Chiyaḻꞌ gaklencho beṉꞌ
6
’Bi wliꞌ wzez c̱hele ladj beṉꞌ nan nakle beṉꞌ wen. Ḻaꞌ shi kwenc̱hezə ileꞌi beṉaan chonle daa nak wen, bibi laxjle goṉ X̱acho Chiozaꞌ, beenaꞌ zoa yabanaꞌ.
2 Naꞌ katꞌ chaklenle beṉꞌkaꞌ chyallj chc̱hini, bi wzelen dillꞌ, ka chon beṉꞌ wxiyeꞌkaꞌ ganaꞌ chdop chllagcho choeꞌḻwillcho Chiozaꞌ, wa do yawi nez. Choeꞌgakeꞌ dillꞌ c̱he daa chongakeꞌ kwenc̱he weꞌlaꞌo beṉꞌ ḻegakeꞌ. Dii ḻi niaꞌ leꞌ, daa choeꞌlaꞌo beṉꞌ ḻegakeꞌ, ḻennanꞌ laxjeꞌkaꞌ.
3 San leꞌ, katꞌ choeꞌle beṉꞌ bi dii choeꞌleneꞌ, bi gonlen ka ileꞌi beṉꞌ. Naꞌ ni to beṉꞌ bi yeꞌleneꞌ bin chonle.
4 San ḻi gaklen beṉꞌ ka kono gakbeꞌi. Naꞌ X̱achonaꞌ, beenaꞌ chen chleꞌi daa chonle, goṉeꞌ laxjle.
Ka chiyaḻꞌ weꞌḻwillcho Chiozaꞌ
5 ’Naꞌ katꞌ choeꞌḻwill-le Chiozaꞌ, bi gonle ka beṉꞌ wxiyeꞌkaꞌ. Ḻegakeꞌ choolallꞌgakeꞌ sechagakeꞌ weꞌḻwillgakeꞌ Chiozaꞌ ganaꞌ chdop chllagcho choeꞌḻwillchoneꞌ wa ga lleꞌ llaꞌ beṉꞌ kwenc̱he ileꞌgakileꞌ ka chongakeꞌ. Dii ḻi niaꞌ leꞌ, daa chleꞌi beṉꞌ ka chongakeꞌ, ḻezannanꞌ laxjeꞌkaꞌ.
6 San leꞌ, katꞌ weꞌḻwill-le Chiozaꞌ, ḻi yiyoo ḻoo lill-lenaꞌ naꞌ ḻi wsej puertaꞌ, naꞌ ḻi weꞌḻwill X̱achonaꞌ, beenaꞌ kono chleꞌi. Naꞌch X̱achonaꞌ, beenaꞌ chen chleꞌi daa chonle, goṉeꞌ laxjle.
7 ’Naꞌ katꞌ choeꞌḻwill-le Chiozaꞌ aga ḻiḻezi dillꞌkaꞌ iṉale ka chon beṉꞌkaꞌ bi nombiaꞌgakeꞌneꞌ, ḻaꞌ chakgakileꞌ daa choeꞌgakeꞌ dillꞌ zan naꞌ wzenagueꞌ bin cheꞌgakeꞌneꞌ.
8 Bi gonle ka chongakeꞌ, ḻaꞌ X̱acho Chiozaꞌ ba ṉezkzileꞌ bi daa chyalljile ka ziꞌ iṉabləlen.
9 Katꞌ weꞌḻwill-le Chiozaꞌ, kin iṉale:
X̱antoꞌ Chios, beṉꞌ zoa yaba,
weꞌlaꞌoshga yogꞌḻoḻ beṉꞌ liꞌ.
10 Naꞌ iṉabiaꞌgachoꞌ ḻoo yic̱hjlallꞌdoꞌ yogꞌḻoḻ beṉꞌ,
kwenc̱he gak lo yell-lioni ka chaklalloo, ka chak yabanaꞌ.
11 Ka nak daa choṉoꞌ cheej chaontoꞌ yogꞌ lla, beṉgachan ṉaanlla.
12 Wxiꞌxen c̱hentoꞌ, ka chon netoꞌ chziꞌxenntoꞌ bittezə dii choni beṉꞌ netoꞌ.
13 Bi weꞌgachoꞌ latj ibix̱ntoꞌ gonntoꞌ daa bi nak wen, san bislagach netoꞌ lo ṉiꞌa naꞌ dii malaꞌ.
Ḻaꞌ linꞌ napoꞌ yeḻꞌ wṉabiaꞌ, naꞌ yeḻꞌ wak, naꞌ linꞌ chidoḻoo shoo balaaṉ xen zejḻi kaṉi. Kanꞌ nakan.
14 ’Ḻaꞌ shi leꞌ chziꞌxenle c̱he beṉꞌ shi bi chongakileꞌ leꞌ, kaꞌkzə X̱acho Chiozaꞌ zoa yabanaꞌ siꞌxeneꞌ c̱hele.
15 San shi leꞌ bi chziꞌxen c̱he ljwell-le, kaꞌkzə Chiozaꞌ, beenaꞌ nak X̱ale, bi siꞌxeneꞌ dii malkaꞌ chonle.
Daa chiyaḻꞌ goncho katꞌ zoacho wbasꞌ
16 ’Katꞌ zoale wbasꞌ, bi gonzle choꞌalaolenaꞌ nyeshꞌ ka chon beṉꞌ wxiyeꞌkaꞌ, ḻaꞌ ḻegakeꞌ chon choꞌalaweꞌkaꞌ nyeshꞌ kwenc̱he gakbeꞌi beṉꞌ bi neej naogakeꞌ. Dii ḻi niaꞌ leꞌ, daa gakbeꞌi beṉꞌ daa chongakeꞌ, ḻezannanꞌ laxjeꞌkaꞌ.
17 San leꞌ, katꞌ soale wbasꞌ, ḻi wpaa yic̱hjlenaꞌ naꞌ ḻi c̱hib ḻi wx̱is choꞌalaolenaꞌ
18 kwenc̱he bi gakbeꞌi beṉꞌ nan zoale wbasꞌ. San toz X̱acho Chiozaꞌ, beenaꞌ kono chleꞌi, ileꞌileꞌ daa chonle naꞌ goṉeꞌ laxjle.
Yeḻꞌ shawaa daa de yabanaꞌ
19 ’Bi wtop wshagle yeḻꞌ wniꞌanaꞌ yell-lioni, ḻaꞌ baḻ diikaꞌ chaljan bakaꞌ chlliayiꞌgakban, naꞌ baḻan chibia leyin naꞌ chbiayiꞌgakan, wa choo wbankaꞌ naꞌ chkaagakeꞌn.
20 San ḻi gon ka gatꞌ yeḻꞌ shaoꞌ c̱hele yabanaꞌ, ḻaꞌ daa de yabanaꞌ bi galjan badoꞌ wlliayiꞌban, ni bi yibia leyin, ni bi gak shoꞌ wbannaꞌ ikeen.
21 Ḻaꞌ ganaꞌ de yeḻꞌ shaoꞌ c̱helenaꞌ, naꞌkzan se yic̱hjlallꞌdoꞌlenaꞌ wṉeyi.
Jalaochoki nakgakan beeniꞌ c̱he kwerp c̱hechoni
22 ’Jalaochoki nakgakan beeniꞌ c̱he kwerp c̱hechoni. Shi jalaochoki chleꞌgakin kwasḻoḻ, doxen kwerp c̱hechoni zoan lo beeniꞌnaꞌ.
23 Per shi bi chleꞌi jalaochoki, kwerp c̱hechoni zoan lo yel c̱hoḻaꞌ. Kaꞌkzan chak c̱he yic̱hjlallꞌdoꞌchoni. Shi bi chzenagcho c̱he Chiozaꞌ, nc̱hoḻi yic̱hjlallꞌdoꞌchoni.
Aga wak goncho yeḻꞌ wniꞌanaꞌ txen naꞌ ḻekzkaꞌ gontecho Chiozaꞌ txen
24 ’Aga ga zoa to beṉꞌ wḻaneꞌ xshin c̱hop beṉꞌ, ḻaꞌ wakzbanileꞌ beenaꞌ to, naꞌ gakchileꞌ beenaꞌ sto, wa goneꞌ xshin beenaꞌ to do yic̱hj do lallee naꞌ xshin beenaꞌ sto goneꞌn do ki do lallee. Naꞌ kaꞌkzan chak c̱hecho len Chiozaꞌ, aga wak goncho ka cheenileꞌ shi weꞌtecho latj iṉabiaꞌ yeḻꞌ wniꞌanaꞌ choꞌ.
Bi kwek yic̱hjcho diikaꞌ chyalljicho
25 ’Daan niaꞌ leꞌ: Bitek kwek yic̱hjle daa yeej gaole kwenc̱he ibanle, ni xalaanle. Ḻaꞌ zakꞌtechlə yeḻꞌ mban c̱hechonaꞌ aga ka daa cheej chaocho, naꞌ zakꞌtech kwerp c̱hechonaꞌ aga ka xalaanchonaꞌ.
26 Ḻi wwiakachi byiṉdoꞌkaꞌ chda xan yabanaꞌ, ḻaꞌkzi bi chaz chaaṉgakb naꞌ bibi chiziꞌ chilapgakb, ni bi zoa ga chgooshaoꞌgakb dii gaogakb, len chweej chwaokz X̱acho Chiozaꞌ zoa yabanaꞌ ḻegakb. ¿Alechlin leꞌ, zakꞌtechle aga ka badoꞌkaꞌ ze lo llazə?
27 Naꞌ ni tole bi gak yisc̱hooch yeḻꞌ mban c̱helenaꞌ zi shloll ḻaꞌkzi nall inlleb zele wṉeyi c̱heyin.
28 ’Naꞌ ¿bic̱he chiꞌ yic̱hjzle xalaanlenaꞌ? Wwiakachile ka chgol yejdoꞌkaꞌ ze lyix̱aa, len aga bi llin chongakan ni bi choḻgakan do.
29 Per niaꞌ leꞌ, ni dii Salomónnaꞌ, beenaꞌ wdapchga yeḻꞌ shaoꞌkaꞌ, bi bllin gak xeꞌnaꞌ xochi ka yejdoꞌkaꞌ.
30 Naꞌ shi Chiozaꞌ noneꞌ yejdoꞌkaꞌ ze lyix̱aa xochi, ḻaꞌkzi nakan de toldezə naꞌtech chtop beṉꞌ ḻen naꞌ chzeyeꞌn, ¿alechla leꞌ, gontechleꞌ wen c̱hele goṉeꞌ xalaanle ḻaꞌkzi bitek chajḻeꞌle gakleneꞌ leꞌ?
31 Naꞌ bi kwek yic̱hjzle iṉazle: “¿Bin yeej gaocho?” wa “¿Nak goncho gatꞌ xalaancho?”
32 Ḻaꞌ beṉꞌkaꞌ bi nonḻilallꞌgakeꞌ Chiozaꞌ to daazə chiꞌ yic̱hjgakeꞌ. Per X̱achonaꞌ, beenaꞌ zoa yabanaꞌ, ṉezkzileꞌ chyalljile yogꞌ diiki.
33 Naꞌ daa llialote chiyaḻꞌ wzenagle c̱he Chiozaꞌ kwenc̱he iṉabiꞌe leꞌ, naꞌ gonle kon daa cheenileꞌ, naꞌ goṉkzeꞌ yogꞌ daa chyalljile.
34 Bitek kwek yic̱hjle shi wyaj wdele llakaꞌ zi zaꞌ ḻaꞌ to to lla nsaꞌ dii zed c̱heyin.