Beṉꞌkaꞌ nak Jesúzaꞌ txen gokdiḻgakeꞌ nogakenꞌ nak beṉꞌ zakꞌchi
18
Naꞌ do kanaꞌkzə, beṉꞌkaꞌ nak Jesúzaꞌ txen jabigꞌgakeꞌ kwiteꞌnaꞌ cheꞌgakeꞌneꞌ:
―¿Noran nak beṉꞌ zakꞌchi ladj beṉꞌkaꞌ chṉabiaꞌ Chiozaꞌ?
―Dii ḻi niaꞌ leꞌ, beenaꞌ bi yiyak yic̱hjlallꞌdoꞌenaꞌ ka c̱he biꞌdoꞌni kwenc̱he iṉabiaꞌ Chiozaꞌ ḻeꞌ, bi ḻeneꞌ beṉꞌkaꞌ chṉabiaꞌ Chiozaꞌ.
4 Daan beenaꞌ wḻex̱j yic̱hjeꞌ wzenagueꞌ c̱he Chiozaꞌ ka chḻex̱j yic̱hj biꞌdoꞌni chzenagbꞌ c̱he x̱axṉaꞌbaa, beenanꞌ zakꞌchi ladj beṉꞌkaꞌ chṉabiaꞌ Chiozaꞌ.
5 Naꞌ beenaꞌ wlebeꞌ to biꞌdoꞌ ka biꞌdoꞌni daa chonḻilallee nadꞌ, nadꞌkzan chlebeꞌ.
Xoll ibix̱cho lao dii malaꞌ
6 ’Nottez beenaꞌ wchix̱eꞌ to beṉꞌ ziꞌ chzolo chonḻilallee nadꞌ goneꞌ dii malaꞌ, naklan wen wwaḻꞌgakeꞌ yeneꞌnaꞌ to yaj c̱he molin naꞌ lljḻekgakeꞌneꞌ yel ḻoo nisdoꞌnaꞌ aga ka daa wchix̱eꞌ beṉꞌ lao dii malaꞌ.
7 ¡Nyeshꞌlaz c̱he beṉꞌ yell-lioki!, ḻaꞌ biga iyallji daa gonan ka wx̱iṉj wḻengakeꞌ. Per ¡nyeshꞌlazch gak c̱he beenaꞌ gon ka wx̱iṉj wḻen beṉꞌ yoblə!
8 ’Naꞌ shi noonaꞌ wa ṉiꞌonaꞌ gonan ka ibix̱oꞌ lao dii malaꞌ, naklan wen wc̱hogoꞌn naꞌ c̱hooṉoꞌn, ḻaꞌ wenchlan bi de noonaꞌ tḻaa wa ṉiꞌonaꞌ tḻaa yillinoꞌ kwit Chiozaꞌ aga ka daa yiyaj doxentioꞌ lo yiꞌ gabiḻaꞌ daa biga yiyol.
9 Naꞌ shi daa ileꞌiloꞌ kon jalawoꞌnaꞌ gonan ka ibix̱oꞌ lao dii malaꞌ, naklan wen wḻec̱hjoꞌn naꞌ c̱hooṉoꞌn, ḻaꞌ wenchlan yillinlenoꞌ tḻaaz jalawoꞌnaꞌ kwit Chiozaꞌ aga ka daa yiyaj doxentioꞌ lo yiꞌ gabiḻaꞌ.
Jempl c̱he xilaa wnit
10 ’Bi gonile nakzi ni to beṉꞌki ziꞌ wzolo chonḻilallꞌ nadꞌ. Ḻaꞌ niaꞌ leꞌ, anjl c̱heꞌkaꞌ toshiizi zoagakeꞌ lao X̱aꞌnaꞌ, beenaꞌ zoa yabanaꞌ.
11 Ḻaꞌ nadꞌ, Beṉꞌ Bseḻꞌ Chiozaꞌ Yell-lioni, bidꞌ kwenc̱he yislaꞌ beṉꞌkaꞌ yoo nez daa wlliayiꞌn ḻegakeꞌ.
12 ’¿Nak chakile? Shi to beṉꞌ lleꞌ to guiyoa xilꞌ c̱heꞌ naꞌ ṉit tob, ¿abi wkwaaṉeꞌ bakaꞌ taplaḻj twaḻj naꞌ shajeꞌ lljadiljeꞌ banaꞌ wnit?
13 Naꞌ shi yillelileꞌb, ḻech yibaileꞌ c̱heb aga ka c̱he bakaꞌ taplaḻj twaḻj bakaꞌ lleꞌ tozga.
14 Kaꞌkzan X̱acho Chiozaꞌ zoa yabanaꞌ cheenileꞌ ni to beṉꞌki ziꞌ wzolo chonḻilallꞌ nadꞌ bi kwiayiꞌ sheḻꞌkaꞌ.
Chiyaḻꞌ siꞌxencho c̱he beṉꞌkaꞌ nakcho txen chonḻilallꞌcho Chiozaꞌ
(Lc. 17:3)
15 ’Shi to beṉꞌ nakle txen nonḻilallꞌle Chiozaꞌ goneꞌ to dii mal c̱hoꞌ, jeꞌleneꞌ dillꞌ to liꞌ to ḻeꞌ daa beneꞌ c̱hoꞌ. Shi ba bzenagueꞌ c̱hoꞌ, ba benoꞌ gan bizoalenoꞌneꞌ wen.
16 Per shi bi wzenagueꞌ bin yooneꞌ, naꞌch wc̱hiꞌo sto c̱hop beṉꞌ kwenc̱he gakgakeꞌ tasc̱hiw c̱he daa yooneꞌ.
17 Naꞌ shi ni kaꞌ bi wzenagueꞌ c̱hele, wak yeꞌle yogꞌ beṉꞌkaꞌ nakle txen nonḻilallꞌle Chiozaꞌ ka nak daa ba beneꞌ kwenc̱he weꞌlengakeꞌneꞌ dillꞌ. Naꞌ shi ni c̱he beṉꞌkaꞌ bi wzenagueꞌ, naꞌchan gonileneꞌ ka to beṉꞌ bi nonḻilallꞌ Chiozaꞌ wa ka to beṉꞌ wic̱hixj.
18 ’Naꞌ dii ḻi niaꞌ leꞌ, diikaꞌ iṉale bi gon beṉꞌ yell-lioni, ḻekzkaꞌ iṉa Chiozaꞌ zoa yabanaꞌ, naꞌ diikaꞌ iṉale wak gon beṉꞌ yell-lioni, ḻekzkaꞌ iṉa Chiozaꞌ zoa yabanaꞌ.
19 ’Naꞌ ḻekzkaꞌ niaꞌ leꞌ, shi c̱hople idiḻi xtillꞌlenaꞌ yell-lioni katꞌ bi iṉable lao X̱aꞌ Chiozaꞌ, beenaꞌ zoa yabanaꞌ, naꞌ goneꞌ daa iṉabileneꞌ.
20 Ḻaꞌ ganaꞌ chdop c̱hopeꞌ wa shoṉeꞌ choeꞌlaꞌogakeꞌ nadꞌ, naꞌkz zoaꞌ ladjeꞌkaꞌ.
21 Naꞌ wbigꞌ Pédronaꞌ kwit Jesúzaꞌ, chiꞌeneꞌ:
―X̱anꞌ, ¿baḻ shii chiyaḻꞌ yiziꞌxenꞌ c̱he bishꞌ ljwellaa shi bi dii mal choneꞌ c̱haꞌ? ¿Azeelo gall shii?
22 Naꞌ cheꞌ Jesúzaꞌneꞌ:
―Aga niaꞌ liꞌ zeelo gall shii yiziꞌxenoꞌ c̱he bishꞌ ljwelloꞌnaꞌ, san niaꞌ liꞌ chiyaḻꞌ yiziꞌxenoꞌ guiyon shinꞌc̱hopə shii.a
Jempl c̱he beenaꞌ bi biziꞌxen c̱he bishꞌ ljwelleꞌnaꞌ
23 ’Yeḻꞌ wṉabiaꞌ c̱he Chiozaꞌ zaklebin to beṉꞌ wṉabiaꞌ beenaꞌ biziꞌ kwent c̱he mechaꞌ daa chaḻꞌ wen llin c̱heꞌkaꞌ.
24 Naꞌ ka wzoloeꞌ chiziꞌe kwent c̱he to toeꞌ, jwaꞌgakeꞌ to wen llin c̱heꞌnaꞌ beenaꞌ chaḻꞌ dii xen inlleb.
25 Per aga bi mech nap beenaꞌ kwenc̱he yiyixjeꞌ daa chbaguee, naꞌ x̱aneꞌnaꞌ beneꞌ mandad witꞌ wdegakeꞌneꞌ do xiiṉ do xooleꞌ naꞌ yogꞌḻoḻ dii de c̱heꞌ kwenc̱he yiyaxj xyanaꞌ daa llieꞌ.
26 Naꞌ beenaꞌ chbagꞌ mechaꞌ bc̱hekꞌ xibeꞌnaꞌ lao x̱aneꞌnaꞌ, chonyeshee, chiꞌe: “X̱anꞌ, wdapgach yeḻꞌ chxenlallꞌ c̱haꞌ, wiyixjkzꞌ doxen daa chbagaa c̱hoꞌ.”
27 Naꞌ x̱aneꞌnaꞌ biyeshileꞌneꞌ, naꞌ beneꞌ kaꞌz doxen daa chaḻee c̱heꞌ, naꞌ bisaneꞌneꞌ.
28 Per ḻeꞌ, ka bichejeꞌ lill x̱aneꞌnaꞌ, billagueꞌ sto wen llin beṉꞌ chaḻꞌ latꞌdoꞌ xmecheꞌ, naꞌ lii bṉiztieꞌ yeneꞌnaꞌ chiꞌeneꞌ: “¡Biyoṉ xmechaa daa chaḻoo!”
29 Naꞌ bc̱hekꞌ xib beenaꞌ laweꞌnaꞌ naꞌ chonyeshee, chiꞌeneꞌ: “Wdapgach yeḻꞌ chxenlallꞌ c̱haꞌ, wiyixjkzꞌ doxen daa chbagaa c̱hoꞌ.”
30 Naꞌ bi goonileꞌ, san lii wyajtieꞌ jiꞌeneꞌ part kwenc̱he wloogakeꞌneꞌ lillyanaꞌ ax̱t ki yiyixjcheꞌ doxen daa chaḻee c̱heꞌ.
31 Naꞌ ka bleꞌi wen llinkaꞌ sto ka beneꞌ, naꞌ gokyeshꞌgakileꞌ naꞌ jayellgakeꞌ x̱aneꞌkaꞌ doxen ka beneꞌ.
32 Naꞌ wizax x̱aneꞌnaꞌ ḻeꞌ, chiꞌeneꞌ: “Beṉꞌ mal inlleb nakoꞌ. Nadꞌ benꞌ kaꞌz doxen daa chaḻoo c̱haꞌ daa benyeshoo lawaꞌ.
33 Kaꞌkzan nan chiyaḻꞌ yiyeshiloꞌ bishꞌ ljwelloꞌnaꞌ chaḻꞌ c̱hoꞌ, ka biyeshidꞌ liꞌ.”
34 Naꞌ daa ḻe bllaachga x̱aneꞌnaꞌ, beneꞌneꞌ lo naꞌ beṉꞌkaꞌ wdix̱jgakeꞌneꞌ lillyanaꞌ naꞌ wit c̱hingakeꞌneꞌ ax̱t ki yiyixjcheꞌ doxen daa chaḻee.
35 Naꞌch goll Jesúzaꞌ ḻegakeꞌ:
―Kaꞌkzan goni X̱aꞌnaꞌ beenaꞌ zoa yabanaꞌ leꞌ shi bi siꞌxen c̱he ljwell-le do yic̱hj do lallꞌle.