Bibej Jesúzaꞌ dii x̱iwaa yoo beṉꞌ Gadáranaꞌ
5
Naꞌch bllingakeꞌ ganaꞌ mbani Gadáranaꞌ daa llia shḻaa nisdoꞌnaꞌ.
San Marcos 5:1-20
2 Naꞌ ka bichej Jesúzaꞌ ḻoo barkwaꞌ, naꞌ wbigꞌ to beṉꞌ yoꞌe dii x̱iwaa. Naꞌ beeni bchejeꞌ ḻoo kapsantaꞌ
3 ganaꞌ noneꞌ ka lill xḻatjeꞌ. Naꞌ kono gok wc̱hej ḻeꞌ, ni gdennaꞌ bi ben llin.
4 Zan shii bc̱hejgakeꞌ ṉiꞌa neenaꞌ gdenkaꞌ, naꞌ tolbeꞌdoꞌ chc̱hogueꞌgakan, naꞌ kono wzoyi ḻeꞌ.
5 Ka waḻ ka tella chec̱hj chdeꞌ yaa yaokaꞌ naꞌch kapsantaꞌ chosyaadieꞌ naꞌ chgoyoeꞌ yajkaꞌ chon kwineꞌ ziꞌ.
6 De zitꞌlə bleꞌileꞌ zej Jesúzaꞌ naꞌ bxoṉjdoeꞌ jatiḻeꞌneꞌ naꞌ jac̱hekꞌ xibeꞌnaꞌ laweꞌnaꞌ,
7 naꞌ besyee zillj, chiꞌe:
―¡Bi wlalliꞌ c̱hoꞌ kon nadꞌ, Jesús, Xiiṉ Chios, beṉꞌ choo beṉꞌ xen! Chatꞌyoidꞌ liꞌ, ¡bc̱heb lao Chiozaꞌ bi wsakꞌziꞌo nadꞌ!
8 Gollan kaꞌ daa goll Jesúzaꞌ ḻen:
―¡Dii x̱iwꞌ, bichej ḻoo kwerp c̱he beeni!
9 Naꞌ goll Jesúzaꞌ ḻen:
―¿Bin lioꞌ?
Naꞌ cheꞌn:
―Legiónan liaꞌ, ḻaꞌ zanntoꞌ nak.
10 Naꞌ gotꞌyochgain Jesúzaꞌ bi wseḻeegakan gan yoblə.
11 Naꞌ gaozə kwit yaanaꞌ ganaꞌ lleꞌgakeꞌ, lleꞌ zan kush chaogakb.
12 Naꞌ gotꞌyoi dii x̱iwꞌkaꞌ ḻeꞌ, cheꞌgakan:
―Bseḻꞌ netoꞌ ganaꞌ lleꞌ kushkaꞌ naꞌ beꞌ latj yiyoontoꞌ ḻegakb.
13 Naꞌ biꞌe latj c̱hegakin, naꞌ bichejgakan jayoogakan kushkaꞌ. Naꞌ nakgakb ka c̱hopa mil, naꞌ wzologakb chxoṉjdogakb jabix̱gakb ḻoo nisdoꞌnaꞌ, naꞌ jc̱heꞌgakb yel.
14 Naꞌ beṉꞌkaꞌ chap kushkaꞌ ziyajdogakeꞌ jayellgakeꞌ beṉꞌkaꞌ lleꞌ yellaꞌ naꞌ beṉꞌkaꞌ lleꞌ lyix̱aa daa bleꞌgakileꞌ, naꞌ beṉꞌ zan jawia daa gok.
15 Naꞌ ka bllingakeꞌ ganaꞌ ze Jesúzaꞌ, bleꞌgakileꞌ beenaꞌ wyoo dii x̱iwꞌkaꞌ chiꞌe kwiteꞌnaꞌ ba biyakw xeꞌnaꞌ naꞌ ba biyeeṉ biyeeniileꞌ, naꞌ bllebgakeꞌ.
16 Naꞌ beṉꞌkaꞌ bleꞌi daa gok c̱he beenaꞌ wyoo dii x̱iwꞌkaꞌ naꞌ daa gok c̱he kushkaꞌ, beꞌgakeꞌn dillꞌ lao beṉꞌkaꞌ bllin.
17 Naꞌ gotꞌyogakileꞌ Jesúzaꞌ yiyajeꞌ gan yoblə.
18 Ka chiyoo Jesúzaꞌ ḻoo barkwaꞌ, beenaꞌ wyoo dii x̱iwꞌkaꞌ gotꞌyoileꞌneꞌ wiꞌe latj shajleneꞌneꞌ.
19 Per bi biꞌe latj, san chiꞌeneꞌ:
―Biyaj lilloꞌnaꞌ ganaꞌ lleꞌ bishꞌ ljwelloꞌkaꞌ, naꞌ jayellgakeꞌ ka nak diiki ba ben X̱ancho Chiozaꞌ c̱hoꞌ naꞌ ka ba biyeshꞌlallileꞌ liꞌ.
20 Naꞌch bizaꞌ beenaꞌ naꞌ jayeꞌ dillꞌ doxen ganaꞌ mbani Decápolizaꞌ daa ben Jesúzaꞌ c̱heꞌ, naꞌ yogꞌ beṉꞌ bibani.
Biyon Jesúzaꞌ noolaꞌ bex̱ꞌ xeꞌnaꞌ naꞌ ḻekzkaꞌ xiiṉ Jaironaꞌ
21 Ka billinlen Jesúzaꞌ barkwaꞌ shḻaa nisdoꞌnaꞌ, naꞌ bdiꞌa bllag beṉꞌ zan choꞌa nisdoꞌnaꞌ ganaꞌ billineꞌ.
San Marcos 5:21-43
22 Naꞌ bllin to beṉꞌ le Jairo, nakeꞌ to beṉꞌkaꞌ chgoogakeꞌ xṉezi diikaꞌ chon beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ. Naꞌ ka bllineꞌ ganaꞌ ze Jesúzaꞌ, bc̱hekꞌ xibeꞌ laweꞌnaꞌ
23 naꞌ benyeshꞌchgueꞌ, chiꞌe:
―Ba chet biꞌ c̱haꞌnaꞌ. Ben goklen shoꞌgach wx̱oa noonaꞌ yic̱hjbaa kwenc̱he yiyakibꞌ naꞌ ibanchbꞌ.
24 Naꞌ wyajlen Jesúzaꞌ ḻeꞌ, naꞌ beṉꞌ zan inlleb nogakeꞌneꞌ ax̱t bdakwyillgakeꞌneꞌ.
25 Naꞌ ladj beṉꞌ zan walkaꞌ len to noolə ba gok shlliṉ yiz chzoeꞌ wbaa.
26 Dii zan dii ba ben bleꞌileꞌ lao beṉꞌ wen rmechkaꞌ, naꞌ ba blliayee yogꞌ dii de c̱heꞌ naꞌ bi gokkzeꞌ rmech, san gokxinlileꞌ.
27 Naꞌ ka benileꞌ xtillꞌ Jesúzaꞌ, jṉiꞌe ladj beṉꞌ zan walkaꞌ no ḻeꞌ naꞌ jex̱ee xeꞌnaꞌ.
28 Ḻaꞌ gokileꞌ: “Ḻaꞌc̱hꞌ xeꞌnaꞌ sheḻꞌ ba bex̱aa, naꞌ yiyakidꞌ.”
29 Naꞌ katenaꞌ wlez wbaanaꞌ naꞌ gokbeꞌileꞌ ba bigaa yillweꞌ c̱heꞌnaꞌ.
30 Naꞌ gokbeꞌi Jesúzaꞌ bchej yeḻꞌ wak c̱heꞌnaꞌ, naꞌ biyec̱hjeꞌ chiꞌe beṉꞌkaꞌ:
―¿Noran bex̱ꞌ xaꞌnaꞌ?
31 Naꞌ beṉꞌkaꞌ non ḻeꞌ txen cheꞌgakeꞌneꞌ:
―Beṉꞌ zan walan ndakwyill liꞌ. ¿Bic̱he nazoꞌ: “Non ba bex̱ꞌ nadꞌ”?
32 Naꞌ ze Jesúzaꞌ chwieꞌ beṉꞌkaꞌ lleꞌ kwiteꞌnaꞌ kwenc̱he iṉezileꞌ non bex̱ꞌ ḻeꞌ.
33 Naꞌch noolaꞌ, daa ba gokbeꞌileꞌ biyakileꞌ, de chall chllebzileꞌ wdieꞌ naꞌ bc̱hekꞌ xibeꞌnaꞌ laweꞌnaꞌ naꞌ golleꞌ ḻeꞌ doxen daa ba gok c̱heꞌ.
34 Naꞌ cheꞌ Jesúzaꞌneꞌ:
―Xiiṉꞌ, daa chonḻilalloo nadaan ba biyakiloꞌ. Biyaj mbalaz daa ba bigaa yillweꞌnaꞌ bsakꞌziꞌ liꞌ.
35 Naꞌ ni chshaljte Jesúzaꞌ ka bllin to c̱hop beṉꞌ wzaꞌ lill Jaironaꞌ, chiꞌeneꞌ:
―Ba wit biꞌ c̱hoꞌnaꞌ. Bich goniloꞌ maestroni zed.
36 Naꞌ bi ben Jesúzaꞌ ḻegakeꞌ kwent, naꞌ golleꞌ Jaironaꞌ:
―Bi illeboꞌ. Kon bx̱enilallꞌ nadꞌ.
37 Naꞌ bi biꞌe latj shajlen beṉꞌ yoblə ḻeꞌ, ḻete Pédronaꞌ naꞌ c̱hop bishꞌte, Jacóbonaꞌ naꞌch Juannaꞌ.
38 Naꞌ ka bllingakeꞌ lill Jaironaꞌ, bleꞌileꞌ ḻe chakyeshii beṉꞌkaꞌ lleꞌ naꞌ naꞌch chbellgakeꞌ naꞌ ḻe chosyaagakeꞌ.
39 Naꞌ jabiguee ganaꞌ lleꞌgakeꞌ naꞌ golleꞌ ḻegakeꞌ:
―¿Berac̱he chonzle daṉe naꞌ chbellzle? Aga ba wit biꞌdoꞌnanꞌ, san cheszbaan.
40 Naꞌ bxillgakileꞌ Jesúzaꞌ. Naꞌ bishesheꞌ yogꞌḻoḻeꞌ naꞌ wyooleneꞌ x̱axṉaꞌbaa naꞌ beṉꞌkaꞌ zejleneꞌ txen ganaꞌ de biꞌdoꞌnaꞌ.
41 Naꞌ bex̱ee naꞌbaa naꞌ golleꞌbꞌ:
―Talita, cumia ―naꞌ zejin: Biꞌ nooldoꞌ, niaꞌ liꞌ biyas.