Biyak Jesúzaꞌ nllaꞌlə
17
Ka wde x̱op lla, bc̱heꞌ Jesúzaꞌ Pédronaꞌ, naꞌ Jacóbonaꞌ len beṉꞌ bishee Juannaꞌ, naꞌ to ḻezgakeꞌ wyajleneꞌ to lo yaa xen.
2 Naꞌ ka lleꞌgakeꞌ lo yaanaꞌ, gok Jesúzaꞌ nllaꞌlə laweꞌkaꞌ. Wyep wyeeniꞌ choꞌalaweꞌnaꞌ kakzə wbillaꞌ, naꞌ xeꞌnaꞌ nakweꞌ gokan xtil llyish ax̱t chey cheeniꞌn.
3 Naꞌ beṉꞌkaꞌ lleꞌlengakeꞌneꞌ bleꞌgakileꞌ dii Moisézaꞌ naꞌ Elíazaꞌ chshaljlengakeꞌ Jesúzaꞌ.
4 Naꞌch Pédronaꞌ golleꞌ Jesúzaꞌ:
―X̱anꞌ, ḻe mbalaz zoacho ni. Shi cheeniloꞌ, gonꞌ shoṉ ransh, ton choꞌ, ston c̱he Moisézaꞌ naꞌ ston c̱he Elíazaꞌ.
5 Naꞌ ka golleꞌ kaꞌ, betj to bej dii chey cheeniꞌ naꞌ bkwashaan ḻegakeꞌ, naꞌ ḻoo bejaꞌ bengakileꞌ cheꞌ Chiozaꞌ:
―Beenin Xiiṉaa, beenaꞌ chakidꞌ, naꞌ chazlallꞌchgaꞌ ka choneꞌ. Ḻi wzenag c̱heꞌ.
6 Naꞌ beṉꞌkaꞌ nak Jesúzaꞌ txen, ka bengakileꞌ wṉe Chiozaꞌ, ḻe bllebchgagakeꞌ naꞌ to bdoszgakeꞌ lo yonaꞌ.
7 Naꞌ wbigꞌ Jesúzaꞌ kwiteꞌkaꞌ bex̱ee ḻegakeꞌ, chiꞌe:
―Ḻi yiyas. Bi illeble.
8 Naꞌ ka biḻis yic̱hjeꞌkaꞌ, koch no beṉꞌkaꞌ bleꞌgakileꞌ, stochga Jesúzaꞌ.
9 Naꞌ ka bizaꞌgakeꞌ lo yaanaꞌ goll Jesúzaꞌ ḻegakeꞌ:
―Ni to kono yeꞌle ka nak dga ba bleꞌile ax̱t katꞌch nadꞌ, Beṉꞌ Bseḻꞌ Chiozaꞌ Yell-lioni, ba bibanꞌ ladj beṉꞌ wetkaꞌ.
10 Naꞌch beṉꞌkaꞌ nak Jesúzaꞌ txen cheꞌgakeꞌneꞌ:
―¿Berac̱he naz beṉꞌkaꞌ chliꞌ chsedi leyaꞌ zigaate Elíazanꞌ yiyed?
11 Naꞌ goll Jesúzaꞌ ḻegakeꞌ:
―Dii ḻi ka nakannanꞌ, zigaate Elíazanꞌ yiyedeꞌ yigwee xṉezi yogꞌḻoḻte.
12 Per nadꞌ niaꞌ leꞌ, ba biyed Elíazaꞌ, naꞌ bi gokbeꞌgakileꞌ shi ḻenꞌ. Naꞌ bengakileꞌneꞌ kon ka wnazan c̱hegakeꞌ. Naꞌ kaꞌkzan gongakileꞌ nadꞌ, Beṉꞌ Bseḻꞌ Chiozaꞌ Yell-lioni.
13 Naꞌ gokbeꞌgakileꞌ nan c̱he Juannaꞌ, beenaꞌ bchoa beṉꞌ nisanꞌ choꞌe dillꞌ.
Jesúzaꞌ biyoneꞌ to biꞌ chaz shoṉ
14 Naꞌ ka billingakeꞌ ganaꞌ lleꞌ llaꞌ beṉꞌ, naꞌch bchej to beṉꞌ jabiguee kwit Jesúzaꞌ naꞌ bc̱hekꞌ xibeꞌnaꞌ laweꞌnaꞌ, chiꞌeneꞌ:
15 ―Maestro, biyeshꞌgachi biꞌ c̱haꞌni. Chazbꞌ shoṉ naꞌ ḻe chzakꞌziꞌbꞌ. Zan shii ba bzaḻaꞌn ḻebꞌ lo yiꞌnaꞌ naꞌ ḻekzkaꞌ ḻoo nisaꞌ.
16 Naꞌ ba jwaꞌbꞌ lao beṉꞌkaꞌ nakgakeꞌ liꞌ txen naꞌ bi gok yiyongakeꞌbꞌ.
17 Naꞌ goll Jesúzaꞌ:
―¡Ziꞌtegalə c̱helenaꞌ, leꞌ beṉꞌ mal naꞌ beṉꞌ bi chajḻeꞌ! ¿Zi kaꞌkꞌtek chiyaḻꞌ soalenꞌ leꞌ? Naꞌ ¿zi kaꞌkꞌtek chiyaḻꞌ soidꞌ leꞌ? Ḻi da diwaꞌ biꞌ xkwidaa ni.
18 Naꞌch bsheshlen Jesúzaꞌ dii x̱iwaa yoobꞌ naꞌ bichejan. Naꞌ katenaꞌ biyakibꞌ.
19 Naꞌ ka biyoll gok kaꞌ, beṉꞌkaꞌ nak Jesúzaꞌ txen bshaljlengakeꞌneꞌ to ḻezgakeꞌ, gollgakeꞌ:
―¿Bic̱he bi gok yibejntoꞌ dii x̱iwaa yoo biꞌ xkwidaa?
20 Naꞌ goll Jesúzaꞌ ḻegakeꞌ:
―Bi gok yibejlen, ḻaꞌ bi chajḻeꞌle Chiozaꞌ goneꞌ ka yichejan. Dii ḻi niaꞌ leꞌ, sheḻꞌkaꞌ yeḻꞌ chajḻeꞌ c̱helenaꞌ nakan ḻaꞌc̱hꞌ ka sa mostásanaꞌ daa nak diidoꞌzə, wakte yeꞌle yaani: “Bkwas ni naꞌ jsoa gan yoblə”, naꞌ wkwasan kaꞌlə. Aga ga de to dii bi gak gonle sheḻꞌkaꞌ chajḻeꞌle c̱he Chiozaꞌ.
21 Kwenc̱he gak yibejle dii x̱iwaa ka daa bibejꞌ biꞌ xkwidaa, chiyaḻꞌ soale wbasꞌ naꞌ soac̱hec̱hle weꞌḻwill-le Chiozaꞌ.
Sto shii wdix̱jee Jesúzaꞌ witgakeꞌneꞌ
22 Naꞌ shlak chdalen Jesúzaꞌ beṉꞌkaꞌ nakgakeꞌneꞌ txen ganaꞌ mbani Galileanaꞌ, golleꞌ ḻegakeꞌ:
―Nadꞌ, Beṉꞌ Bseḻꞌ Chiozaꞌ Yell-lioni, gakꞌ lo naꞌ beṉꞌ malkaꞌ.
23 Naꞌ witgakeꞌ nadꞌ, naꞌ ka gak shoṉ lla yibanꞌ ladj beṉꞌ wetkaꞌ.
Naꞌ ka golleꞌ ḻegakeꞌ kaꞌ, ḻe gokyeshꞌgakileꞌ.
Jesúzaꞌ wdixjeꞌ daa chiyaḻꞌ gaxj c̱he yoodoꞌnaꞌ
24 Naꞌ ka billin Jesúzaꞌ len beṉꞌkaꞌ nakgakeꞌneꞌ txen Capernaúmaꞌ, beṉꞌ Israelkaꞌ beṉꞌkaꞌ chc̱hixj c̱he yoodoꞌnaꞌ jawiagakeꞌ Pédronaꞌ, naꞌ wṉabgakileꞌneꞌ:
―¿Achyixj maestro c̱helenaꞌ daa chidoḻꞌcho weꞌcho c̱he yoodoꞌnaꞌ?
25 Naꞌ goll Pédronaꞌ ḻegakeꞌ:
―Awe, chyixjeꞌn.
Naꞌ ka biyoo Pédronaꞌ ḻoo yoonaꞌ ganaꞌ zoagakeꞌ, Jesúzaꞌ bkwialoeꞌ dillaa chiꞌe:
―¿Nak ka chakiloꞌ, Simón? Beṉꞌkaꞌ chṉabiaꞌ yell-lioni, ¿abeṉꞌ wlall c̱heꞌkanꞌ chc̱hixjgakeꞌ?, ¿awa beṉꞌ zitꞌkanꞌ?
26 Naꞌ billii Pédronaꞌ xtilleenaꞌ:
―Beṉꞌ zitꞌkanꞌ chc̱hixjgakeꞌ.
Naꞌ goll Jesúzaꞌneꞌ: