Ka billin Jesúzaꞌ Jerusalénnaꞌ
11
Ka ba zoa yillingakeꞌ Jerusalénnaꞌ, naꞌ wdegakeꞌ gaozə ganaꞌ llia yell Betfagénaꞌ naꞌ yell Betánianaꞌ, kwit Yaa Olívozaꞌ, naꞌ Jesúzaꞌ bseḻee c̱hop beṉꞌkaꞌ nakgakeꞌneꞌ txen,
San Marcos 11:1-18
―Ḻi shaj yellaꞌ daa llia gaozə, naꞌ ka illinle naꞌ, ileꞌile to burr chbandoꞌ, ba konoṉꞌ kwia, daꞌb yagaꞌ. Naꞌ wsell-leb wc̱heꞌleb nilə.
3 Naꞌ shi no iṉaz leꞌ: “¿Berac̱he chsellzleb?”, naꞌ yeꞌleneꞌ: “X̱anchonanꞌ chyalljileꞌb xtit, naꞌ yiyoṉtieꞌb.”
4 Naꞌch wyaj beṉꞌkaꞌ bseḻee, naꞌ bleꞌgakileꞌ to burr daꞌb to choꞌa yoo ganaꞌ chde nezaꞌ, naꞌ bsellgakeꞌb.
5 Naꞌ beṉꞌkaꞌ lleꞌ naꞌ wṉabgakileꞌ ḻegakeꞌ:
―¿Bin chonle? ¿Bic̱he chsellzleb?
6 Naꞌ gollgakeꞌ ḻegakeꞌ daa goll Jesúzaꞌ, naꞌ beꞌgakeꞌ latj bc̱heꞌgakeꞌb.
7 Naꞌ bx̱oagakeꞌ xeꞌkaꞌ kollꞌ burraꞌ naꞌ jasangakeꞌb lao Jesúzaꞌ, naꞌ wllieꞌb.
8 Naꞌ beṉꞌ zan bshiljgakeꞌ xeꞌkaꞌ tnezaꞌ, naꞌ zi baḻeꞌ bc̱hoggakeꞌ no zin naꞌ wdix̱jgakeꞌn tnezaꞌ.
9 Naꞌ ka beṉꞌkaꞌ llialo lao Jesúzaꞌ ka beṉꞌkaꞌ nogakeꞌneꞌ, chosyaagakeꞌ, nagakeꞌ:
―¡Ḻi weꞌlaꞌo Chiozaꞌ! ¡Gonḻeeyshga X̱ancho Chiozaꞌ beeni ba bseḻee!
10 ¡Gonḻeeyshga X̱ancho Chiozaꞌ yeḻꞌ wṉabiaꞌ c̱he beeni zee lo dia c̱he dii x̱ozxtoꞌcho Davinaꞌ! ¡Ḻi da weꞌlaꞌocho Chiozaꞌ zoa yabanaꞌ!
11 Naꞌ wyoo Jesúzaꞌ yell Jerusalénnaꞌ naꞌ zejeꞌ ganaꞌ zoa yoodoꞌnaꞌ. Naꞌ ka biyoll bwieꞌ doxenten naꞌ ziyajeꞌ Betánianaꞌ len beṉꞌkaꞌ shlliṉ, daa ba wlleꞌ.
Bllaa Jesúzaꞌ daa bibi dii zix̱ llia yag yix̱wewaꞌ
12 Naꞌ betiyo ka bizaꞌgakeꞌ Betánianaꞌ, wdon Jesúzaꞌ.
13 Naꞌ zitꞌlə bleꞌile to yag yix̱wew llia xḻaguinnaꞌ, naꞌ jawieꞌ shi ḻekzkaꞌ llian yix̱wewaꞌ. Naꞌ ka bllineꞌ zeelo xḻaguiinnaꞌ llia, ḻaꞌ aga tiemp c̱he yix̱wew kanaꞌ.
14 Naꞌch golleꞌ yagaꞌ:
―¡Batch kwioꞌ dii gao beṉꞌ!
Naꞌ beni beṉꞌkaꞌ nakgakeꞌneꞌ txen ka golleꞌn.
Jesúzaꞌ bishesheꞌ beṉꞌkaꞌ chitꞌ chde leshꞌ chyoodoꞌnaꞌ
15 Naꞌ ka billingakeꞌ Jerusalénnaꞌ, Jesúzaꞌ wyoꞌe leshꞌ chyoodoꞌnaꞌ naꞌ wzoloeꞌ bishesh bic̱heeṉeꞌ beṉꞌkaꞌ chitꞌ chde naꞌ beṉꞌkaꞌ chaꞌo chziꞌ. Naꞌ bishiꞌe mes c̱he beṉꞌkaꞌ chshaa mechaꞌ naꞌ bzoles bzollineꞌ ganaꞌ chiꞌ beṉꞌkaꞌ chitꞌgakeꞌ palomkaꞌ.
16 Naꞌ bi biꞌe latj no shoꞌlench dii witꞌ wdieꞌ leshꞌ chyoodoꞌnaꞌ.
17 Naꞌ wzoloeꞌ chliꞌ chsedileꞌ beṉꞌkaꞌ lleꞌ naꞌ, chiꞌe:
―Choꞌa Xtillꞌ Chiozaꞌ nan: “Lillaꞌnaꞌ nakan ga choeꞌḻwill yogꞌte beṉꞌ lleꞌ doxen lo yell-lioni nadꞌ”, per leꞌ, ba nonzlen ka to ga chdop chllag wban.
18 Naꞌ ka beni bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ ka wneꞌ, wzologakeꞌ wdiljlallꞌgakeꞌ nak gongakeꞌ witgakeꞌneꞌ, daa ḻe chllebgakeꞌneꞌ, ḻaꞌ yogꞌ beṉꞌ chibangakileꞌ ka chliꞌ chsedileꞌ ḻegakeꞌ.
19 Naꞌ ka goḻ, bizaꞌlen Jesúzaꞌ beṉꞌkaꞌ nakgakeꞌneꞌ txen Jerusalénnaꞌ.
San Marcos 11:19-33
Wbill yag yix̱wewaꞌ
20 Naꞌ betiyo shzilaꞌ ka wdegakeꞌ ganaꞌ zoa yag yix̱wewaꞌ, bleꞌgakileꞌ ba wbill ax̱t loinnaꞌ.
21 Naꞌ jadini Pédronaꞌ daa goll Jesúzaꞌ yagaꞌ naꞌ chiꞌeneꞌ:
―Maestro, bwiakachi, yag yix̱wewaꞌ daa bsheshlenoꞌ. Ba wbillan.
22 Naꞌ cheꞌ Jesúzaꞌ ḻegakeꞌ:
―Ḻi gonḻilallꞌ Chiozaꞌ.
23 Dii ḻi niaꞌ le, nottezə beenaꞌ yee yaani: “Bkwas kaꞌlə naꞌ jsoa ḻoo nisdoꞌnaꞌ”, naꞌ bi gonc̱hoplallee, san shajḻiꞌe, naꞌ gak ka iṉeꞌ.
24 Daan niaꞌ leꞌ, bittezə iṉable katꞌ weꞌḻwill-le Chiozaꞌ, ḻi shajḻeꞌ ba nakkzan goṉeꞌn, naꞌ ikaalen.
25 Naꞌ katꞌkaꞌ choeꞌḻwill-le Chiozaꞌ, ḻi siꞌxen c̱he bishꞌ ljwell-lenaꞌ shi bi choneꞌ c̱hele kwenc̱he X̱alenaꞌ beenaꞌ zoa yabanaꞌ siꞌxeneꞌ saaxya c̱helekaꞌ.
26 Ḻaꞌ shi leꞌ bi siꞌxen c̱he ljwell-le, ḻekzkaꞌ X̱alenaꞌ, beenaꞌ zoa yabanaꞌ, bi siꞌxeneꞌ saaxya c̱helekaꞌ.
Yeḻꞌ wṉabiaꞌ c̱he Jesúzaꞌ
27 Naꞌ billingakeꞌ Jerusalénnaꞌ sto shii, naꞌ shlak chda Jesúzaꞌ leshꞌ chyoodoꞌnaꞌ, wbigꞌ bx̱ozkaꞌ chṉabiaꞌ, len beṉꞌkaꞌ chliꞌ chsedi leyaꞌ naꞌ beṉꞌ golkaꞌ chṉabiaꞌ,
28 naꞌ cheꞌgakeꞌneꞌ:
―Wnashki netoꞌ, ¿nora lsens c̱heyi chonoꞌ diiki? ¿No beṉ liꞌ yeḻꞌ wṉabiaꞌnaꞌ kwenc̱he chonoꞌ diiki?
29 Naꞌ cheꞌ Jesúzaꞌ ḻegakeꞌ:
―Ḻekzkaꞌ nadꞌ, de to dii iṉabidꞌ leꞌ. Naꞌ shi leꞌ iṉale nadꞌ daa iṉabidꞌ leꞌ, naꞌ iṉiaꞌ leꞌ no lsens c̱heyin chonꞌ yogꞌ diiki.
30 ¿Noran bseḻꞌ Juannaꞌ kwenc̱he bidchoeꞌ beṉꞌ nisaꞌ? ¿AChiozanꞌ bseḻeeneꞌ, anti beṉꞌ yell-lionaꞌzan? Ḻi iṉashki nadꞌ.
31 Naꞌch choeꞌlen ljwellgakeꞌ dillꞌ, cheꞌgakeꞌ:
―Shi yeꞌchoneꞌ Chiozaꞌ bseḻeeneꞌ, ḻobeꞌ iṉeꞌ choꞌ: “¿Berac̱he ki wyajḻeꞌle c̱heꞌ, lla?”
32 Naꞌ bite gak yizeꞌchoneꞌ nozə beṉaan bseḻeeneꞌ.
Bi biyaxjgakileꞌ yeꞌgakeꞌneꞌ kaꞌ daa bllebgakeꞌ beṉꞌ yellkaꞌ, ḻaꞌ yogꞌzgakeꞌ yoo yic̱hjgakeꞌ Juannaꞌ gokeꞌ to beṉꞌ wdix̱jee daa goll Chiozaꞌneꞌ.
33 Naꞌ gollgakeꞌ Jesúzaꞌ:
―Bi ṉezintoꞌ.
Naꞌ cheꞌ Jesúzaꞌ ḻegakeꞌ:
―Ḻekzkaꞌ nadꞌ, bi iṉiaꞌ leꞌ no beṉ nadꞌ yeḻꞌ wṉabiaꞌnaꞌ chonꞌ diiki.