Bi chiyaḻꞌ yilaa ljwell beṉꞌkaꞌ nkaa c̱heyin
19
Naꞌ ka biyoll beꞌ Jesúzaꞌ dillꞌki, bizee Galileanaꞌ naꞌ biyajeꞌ ganaꞌ mbani Judeanaꞌ daa llia shḻaa yao Jordánnaꞌ.
2 Naꞌ beṉꞌ zan zjanogakeꞌneꞌ, naꞌ naꞌ biyoneꞌ beṉꞌkaꞌ bi shaoꞌ.
3 Naꞌ wbigꞌ baḻ fariseokaꞌ lao Jesúzaꞌ daa goklallꞌgakeꞌ wiꞌe dillꞌ dii wchix̱aꞌn ḻeꞌ, naꞌ cheꞌgakeꞌneꞌ:
―¿Ade lsens yiḻaa xool beṉꞌ ni c̱he bizə diidoꞌ choneꞌ dii bi chiyoolallee?
4 Naꞌch cheꞌ Jesúzaꞌ ḻegakeꞌ:
―¿Abiṉꞌ wlable ganaꞌ nan ka wxe wzil yell-lioni Chiozaꞌ beneꞌ beṉec̱haꞌ, beṉꞌ byo naꞌ noolə?
5 Naꞌ wneꞌ: “Daan, wḻaa beṉꞌ byonaꞌ x̱axṉeenaꞌ katꞌ ikaa c̱heꞌ, naꞌ soaleneꞌ xooleꞌnaꞌ gakgakeꞌ toz.”
6 Naꞌ bich nakgakeꞌ c̱hop, san ba nakgakeꞌ toz. Naꞌ daan bi chiyaḻꞌ yiḻaa xool beṉꞌ, ḻaꞌ Chiozanꞌ ba btiḻeꞌ ḻegakeꞌ.
7 Naꞌ gollgakeꞌneꞌ:
―Naꞌ ¿bic̱he ben dii Moisézaꞌ mandad katꞌ to beṉꞌ yiḻaa xooleꞌnaꞌ chiyaḻꞌ wḻiseꞌ to yish dii weꞌn dillꞌ bich nakeꞌ xooleꞌ naꞌ wak yichooṉeꞌneꞌ?
8 Naꞌ goll Jesúzaꞌ ḻegakeꞌ:
―Yeḻꞌ widenag c̱helenanꞌ beꞌ dii Moisézaꞌ latj yiḻaa xool-lenaꞌ. Per ka ben Chiozaꞌ beṉꞌ nechkaꞌ, bi gokan kaꞌ.
9 Nadꞌ niaꞌ leꞌ, shi nool c̱helenaꞌ bi chdaleneꞌ beṉꞌ yoblə, bi chiyaḻꞌ yiḻaaleneꞌ naꞌ yikaale nool yoblə, ḻaꞌ shi kaꞌ gonle, naꞌ chonle ka beenaꞌ zoalente xooleꞌnaꞌ naꞌ chdaleneꞌ noolə yoblə.
10 Naꞌ beṉꞌkaꞌ nakgakeꞌneꞌ txen gollgakeꞌneꞌ:
―Shi kaꞌ nak c̱he beenaꞌ chshagnaꞌ, naklan wen kono wshagnaꞌ.
11 Naꞌ goll Jesúzaꞌ ḻegakeꞌ:
―Aga yogꞌ beṉꞌ chajniꞌgakileꞌ dga, ḻete beṉꞌkaꞌ chon Chiozaꞌ ka shajniꞌgakileꞌn.
12 Ḻaꞌ de dii chllonan wshagnaꞌ beṉꞌ. Baḻ beṉꞌ bi chshagnaꞌgakeꞌ daa bi nak kwerp c̱heꞌkaꞌ wen ka chaljtegakeꞌ, naꞌ zi baḻeꞌ bi chshagnaꞌgakeꞌ daa bx̱iṉj beṉec̱haꞌ kwerp c̱heꞌkaꞌ. Naꞌ zi baḻeꞌ bi chshagnaꞌgakeꞌ daa cheenchgakileꞌ gongakeꞌ xshin Chiozaꞌ. Beenaꞌ wlebeꞌ dga, naꞌ gonin c̱heꞌ.
Jwaꞌgakeꞌ biꞌdoꞌkaꞌ lao Jesúzaꞌ
13 Naꞌ wyaj beṉꞌ jwaꞌ biꞌdoꞌ c̱heꞌkaꞌ lao Jesúzaꞌ kwenc̱he wx̱oa neenaꞌ yic̱hjbꞌkaꞌ naꞌ weꞌḻwilleꞌ Chiozaꞌ ni c̱hegakbꞌ. Per beṉꞌkaꞌ nakgakeꞌneꞌ txen bsheshlengakeꞌ beṉꞌkaꞌ zjwaꞌ biꞌdoꞌkaꞌ.
14 Naꞌ goll Jesúzaꞌ ḻegakeꞌ:
―Ḻi weꞌ latj yid biꞌdoꞌki lawaꞌni, bi wllonle, ḻaꞌ Chiozaꞌ chṉabiꞌe ḻoo yic̱hjlallꞌdoꞌ beṉꞌkaꞌ nak ka ḻegakbꞌ.
15 Naꞌ ka biyoll bx̱oa naꞌ Jesúzaꞌ yic̱hj biꞌdoꞌkaꞌ, naꞌch bizee ziyajeꞌ gan yoblə.
To biꞌ wewꞌ, biꞌ wniꞌa, bshaljlemꞌ Jesúzaꞌ
16 Naꞌ bllin to biꞌ wewꞌ lao Jesúzaꞌ cheꞌbꞌ ḻeꞌ:
―Maestro, ¿bi dii wennanꞌ chiyaḻꞌ gonꞌ kwenc̱he gatꞌ to yeḻꞌ mban c̱haꞌ zejḻi kaṉi?
17 Naꞌch goll Jesúzaꞌ ḻebꞌ:
―¿Bic̱he chṉabziloꞌ nadꞌ c̱he daa nak wen? Toz Chiozaꞌ nakeꞌ beṉꞌ wen. Naꞌ shi cheeniloꞌ gatꞌ to yeḻꞌ mban c̱hoꞌ zejḻi kaṉi, chiyaḻꞌ gonoꞌ diikaꞌ bllia Chiozaꞌ biaꞌ goncho.
18 Naꞌ goll biꞌ wewaaneꞌ:
―¿Bera diikaꞌ chiyaḻꞌ gonꞌ, lla?
Naꞌ cheꞌ Jesúzaꞌ:
―Bi witoꞌ beṉꞌ, bi soalenoꞌ nool bi nak nool c̱hoꞌ, bi kwanoꞌ bi de c̱he beṉꞌ, bi c̱hiljlalloo bizə gon iṉoꞌ c̱he beṉꞌ.
19 Wdap balaaṉ x̱axṉoonaꞌ naꞌ goki bishꞌ ljwelloꞌnaꞌ ka chaki kwinoꞌ.
20 Naꞌ cheꞌ biꞌ wewaaneꞌ:
―Yogꞌ diikaꞌ chonꞌ kanaꞌ naktiaꞌ biꞌdoꞌ. ¿Berachan ni chyallj gonꞌ?
21 Naꞌ goll Jesúzaꞌ ḻebꞌ:
―Shi lekziloꞌ cheeniloꞌ gakoꞌ dowalj beṉꞌ ḻi beṉꞌ shaoꞌ, biyaj jayetꞌ yogꞌ dii de c̱hoꞌ naꞌ xmechinnaꞌ wyoon beṉꞌ yeshꞌkaꞌ, naꞌ yidoꞌ gonoꞌ nadꞌ txen. Naꞌ katꞌ yillinoꞌ yabanaꞌ naꞌ goṉ Chiozaꞌ liꞌ yeḻꞌ shawaa.
22 Naꞌ ka beni biꞌ wewaa dga, nyeshꞌ inlleb gokibꞌ naꞌ bizaꞌbꞌ, ḻaꞌ biꞌ wniꞌa nlleban nakbꞌ.
23 Naꞌ goll Jesúzaꞌ beṉꞌkaꞌ nakgakeꞌneꞌ txen:
―Dii ḻi niaꞌ leꞌ, lallj inlleb chonan c̱he beṉꞌ wniꞌanaꞌ yillineꞌ yabanaꞌ ganaꞌ chṉabiaꞌ Chiozaꞌ.
24 Sto shii niaꞌ leꞌ, ḻobeꞌch te to kamey to xan yeshꞌ aga ka to beṉꞌ wniꞌa yillineꞌ yabanaꞌ ganaꞌ chṉabiaꞌ Chiozaꞌ.
25 Naꞌ bibangakileꞌ ka wneꞌ, naꞌ cheꞌ ljwellgakeꞌ:
―¿Notg gak yillin lao Chiozaꞌ, shkaꞌ?
26 Naꞌ bwia Jesúzaꞌ ḻegakeꞌ, naꞌ golleꞌ:
―Ni to beṉꞌ yell-lionaꞌ bi gak goneꞌ dga, san Chiozaꞌ yogꞌḻoḻte chak goneꞌ.
27 Naꞌ cheꞌ Pédronaꞌneꞌ:
―Netoꞌ ba wlej yic̱hjntoꞌ yogꞌ dii de c̱hentoꞌ kwenc̱he nakntoꞌ liꞌ txen. ¿Bin gonntoꞌ gan?
28 Naꞌ cheꞌ Jesúzaꞌ ḻegakeꞌ:
―Dii ḻi niaꞌ leꞌ, katꞌ illin lla yikob yogꞌḻoḻ dii de, nadꞌ, Beṉꞌ Bseḻꞌ Chiozaꞌ Yell-lioni, kwiꞌa iṉabiꞌa ganaꞌ shoꞌa balaaṉ xen wal, naꞌ leꞌ, shlliṉtele, nakle nadꞌ txen kweꞌle kwitaa kwenc̱he iṉabiaꞌlenle nadꞌ. Naꞌ yiziꞌle kwent shlliṉ kwente yell c̱he beṉꞌ Israelkaꞌ.
29 Naꞌ nottez beenaꞌ ba wlej yic̱hjeꞌ lilleꞌnaꞌ, beṉꞌ bisheekaꞌ, beṉꞌ zaneꞌkaꞌ, x̱axṉeekaꞌ, wa xiiṉ xooleꞌ, wa yell-lio c̱heꞌ ni c̱haꞌ, Chiozaꞌkzə wiꞌeneꞌ dii zakꞌ dii xen inllebch aga ka daa wlej yic̱hjeꞌ, naꞌ ḻekzkaꞌ wiꞌeneꞌ to yeḻꞌ mban zejḻi kaṉi.
30 Per beṉꞌ zan nakgakeꞌ beṉꞌ zakii, wllin lla bich bi sakꞌgakeꞌ, naꞌ beṉꞌ zan bi nakgakeꞌ beṉꞌ zakii, wllin lla gakgakeꞌ beṉꞌ zakii.