Bllin Jesúzaꞌ Jerusalénnaꞌ
21
Naꞌ ka ba zoa yillingakeꞌ Jerusalénnaꞌ, bllingakeꞌ choꞌa yell Betfagénaꞌ daa llia kwit Yaa Olívozaꞌ. Naꞌ wlej Jesúzaꞌ c̱hop beṉꞌkaꞌ nakgakeꞌneꞌ txen naꞌ bseḻee ḻegakeꞌ yellaꞌ.
2 Naꞌ chiꞌe ḻegakeꞌ:
―Ḻi shaj yellaꞌ daa llia shḻaanaꞌ. Naꞌ ileꞌile to burr ba noolə daꞌb yag naꞌ nc̱heꞌ to xiiṉdoꞌb. Naꞌ wsell-leb wc̱heꞌlegakb nilə.
3 Naꞌ shi no bi iṉa leꞌ, naꞌ yeꞌleneꞌ: “X̱anntoꞌnanꞌ chyalljileꞌ ḻegakb, naꞌ lii yidsantentoꞌgakb.”
4 Naꞌ daa gok kaꞌ, billinin ka bzej dii beenaꞌ wdix̱jee daa goll Chiozaꞌneꞌ daa wneꞌ:
5 Ḻi yeꞌ beṉꞌkaꞌ lleꞌ yell Siónnaꞌ:
“Ḻi wwia, ba zaꞌ beṉꞌ wṉabiaꞌ c̱helenaꞌ,
nakeꞌ beṉꞌ gax̱jlallꞌ naꞌ llieꞌ to burrdoꞌ;
xiiṉ to ba choaꞌ yoaꞌ.”
6 Naꞌ wzaꞌ beṉꞌkaꞌ nakgakeꞌneꞌ txen zejgakeꞌ yelldoꞌnaꞌ ganaꞌ bseḻꞌ Jesúzaꞌ ḻegakeꞌ naꞌ bengakeꞌ kon ka golleꞌ ḻegakeꞌ.
7 Naꞌ jx̱iꞌgakeꞌ burraꞌ len xiiṉbaꞌ naꞌ bc̱heꞌgakeꞌ ḻegakb kwit Jesúzaꞌ. Naꞌch bx̱oagakeꞌ xeꞌkaꞌ kollꞌbkaꞌ, naꞌch wllia Jesúzaꞌb zejeꞌ Jerusalénnaꞌ.
8 Naꞌ beṉꞌ zan wdix̱jgakeꞌ xeꞌkaꞌ tnezaꞌ, naꞌ zi baḻeꞌ bc̱hoggakeꞌ no zin naꞌ wdix̱jgakeꞌn tnezaꞌ ganaꞌ zejeꞌ.
9 Naꞌ beṉꞌkaꞌ llialo lao Jesúzaꞌ, naꞌ kaꞌkzə beṉꞌkaꞌ nogakeꞌneꞌ, wzologakeꞌ chosyaagakeꞌ, nagakeꞌ:
―¡Weꞌlaꞌocho beeni nak xiiṉ dia c̱he dii Davinaꞌ! ¡Gonḻeeyshga X̱ancho Chiozaꞌ beeni ba bseḻee! ¡Ḻi da weꞌlaꞌocho Chiozaꞌ zoa yabanaꞌ!
10 Naꞌ ka wyoo Jesúzaꞌ yell Jerusalénnaꞌ, naꞌ yogꞌ beṉꞌkaꞌ lleꞌ naꞌ bllesh bcheeṉgakeꞌ, nagakeꞌ:
―¿Noraz beeni blaꞌ ni, lla?
11 Naꞌ beṉꞌkaꞌ cheꞌgakeꞌ:
―Beenin Jesúzaꞌ beṉꞌ Nazaretaꞌ yell daa mbani Galileanaꞌ, beenaꞌ chyix̱jee daa cheꞌ Chiozaꞌneꞌ.
Bishesh Jesúzaꞌ beṉꞌkaꞌ chitꞌ chde leshꞌ chyoodoꞌnaꞌ
12 Naꞌ wyoo Jesúzaꞌ leshꞌ chyoodoꞌnaꞌ naꞌ bishesheꞌ yogꞌ beṉꞌkaꞌ chitꞌ chde naꞌ. Naꞌch bishiꞌe mes c̱he beṉꞌkaꞌ chshaꞌ mechaꞌ naꞌ bzoles bzollineꞌ ganaꞌ chiꞌ beṉꞌkaꞌ chitꞌgakeꞌ palomkaꞌ.
13 Naꞌ ka wde beneꞌ kaꞌ chiꞌe ḻegakeꞌ:
―Choꞌa xtillꞌ Chiozaꞌ nan: “Lillaa nakan ga choeꞌḻwill beṉꞌ nadꞌ”, naꞌ leꞌ, ba nonzlen ka to ga chdop chllag wban.
14 Naꞌ shlak zoa Jesúzaꞌ yoodoꞌnaꞌ, baḻ beṉꞌ lc̱hoḻ naꞌ beṉꞌ bi chak saꞌgakeꞌ wen bllingakeꞌ laweꞌnaꞌ, naꞌ biyoneꞌ ḻegakeꞌ.
15 Naꞌ bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ ḻe bllaagakeꞌ ka bleꞌgakileꞌ yeḻꞌ wakkaꞌ chon Jesúzaꞌ, naꞌ bengakileꞌ chosyaa biꞌdoꞌkaꞌ leshꞌ chyoodoꞌnaꞌ, cheꞌgakbꞌ: “¡Weꞌlaꞌocho beeni nak xiiṉ dia c̱he dii Davinaꞌ!”
16 Naꞌ gollgakeꞌ Jesúzaꞌ:
―¿Acheniloꞌ ka na biꞌdoꞌkaꞌ?
Naꞌ chiꞌe ḻegakeꞌ:
―Awe, chenkzidꞌ. ¿Abiṉꞌ wlable Choꞌa Xtillꞌ Chiozaꞌ ganaꞌ na:
Chc̱hinoꞌ choꞌa ḻollꞌ biꞌ xkwidꞌdoꞌkaꞌ naꞌ bdoꞌkaꞌ ni challꞌ chxop
kwenc̱he choḻ chṉegakbꞌ liꞌ ka chiyaḻꞌ weꞌlaꞌo beṉꞌ liꞌ?
17 Naꞌch bichejeꞌ ladj beṉꞌkaꞌ, naꞌ bizee yell Jerusalénnaꞌ ziyajeꞌ yell Betánianaꞌ ganaꞌ wdieꞌ yel.
Jesúzaꞌ beneꞌ ka wbill to yag yix̱wew
18 Naꞌ betiyo bizaꞌgakeꞌ shzildoꞌ yell Betánianaꞌ kwenc̱he biyajgakeꞌ yell Jerusalénnaꞌ dii yoblə, naꞌ tnezaꞌ wzolo chdon Jesúzaꞌ.
19 Naꞌ bleꞌileꞌ to yag yix̱wew dii zoa choꞌa nezaꞌ, naꞌ jawieꞌ shi llian. Per zeelo xḻaguiinnaꞌz llia. Naꞌ golleꞌn:
―¡Batch kwioꞌ yix̱wewaꞌ!
Naꞌ katenaꞌ lii wbillte yagaꞌ.
20 Naꞌ ka bleꞌi beṉꞌkaꞌ nakgakeꞌneꞌ txen ka gok, ḻe bibangakileꞌ, naꞌ cheꞌgakeꞌneꞌ:
―¿Berac̱he lii wbilltelikazə yag yix̱wewaꞌ?
21 Naꞌch cheꞌ Jesúzaꞌ ḻegakeꞌ:
―Dii ḻi niaꞌ leꞌ, shi nonḻilallꞌle Chiozaꞌ naꞌ bi gakc̱hoplallꞌle, aga daazan gak gonle, san wakte yeꞌle yaani: “Bkwas, naꞌ jsoa ḻoo nisdoꞌnaꞌ”, naꞌ gak ka yeꞌlen.
22 Naꞌ yogꞌ daa iṉabile Chiozaꞌ ka weꞌḻwill-leneꞌ goṉkzeꞌn kon shi nonḻilallꞌleneꞌ.
Yeḻꞌ wṉabiaꞌ c̱he Jesúzaꞌ
23 Naꞌ wyaj Jesúzaꞌ dii yoblə yoodoꞌnaꞌ kwenc̱he jaliꞌ jasedileꞌ beṉꞌkaꞌ. Naꞌ shlak chliꞌ chsedileꞌ ḻegakeꞌ, bx̱ozkaꞌ chṉabiaꞌ naꞌ beṉꞌ golkaꞌ chṉabiaꞌ beṉꞌ Israelkaꞌ bllingakeꞌ, naꞌ cheꞌgakeꞌneꞌ:
―¿Nora lsens c̱heyi chonoꞌ diiki? ¿No beṉ liꞌ yeḻꞌ wṉabiaꞌnaꞌ?
24 Naꞌ goll Jesúzaꞌ ḻegakeꞌ:
―Ḻekzkaꞌ de to dii cheenidꞌ iṉabidꞌ leꞌ. Naꞌ shi leꞌ iṉale nadꞌ daa iṉabidꞌ leꞌ, naꞌ iṉiaꞌ leꞌ no lsens c̱heyi chonꞌ yogꞌ diiki.
25 Ḻi iṉashki nadꞌ, ¿noran bseḻꞌ Juannaꞌ kwenc̱he bidchoeꞌ beṉꞌ nisaꞌ? ¿AChiozaꞌ anti beṉꞌ yell-lioni?
Naꞌ wzologakeꞌ chakguedgakeꞌ to ḻezgakeꞌ, nagakeꞌ:
―Shi yeꞌchoneꞌ Chiozaꞌ bseḻeeneꞌ naꞌch iṉeꞌ choꞌ: “¿Bic̱he bi wyajḻeꞌle c̱heꞌ, lla?”
26 Naꞌ shi yeꞌchoneꞌ beṉꞌ yell-lionaꞌ bseḻee Juannaꞌ, ḻe xoll bi goni beṉꞌki choꞌ, ḻaꞌ yogꞌḻoḻeꞌ chajḻeꞌgakeꞌ Chiozaꞌ bseḻee Juannaꞌ kwenc̱he bidtix̱jiꞌe daa golleꞌneꞌ.
27 Naꞌch cheꞌgakeꞌ Jesúzaꞌ:
―Bi ṉezintoꞌ non bseḻꞌ dii Juannaꞌ.
Naꞌ goll Jesúzaꞌ ḻegakeꞌ:
―Ḻekzkaꞌ nadꞌ, aga wniaꞌ leꞌ nora lsens c̱heyin chonꞌ diiki.
Jempl c̱he c̱hop xiiṉ beṉꞌ
28 Naꞌ goll Jesúzaꞌ ḻegakeꞌ:
―¿Bi ka iṉale c̱heyi dga wseesaa? To beṉꞌ zoa c̱hop xiiṉeꞌ, naꞌch golleꞌ biꞌnaꞌ to: “Xiiṉdawaa, wyajgach jen llinnaꞌ ganaꞌ nazcho yag uvanaꞌ.”
29 Naꞌ cheꞌ xiiṉeꞌnaꞌneꞌ: “¡Bi shaꞌ!” Per naꞌtech biyajibꞌ naꞌ wyajkzbꞌ jemꞌ llinnaꞌ.
30 Naꞌ wyaj x̱abaa jelleꞌ biꞌnaꞌ sto ka golleꞌ biꞌ bishꞌbaa, naꞌch goll biꞌnaꞌneꞌ: “Wakkzə x̱a, naꞌ shaꞌ.” Per bi wyajbꞌ.
31 Ḻi iṉashki, ¿nora biꞌkaꞌ c̱hop ben ka cheeni x̱abꞌkaꞌ?
Naꞌ goll beṉꞌkaꞌneꞌ:
―Biꞌnaꞌ golleꞌ kaꞌ dii nech.
Naꞌch cheꞌ Jesúzaꞌ ḻegakeꞌ:
―Dii ḻi niaꞌ leꞌ, beṉꞌ wic̱hixjkaꞌ naꞌ noolə wdakaꞌ, ḻelgakenꞌ zigaate weꞌgakeꞌ latj iṉabiaꞌ Chiozaꞌ ḻegakeꞌ aga ka leꞌ.
32 Ḻaꞌ ka bid Juannaꞌ bchoeꞌ beṉꞌ nisaꞌ, bidzajniileꞌ leꞌ ka chiyaḻꞌ soa kwezle, per leꞌ aga wyajḻeꞌle c̱heꞌ, ḻete beṉꞌ wic̱hixjkaꞌ naꞌ nool wdakaꞌchgan wyajḻeꞌgakeꞌ c̱heꞌ. Naꞌ leꞌ ṉaalla, ḻaꞌkzi gokbeꞌile ba chajḻeꞌgakeꞌ c̱heꞌ, aga biyaj bileni saaxya c̱helekaꞌ naꞌ shajḻeꞌle c̱heꞌ.
Jempl c̱he wen llinkaꞌ nak beṉꞌ mal
33 ’Ḻi wzenag jempli sto. Wzoa to beṉꞌ biyazeꞌ yag uva lo yell-lio c̱heꞌnaꞌ naꞌch wloꞌen leej, naꞌtech benshawee to ga wsigakeꞌ uvakaꞌ. Naꞌ ḻekzkaꞌ beneꞌ to yoo sibə ganaꞌ kwia beenaꞌ gap wwieꞌn.
’Naꞌtech beneꞌn lo naꞌ to c̱hop beṉꞌ naꞌ wzee zejeꞌ zitꞌ.
34 Naꞌ ka goḻꞌ yishibgakeꞌ uvakaꞌ, naꞌch bseḻee to c̱hop wen llin c̱heꞌnaꞌ ganaꞌ lleꞌ beṉꞌkaꞌ chapgakeꞌ yag uvakaꞌ kwenc̱he lljaxiꞌgakeꞌ uvakaꞌ daa chidoḻee.
35 Per ka bllingakeꞌ ganaꞌ lleꞌ beṉꞌkaꞌ chapgakeꞌ yag uvakaꞌ, naꞌch bex̱ꞌgakeꞌ beṉꞌkaꞌ bllin, toeꞌ bet wdingakeꞌneꞌ, naꞌ stoeꞌ bettekzgakeꞌneꞌ naꞌ beenaꞌ sto btakwgakeꞌneꞌ yajaꞌ.
36 Naꞌch bseḻꞌ x̱an yag uvakaꞌ zanch wen llin c̱heꞌkaꞌ aga ka to beṉꞌkaꞌ bseḻee dii nech, per beṉꞌkaꞌ chap yag uvakaꞌ bengakileꞌ ḻegakeꞌ ka bengakileꞌ beṉꞌ nechkaꞌ bllin.
37 ’Naꞌch x̱an yag uvakaꞌ bseḻee kwinkz xiiṉeꞌnaꞌ, chakileꞌ: “Wapgakeꞌ balaaṉ biꞌ c̱haꞌni naꞌ weꞌgakeꞌbꞌ daa chidoḻaa.”
38 Per beṉꞌkaꞌ chap yag uvakaꞌ ka bleꞌgakileꞌ xiiṉeꞌnaꞌ, naꞌch cheꞌ ljwelleꞌ: “Biꞌnin xiiṉ x̱an yag uvaki naꞌ ḻebanꞌ yigaaṉlemꞌ yogꞌ dii napeꞌ. Ḻi da witchobꞌ kwenc̱he yigaaṉlencho daa gaki c̱hebꞌ.”
39 Naꞌch bex̱ꞌgakeꞌbꞌ bibejgakeꞌbꞌ ganaꞌ lleꞌ yag uvakaꞌ naꞌ betgakeꞌbꞌ.
40 Naꞌ Jesúzaꞌ chiꞌe beṉꞌkaꞌ lleꞌ naꞌ:
―¿Nakra ka chakile gon x̱an yag uvakaꞌ c̱he beṉꞌkaꞌ chapgakeꞌn ka illineꞌ kwineꞌ?
41 Naꞌ cheꞌ beṉꞌkaꞌ:
―Ba nakten witeꞌ ḻegakeꞌ naꞌ bi yiyeshileꞌ ḻegakeꞌ daa nakgakeꞌ beṉꞌ mal. Naꞌ yiyoneꞌ yell-lio c̱heꞌnaꞌ lo naꞌ beṉꞌ yoblə, beṉꞌ yiyoeꞌgakeꞌneꞌ daa chidoḻee katꞌ yishibgakeꞌn.
42 Naꞌ goll Jesúzaꞌ ḻegakeꞌ:
―¿Abigaṉꞌ wlable Choꞌa Xtillꞌ Chiozaꞌ ganaꞌ na:
Yajaꞌ daa bi wyoolallꞌ wen yookaꞌ,
ḻeyeṉꞌlannanꞌ yajaꞌ daa ba nc̱hejcha yoonaꞌ.
Dgan ben X̱ancho Chiozaꞌ
naꞌ nakan to dii yibanicho?
43 Daan niaꞌ leꞌ, kon ka gon x̱an yag uvakaꞌ yiyoneꞌ yell-lio c̱heꞌnaꞌ lallꞌ naꞌ beṉꞌ yoblə, beṉꞌ gongakeꞌ ka cheenileꞌ, kaꞌkzan gon Chiozaꞌ c̱hele. Kwej yic̱hjeꞌ leꞌ, naꞌ beṉꞌkaꞌ wzenaggakeꞌ c̱heꞌ, siꞌgakeꞌ banez yeḻꞌ wṉabiaꞌ c̱heꞌnaꞌ.
44 Naꞌ ka nak yajaꞌ, nottezə beṉꞌ lljc̱hazeꞌ lawinnaꞌ kwiayee, naꞌ shi idakwan beṉꞌ, ax̱t wshoshjan ḻeꞌ.