Chiyaḻꞌ yiyaj yilenicho dii malkaꞌ choncho
13
Naꞌ lo llanaꞌtezə bllin baḻ beṉꞌ lao Jesúzaꞌ gollgakeꞌneꞌ ka ben Pilátonaꞌ beneꞌ mandad betgakeꞌ baḻ beṉꞌ Galiléakaꞌ ka chitgakeꞌ bayix̱ꞌkaꞌ choeꞌlaꞌogakeꞌ Chiozaꞌ. Naꞌ xc̱heneꞌkaꞌ biyakan toz kon xc̱hen bayix̱ꞌkaꞌ betgakeꞌ.
Lucas 13.1-35
―¿Achakile beṉꞌ Galiléakaꞌ betgakeꞌ nakchgakeꞌ beṉꞌ malch aga ka nochlə beṉꞌ wlall c̱heꞌkaꞌ?
3 Niaꞌ leꞌ bi nakan kaꞌ. Shi leꞌ bi yiyaj yilenile dii malkaꞌ chonle, ḻekzkaꞌ yogꞌle kwiayiꞌ.
4 Shera beṉꞌ Jerusalénkaꞌ shiṉꞌshoṉə, beṉꞌkaꞌ wit daa bdakwgakeꞌ yoo sibaꞌ daa zoa Siloénaꞌ, ¿achakileꞌ napchgakeꞌ doḻꞌ aga ka beṉꞌ wlall c̱heꞌkaꞌ?
5 Niaꞌ leꞌ bi nakan kaꞌ. Naꞌ shi leꞌ bi yiyaj yilenile dii malkaꞌ chonle, ḻekzkaꞌ yogꞌle kwiayiꞌ.
Jempl c̱he yag yix̱wewaꞌ daa bi wllia
6 Naꞌch bzoa Jesúzaꞌ to jempl, chiꞌe beṉꞌkaꞌ:
―To beṉꞌ zoa to yag yix̱wew lo yell-lio c̱heꞌnaꞌ ganaꞌ nazeꞌ yag uvakaꞌ, naꞌ wyajeꞌ jawieꞌ shi llian yix̱wewaꞌ, naꞌ ka bllineꞌ ni tlishꞌ bi llian.
7 Naꞌch chiꞌe beenaꞌ chap yell-lio c̱heꞌnaꞌ: “Ba gok shoṉ yiz chidwiaꞌ shi llian yix̱wewaꞌ, naꞌ ni to bibi chbian. Bc̱hogchoklan, ḻaꞌ nḻanchokzan yell-lioni.”
8 Naꞌ beenaꞌ chapeꞌ yell-lio c̱heꞌnaꞌ chiꞌe: “X̱anꞌ, ziꞌ zoashkin zi twiz naꞌ wc̱heeṉꞌ xaninnaꞌ naꞌ wllaꞌn benꞌnaꞌ.
9 Shera shicholə wbian. Naꞌ shi bi wlliakzan, naꞌ wc̱hogoꞌn.”
Biyon Jesúzaꞌ to noolə llanaꞌ chombaaṉ beṉꞌ Israelkaꞌ
10 Naꞌ to lla sabd, llanaꞌ chombaaṉ beṉꞌ Israelkaꞌ, chliꞌ chsedi Jesúzaꞌ beṉꞌkaꞌ chdop chllag ganaꞌ choeꞌḻwillgakeꞌ Chiozaꞌ.
11 Naꞌ len to noolə ba gok shiṉꞌshoṉ yiz nḻew dii x̱iwaa ḻeꞌ, naꞌ bichkzə gok yizieꞌ shḻi.
12 Naꞌ ka bleꞌi Jesúzaꞌneꞌ wṉieꞌneꞌ naꞌ golleꞌneꞌ:
―Noolə, ba bikwas yillweꞌ c̱hoꞌnaꞌ.
13 Naꞌch bx̱oa neenaꞌ kollꞌ noolaꞌ naꞌ katenaꞌ lii bizetieꞌ shḻicha, naꞌ wzoloeꞌ choeꞌlawee Chiozaꞌ.
14 Naꞌ beenaꞌ chgoo xṉezi c̱heyi diikaꞌ chongakeꞌ ganaꞌ chdop chllaggakeꞌ bllee daa biyon Jesúzaꞌ noolaꞌ llanaꞌ chombaaṉgakeꞌ, naꞌch chiꞌe beṉꞌkaꞌ lleꞌ naꞌ:
―De x̱op lla goncho llinnaꞌ, naꞌ bittezə llakaꞌ yidle kwenc̱he yiyakile, naꞌ bi gonle lez yiyakileꞌ llani chombaaṉcho.
15 Naꞌch cheꞌ X̱ancho Jesúzaꞌ ḻegakeꞌ:
―Leꞌ beṉꞌ wxiyeꞌ, ¿abi wsell-le gooṉ c̱helekaꞌ wa burr c̱helekaꞌ lljaweejlegakb nisaꞌ llani chombaaṉcho?
16 Nooli nakeꞌ xiiṉ dia c̱he dii Abrahamaꞌ, naꞌ ba gok shiṉꞌshoṉ yiz Satanázaꞌ daa chṉabiaꞌ dii x̱iwꞌkaꞌ nonan ḻeꞌ ka beṉꞌ nc̱hejeꞌ. ¿Anaꞌ chakile bi nakan wen biyonee llani chombaaṉcho?
17 Naꞌ ka goll Jesúzaꞌ kaꞌ, yogꞌ beṉꞌkaꞌ chakzbangakileꞌneꞌ biyii bidoꞌgakileꞌ, naꞌ yogꞌ beṉꞌkaꞌ sto bibagakileꞌ daa bleꞌgakileꞌ yeḻꞌ wakkaꞌ choneꞌ.
Jempl c̱he sa mostásanaꞌ
18 Naꞌch wna Jesúzaꞌ:
―¿Nakra ka nak yeḻꞌ wṉabiaꞌ c̱he Chiozaꞌ, lla? Naꞌ ¿bera ka wsaklebidaꞌn?
19 Zaklebin sa mostásanaꞌ daa goz to beṉꞌ lo yell-lio c̱heꞌnaꞌ, naꞌ ka blaꞌn naꞌ bgolan gokan to yag xen naꞌ ax̱t byiṉdoꞌkaꞌ ben lillbkaꞌ lo xoziinnaꞌ.
Jempl c̱he levadúranaꞌ
20 Naꞌ ḻekzkaꞌ chizeꞌ Jesúzaꞌ:
―Dga sto wsaklebidaꞌn yeḻꞌ wṉabiaꞌ c̱he Chiozaꞌ.
21 Zaklebin levadúranaꞌ daa chc̱hix̱ to noolə shoṉa rob yezj kwenc̱he yisgolan kwa c̱he yetxtilaꞌ.
Chiyaḻꞌ shoꞌcho puertdoꞌnaz
(Mt. 7:13-14, 21-23)
22 Shlak ziyaj Jesúzaꞌ Jerusalénnaꞌ, bidieꞌ yell yeḻkaꞌ naꞌ yelldoꞌkaꞌ naꞌ bliꞌ bsedileꞌ beṉꞌ.
23 Naꞌ bchej to beṉꞌ wṉabileꞌneꞌ, chiꞌeneꞌ:
―Maestro, ¿ato c̱hopchga beṉꞌ yila bi kwiayiꞌgakeꞌ?
Naꞌch cheꞌ Jesúzaꞌneꞌ:
24 ―Ḻi gon byen shoꞌle choꞌa puert daa nak diidoꞌzə kwenc̱he soalenle Chiozaꞌ. Ḻaꞌ beṉꞌ zan gaklallꞌgakeꞌ shoꞌgakeꞌn, naꞌ bi gak shoꞌgakeꞌ.
25 Naꞌ ka sollaꞌ x̱an yoonaꞌ wsejeꞌ puertaꞌ, naꞌ leꞌ, igaaṉle choꞌa puertaꞌ wtankwle ḻeꞌinnaꞌ naꞌ yeꞌleneꞌ: “Beṉꞌdoꞌ, bsaljgach kwenc̱he shoꞌntoꞌ.” Naꞌ x̱an yoonaꞌ iṉeꞌ leꞌ: “Bi nombiꞌa leꞌ ni bi ṉezidꞌ ga beṉꞌ leꞌ.”
26 Naꞌch yeꞌleneꞌ: “Weej wdaolenntoꞌ liꞌ txen, naꞌ bliꞌ bsediloꞌ netoꞌ yell c̱hentoꞌnaꞌ.”
27 Naꞌch iṉeꞌ leꞌ: “Bi nombiꞌa leꞌ, ni bi ṉezidꞌ ga beṉꞌ leꞌ. Ḻi lljayaak do naꞌlə yogꞌḻoḻ-le leꞌ beṉꞌ wen dii mal.”
28 Naꞌ kwellchgale ax̱t gaox̱ax̱j ḻeylenaꞌ daa ḻe gakshejlallꞌle ka ileꞌile dii Abrahamaꞌ, dii Isaacaꞌ, dii Jacobaꞌ naꞌ yogꞌ dii beṉꞌkaꞌ wdix̱jee daa goll Chiozaꞌ ḻegakeꞌ lleꞌgakeꞌ yabanaꞌ ganaꞌ chṉabiaꞌ Chiozaꞌ, naꞌ leꞌ, bi gok yiyoole.
29 Naꞌ wde wdeli beṉꞌ lleꞌ zbii zkaaṉ yell-lioni yillingakeꞌ yabanaꞌ ganaꞌ chṉabiaꞌ Chiozaꞌ naꞌ kweꞌgakeꞌ gaogakeꞌ.
30 Naꞌ baḻ beṉꞌ bi nak beṉꞌ zakii ṉaa gakgakeꞌ beṉꞌ zakii, naꞌ beṉꞌkaꞌ nak beṉꞌ zakii ṉaa bich gakgakeꞌ beṉꞌ zakii.
Wchell Jesúzaꞌ ni c̱he beṉꞌ Jerusalénkaꞌ
31 Naꞌ lo llanaꞌtezə bllin baḻ fariseokaꞌ kwit Jesúzaꞌ naꞌ cheꞌgakeꞌneꞌ:
―Biyaj gan yoblə. Cheeni Heródezaꞌ witeꞌ liꞌ.
32 Naꞌ cheꞌ Jesúzaꞌ ḻegakeꞌ:
―Ḻi yiyaj naꞌ ḻi lljayell beṉꞌ wxiyeꞌnaꞌ: “Nin soaꞌ to c̱hop shoṉ lla kwenc̱he yibejꞌ dii x̱iwꞌkaꞌ yoo beṉꞌ naꞌ yiyonꞌ beṉꞌ bi shaoꞌ, naꞌ sheelo diikaꞌ chonꞌ.”
33 Chonan byen koochꞌ nez ṉaa, wx̱e len willj kwenc̱he yiyaa Jerusalénnaꞌ ganaꞌ chitgakeꞌ beṉꞌkaꞌ chyix̱jee daa cheꞌ Chiozaꞌ, ḻaꞌ agagaṉꞌ witgakeꞌ ḻegakeꞌ gan yoblə.
34 ’¡Leꞌ beṉꞌ Jerusalén, chitle beṉꞌkaꞌ chidtix̱jee daa cheꞌ Chiozaꞌ ḻegakeꞌ, naꞌ yajaꞌ chitile beṉꞌkaꞌ chseḻee choeꞌgakeꞌ choꞌa xtilleenaꞌ! Dii zan shii goklallaa yitopꞌ leꞌ ka chon jedaꞌ chiyellb xiiṉdobkaꞌ xan x̱ilbaꞌ, naꞌ leꞌ bi goonileꞌ.
35 Ḻi koo yic̱hjle dga iṉiaꞌ leꞌ, Chiozaꞌ kwej yic̱hjeꞌ gani zoale. Naꞌ niaꞌ leꞌ, aga wleꞌchile nadꞌ ax̱t katꞌch illin lla iṉale: “¡Gaklenshga X̱ancho Chiozaꞌ beeni ba bseḻee!”