Noolkaꞌ goklengakeꞌ Jesúzaꞌ
8
Ka wde dga, wda Jesúzaꞌ zan yell xen naꞌ zan yelldoꞌ, chyix̱jiꞌe dillꞌ kobaꞌ nan Chiozaꞌ chṉabiꞌe ḻoo yic̱hjlallꞌdoꞌ beṉꞌkaꞌ chzenag c̱heꞌ. Naꞌ postl c̱heꞌkaꞌ shlliṉ chdalengakeꞌneꞌ txen.
2 Naꞌ ḻekzkaꞌ len baḻ noolkaꞌ ba biyoneꞌ. Baḻeꞌ bibejeꞌ dii x̱iwꞌkaꞌ wyoogakeꞌ, naꞌ zi baḻeꞌ gokgakeꞌ yillweꞌ naꞌ biyoneꞌ ḻegakeꞌ. Naꞌ ladjeꞌkaꞌ len Maríanaꞌ, noolaꞌ nsiꞌgakeꞌ Magdalena, beenaꞌ bibej Jesúzaꞌ gall dii x̱iwꞌkaꞌ.
3 Naꞌ ḻekzkaꞌ len noolaꞌ le Juana, xool Chúzanaꞌ, beenaꞌ ngoo lo nee chap chwieꞌ lill Heródezaꞌ. Naꞌ len Susánanaꞌ, naꞌ zanch noolkaꞌ beṉꞌkaꞌ jano Jesúzaꞌ naꞌ bc̱hingakeꞌ dii de c̱hegakeꞌ kwenc̱he goklengakeꞌneꞌ.
Jempl c̱he to beṉꞌ goz gooṉ
4 Beṉꞌ zan bllesh to to yell jawiagakeꞌ Jesúzaꞌ, naꞌ ka bdop beṉꞌ zan wal naꞌch bseesileꞌ ḻegakeꞌ to jempl, chiꞌe:
5 ―To beṉꞌ goz gooṉ wzee zejeꞌ gozaꞌ. Naꞌ ka zej chzaḻee biṉnaꞌ, baḻan bxop choꞌa nezaꞌ naꞌ blej bshoshj beṉꞌ ḻen, naꞌ bllin byiṉkaꞌ wdaogakban.
6 Naꞌ zi baḻan bxop ladj yajkaꞌ ganaꞌ bitek chiꞌ yonaꞌ, naꞌ ka blaꞌgakan to wbillzgakan, ḻaꞌ aga bi gopꞌ de ganaꞌ bxopan.
7 Naꞌ zi baḻan bxop ladj yag yeshꞌkaꞌ, naꞌ ka blaꞌgakan aga beꞌ yag yeshꞌkaꞌ latj igolgakan.
8 Naꞌ zi baḻan bxop lo yo wennaꞌ, naꞌ ḻe bgolgakan naꞌ ax̱t do to guiyoa wej wllia to ton.
Naꞌ ka biyoll bseesee jemplaꞌ, naꞌch wṉieꞌ zilljə chiꞌe:
―Leꞌ chenile dga niaꞌ, ḻi sen wṉeyi.
Lucas 8.1-56
Bzajnii Jesúzaꞌ bic̱he chzoeꞌ jemplkaꞌ
―Chiozaꞌ choꞌe latj iṉezile daa kono ṉezkzi, ka chṉabiꞌe ḻoo yic̱hjlallꞌdoꞌ beṉꞌkaꞌ chzenaggakeꞌ c̱heꞌ. Naꞌ beṉꞌkaꞌ sto chseesidꞌ ḻegakeꞌ shgaḻꞌ jempl, ḻaꞌ ḻaꞌkzi chleꞌgakileꞌ bin chonꞌ, kon chongakeꞌ ka beṉꞌ bi chleꞌi. Naꞌ ḻaꞌkzi chengakileꞌ bin niaꞌ, aga chajniꞌgakileꞌn.
Bzajnii Jesúzaꞌ bi zeji jempl c̱he beṉꞌ goz gooṉaꞌ
11 ’Kin zeji jempl c̱he beṉ goz gooṉaꞌ: choꞌa xtillꞌ Chiozaꞌ nakan ka biṉnaꞌ daa gozeꞌ.
12 Naꞌ zoa beṉꞌ chzenaggakeꞌ choꞌa xtillꞌ Chiozaꞌ, naꞌ lii zeꞌte dii x̱iwaa chikwasan daa kwenc̱he bi shajḻeꞌgakeꞌ naꞌ kwiayiꞌgakeꞌ. Chak c̱hegakeꞌ ka gok c̱he biṉnaꞌ daa bxop choꞌa nezaꞌ.
13 Naꞌ zoa beṉꞌ chibagakileꞌ chzenaggakeꞌ choꞌa xtillꞌ Chiozaꞌ naꞌ chlebgakeꞌn, per katꞌ chak bi chak c̱hegakeꞌ naꞌ chbej yic̱hjgakeꞌn. Chak c̱hegakeꞌ ka gok c̱he biṉnaꞌ bi bde loinnaꞌ daa bxopan lo yajaꞌ.
14 Naꞌ zoa beṉꞌ chzenagueꞌ choꞌa xtillꞌ Chiozaꞌ, per chiꞌch yic̱hjgakeꞌ daa chak c̱hegakeꞌ naꞌ c̱he yeḻꞌ wniꞌanaꞌ, naꞌ c̱he bichlə dii chzelallꞌgakeꞌ, naꞌ bi chakchagakeꞌ lo xṉez Chiozaꞌ. Chak c̱hegakeꞌ ka gok c̱he biṉnaꞌ bxop ladj yag yeshꞌkaꞌ.
15 Naꞌ zoa beṉꞌ chzenaggakeꞌ choꞌa xtillꞌ Chiozaꞌ do yic̱hj do lallꞌgakeꞌ naꞌ chongakeꞌ ka nan, naꞌ chzo chzakgakileꞌ bittezə dii chak c̱hegakeꞌ. Beṉꞌkin chak c̱hegakeꞌ ka gok c̱he biṉnaꞌ bxop lo yo wennaꞌ daa ḻe wllia.
Jempl c̱he to kandil
16 ’Biga zoa to beṉꞌ chxeneꞌ kandilaꞌ naꞌ chdoseꞌn to dii wkwashaan daa wa chzoeꞌn xan xḻagueꞌnaꞌ, san chzoeꞌn sibə kwenc̱he ileꞌi beṉꞌkaꞌ shoꞌ ḻoo yoonaꞌ.
17 Naꞌ ḻekzkaꞌ yogꞌḻoḻte dii ngashꞌ ṉaa, wllin lla yilaꞌ lawin, naꞌ daa kono ṉezi ṉaa, wllin lla iṉezi beṉaan.
18 ’Ḻi wzenag dga niaꞌ leꞌ ṉaa. Beenaꞌ chzenag zizikchli shajniꞌchileꞌ, naꞌ beenaꞌ bi chzenag, daa ba bzenagueꞌ latꞌ, yogꞌḻoḻan yiyaḻ-lallee.
Xṉaꞌ Jesúzaꞌ len beṉꞌ bisheekaꞌ
19 Naꞌch bllin xṉaꞌ Jesúzaꞌ len beṉꞌ bisheekaꞌ ganaꞌ zoeꞌ, naꞌ bi gok ibigꞌgakeꞌ kwiteꞌnaꞌ daa lleꞌ beṉꞌ zan.
20 Naꞌ wbigꞌ to beṉꞌ golleꞌ Jesúzaꞌ:
―Xṉoonaꞌ len beṉꞌ bishookaꞌ lleꞌgakeꞌ leshꞌ chyoonaꞌ naꞌ cheengakileꞌ wshaljlengakeꞌ liꞌ.
21 Naꞌ goll Jesúzaꞌ:
―Beṉꞌkaꞌ chzenaggakeꞌ choꞌa xtillꞌ Chiozaꞌ naꞌ chongakeꞌ ka nan, ḻegakenꞌ nakgakeꞌ xṉaꞌ naꞌ beṉꞌ bishaa.
Jesúzaꞌ bkwezeꞌ to beꞌ wal lo nisdoꞌnaꞌ
22 To lla wyoo Jesúzaꞌ to ḻoo barkw len beṉꞌkaꞌ nakgakeꞌneꞌ txen naꞌ golleꞌ ḻegakeꞌ:
―Techo shḻaalə nisdoꞌni.
Naꞌch wzaꞌgakeꞌ.
23 Naꞌ shlak ngoo barkwaꞌ nez, wtes Jesúzaꞌ. Naꞌch wze to beꞌ wal lo nisdoꞌnaꞌ naꞌ wzolo chas chatꞌ nisaꞌ naꞌ biyollan ḻoo barkwaꞌ, naꞌ zi latꞌzə nan kweꞌn yel.
24 Naꞌ jasbangakeꞌ Jesúzaꞌ, cheꞌgakeꞌneꞌ:
―¡Maestro! ¡Maestro! ¡Ba chbeꞌcho yel!
Naꞌ wyas Jesúzaꞌ naꞌ bsheshleneꞌ beꞌnaꞌ len nisdoꞌnaꞌ. Naꞌ wlezgakan, bich bi gok.
25 Naꞌch golleꞌ ḻegakeꞌ:
―¿Abi chonḻilallꞌkzle nadꞌ?
Naꞌ ḻegakeꞌ ḻe chllebgakeꞌ naꞌ ḻe chibangakileꞌ naꞌ cheꞌ ljwellgakeꞌ:
―¿Nora beeni lla?, ax̱t beꞌnaꞌ naꞌ nisdoꞌnaꞌ chzenaggakan c̱heꞌ.
Bibej Jesúzaꞌ dii x̱iwaa yoo to beṉꞌ Gadara
26 Naꞌch bllingakeꞌ yell-lio c̱he beṉꞌ Gadárakaꞌ, daa llia shḻaa nisdoꞌnaꞌ ndiḻ yell-lio c̱he Galileanaꞌ.
27 Ka bichej Jesúzaꞌ ḻoo barkwaꞌ jabigꞌ to beṉꞌ Gadara kwiteꞌnaꞌ. Ba wlla yoꞌe dii x̱iwꞌkaꞌ, naꞌ bich bi xalaaneꞌ nakw, ni bich zoeꞌ lilleꞌ, san kapsantaꞌ noni lilleꞌ.
28 Naꞌ ka bleꞌileꞌ Jesúzaꞌ, besyee naꞌ jac̱hekꞌ xibeꞌ laweꞌnaꞌ, naꞌ zillj inlleb chiꞌe:
―Jwayiz nadꞌ, Jesús Xiiṉ Chios, beṉꞌ nak ḻiizelozi beṉꞌ choo beṉꞌ xen. Ben goklen bi wsakꞌziꞌo nadꞌ.
29 Gollan kaꞌ daa ba chon Jesúzaꞌ byen yichejan. Ba wlla chṉabiꞌan ḻeꞌ naꞌ ḻaꞌkzi chc̱hejgakeꞌ ṉiꞌa neenaꞌ gdennaꞌ, ḻobeꞌ chc̱hogueꞌn. Naꞌ dii x̱iwaa chtadon ḻeꞌ naꞌ chjsoeꞌ ga kono beṉꞌ lleꞌ.
30 Naꞌ cheꞌ Jesúzaꞌ:
―¿Bin lioꞌ?
Naꞌ chiꞌe:
―Legiónan liaꞌ.
Golleꞌ kaꞌ, ḻaꞌ zanannanꞌ yoꞌe.
31 Naꞌ gotꞌyogakin Jesúzaꞌ bi wseḻeegakan ganaꞌ kwiayiꞌgakan.
32 Naꞌ gaozə zoa to yaa ganaꞌ lleꞌ kush zan chaogakb. Naꞌ dii x̱iwꞌkaꞌ wzeyidgakan wṉabgakin Jesúzaꞌ wiꞌe latj yiyoogakan kushkaꞌ, naꞌ biꞌe latj.
33 Naꞌch bichej dii x̱iwꞌkaꞌ yoo beenaꞌ naꞌ biyoogakan kushkaꞌ. Naꞌ lii goklleshtegakib naꞌ jabix̱gakb to choꞌa bdiṉj naꞌ jshoogakb ḻoo nisaꞌ naꞌ witgakb.
34 Naꞌ beṉꞌkaꞌ chap kushkaꞌ ka bleꞌgakileꞌ daa gok, biyajdogakeꞌ jazengakileꞌn beṉꞌkaꞌ lleꞌ yellaꞌ naꞌ beṉꞌkaꞌ lleꞌ lyix̱aa.
35 Naꞌch bllesh beṉꞌkaꞌ jawiagakeꞌ daa gok. Naꞌ ka bllingakeꞌ kwit Jesúzaꞌ, naꞌ chiꞌ beenaꞌ wyoo dii x̱iwꞌkaꞌ kwiteꞌnaꞌ. Ba biyakw xalaaneꞌnaꞌ naꞌ ba biyeeṉ biyeeniileꞌ. Naꞌ bllebgakeꞌ.
36 Naꞌ beṉꞌkaꞌ bleꞌgakileꞌ daa gok, gollgakeꞌ beṉꞌkaꞌ ziꞌ bllin nakan gok biyaki beenaꞌ wyoo dii x̱iwꞌkaꞌ.
37 Naꞌ yogꞌḻoḻ beṉꞌ Gadárakaꞌ gotꞌyogakileꞌ Jesúzaꞌ yizee lalleꞌkaꞌ daa ḻe chllebgakeꞌ ka beneꞌ. Naꞌ biyoꞌe ḻoo barkwaꞌ ziyajeꞌ.
38 Naꞌ beenaꞌ bichej dii x̱iwꞌkaꞌ gotꞌyoileꞌ Jesúzaꞌ wiꞌe latj shajleneꞌneꞌ. Per Jesúzaꞌ chiꞌeneꞌ:
39 ―Biyaj lilloꞌnaꞌ naꞌ jayeꞌ dillꞌ ka nak dii wen dii shawaa daa ba ben Chiozaꞌ c̱hoꞌ.
Naꞌch biyaj beenaꞌ jayee dillꞌ doxen yellaꞌ ka nak dii wen dii shawaa daa ben Jesúzaꞌ c̱heꞌ.
Biyon Jesúzaꞌ noolaꞌ bex̱ee xeꞌnaꞌ naꞌ ḻekzkaꞌ xiiṉ Jaironaꞌ
40 Ka billin Jesúzaꞌ shḻaa nisdoꞌnaꞌ, ḻe chiba chizaki beṉꞌkaꞌ lleꞌ naꞌ, ḻaꞌ yogꞌzgakeꞌn chbezgakeꞌ ḻeꞌ.
41 Naꞌch bllin to beṉꞌ le Jairo, nakeꞌ to beṉꞌkaꞌ chgoo xṉezi c̱heyi diikaꞌ chon beṉꞌ Israelkaꞌ ganaꞌ chdop chllaggakeꞌ choeꞌḻwillgakeꞌ Chiozaꞌ. Naꞌ bc̱hekꞌ xibeꞌnaꞌ lao Jesúzaꞌ naꞌ gotꞌyoileꞌneꞌ shajeꞌ lilleꞌnaꞌ,
42 daa ba chakshwet biꞌ nool c̱heꞌnaꞌ. Nakbꞌ to biꞌ tlishꞌ tyaj, naꞌ ka do shlliṉ yizibꞌ. Naꞌ shlak zej Jesúzaꞌ beṉꞌ zan janogakeꞌneꞌ ax̱t bdakwyillgakeꞌneꞌ.
43 Naꞌ ladj beṉꞌkaꞌ zjano Jesúzaꞌ len to noolə ba gok shlliṉ yiz chzoeꞌ wbaanaꞌ. Naꞌ ba blliayee yogꞌ dii de c̱heꞌ daa chajtezi chajeꞌ lao beṉꞌ wen rmechkaꞌ, naꞌ ni to kono gok yiyon ḻeꞌ.
44 Naꞌch wbiguee kollꞌ Jesúzaꞌ bex̱ee xeꞌnaꞌ, naꞌ katenaꞌ lii biyakteileꞌ.
45 Naꞌch goll Jesúzaꞌ beṉꞌkaꞌ zjano ḻeꞌ:
―¿No beenaꞌ ba bex̱ꞌ nadꞌ?
Naꞌ ni to kono bc̱heb. Naꞌch goll Pédronaꞌneꞌ:
―Maestro, beṉꞌkin chdakwyillgakeꞌ liꞌ naꞌ chlligꞌgakeꞌ liꞌ to ki to kaꞌlə. ¿Bic̱he nazoꞌ: “Non ba bex̱ꞌ nadꞌ”?
46 Naꞌ cheꞌ Jesúzaꞌ ḻegakeꞌ:
―Nochodanꞌ ba bex̱ꞌ nadꞌ, ḻaꞌ gokbeꞌteidꞌ bchej yeḻꞌ wak c̱haꞌnaꞌ.
47 Naꞌ noolaꞌ, ka gokbeꞌileꞌ aga wak wkwashee, do chllebzeꞌ jac̱hekꞌ xibeꞌnaꞌ lao Jesúzaꞌ. Naꞌ lao yogꞌḻoḻ beṉꞌkaꞌ lleꞌ naꞌ, golleꞌ bic̱he bex̱ꞌzeꞌ xeꞌnaꞌ naꞌ daa bex̱een lii biyakteileꞌ.
48 Naꞌch goll Jesúzaꞌneꞌ:
―Xiiṉꞌ, daa chonḻilalloo nadaan biyakiloꞌ. Biyaj mbalaz.
49 Ni choeꞌtelə Jesúzaꞌ dillꞌ ka bllin to beṉꞌ wzee lill Jaironaꞌ, naꞌ jelleꞌneꞌ:
―Ba wit biꞌ c̱hoꞌnaꞌ. Bich goniloꞌ Maestroni zed.
50 Naꞌ ka beni Jesúzaꞌ, naꞌ golleꞌ Jaironaꞌ:
―Bi illeboꞌ. Wyajḻeꞌ c̱haꞌ, naꞌ wiyakkzi biꞌ c̱hoꞌnaꞌ.
51 Naꞌ ka bllingakeꞌ lilleꞌnaꞌ, aga beꞌ Jesúzaꞌ latj shoꞌ beṉꞌ yoblə, ḻete Pédronaꞌ, Jacóbonaꞌ, Juannaꞌ naꞌ x̱axṉaꞌ biꞌ wetaꞌzə.
52 Yogꞌḻoḻ beṉꞌkaꞌ lleꞌ lill Jaironaꞌ chbellgakeꞌ daa ba wit biꞌdoꞌnaꞌ. Naꞌ goll Jesúzaꞌ ḻegakeꞌ:
―Bi kwell-le, aga witbaan, cheszbaan.
53 Naꞌ bxill-ləgakeꞌ c̱heꞌ, ḻaꞌ ṉezgakileꞌ ba witbaan.
54 Naꞌch bex̱ꞌ Jesúzaꞌ naꞌ biꞌ wetdoꞌnaꞌ naꞌ wṉieꞌ zilljə, chiꞌe:
―Biyas, biꞌdoꞌ.