Jesúzaꞌ biyoneꞌ to beṉꞌ yoꞌe yi
14
To lla sabd, llanaꞌ chombaaṉ beṉꞌ Israelkaꞌ, wyaj Jesúzaꞌ jtaweꞌ lill to fariseo, beṉꞌ chṉabiaꞌ, naꞌ fariseokaꞌ sto chinaḻꞌ chinogakeꞌneꞌ.
Lucas 14.1-35
2 Naꞌ laweꞌnaꞌ ze to beṉꞌ yoꞌe yi.
3 Naꞌch Jesúzaꞌ wṉabileꞌ fariseokaꞌ naꞌ beṉꞌkaꞌ chliꞌ chsedi leyaꞌ, chiꞌe ḻegakeꞌ:
―¿Ade lsens yiyoncho to beṉꞌ bi shaoꞌ llani chombaaṉcho, anti bi den?
4 Naꞌ ḻegakeꞌ bikzə bi gollgakeꞌneꞌ. Naꞌch Jesúzaꞌ bex̱ee beenaꞌ yoo yinaꞌ naꞌ biyoneꞌneꞌ, naꞌ golleꞌneꞌ:
―Wak yiyajoꞌ.
5 Naꞌch chiꞌe fariseokaꞌ:
―Shi to burr c̱hele wa to gooṉ c̱hele ixopb to ḻoo yech to lla chombaaṉcho, ¿abi yibejleb katenaꞌ ḻaꞌkzi nakan llanaꞌ chombaaṉcho?
6 Naꞌ bikz bi billel-lallꞌgakeꞌ yeꞌgakeꞌneꞌ.
Beṉꞌkaꞌ chaxgakeꞌ to ga chak wishagnaꞌ
7 Naꞌ bleꞌi Jesúzaꞌ ka chon beṉꞌkaꞌ wdaoleneꞌ lill farisewaꞌ, wcheꞌgakeꞌ ganaꞌ chbeꞌ beṉꞌkaꞌ zakii. Naꞌch bseesee to jempl, chiꞌe ḻegakeꞌ:
8 ―Katꞌ no gax leꞌ to ga chak wishagnaꞌ, bi kweꞌle ganaꞌ chbeꞌ beṉꞌkaꞌ zakii. Ḻaꞌ shera shi ilaꞌ beṉꞌ zakꞌchi ka leꞌ,
9 naꞌ beenaꞌ goxeꞌ leꞌ iṉeꞌ: “Wzollaꞌ kwenc̱he kweꞌ beeni gani chiꞌo.” Naꞌch do chidoꞌzile yizollaꞌle naꞌ lljacheꞌle xanteyin.
10 Naꞌ bi gonle kaꞌ. San katꞌ no gax leꞌ, chiyaḻꞌ lljc̱heꞌle xanteyin kwenc̱he katꞌ ilaꞌ beenaꞌ goxeꞌ leꞌ naꞌ iṉeꞌ: “Bishꞌdawaa, nilə wda kwiꞌo gani zakꞌchi.” Naꞌ kaꞌ shoꞌle balaaṉ lao beṉꞌkaꞌ chiꞌlenle choꞌa mesaꞌ.
11 Ḻaꞌ beenaꞌ chon kwineꞌ beṉꞌ choo beṉꞌ xen, Chiozaꞌ goneꞌneꞌ beṉꞌ bibi zakii; naꞌ beenaꞌ chakileꞌ bibi zakee, Chiozaꞌ goneꞌneꞌ beṉꞌ choo beṉꞌ xen.
12 Naꞌ ḻekzkaꞌ cheꞌ Jesúzaꞌ beenaꞌ goxeꞌneꞌ lilleꞌnaꞌ:
―Katꞌ cheeniloꞌ wwawoꞌ beṉꞌ, bi gaxoꞌ beṉꞌ zoalenzoꞌ wen, no beṉꞌ bishoo, no beṉꞌ dialla c̱hoꞌ, ni no beṉꞌ wlill c̱hoꞌ, beṉꞌ nakeꞌ beṉꞌ wniꞌa, ḻaꞌ ḻegakeꞌ ḻekzkaꞌ wak yigoogakeꞌ wzonnaꞌ yiwaogakeꞌ liꞌ ka benoꞌ c̱hegakeꞌ.
13 Aga kanꞌ gonoꞌ, san byi beṉꞌ yeshꞌ, beṉꞌ net ṉiꞌa nee, beṉꞌ bi chak saꞌ wen naꞌ beṉꞌ lc̱hoḻ. Beṉꞌkanꞌ chiyaḻꞌ gaxoꞌ,
14 naꞌch soꞌ mbalaz. Ḻaꞌ beṉꞌkanꞌ aga wak yigoogakeꞌ wzon c̱hoꞌ, san Chiozanꞌ yigwee wzon c̱hoꞌnaꞌ llanaꞌ katꞌ yisbaneꞌ beṉꞌ wenkaꞌ ladj beṉꞌ wetkaꞌ.
Jempl c̱he to beṉꞌ ben to lṉi xen
15 Naꞌ to beenaꞌ chiꞌleneꞌ Jesúzaꞌ choꞌa mesaꞌ, ka benileꞌ wneꞌ kaꞌ, naꞌ chiꞌeneꞌ:
―¡Chakomba beṉꞌkaꞌ lljadaogakeꞌ ganaꞌ chṉabiaꞌ Chiozaꞌ!
16 Naꞌch cheꞌ Jesúzaꞌneꞌ:
―Wzoa to beṉꞌ beneꞌ to lṉi xen, naꞌ goxeꞌ beṉꞌ zan kwenc̱he shajgakeꞌ lilleꞌnaꞌ lljtaogakeꞌ.
17 Naꞌ ka goḻꞌ gaogakeꞌ, bseḻee to wen llin c̱heꞌnaꞌ jelleꞌ beṉꞌkaꞌ ba byeꞌ: “Ḻi dagach, ḻaꞌ ba gok daa gaocho.”
18 Naꞌ yogꞌ beṉꞌkaꞌ jaṉieꞌ wzologakeꞌ chc̱heꞌgakeꞌ dillꞌ. Toeꞌ golleꞌneꞌ: “Ziꞌ biziꞌa latꞌ yell-lio naꞌ chonan byen lljawiaꞌn. Yeꞌgachoꞌneꞌ siꞌxeneꞌ bi gak yidꞌ.”
19 Naꞌ beenaꞌ sto chiꞌeneꞌ: “Ziꞌ biziꞌa gayꞌ kweꞌ gooṉ naꞌ chonan byen wwiaꞌ shi wak gaaṉgakb. Yeꞌgachoꞌneꞌ siꞌxeneꞌ bi gak yidꞌ.”
20 Naꞌ beenaꞌ sto chiꞌeneꞌ: “Ziꞌ bshagnaꞌ, naꞌ bi gak yidꞌ.”
21 Naꞌch bizaꞌ wen llinnaꞌ jayelleꞌ x̱aneꞌnaꞌ yogꞌ daa goll beṉꞌkaꞌ ḻeꞌ. Naꞌch bllaa x̱aneꞌnaꞌ naꞌ chiꞌe wen llin c̱heꞌnaꞌ: “Ḻobeꞌ jta lyell naꞌ bc̱heꞌ kon no beṉꞌ yillagoꞌ, no beṉꞌ yeshꞌ, no beṉꞌ net ṉiꞌa nee, no beṉꞌ lc̱hoḻ, naꞌ no beṉꞌ bi chak saꞌ wen.”
22 Naꞌ ka jasaneꞌ beṉꞌkaꞌ jatopeꞌ, naꞌch chiꞌe x̱aneꞌnaꞌ: “X̱anꞌ, ba benꞌ ka wnoꞌ, naꞌ ni dech latj shoꞌ beṉꞌ.”
23 Naꞌch cheꞌ x̱aneꞌnaꞌ: “Wyaj do yawi nezkaꞌ naꞌ ben byen yid beṉꞌkaꞌ yillagoꞌ kwenc̱he yillaꞌ ḻoo lillaꞌni.
24 Naꞌ niaꞌ leꞌ, ka nak beṉꞌkaꞌ byaꞌ dii nech, ni toeꞌ bi gaogakeꞌ daa ba bsiniꞌa.”
Yeḻꞌ zakꞌziꞌnaꞌ yen ileꞌicho ni c̱he Jesucrístonaꞌ
25 Beṉꞌ zan zjanogakeꞌ Jesúzaꞌ, naꞌch biyec̱hjeꞌ chiꞌe ḻegakeꞌ:
26 ―Shi nole cheeni gakle nadꞌ txen, chiyaḻꞌ gakchile nadꞌ aga ka x̱axṉaꞌle, xool-le, xiiṉle, beṉꞌ bishꞌle, beṉꞌ zanle, naꞌ ax̱t yeḻꞌ mban c̱helenaꞌ. Shi bi gakileꞌ nadꞌ, aga wak gakle nadꞌ txen.
27 Naꞌ ḻekzkaꞌ beenaꞌ bi chzanileꞌ yeḻꞌ mban c̱heꞌnaꞌ, gak bittezə dii gak c̱heꞌ, kwenc̱he goneꞌ daa chazlallaa, aga wak gakeꞌ nadꞌ txen.
28 Shi nole cheenile gonle to yoo sib wal, zigaate chiyaḻꞌ wwiale kaꞌkꞌ gaki naꞌ shi waki xmechlenaꞌ sheeloin.
29 Ḻaꞌ shi ba wlekwle leninnaꞌ naꞌ tenaꞌ bich bi de wzeeloilen, naꞌ yogꞌ beṉꞌkaꞌ ileꞌgakileꞌ bi biyollan wxillgakileꞌ leꞌ.
30 Naꞌ iṉagakeꞌ: “Kon wdishj beenaꞌ len yoonaꞌ naꞌ bi goki xmecheꞌnaꞌ wzeeloeꞌn.”
31 Naꞌ kaꞌkz to beṉꞌ wṉabiaꞌ, shi cheenileꞌ tiḻ-leneꞌ sto wṉabiaꞌ yoblə, naꞌ ḻekzkaꞌ chiyaḻꞌ wsakee shi wzoi shi mil beṉꞌkaꞌ napeꞌ tiḻ-lengakeꞌ beenaꞌ nap gaḻja mil beṉꞌ.
32 Naꞌ shi gakbeꞌileꞌ bi soi beṉꞌkaꞌ napeꞌ, naꞌ ziꞌ illinlə beṉꞌ wṉabiaꞌnaꞌ sto, wseḻee to c̱hop beṉꞌ lljellgakeꞌneꞌ: “Bizə tiḻcho.”
33 Naꞌ kaꞌ leꞌ, shi bi c̱hooṉlallꞌle yogꞌ dii de c̱hele, aga wakə gakle nadꞌ txen.
Katꞌ bich zxiꞌ zedaa