Jempl c̱he to beṉꞌ goz gooṉ
4
Sto shii wzolo Jesúzaꞌ bliꞌ bsedileꞌ beṉꞌ choꞌa nisdoꞌnaꞌ, naꞌ daa bdop bllag beṉꞌ zan inlleb jshieꞌ to ḻoo barkw daa chiꞌ choꞌa nisdoꞌnaꞌ, naꞌ beṉꞌkaꞌ bdiꞌa bllag wlleꞌgakeꞌ choꞌa nisdoꞌnaꞌ.
San Marcos 4:1-20
3 ―Ḻi wzenag dga. To beṉꞌ goz gooṉ wzee zejeꞌ gozaꞌ.
4 Naꞌ ka zej chzaḻee biṉnaꞌ, baḻan bxop choꞌa nezaꞌ naꞌ bllin byiṉkaꞌ wdaogakban.
5 Naꞌ zi baḻan bxop ladj yajkaꞌ, ganaꞌ bitek bi yo chiꞌ. Naꞌ tolbeꞌ bilaan, daa bi chiꞌtekan yonaꞌ.
6 Per ka blaꞌ wbillaꞌ, bkwedgakan. Naꞌ daa bi bde loinnaꞌ, wbillan.
7 Naꞌ zi baḻan bxop ladj yag yeshꞌkaꞌ naꞌ yag yeshꞌkaꞌ bi beꞌgakan latj igolgakan naꞌ bibi wllian.
8 Naꞌ zi baḻan bxop ganaꞌ chiꞌ yo wennaꞌ, naꞌ bgolgakan naꞌ ḻe wlliagakan. Baḻan wllia shichoa wej, naꞌ zi baḻan guiyon wej, naꞌch to guiyoa wej.
9 Naꞌ chiꞌe ḻegakeꞌ:
―Ka leꞌ chenile dga niaꞌ, ḻi sen wṉeyi.
Jesúzaꞌ bzajniileꞌ ḻegakeꞌ bic̱he chseesee jemplkaꞌ
10 Naꞌ ka bgaaṉ stoz Jesúzaꞌ, beṉꞌkaꞌ wlleꞌ gaoshosh kwiteꞌnaꞌ len beṉꞌkaꞌ shlliṉ, wṉabgakileꞌneꞌ bi zeji jemplaꞌ daa bseesileꞌ ḻegakeꞌ.
11 Naꞌ chiꞌe ḻegakeꞌ:
―Chiozaꞌ choꞌe latj iṉezile daa kono wṉezi c̱he yeḻꞌ wṉabiaꞌ c̱heꞌnaꞌ. Per beṉꞌkaꞌ bi chzenag c̱heꞌ, chseesidꞌ ḻegakeꞌ jemplkaꞌ
12 kwenc̱he ḻaꞌkzi ileꞌtegakileꞌ ka chonꞌ, bi shajniꞌgakileꞌ bi zejin, naꞌ ḻaꞌkzi yentegakileꞌ xtillaanaꞌ, bi shajniꞌgakileꞌn, kwenc̱he bi yiyaj yilengakileꞌ lao Chiozaꞌ naꞌ bi yiziꞌxeneꞌ c̱hegakeꞌ.
Jesúzaꞌ bizajniileꞌ bi zeji jemplaꞌ
13 Naꞌ chiꞌe ḻegakeꞌ:
―Shi bi chajniile jempli, ¿nakra gonle shajniile diikaꞌ sto?
14 Beenaꞌ chaz zaklebileꞌ beenaꞌ choeꞌ choꞌa xtillꞌ Chiozaꞌ.
15 Zoa beṉꞌ chengakileꞌ choꞌa xtillꞌ Chiozaꞌ naꞌ katꞌ ba bengakileꞌn, ḻii zejte dii x̱iwaa chikwasan daa ḻoo yic̱hjlallꞌdoꞌekaꞌ. Naꞌ chak c̱hegakeꞌ ka gok c̱he biṉnaꞌ daa bxop choꞌa nezaꞌ.
16 Zi baḻgakeꞌ chak c̱hegakeꞌ ka gok c̱he biṉnaꞌ daa bxop ladj yajkaꞌ naꞌ aga bi logakin bde. Ḻaꞌ ka chengakileꞌ choꞌa xtill Chiozaꞌ chiba chizakꞌgakileꞌ chzenaggakeꞌn
17 per shlollchga chajḻeꞌgakeꞌ. Naꞌ katꞌ bi chen chleꞌgakileꞌ ni c̱he choꞌa xtillꞌ Chiozaꞌ, lii chbej yic̱hjtegakeꞌn.
18 Zi baḻgakeꞌ chak c̱hegakeꞌ ka gok c̱he biṉnaꞌ daa bxop ladj yag yeshꞌkaꞌ. Chengakileꞌ choꞌa xtillꞌ Chiozaꞌ,
19 per chiꞌ yic̱hjgakeꞌ diikaꞌ chak c̱hegakeꞌ, naꞌ zetegakeꞌ wṉeyi c̱he yeḻꞌ wniꞌanaꞌ naꞌ chzelallꞌtegakeꞌ yogꞌḻoḻte daa de yell-lioni. Naꞌ ḻegakannanꞌ chsej chllongakan gon xshin choꞌa xtillꞌ Chiozaꞌ ḻoo yic̱hjlallꞌdoꞌekaꞌ.
20 Naꞌ zoa zi baḻ beṉꞌ chengakileꞌ choꞌa xtillꞌ Chiozaꞌ naꞌ chajḻeꞌgakeꞌ do yic̱hj do lallꞌgakeꞌ, naꞌ chon xshinin ḻoo yic̱hjlallꞌdoꞌekaꞌ. Naꞌ chak c̱hegakeꞌ ka biṉnaꞌ bxop lo yo wennaꞌ daa wllia shichoa wej, naꞌ guiyon wej naꞌch to guiyoa wej.
Jempl c̱he to kandil
21 Naꞌ ḻekzkaꞌ chiꞌe ḻegakeꞌ:
―Biga zoa beṉꞌ chxeneꞌ kandilaꞌ naꞌ chdoseꞌn to dii wkwashaan ḻen wa chṉiꞌen xan xḻagueꞌnaꞌ, san chzoeꞌn sibə kwenc̱he wzeeniꞌn doxen ḻoo yoonaꞌ.
San Marcos 4:21-41
22 Naꞌ ḻekzkaꞌ yogꞌḻoḻte dii ngashꞌ ṉaa wllin lla yilaꞌ lawin, naꞌ daa kono ṉezi ṉaa wllin lla iṉezi beṉaan.
23 Leꞌ chenile dga niaꞌ, ḻi sen wṉeyi.
24 Naꞌ ḻekzkaꞌ chiꞌe ḻegakeꞌ:
―Ḻi se wṉeyi c̱heyi dga chzenagle. Naꞌ shi gonle ka dii le, Chiozaꞌ wzajniꞌchileꞌ leꞌ dii xench.
25 Beenaꞌ chzenag, zizikchli shajniꞌchileꞌ, naꞌ beenaꞌ bi chzenag, ax̱t daa ba benileꞌ latꞌ yiyaḻ-lallee.
Jempl c̱he biṉnaꞌ daa chgol
26 Naꞌ ḻekzkaꞌ chiꞌe ḻegakeꞌ:
―Yeḻꞌ wṉabiaꞌ c̱he Chiozaꞌ zaklebin daa chak c̱he biṉnaꞌ chaz beṉꞌ.
27 Beenaꞌ chaz chaaṉ, chilaꞌ daa chazeꞌ naꞌ chgolan ḻaꞌkzi cheseꞌ wa chec̱hj chdazeꞌ, kaꞌkzə shi waḻ wa tella, naꞌ ni bi ṉezileꞌ nak chak chgolan.
28 Lo yell-lioni chlaꞌ daa chaz beṉꞌ: zigaate chilaꞌn, naꞌ chgolan, naꞌ chzen do, naꞌtech chbian.
29 Naꞌ katꞌ ba gol daa chbian, naꞌ chiziꞌ chilapeꞌn.
Jempl c̱he sa mostásanaꞌ
30 Ḻekzkaꞌ cheꞌ Jesúzaꞌ ḻegakeꞌ:
―¿Bera ka wsaklebicho yeḻꞌ wṉabiaꞌ c̱he Chiozaꞌ, lla? wa ¿bera ka jempl wc̱hincho wsaklebichon?
31 Yeḻꞌ wṉabiaꞌ c̱he Chiozaꞌ nakan ka sa mostásanaꞌ daa chazgakeꞌ. Ḻaꞌkzi ḻennanꞌ biṉnaꞌ daa ḻiizelozi neshꞌch,
32 katꞌ ba blaꞌn naꞌch chgolan naꞌ chakan dii xench ka yogꞌte yix̱ꞌ kwan yoblə, naꞌ chak xoziinkaꞌ dii xen ax̱t byiṉdoꞌkaꞌ wak lljshiagakban naꞌ shoꞌgakb xol c̱heyinnaꞌ.
Jesúzaꞌ bc̱hineꞌ jempl ka bliꞌ bsedileꞌ beṉꞌ
33 Dii zan jempl bc̱hin Jesúzaꞌ ka bliꞌ bsedileꞌ beṉꞌkaꞌ choꞌa xtillꞌ Chiozaꞌ, beneꞌ kon ga zeelo wyajniꞌgakileꞌ.
34 Naꞌ toshiizi bzoeꞌ jemplkaꞌ lao beṉꞌkaꞌ bdiꞌa bllag, naꞌ toz beṉꞌkaꞌ nakgakeꞌneꞌ txen bizajniileꞌ bi zejin yogꞌ diikaꞌ.
Jesúzaꞌ bkwezeꞌ to yejpeꞌ wal lo nisdoꞌnaꞌ
35 Naꞌ ka goḻ, golleꞌ beṉꞌkaꞌ nakgakeꞌneꞌ txen:
―Techo shḻaa nisdoꞌni.
36 Naꞌ bizaꞌgakeꞌ kwit beṉꞌkaꞌ bdiꞌa bllag naꞌ bic̱heꞌgakeꞌ Jesúzaꞌ ḻoo barkwaꞌ daa chiꞌ choꞌa nisdoꞌnaꞌ, naꞌ lench barkw yoblə ziyajlengakeꞌ.
37 Naꞌ wze to yejpeꞌ wal naꞌ wzolo nisdoꞌnaꞌ chas chataan ax̱t ba chiyollan ḻoo barkwaꞌ, naꞌ ba wzolo chbeꞌn yel.
38 Naꞌ ba de Jesúzaꞌ cheseꞌ xaninnaꞌ nkogtieꞌ to dii nkogueꞌ, naꞌ jasbangakeꞌneꞌ cheꞌgakeꞌ:
―¡Maestro! ¿Abikzə chakbeꞌiloꞌ ba chbeꞌcho yel?
39 Naꞌ wyaseꞌ bsheshleneꞌ beꞌnaꞌ, naꞌ chiꞌe nisdoꞌnaꞌ:
―Lliz wzoa.
―¿Bic̱he chllebzle? ¿Abikzaṉꞌ gonḻilallꞌle nadꞌ?
41 Naꞌ ḻe bllebgakeꞌ, naꞌ cheꞌ ljwellgakeꞌ:
―¿Nora beeni, lla?, ax̱t beꞌnaꞌ naꞌch nisdoꞌni chzoagakan xtillee.