Jempl c̱he wen llinkaꞌ
20
Naꞌ wna Jesúzaꞌ:
―Yeḻꞌ wṉabiaꞌ c̱he Chiozaꞌ chzaklebin daa gok c̱he to x̱an yell-lio beenaꞌ naz yag uvanaꞌ. Naꞌ shzildoꞌ wzee zejeꞌ zjtiljeꞌ wen llinkaꞌ kwenc̱he lljengakeꞌ llinnaꞌ ganaꞌ nazeꞌ yag uvakaꞌ.
2 Naꞌ bgaaṉgakeꞌ dillꞌ c̱hixjeꞌ ḻegakeꞌ c̱he lla, naꞌch bseḻee ḻegakeꞌ ganaꞌ lljengakeꞌ llinnaꞌ.
3 Naꞌ ba gok shoṉ gor chon beṉꞌ nechkaꞌ llinnaꞌ ka wyajeꞌ dii yoblə ganaꞌ chak yaanaꞌ, naꞌ bleꞌileꞌ lleꞌ beṉꞌ bibi llin de gongakeꞌ.
4 Naꞌch chiꞌe ḻegakeꞌ: “Ḻi shaj ḻi lljen llinnaꞌ ganaꞌ nazꞌ yag uvanaꞌ naꞌ c̱hixjꞌ leꞌ daa chidoḻꞌle.” Naꞌ wzaꞌgakeꞌ zejgakeꞌ llinnaꞌ.
5 Naꞌ do ka gobill wizajeꞌ dii yoblə, naꞌ ḻekzkaꞌ chida shoṉə, bizllelileꞌ beṉꞌ yoblə lljengakeꞌ llin c̱heꞌnaꞌ.
6 Naꞌ do ka chida gayꞌ, wizajeꞌ dii yoblə naꞌ bizleꞌileꞌ beṉꞌ lleꞌzgakeꞌ. Naꞌch chiꞌe ḻegakeꞌ: “¿Bic̱he bi benle llinnaꞌ ṉaanlla?”
7 Naꞌ goll beṉꞌkaꞌneꞌ: “Ḻaꞌ ni to kono bc̱heꞌ netoꞌ llinnaꞌ.” Naꞌ golleꞌ ḻegakeꞌ: “Ḻi shaj, lla, ḻi lljen llinnaꞌ ganaꞌ nazꞌ yag uvanaꞌ.”
8 Naꞌ ka wzeḻes yelaꞌ naꞌ cheꞌ x̱an yag uvanaꞌ beenaꞌ ngoo lo nee llinnaꞌ: “Biyax wen llinkaꞌ naꞌ wdixjgakeꞌ. Zigaate beṉꞌkaꞌ ziꞌ wyoo llinnaꞌ c̱hixjoꞌ, naꞌ yiyoll-lin beṉꞌkaꞌ wzolo nech.”
9 Naꞌ beneꞌ kon ka goll x̱aneꞌnaꞌ, naꞌ wdixjeꞌ zigaate beṉꞌkaꞌ wyoo llinnaꞌ do ka chida gayꞌ. Naꞌ wdixjeꞌ to toeꞌ c̱he llakzə.
10 Naꞌ ka goḻꞌ c̱hixjeꞌ beṉꞌkaꞌ wyoogakeꞌ llinnaꞌ shzildoꞌ, gokgakileꞌ wx̱oacheꞌ laxjeꞌkaꞌ. Per bich bi bx̱oeꞌ san c̱he llachokzə wdixjeꞌ ḻegakeꞌ.
11 Naꞌ ka ba nox̱ꞌgakeꞌ laxjeꞌkaꞌ, wzologakeꞌ biz chon chnagakeꞌ c̱he x̱an llinnaꞌ,
12 naꞌ gollgakeꞌneꞌ: “Do lla wzentoꞌ lo banaꞌ benntoꞌ xshinoꞌnaꞌ naꞌ toz ka wdixjoꞌ netoꞌ len beṉꞌkaꞌ ziꞌ wyoo, naꞌ ziꞌ tgorchga bengakeꞌ llinnaꞌ.”
13 Naꞌ cheꞌ x̱an llinnaꞌ toeꞌ: “Bishꞌdawaa, aga bi laxjoꞌ chzeshaa. ¿Aaga bgaaṉcho dillꞌ c̱he llan c̱hixjꞌ liꞌ?
14 Wkaa laxjoꞌnaꞌ, naꞌ biyaj. Nadꞌ cheenidꞌ c̱hixjꞌ beṉꞌkaꞌ wyoo llinnaꞌ ba wlleꞌch ka to daa ba wkoo.
15 Jwayishaz nadꞌ bi gonidꞌ xmechaa. ¿Anti chakziiloꞌ daa chonidꞌ beṉꞌ wen?”
16 Naꞌ ka wde bzoa Jesúzaꞌ jempli, naꞌ chiꞌe beṉꞌkaꞌ:
―Kaꞌkzan beṉꞌ zan nakgakeꞌ beṉꞌ zakii, wllin lla bich bi sakꞌgakeꞌ, naꞌ beṉꞌ zan bi nakgakeꞌ beṉꞌ zakii, wllin lla gakgakeꞌ beṉꞌ zakii.
Sto shii wdix̱jee Jesúzaꞌ witgakeꞌneꞌ
17 Ka ziyaj Jesúzaꞌ Jerusalénnaꞌ wṉieꞌ to beṉꞌkaꞌ shlliṉzə, chiꞌe:
18 ―Ṉaa ba ziyajcho Jerusalénnaꞌ, ganaꞌ gongakeꞌ nadꞌ, Beṉꞌ Bseḻꞌ Chiozaꞌ yell-lioni, lo naꞌ bx̱ozkaꞌ chṉabiaꞌ naꞌ lo naꞌ beṉꞌkaꞌ chliꞌ chsedi leyaꞌ, naꞌ wc̱hoglogakeꞌ witgakeꞌ nadꞌ.
19 Naꞌ gongakeꞌ nadꞌ lo naꞌ beṉꞌkaꞌ bi nak beṉꞌ Israel kwenc̱he wtitjgakileꞌ nadꞌ naꞌ wit c̱hingakeꞌ nadꞌ, naꞌtech wdaꞌgakeꞌ nadꞌ ḻee yag cruzaꞌ, per ka gak shoṉ lla yibanꞌ ladj beṉꞌ wetkaꞌ.
Daa wṉab xṉaꞌ Jacóbonaꞌ len Juannaꞌ lao Jesúzaꞌ
20 Naꞌ Jacóbonaꞌ len Juannaꞌ, beṉꞌkaꞌ nak xiiṉ Zebedewaꞌ, wbigꞌlengakeꞌ xṉeekaꞌ kwit Jesúzaꞌ, naꞌ xṉeekaꞌ bc̱hekꞌ xibeꞌnaꞌ laweꞌnaꞌ wṉabileꞌneꞌ to goklen.
21 Naꞌ goll Jesúzaꞌneꞌ:
―¿Bera goklenan cheeniloꞌ gonꞌ c̱hoꞌ?
Naꞌ golleꞌneꞌ:
―Cheenidꞌ gongachoꞌ goklen kwekoꞌ biꞌ c̱haꞌki shḻaa wej kwitoꞌnaꞌ katꞌkaꞌ illin lla iṉabiꞌo.
22 Naꞌ goll Jesúzaꞌneꞌ:
―Ni bi ṉezile bin chṉable. ¿Awizoile wtiḻ-le yeḻꞌ zakꞌziꞌnaꞌ ka daa wtiḻꞌ naꞌ gak c̱hele ka daa gak c̱haꞌ?
Naꞌ gollgakeꞌneꞌ:
―Wizokzintoꞌn.
23 Naꞌ goll Jesúzaꞌ ḻegakeꞌ:
―Lekzile wtiḻ-le ka daa wtiḻꞌ, naꞌ gak c̱hele ka daa gak c̱haꞌ, per daa nale kweꞌle shḻaa wej kwitaa bi nak lo naꞌ gonꞌ ka nale, san X̱aꞌnanꞌ ba mbejeꞌ beṉꞌkaꞌ wiꞌen.
24 Naꞌ beṉꞌkaꞌ zi shi, bllaagakeꞌ Juannaꞌ len Jacóbonaꞌ daa wṉabgakeꞌ kweꞌgakeꞌ kwit Jesúzaꞌ.
25 Naꞌ bitop Jesúzaꞌ ḻegakeꞌ, naꞌ chiꞌe:
―Ṉezkzile zoa beṉꞌ wṉabiaꞌ naꞌ beṉꞌ zakii c̱he to to yell naꞌ chongakileꞌ kon daa nazan c̱hegakeꞌ beṉꞌ yell c̱heꞌkaꞌ.
26 Per aga kanꞌ chiyaḻꞌ gonle. Shi nole cheenile gakle beṉꞌ mbejlawin chiyaḻꞌ gakle ka to beṉꞌ chon xshin beṉꞌ.
27 Naꞌ shi nole cheenile gakle beṉꞌ zakii, chiyaḻꞌ gakle ka beṉꞌ ndoo lla yel choneꞌ xshin beṉꞌ.
28 Ka nak nadꞌ, Beṉꞌ Bseḻꞌ Chiozaꞌ Yell-lioni, aga bidꞌ kwenc̱he gaklen beṉꞌ nadꞌ, san bidꞌ kwenc̱he gaklenꞌ beṉꞌ naꞌ wiꞌa yeḻꞌ mban c̱haꞌni kwenc̱he yislaꞌ beṉꞌ zan lao saaxya c̱heꞌkaꞌ.
Jesúzaꞌ biyoneꞌ c̱hop beṉꞌ lc̱hoḻ
29 Naꞌ ka bizaꞌ Jesúzaꞌ yell Jericónaꞌ len beṉꞌkaꞌ nakgakeꞌneꞌ txen, beṉꞌ zan inlleb janogakeꞌneꞌ.
30 Naꞌ choꞌa nezaꞌ chiꞌ c̱hop beṉꞌ lc̱hoḻ, naꞌ ka bengakileꞌ bide Jesúzaꞌ kwiteꞌkaꞌ naꞌch besyaagakeꞌ, cheꞌgakeꞌ:
―¡X̱anꞌ, xiiṉ dia c̱he dii Daví, biyeshꞌlallꞌgachi netoꞌ!
31 Naꞌ beṉꞌkaꞌ zejlen Jesúzaꞌ bsheshlengakeꞌ ḻegakeꞌ kwenc̱he nan kweꞌgakeꞌ lliz, per ziziklə besyaachgakeꞌ, cheꞌgakeꞌ:
―¡X̱anꞌ, xiiṉ dia c̱he dii Daví, biyeshꞌlallꞌgachi netoꞌ!
32 Naꞌch wlez Jesúzaꞌ naꞌ wṉieꞌ beṉꞌ lc̱hoḻkaꞌ, naꞌ chiꞌe ḻegakeꞌ:
―¿Beran cheenile gonꞌ c̱hele?
33 Naꞌch cheꞌ beṉꞌ lc̱hoḻkaꞌneꞌ:
―X̱anꞌ, bengach ka ileꞌintoꞌ.
34 Naꞌ biyeshꞌlallii Jesúzaꞌ ḻegakeꞌ naꞌ bex̱ee jalaweꞌkaꞌ. Naꞌ katenaꞌ gok bleꞌgakileꞌ naꞌ janogakeꞌ Jesúzaꞌ.