Bi chiyaḻꞌ yilaa beṉꞌkaꞌ nshagnaꞌ
10
Bizaꞌ Jesúzaꞌ Capernaúmaꞌ ziyajeꞌ ganaꞌ mbani Judeanaꞌ naꞌ lo yell-lionaꞌ daa de shḻaa yao Jordánnaꞌ. Naꞌ bizdiꞌa bizllag beṉꞌ zan laweꞌnaꞌ naꞌ wzoloeꞌ chliꞌ chsedileꞌ ḻegakeꞌ kon ka ba yooloeꞌ choneꞌ.
San Marcos 10:1-16
2 Naꞌ baḻ fariseokaꞌ wbigꞌgakeꞌ laweꞌnaꞌ, naꞌ kwenc̱hezə wchix̱gakeꞌneꞌ wṉabgakileꞌneꞌ shi de lsens yiḻaa xool beṉꞌ.
3 Naꞌ chiꞌe ḻegakeꞌ:
―¿Bin bllia dii Moisézaꞌ biaꞌ gonle?
4 Naꞌ cheꞌgakeꞌneꞌ:
―Dii Moisézaꞌ biꞌe latj yichooṉ beṉꞌ byonaꞌ xooleꞌnaꞌ naꞌ wiꞌeneꞌ to yish daa choꞌe dillꞌ ba bilaagakeꞌ.
5 Naꞌ cheꞌ Jesúzaꞌ ḻegakeꞌ:
―Dii Moisézaꞌ bllieꞌ biaꞌ gonle kaꞌ daa nakle beṉꞌ widenag.
6 Per dii nech ka wxe wzil yell-lioni, Chiozaꞌ “beneꞌ beṉꞌ byonaꞌ naꞌch noolaꞌ.”
7 “Daan, beṉꞌ byonaꞌ wḻee x̱axṉeenaꞌ kwenc̱he soaleneꞌ xooleꞌnaꞌ
8 naꞌ gakgakeꞌ toz.” Naꞌ bich nakgakeꞌ c̱hop, san ba nakgakeꞌ toz.
9 Naꞌ beṉꞌkaꞌ ba non Chiozaꞌ toz, ni to beṉꞌ yell-lio bi chiyaḻꞌ yiḻee ḻegakeꞌ.
10 Ka billingakeꞌ yoonaꞌ ganaꞌ zoagakeꞌ, beṉꞌkaꞌ nakgakeꞌneꞌ txen wṉabgakileꞌneꞌ c̱heyi daa golleꞌ kaꞌ.
11 Naꞌ cheꞌ Jesúzaꞌ ḻegakeꞌ:
―Beenaꞌ yiḻee nool c̱heꞌnaꞌ naꞌ yishagnee nool yoblə, choneꞌ ka beenaꞌ zoakzə nool c̱heꞌ naꞌ chdaleneꞌ nool yoblə.
12 Naꞌ shi noolaꞌ yiḻee beṉꞌ c̱heꞌnaꞌ naꞌ yikee beṉꞌ yoblə, choneꞌ ka beenaꞌ zoakzə beṉꞌ c̱heꞌ naꞌ chdaleneꞌ beṉꞌ yoblə.
Jesúzaꞌ chonḻeeyeꞌ biꞌdoꞌkaꞌ
13 Naꞌ baḻ beṉꞌ jwaꞌgakeꞌ biꞌdoꞌ c̱heꞌkaꞌ lao Jesúzaꞌ kwenc̱he wx̱oa neenaꞌ yic̱hjbꞌkaꞌ naꞌ gonḻeeyeꞌ ḻegakbꞌ. Naꞌ beṉꞌkaꞌ nakgakeꞌneꞌ txen wzologakeꞌ chsheshlengakeꞌ beṉꞌkaꞌ zjwaꞌ biꞌdoꞌkaꞌ.
14 Naꞌ ka bleꞌi Jesúzaꞌ chsheshlengakeꞌ beṉꞌkaꞌ, bllee naꞌ chiꞌe ḻegakeꞌ:
―Ḻi weꞌ latj yid biꞌdoꞌki lawaꞌni, bi wllonle, ḻaꞌ Chiozaꞌ chṉabiꞌe ḻoo yic̱hjlallꞌdoꞌ beṉꞌkaꞌ nak ka ḻegakbꞌ.
15 Dii ḻi niaꞌ leꞌ, beenaꞌ bi yiyak yic̱hjlallꞌdoꞌenaꞌ ka c̱he biꞌdoꞌki kwenc̱he iṉabiaꞌ Chiozaꞌ ḻeꞌ, bi yillineꞌ ganaꞌ zoa Chiozaꞌ.
16 Naꞌ bḻeneꞌ biꞌdoꞌkaꞌ, naꞌ bx̱oa neenaꞌ yic̱hjbꞌkaꞌ naꞌ benḻeeyeꞌ ḻegakbꞌ.
To biꞌ wewꞌ, biꞌ wniꞌa, bshaljlemꞌ Jesúzaꞌ
17 Ka ba chizaꞌ Jesúzaꞌ yigwee nez, bllindo to biꞌ wewꞌ bc̱hekꞌ xibbaa laweꞌnaꞌ cheꞌbee:
―Maestro, liꞌ nakoꞌ beṉꞌ wen. ¿Beran chiyaḻꞌ gonꞌ kwenc̱he gatꞌ to yeḻꞌ mban c̱haꞌ zejḻi kaṉi?
San Marcos 10:17-31
18 Naꞌ cheꞌ Jesúzaꞌ ḻebꞌ:
―¿Berac̱he nazoꞌ nadꞌ beṉꞌ wen? Toz Chiozaꞌ nakeꞌ beṉꞌ wen.
19 Ba ṉezkziloꞌ daa nllia Chiozaꞌ biaꞌ goncho: “Bi witoꞌ beṉꞌ, bi soalenoꞌ nool bi nak nool c̱hoꞌ, bi kwanoꞌ, bi c̱hiljlalloo bizə gon iṉoꞌ c̱he beṉꞌ, ni bi siyoo, naꞌ wdap balaaṉ x̱axṉoo.”
20 Naꞌch cheꞌbee:
―Maestro, kanaꞌ naktiaꞌ biꞌ xkwidꞌ chonꞌ yogꞌ diikaꞌ.
21 Naꞌ bwia Jesúzaꞌ ḻebꞌ kon yeḻꞌ chaki, chiꞌe:
―Stozə daa chyallj gonoꞌ: jayetꞌ yogꞌ dii de c̱hoꞌ naꞌ beꞌn beṉꞌ yeshꞌkaꞌ, naꞌ gatꞌ to yeḻꞌ shaoꞌ c̱hoꞌ yabanaꞌ. Naꞌ da dinoꞌ nadꞌ.
22 Naꞌ gokyeshii biꞌ wniꞌanaꞌ ka golleꞌbꞌ kaꞌ. Naꞌ ziyajbꞌ chakyeshibꞌ daa nakbꞌ biꞌ wniꞌa xen inlleb.
23 Naꞌ bwia Jesúzaꞌ beṉꞌkaꞌ lleꞌ naꞌ, naꞌ chiꞌe beṉꞌkaꞌ nakgakeꞌneꞌ txen:
―¡Lallj inlleb chonan c̱he beṉꞌ wniꞌakaꞌ weꞌgakeꞌ latj iṉabiaꞌ Chiozaꞌ ḻegakeꞌ!
24 Naꞌ bibani beṉꞌkaꞌ nakgakeꞌneꞌ txen daa golleꞌ kaꞌ. Naꞌ chiziꞌe ḻegakeꞌ:
―Leꞌ xiiṉdawaa, chonan lallj c̱he beṉꞌ wniꞌanaꞌ yillineꞌ yabanaꞌ ganaꞌ chṉabiaꞌ Chiozaꞌ.
25 Ḻobeꞌch te to kamey to xan yeshꞌ aga ka to beṉꞌ wniꞌa yillineꞌ yabanaꞌ ganaꞌ chṉabiaꞌ Chiozaꞌ.
26 Ka bengakileꞌ golleꞌ kaꞌ, zizikli bibangakileꞌ, naꞌ cheꞌ ljwellgakeꞌ:
―¿Notg gak yillin lao Chiozaꞌ, shkaꞌ?
27 Naꞌ bwia Jesúzaꞌ ḻegakeꞌ chiꞌe:
―Ni to beṉꞌ yell-lio bi gak goneꞌ dga, per Chiozaꞌ aga bi dii lallj c̱heꞌ de, ḻaꞌ yogꞌḻoḻte chak goneꞌ.
28 Naꞌ Pédronaꞌ chiꞌeneꞌ:
―Netoꞌ ba wlej yic̱hjntoꞌ yogꞌḻoḻ dii napntoꞌ kwenc̱he nonntoꞌ liꞌ txen.
29 Naꞌ cheꞌ Jesúzaꞌ:
―Dii ḻi niaꞌ leꞌ, nottezə beṉꞌ ba bzanileꞌ no lilleꞌ, no x̱axṉee, no beṉꞌ bishee, no beṉꞌ zaneꞌ, no xiiṉ xooleꞌ, no yell-lio c̱heꞌ ni c̱haꞌ nadꞌ naꞌ ni c̱he dillꞌ wen dillꞌ kob c̱haꞌnaꞌ,
30 lo yell-lioni Chiozaꞌ yiyoꞌeneꞌ dii zanch ka diikaꞌ wlej yic̱hjeꞌ, no lilleꞌ, no beṉꞌ bishee, no beṉꞌ zaneꞌ, no xiiṉeꞌ, no yell-lio c̱heꞌ ḻaꞌkzi chiya dii wsakꞌziꞌ beṉꞌ ḻeꞌ, naꞌ illin lla gatꞌ to yeḻꞌ mban c̱heꞌ zejḻi kaṉi.
31 Per beṉꞌ zan nakgakeꞌ beṉꞌ zakii ṉaa, wllin lla bich bi sakꞌgakeꞌ, naꞌ beṉꞌ zan bi nakgakeꞌ beṉꞌ zakii, wllin lla gakgakeꞌ beṉꞌ zakii.
De wyoṉ shii Jesúzaꞌ choꞌe dillꞌ gueteꞌ
32 Ka ziyajgakeꞌ Jerusalénnaꞌ, naꞌ zillialo Jesúzaꞌ lao beṉꞌkaꞌ nakgakeꞌneꞌ txen. Naꞌ ḻe chibangakileꞌ, naꞌ beṉꞌkaꞌ zinoch ḻeꞌ ḻe chllebgakeꞌ. Naꞌ bc̱heꞌ Jesúzaꞌ beṉꞌkaꞌ shlliṉ kaꞌlə naꞌ wzoloeꞌ choꞌe dillꞌ laweꞌkaꞌ daa gak c̱heꞌ,
San Marcos 10:32-52
―Ba gokbeꞌkzileꞌ ba ziyajcho Jerusalénnaꞌ, naꞌ nadꞌ, Beṉꞌ Bseḻꞌ Chiozaꞌ Yell-lioni, gongakeꞌ nadꞌ lo naꞌ bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ, naꞌ wc̱hoglogakeꞌ c̱haꞌ guetꞌ naꞌ gongakeꞌ nadꞌ lo naꞌ beṉꞌ zitꞌkaꞌ.
34 Naꞌ wtitjgakileꞌ nadꞌ, naꞌ wllaꞌ x̱eneekaꞌ nadꞌ, naꞌ wit c̱hingakeꞌ nadꞌ, naꞌ witgakeꞌ nadꞌ. Naꞌ ka gak shoṉ lla yibanꞌ ladj beṉꞌ wetkaꞌ.
To dii wṉab Jacóbonaꞌ len Juannaꞌ lao Jesúzaꞌ
35 Naꞌ Jacóbonaꞌ len Juannaꞌ, beṉꞌkaꞌ nak xiiṉ Zebedewaꞌ, wbigꞌgakeꞌ lao Jesúzaꞌ cheꞌgakeꞌneꞌ:
―Maestro, cheenintoꞌ gongachoꞌ goklen gonoꞌ dga iṉabintoꞌ liꞌ.
36 Naꞌ chiꞌe ḻegakeꞌ:
― ¿Beran cheenileꞌ gonꞌ c̱hele?
37 Naꞌ cheꞌgakeꞌneꞌ:
―Weꞌgachoꞌ latj kweꞌntoꞌ shḻaa wej kwitoꞌnaꞌ katꞌ solo iṉabiꞌo ganaꞌ de balaaṉ xen c̱hoꞌnaꞌ.
38 Naꞌ cheꞌ Jesúzaꞌ ḻegakeꞌ:
―Aga ṉezileꞌ bin chṉable. ¿Awzoileꞌ wtiḻ-le ka yeḻꞌ zakꞌziꞌkaꞌ idiḻ illagꞌ naꞌ gak c̱hele ka gak c̱haꞌ?
39 Naꞌ cheꞌgakeꞌneꞌ:
―Wzointoꞌn.
Naꞌ cheꞌ Jesúzaꞌ ḻegakeꞌ:
―Dii ḻi, wtiḻ-le ka yeḻꞌ zakꞌziꞌkaꞌ idiḻ illagꞌ naꞌ gak c̱hele ka gak c̱haꞌ.
40 Per daa nale kweꞌle shḻaa wej kwitaa bi nak lo naꞌ gonaꞌn, san beṉꞌkaꞌ ba mbej Chiozanꞌ, gakan c̱hegakeꞌ.
41 Ka beni beṉꞌkaꞌ zi shi, naꞌ bllaagakeꞌ Jacóbonaꞌ naꞌch Juannaꞌ.
42 Naꞌ wṉe Jesúzaꞌ ḻegakeꞌ, chiꞌe:
―Ṉezkzile beṉꞌkaꞌ chṉabiaꞌ yell-lioni naꞌ beṉꞌkaꞌ zakii chongakeꞌ byen chzenag beṉꞌ c̱hegakeꞌ.
43 Per aga kanꞌ chiyaḻꞌ gonle. Shi nole cheenile gakle beṉꞌ mbejlawin chiyaḻꞌ gon kwinle ka wen llin c̱he beṉꞌ.
44 Naꞌ shi nole cheenile gakle beṉꞌ zakii, chiyaḻꞌ gakle ka beṉꞌ ndoo lla yel choneꞌ xshin beṉꞌ.
45 Ḻaꞌ nadꞌ, Beṉꞌ Bseḻꞌ Chiozaꞌ Yell-lioni, aga bidꞌ kwenc̱he gaklen beṉꞌ nadꞌ, san bidꞌ kwenc̱he gaklenꞌ beṉꞌ naꞌ wiꞌa yeḻꞌ mban c̱haꞌnaꞌ kwenc̱he yislaꞌ beṉꞌ zan lao saaxyanaꞌ.
Jesúzaꞌ biyoneꞌ beṉꞌ lc̱hoḻaꞌ le Bartimeo
46 Naꞌ bllingakeꞌ Jericónaꞌ, naꞌ ka ba chichej Jesúzaꞌ yellaꞌ kon beṉꞌkaꞌ nakgakeꞌneꞌ txen naꞌ len beṉꞌ zanch zinogakeꞌneꞌ, naꞌ chiꞌ to beṉꞌ lc̱hoḻ choꞌa nezaꞌ cheenileꞌ no weꞌ ḻeꞌ mech, naꞌ lieꞌ Bartimeo, xiiṉ to beṉꞌ le Timeo.
47 Naꞌ ka benileꞌ nan Jesús, beṉꞌ Nazaretanꞌ, wdenaꞌ, naꞌ wzoloeꞌ chosyee, chiꞌe:
―¡Jesús, xiiṉ dia c̱he dii Daví, biyeshꞌlallꞌgachi nadꞌ!
48 Naꞌ beṉꞌ zan bsheshlengakeꞌneꞌ daa chosyee, naꞌ zizikli chosyaacheꞌ, chiꞌe:
―¡Xiiṉ dia c̱he dii Daví, biyeshꞌlallꞌgachi nadꞌ!
49 Naꞌ wlez Jesúzaꞌ chiꞌe:
―Ḻi iṉieꞌ.
Naꞌ wṉegakeꞌneꞌ, cheꞌgakeꞌ:
―Btiplalloo, wzollaꞌ, ba chṉieꞌ liꞌ.
50 Naꞌ bzaḻee kaꞌlə lechaa nx̱oa kolleenaꞌ naꞌ wzollee jsieꞌ lao Jesúzaꞌ.
51 Naꞌ wṉabileꞌneꞌ, chiꞌe:
―¿Bin cheeniloꞌ gonꞌ c̱hoꞌ?
Naꞌ cheꞌ beṉꞌ lc̱hoḻaꞌneꞌ:
―Maestro, cheenidꞌ ileꞌidꞌ.
52 Naꞌ cheꞌ Jesúzaꞌneꞌ:
―Wak yiyajoꞌ. Daa ba benḻilalloo nadꞌ, ba biyakiloꞌ.
Naꞌ katenaꞌ lii bleꞌteileꞌ naꞌ wnoeꞌ Jesúzaꞌ.