꞌgakeꞌn, kwenc̱he ki gongakileꞌ leꞌ zṉia ka chon bekwꞌkaꞌ chxoxj chtingakb katꞌ no chonḻegakib. Ni bi weꞌlenle xtillꞌ Chiozaꞌ beṉꞌkaꞌ bi cheengakileꞌ wzenaggakeꞌn kwenc̱he ki wlej wshoshjgakeꞌ dillaa ka chon kushkaꞌ chlej chshoshjgakb daa bi choolallꞌgakb gaogakb.
Chiyaḻꞌ iṉabicho Chiozaꞌ gakleneꞌ choꞌ
(Lc. 11:9-13; 6:31)
7 ’Ḻi iṉabi Chiozaꞌ bin cheenile naꞌ goṉeꞌn. Ḻi yiyilj daa cheenile naꞌ yillelilen. Ḻi iṉe choꞌa puertaꞌ, naꞌ wsaljeꞌn.
8 Ḻaꞌ beenaꞌ chṉabileꞌ beṉꞌ daa cheenileꞌ, weꞌkzeꞌn; naꞌ beenaꞌ chiyiljeꞌ daa cheenileꞌ, willelkzileꞌn; naꞌ beenaꞌ chṉe choꞌa puertaꞌ, wsaljkzgakeꞌ shoꞌe.
9 ’Leꞌ zoa xiiṉle, shi iṉabibꞌ leꞌ to yetxtil aga weꞌlebꞌ to yaj.
10 Wa shi iṉabibꞌ leꞌ to beḻ yaa, aga weꞌlebꞌ to beḻ zṉia.
11 Shi leꞌ naktele beṉꞌ mal chak weꞌle xiiṉlekaꞌ daa nak dii wen, ¿alechli X̱acho Chiozaꞌ zoa yabanaꞌ ki goṉeꞌ leꞌ dii wen dii shawaa shi iṉabileneꞌn?
12 ’Kon ka cheenile goni beṉꞌ leꞌ, kaꞌkzan chiyaḻꞌ gonileneꞌ, ḻaꞌ kanꞌ na leyaꞌ naꞌ librkaꞌ bzej dii beṉꞌkaꞌ wdix̱jee daa goll Chiozaꞌ ḻegakeꞌ.
Puert daa nak diidoꞌ yid
13 ’Ḻi gon byen shoꞌle choꞌa puertaꞌ daa nshopꞌ. Ḻaꞌ nḻagꞌ puertaꞌ naꞌ zlagꞌ nak nezaꞌ daa zej ganaꞌ chbiayiꞌ beṉꞌ, naꞌ beṉꞌ zan choogakeꞌn.
14 Per ka nak nezaꞌ daa zej yabanaꞌ ganaꞌ lljazoalencho Chiozaꞌ, nakan to nez les, naꞌ to c̱hopchga beṉꞌ chillelgakileꞌn.
Daa chbia lo yagaꞌ chliꞌn bi yag daa
15 ’Ḻi wsakꞌ kwenc̱he bi shajḻeꞌle c̱he beṉꞌkaꞌ chonz ka chyix̱jee daa cheꞌ Chiozaꞌ ḻegakeꞌ, naꞌ chonz kwingakeꞌ beṉꞌ wen beṉꞌ gax̱jlallꞌ, per beṉꞌ malzgakan naꞌ chlliayiꞌgakeꞌ beṉꞌ, ka chon to ba zṉia.
16 Ka ileꞌile ka nsaꞌ c̱hegakeꞌ naꞌ gakbeꞌile non nakgakeꞌ. Ḻaꞌ ṉezkzile aga wishibcho uvanaꞌ to lo yag yeshꞌ naꞌ ḻekzkaꞌ aga wishibcho yix̱wewaꞌ to lo yag yeshꞌ yaa.
17 Kaꞌkzan yag wennaꞌ chbian dii wen, naꞌ yagaꞌ daa bi nak wen chbian dii bi nak wen.
18 Ḻaꞌ yagaꞌ daa nak dii wen aga wbian dii bi nak wen, naꞌ yagaꞌ daa bi nak dii wen aga wbian dii nak wen.
19 Yogꞌ yag dii chbia dii bi nak wen, chc̱hoggakeꞌn naꞌ chzeygakeꞌn.
20 Daan, wakbeꞌkzile ka nsaꞌ c̱he beṉꞌkaꞌ.
Aga yogꞌ beṉꞌ yillineꞌ yabanaꞌ ganaꞌ zoa Chiozaꞌ chṉabiꞌe
21 ’Aga yogꞌ beṉꞌkaꞌ na nadꞌ: “X̱anꞌ, X̱anꞌ”, yillingakeꞌ yabanaꞌ ganaꞌ chṉabiaꞌ Chiozaꞌ, ḻete beṉꞌkaꞌ chongakeꞌ ka cheeni X̱aꞌ Chiozaꞌ, beenaꞌ zoa yabanaꞌ.
22 Katꞌkaꞌ illin llanaꞌ yiziaꞌ kwent c̱he benꞌ, zangakeꞌ iṉagakeꞌ nadꞌ: “X̱anꞌ, X̱anꞌ, netoꞌ wdix̱jeentoꞌ daa wnoꞌ, naꞌ kon yeḻꞌ wak c̱hoꞌnaꞌ bibejntoꞌ dii x̱iwꞌkaꞌ yoo beṉꞌ naꞌ benntoꞌ dii zan yeḻꞌ wak.”
23 Naꞌch yepgakee: “Biga bembiꞌa leꞌ. Ḻi kwas kaꞌlə, leꞌ beṉꞌ wen dii mal.”
C̱hop beṉꞌ bengakeꞌ twej yoo
24 ’Daan, nottez beenaꞌ chzenag choꞌa xtillaani naꞌ choneꞌ ka niaꞌ, nakeꞌ ka to beṉꞌ sinꞌ, beenaꞌ ben lilleꞌnaꞌ to lo yaj.
25 Naꞌ ka gok yejsiwaa, bgol yaokaꞌ, naꞌ wzechga beꞌnaꞌ nan wlligꞌgakan yoonaꞌ, per bi billeen daa chiꞌcha leninnaꞌ lo yajaꞌ.
26 Per beenaꞌ cheni choꞌa xtillaani naꞌ bi choneꞌ ka niaꞌ, nakeꞌ ka beenaꞌ bi chajnii, beenaꞌ bx̱e lilleꞌnaꞌ lo yoxaꞌ.
27 Naꞌ ka gok yejsiwaa, bgol yaokaꞌ, naꞌ wzechga beꞌnaꞌ naꞌ blligꞌgakan yoonaꞌ naꞌ wlliayiꞌtekzan.