9
Naꞌ ḻekzkaꞌ golleꞌ ḻegakeꞌ:
―Dii ḻi niaꞌ leꞌ, baḻ-le lleꞌleni, ni mbanle ileꞌile ka chṉabiaꞌlen Chiozaꞌ yeḻꞌ wak xen c̱heꞌnaꞌ.
San Marcos 9:1-27
Jesúzaꞌ biyakeꞌ nllaꞌlə
2 Wde x̱op lla, Jesúzaꞌ wyajeꞌ to lo yaa sibə, naꞌ bc̱hiꞌe Pédronaꞌ, Jacóbonaꞌ naꞌch Juannaꞌ. Naꞌ laweꞌkaꞌ biyakeꞌ nllaꞌlə.
3 Naꞌ xeꞌnaꞌ ax̱t chep cheeniꞌn, naꞌ biga zoa beṉꞌ c̱hibeꞌn xtil inlleb ka gokan.
4 Naꞌ bleꞌgakileꞌ Elíazaꞌ naꞌch dii Moisézaꞌ chshaljlengakeꞌ Jesúzaꞌ.
5 Naꞌ cheꞌ Pédronaꞌ Jesúzaꞌ:
―Maestro, ¡wen inlleb zoacho ni! Gonntoꞌ twej ransh c̱hele, to c̱hoꞌ, to c̱he dii Moisézaꞌ, naꞌ sto c̱he Elíazaꞌ.
6 Kon bi billel-lallee golleꞌ, daa chllebchgagakeꞌ.
7 Naꞌ wze to bej bkwashaan ḻegakeꞌ, naꞌ ḻoo bejaꞌ wṉe Chiozaꞌ, chiꞌe:
―Beenin xiiṉaa, naꞌ ḻe chakidee. Ḻi wzenag c̱heꞌ.
8 Naꞌ ka bwiagakeꞌ ganaꞌ wlleꞌ beṉꞌkaꞌ shoṉ, stoz Jesúzaꞌ ze.
9 Naꞌ shlak chiyetjgakeꞌ lo yaanaꞌ, goll Jesúzaꞌ ḻegakeꞌ kono yeꞌgakeꞌ daa bleꞌgakileꞌ ax̱t katꞌch ḻeꞌ, Beṉꞌ Bseḻꞌ Chiozaꞌ Yell-lioni, ba bibaneꞌ ladj beṉꞌ wetkaꞌ.
10 Naꞌ daa golleꞌ kaꞌ, ni to kono beṉꞌ yoblə gollgakeꞌ daa ben bleꞌgakileꞌ, ḻaꞌkzi wṉabi ljwellgakeꞌ, bi zejin daa golleꞌ yibaneꞌ ladj beṉꞌ wetkaꞌ.
11 Naꞌ wṉabgakileꞌ Jesúzaꞌ, cheꞌgakeꞌneꞌ:
―¿Bic̱he naz beṉꞌkaꞌ chliꞌ chsedi leyaꞌ nan zigaate Elíazanꞌ yiyed?
12 Naꞌ chiꞌe ḻegakeꞌ:
―Dii ḻi, Elíazaꞌ yideꞌ zigaate yidgwee xṉezi yogꞌḻoḻte. ¿Abi ṉezile bic̱he Choꞌa Xtillꞌ Chiozaꞌ nan Beenaꞌ Bseḻꞌ Chiozaꞌ Yell-lioni chonan byen sakꞌziꞌchgueꞌ naꞌ gakzbani beṉꞌ ḻeꞌ?
13 Naꞌ niaꞌ leꞌ, ba biyed Elíazaꞌ, naꞌ bengakileꞌneꞌ daa nazan c̱hegakeꞌ, kon ka na Choꞌa Xtillꞌ Chiozaꞌ gongakeꞌ c̱heꞌ.
Biyon Jesúzaꞌ to biꞌ yoo dii x̱iwꞌ
14 Naꞌ ka billingakeꞌ ganaꞌ lleꞌ beṉꞌkaꞌ sto, beṉꞌkaꞌ nakgakeꞌneꞌ txen, naꞌ bleꞌgakileꞌ lleꞌ beṉꞌ zan inlleb kwiteꞌkaꞌ, naꞌ len baḻ beṉꞌkaꞌ chliꞌ chsedi leyaꞌ chakguedlengakeꞌ ḻegakeꞌ.
15 Naꞌ beṉꞌkaꞌ lleꞌ naꞌ ka bleꞌgakileꞌ Jesúzaꞌ, bibangakileꞌ naꞌ wzaꞌdogakeꞌ jawapgakeꞌneꞌ chiox.
16 Naꞌ chiꞌe ḻegakeꞌ:
―¿Bi c̱heyin chakguedlenile beṉꞌkaꞌ?
17 Naꞌ to beenaꞌ len ladj beṉꞌkaꞌ lleꞌ naꞌ chiꞌeneꞌ:
―Maestro, ni ba nc̱hiꞌa biꞌ c̱haꞌni lawoꞌni, ḻaꞌ yoobꞌ to dii x̱iwꞌ naꞌ chllonan iṉebꞌ.
18 Gattezə chdabꞌ dii x̱iwaa chox̱aꞌn ḻebꞌ naꞌch chchooṉan ḻebꞌ lo yonaꞌ. Naꞌ chbia bllinꞌ choꞌabaa, naꞌ chaox̱ax̱j ḻeybaa naꞌ chzecha kwerp c̱heꞌbaa. Naꞌ ba goshꞌ beṉꞌki nakoꞌ txen yibejgakeꞌ dii x̱iwaa yoobꞌ, per bi chakgakeꞌ.
19 Naꞌ cheꞌ Jesúzaꞌ ḻegakeꞌ:
―¡Leꞌ beṉꞌ bi chajḻeꞌ! ¿Ziꞌ kaꞌkꞌtek chiyaḻꞌ soalenꞌ leꞌ? ¿Ziꞌ kaꞌkꞌtek chiyaḻꞌ soidꞌ leꞌ? Ḻi lljx̱iꞌshkibꞌ ni.
20 Naꞌ jwaꞌgakeꞌbꞌ laweꞌnaꞌ. Naꞌ ka bleꞌi dii x̱iwaa Jesúzaꞌ, benan ka wyazbꞌ shoṉaꞌ. Naꞌ billeebꞌ lo yonaꞌ naꞌ wbix̱ wtoḻbꞌ naꞌ wllia bllinꞌnaꞌ choꞌabaa.
21 Naꞌ wṉabi Jesúzaꞌ x̱abaa, chiꞌe:
―¿Batrate wzolo chakbꞌ ki?
Naꞌ cheꞌ x̱abaa:
―Kanaꞌ naktebꞌ biꞌdoꞌ chakbꞌ kaꞌ.
22 Naꞌ zan shii ba bzaḻꞌ dii x̱iwaabꞌ lo yiꞌnaꞌ naꞌ ḻoo nisaꞌ kwenc̱he witan ḻebꞌ. Naꞌ shi wak yiyonoꞌbꞌ, biyeshꞌlallꞌgachi netoꞌ naꞌ goklengach netoꞌ.
23 Naꞌ cheꞌ Jesúzaꞌ:
―¿Bic̱he nazoꞌ shi wakꞌ?, ḻaꞌ beenaꞌ chonḻilallꞌ Chiozaꞌ aga bi dii lallj gatꞌ c̱heꞌ.
24 Naꞌ besyaa x̱abaa, chiꞌe:
―Chonḻilallaaneꞌ. ¡Goklen nadꞌ gonḻilallꞌchee!
25 Naꞌ ka bleꞌi Jesúzaꞌ ba chdop chllag beṉꞌ zan inlleb, naꞌ bsheshleneꞌ dii x̱iwaa, chiꞌen:
―Dii x̱iwꞌ, linꞌ chonoꞌ kwenc̱he bi cheni biꞌni ni bi chak iṉebꞌ, nadꞌ niaꞌ liꞌ, bichej, naꞌ bich gak yiyoo sto shii.
26 Naꞌ besyaa dii x̱iwaa, naꞌ bx̱izan ḻebꞌ zibiaꞌ wal naꞌ bichejan, naꞌ gotbꞌ ka biꞌ wet. Naꞌ beṉꞌ zan wnagakeꞌ: “Ba witbꞌ.”
27 Naꞌ bex̱ꞌ Jesúzaꞌ naꞌbaꞌ kwenc̱he bisolleebꞌ.
28 Naꞌ ka biyoo Jesúzaꞌ to ḻoo yoo, beṉꞌkaꞌ nakgakeꞌneꞌ txen wṉabgakileꞌneꞌ to ḻezgakeꞌ, cheꞌgakeꞌ:
―¿Berac̱he bi gok yibejntoꞌ dii x̱iwaa?
San Marcos 9:28-50
29 Naꞌ chiꞌe ḻegakeꞌ:
―Kwenc̱he gak yichej dii x̱iwꞌ ka dga, chiyaḻꞌ soale wbasꞌ naꞌ weꞌḻwill-le Chiozaꞌ.
Jesúzaꞌ sto shii choꞌe dillꞌ gueteꞌ
30 Naꞌ bizaꞌgakeꞌ, naꞌ bidegakeꞌ ganaꞌ mbani Galileanaꞌ. Naꞌ Jesúzaꞌ bi goklallee no iṉezi gan zoagakeꞌ
31 daa chzajniileꞌ beṉꞌkaꞌ nakgakeꞌneꞌ txen. Naꞌ chiꞌe ḻegakeꞌ:
―Nadꞌ, Beṉꞌ Bseḻꞌ Chiozaꞌ Yell-lioni, gon beṉꞌ nadꞌ lo naꞌ beṉꞌ malkaꞌ naꞌ witgakeꞌ nadꞌ, naꞌ ka gak shoṉ lla, yibanꞌ ladj beṉꞌ wetkaꞌ.
32 Naꞌ bi wyajniꞌgakileꞌ daa chiꞌe ḻegakeꞌ, naꞌ bi biyaxjgakileꞌ iṉabgakileꞌneꞌ bic̱he cheꞌzeꞌ kaꞌ.
¿Noran zakꞌchi?
33 Naꞌ billingakeꞌ yell Capernaúmaꞌ. Naꞌ ka billingakeꞌ ganaꞌ zoagakeꞌ, naꞌ chiꞌe ḻegakeꞌ:
―¿Bi c̱heyin chakguedzle shlak zingoocho nezaꞌ?
34 Naꞌ ni togakeꞌ bi wṉe, daa gokguedgakeꞌ c̱he noyeṉꞌgakenꞌ nak beṉꞌ zakꞌchi.
35 Naꞌ wcheꞌ Jesúzaꞌ naꞌ goxeꞌ beṉꞌkaꞌ shlliṉ, chiꞌe ḻegakeꞌ:
―Shi nole cheenile gakle beṉꞌ zakii, chiyaḻꞌ gon kwinle ka wen llin c̱he beṉꞌ.
36 Naꞌch bzoeꞌ to biꞌdoꞌ ladjeꞌkaꞌ. Naꞌ bḻeneꞌbꞌ chiꞌe ḻegakeꞌ:
37 ―Nottezə beṉꞌ wlebeꞌ to biꞌdoꞌ ka biꞌdoꞌni daa chonḻilallee nadꞌ, nadꞌkzan chlebeꞌ. Naꞌ beenaꞌ chlebeꞌ nadꞌ, ḻekzkaꞌ chlebeꞌ Chiozaꞌ, beenaꞌ bseḻꞌ nadꞌ.
Beenaꞌ bi chakzbani choꞌ, txenkzan nakeꞌ choꞌ
38 Naꞌ cheꞌ Juannaꞌ ḻeꞌ:
―Maestro, ba bleꞌintoꞌ to beṉꞌ chzetjeꞌ lioꞌnaꞌ kwenc̱he chibejeꞌ dii x̱iwꞌkaꞌ yoo beṉꞌ naꞌ bllonntoꞌ goneꞌ kaꞌ, ḻaꞌ bi nakeꞌ choꞌ txen.
39 Naꞌ cheꞌ Jesúzaꞌ:
―Bi wllonle goneꞌ kaꞌ, ḻaꞌ beenaꞌ chzetj liaꞌnaꞌ kwenc̱he choneꞌ yeḻꞌ wak, aga wak iṉieꞌ zban c̱haꞌ.
40 Ḻaꞌ beenaꞌ bi chakzbani choꞌ, txenkzan nakeꞌ choꞌ.
41 Naꞌ nottezə beenaꞌ goṉeꞌ leꞌ ḻaꞌc̱hꞌ latꞌ nis yeejle daa nakle nadꞌ txen, dii ḻi niaꞌ leꞌ, de dii siꞌe banez.
Diikaꞌ gon ka ibix̱cho lao dii malaꞌ
42 ’Nottezə beenaꞌ gon ka ibix̱ to beṉꞌ ziꞌ chzolo chonḻilallee nadꞌ, naklan wen wwaḻꞌgakeꞌ yeneꞌnaꞌ to yaj c̱he molinnaꞌ naꞌ lljazaḻꞌgakeꞌneꞌ ḻoo nisdoꞌnaꞌ aga ka daa goneꞌ ka ibix̱ beṉꞌ lao dii malaꞌ.
43 Naꞌ shi noonaꞌ chonan ka ibix̱oꞌ lao dii malaꞌ, bc̱hogan. Wenchlan bi de noonaꞌ tḻaa yillinoꞌ kwit Chiozaꞌ aga ka daa yiyaj doxentioꞌ lo yiꞌ gabiḻaꞌ daa biga yiyol,
44 ganaꞌ ni bzogaa bi chet ni biga chiyol yiꞌnaꞌ.
45 Naꞌ shi ṉiꞌonaꞌ chonan ka chonoꞌ to dii mal, bc̱hogan. Wenchlan bi de ṉiꞌonaꞌ tḻaa yillinoꞌ kwit Chiozaꞌ aga ka daa yiyaj doxentioꞌ lo yiꞌ gabiḻaꞌ,
46 ganaꞌ ni bzogaa bi chet ni biga chiyol yiꞌnaꞌ.
47 Naꞌ shi jalawoꞌnaꞌ chonan ka chonoꞌ to dii mal, wlejan. Wenchlan bi de jalawoꞌnaꞌ tḻaa yillinoꞌ ganaꞌ zoa Chiozaꞌ chṉabiꞌe aga ka daa yiyaj doxentioꞌ lo yiꞌ gabiḻaꞌ,
48 ganaꞌ bi chet bzogaa ni biga chiyol yiꞌnaꞌ.
49 ’Ka yogꞌte diikaꞌ chzangakileꞌ choeꞌgakeꞌ Chiozaꞌ chgoogakeꞌn zedꞌ, kaꞌkzan yogꞌte beṉꞌkaꞌ nonḻilallꞌ nadꞌ yen ileꞌgakileꞌ yeḻꞌ zakꞌziꞌnaꞌ yell-lioni.
50 Zedaa nakan dii wen, per shi bich nakan zxiꞌ, aga wakch yiyonchon zxiꞌ dii yoblə kwenc̱he wc̱hinchon. Chiyaḻꞌ soalen ljwell-le mbalaz, naꞌ shi gonle kaꞌ, nakle ka yeḻꞌ wao daa yoo zedꞌ naꞌ sian.