Jempl c̱he xilaa wnit
15
Yogꞌ beṉꞌ wic̱hixjkaꞌ naꞌ beṉꞌ saaxyakaꞌ jabigꞌgakeꞌ kwit Jesúzaꞌ kwenc̱he bzenaggakeꞌ dillaa choꞌe.
Lucas 15.1-32
2 Naꞌ fariseokaꞌ naꞌ beṉꞌkaꞌ chliꞌ chsedi leyaꞌ wzologakeꞌ biz chon chnagakeꞌ c̱he Jesúzaꞌ, cheꞌgakeꞌ:
―Chlebtezə beeni beṉꞌ saaxyakaꞌ naꞌ chaolentezeꞌ ḻegakeꞌ.
3 Naꞌch bzoa Jesúzaꞌ to jempl, golleꞌ ḻegakeꞌ:
4 ―Shi tole naple to guiyoa xilꞌ naꞌ ṉit tob, naꞌ wkwaaṉle bakaꞌ taplalj twaḻj lyix̱aa naꞌ lljadiljle banaꞌ wnit, naꞌ ax̱t kon ka yillelb gonle.
5 Naꞌ ka yillelb, yibaile yix̱oaleb yaaxizlenaꞌ.
6 Naꞌ ka yillinle lill-lenaꞌ wtople beṉꞌkaꞌ nllaguile naꞌ beṉꞌ wlill c̱helekaꞌ, naꞌ yeꞌle ḻegakeꞌ: “Ḻi yibaleni nadꞌ, ḻaꞌ ba billel xilꞌ c̱haꞌnaꞌ banaꞌ wnit.”
7 Naꞌ niaꞌ leꞌ, kaꞌkzan chibayi Chiozaꞌ len anjl c̱heꞌkaꞌ yabanaꞌ katꞌ to beṉꞌ wen dii mal chiyajileꞌ saaxya c̱heꞌnaꞌ aga ka taplalj twaḻj beṉꞌkaꞌ bi chonan byen yiyajgakileꞌ.
Jempl c̱he mechaꞌ wnit
8 ’Wa shi to noolə de shi mech plat c̱heꞌ naꞌ ṉit ton, naꞌ wxeneꞌ yiꞌ c̱heꞌnaꞌ naꞌ wḻoeꞌ ḻoo lilleꞌnaꞌ naꞌ yiyiljeꞌn ax̱t ki yillelileꞌn.
9 Naꞌ ka yillelileꞌn naꞌ wtopeꞌ noolkaꞌ nllaguileꞌ naꞌ beṉꞌ wlill c̱heꞌkaꞌ, naꞌ yee ḻegakeꞌ: “Ḻi yibaleni nadꞌ, ḻaꞌ ba billel mech c̱haꞌnaꞌ daa wnit.”
10 Naꞌ niaꞌ leꞌ, kaꞌkzan chibayi Chiozaꞌ len anjl c̱heꞌkaꞌ katꞌ chiyaj chileni to beṉꞌ saaxya.
Jempl c̱he biꞌnaꞌ benditj xmech x̱abaa
11 Naꞌ ḻekzkaꞌ cheꞌ Jesúzaꞌ ḻegakeꞌ:
―To beṉꞌ wzoa c̱hop xiiṉeꞌ,
12 naꞌ biꞌ neshaa gollbꞌ x̱abaa: “X̱a, bḻaa daa de c̱hoꞌ naꞌ beṉ nadꞌ daa chiyaḻꞌ ikaa.” Naꞌch bḻaa x̱abaa daa de c̱heꞌ naꞌ biꞌen ḻegakbꞌ.
13 Naꞌ aga wlla, biyitꞌ bide biꞌ neshaa daa biꞌebꞌ, naꞌ mechaꞌ daa bex̱ꞌbꞌ c̱heyin wyajlemaꞌn to yell zitꞌ naꞌ jenditjbaꞌn naꞌ jemꞌ kon daa nazan c̱hebꞌ.
14 Naꞌ ka biyoll benditj xmechbaa wcheꞌ to wbiṉ xen yellaꞌ ganaꞌ chdabꞌ, naꞌch wzolo chdebꞌ wbinnaꞌ.
15 Naꞌ wyajbꞌ jaṉabbꞌ llinnaꞌ gomꞌ lao to beṉꞌ yellaꞌ ganaꞌ chdabꞌ, naꞌ beenaꞌ bseḻeebꞌ lyix̱aa ganaꞌ nllee kushkaꞌ kwenc̱he jtapbꞌ ḻegakb.
16 Naꞌ daa ḻe chdomꞌ goklallꞌbꞌ gaobꞌ daa chao kushkaꞌ, naꞌ ni ḻen bi beꞌgakeꞌbꞌ.
17 Naꞌ gokibꞌ: “Beṉꞌ zan wen llin c̱he x̱aꞌnaꞌ lleꞌ naꞌ chichooṉzan dii cheej chaogakeꞌ, naꞌ nadꞌ, ba chetidꞌ wbinni.
18 Ba ziyaachoklə kwit x̱aꞌnaꞌ naꞌ yepee: X̱adawaa, ba bx̱iṉjꞌ bḻenꞌ lao Chiozaꞌ naꞌ lawoꞌnaꞌ.
19 Bich chidoḻaa gakꞌ xiiṉoꞌ, san beni nadꞌ ka nottezə wen llin c̱hoꞌki.”
20 Naꞌch bizaꞌbꞌ ziyajbꞌ lill x̱abaa.
’Naꞌ zi dii xench yillimꞌ lillbaa bleꞌi x̱abaa ḻebꞌ naꞌ biyeshꞌlallileꞌbꞌ. Naꞌch zejdoeꞌ jatiḻeꞌbꞌ naꞌ wdeḻeꞌbꞌ naꞌ bnopeꞌbꞌ.
21 Naꞌch cheꞌbꞌ x̱abaa: “X̱adawaa, ba bx̱iṉj bḻenꞌ lao Chiozaꞌ naꞌ lawoꞌnaꞌ, bich chidoḻaa gakꞌ xiiṉoꞌ.”
22 Naꞌ x̱abaa chiꞌe wen llin c̱heꞌkaꞌ: “Ḻobeꞌzə ḻi lljḻej tgot lechꞌ daa ḻiizelozi nakch naꞌ ḻi wwakwbaꞌn, naꞌ ḻekzkaꞌ ḻi wllin to niy xbemaa naꞌ ḻi wllin yel ṉiꞌabaa.
23 Naꞌ ḻi lljx̱iꞌ meꞌdoꞌnaꞌ mbejchlawin, ḻi witb kwenc̱he gaochob naꞌ goncho to lṉi,
24 ḻaꞌ xiiṉdawaani gok c̱hebꞌ ka biꞌ ba wit, naꞌ ṉaa ba bilaꞌbꞌ mbamꞌ. Gok c̱hebꞌ ka biꞌ wnit, naꞌ ṉaa ba billelbꞌ.” Naꞌch wzologakeꞌ bengakeꞌ lṉinaꞌ.
25 ’Naꞌ ka wzolo lṉinaꞌ, xiiṉeꞌ biꞌ nechaꞌ chdabꞌ lyix̱aa. Naꞌ ka billimꞌ gaozə lillbaa, benibꞌ chkwell wikwellkaꞌ naꞌ chakte wiyaanaꞌ.
26 Naꞌch wṉebꞌ to wen llinkaꞌ naꞌ wṉabibee bin chak lillbaa.
27 Naꞌ wen llinnaꞌ chiꞌe: “Biꞌ bishoonanꞌ ba bilaꞌ, naꞌ ben x̱oꞌnaꞌ mandad betgakeꞌ meꞌdoꞌnaꞌ mbejchlawin daa bilaꞌbꞌ shiꞌa shaoꞌ.”
28 Naꞌ xiiṉeꞌ biꞌ nechaꞌ bllaabꞌ naꞌ bi goonibꞌ yiyoobꞌ. Naꞌch bchej x̱abaa gotꞌyoileꞌbꞌ kwenc̱he yiyoobꞌ.
29 Naꞌch cheꞌbꞌ x̱abaa: “Ṉezkziloꞌ ba gok zan yiz chonꞌ yogꞌ daa noꞌ, naꞌ ni shlin biṉꞌ c̱hishjꞌ choꞌa xtilloonaꞌ. Naꞌ bigaṉꞌ goṉoꞌ nadꞌ ḻaꞌc̱hꞌ to shibdoꞌ kwenc̱he witꞌb yeej gaolemꞌ biꞌkaꞌ nllaguidꞌ.
30 Naꞌ ṉaa bilaꞌ xiiṉoꞌni biyitꞌ bidebꞌ yogꞌ daa biꞌobꞌ naꞌ benditjbꞌ xmechoꞌnaꞌ kon noolə wdakaꞌ, naꞌ ba betzoꞌ meꞌdoꞌnaꞌ, banaꞌ ḻe nak, ni c̱hebꞌ.”
31 Naꞌch cheꞌ x̱abaa: “Xiiṉdawaa, liꞌ zoalenoꞌ nadꞌ toshiizi, naꞌ yogꞌ bi de c̱haꞌ c̱hekzoꞌ daa.
32 Per chonan byen ṉaa yibaicho naꞌ goncho lṉini, ḻaꞌ ba bilaꞌ biꞌ bishooni. Ba gok c̱hebꞌ ka biꞌ ba wit, naꞌ ṉaa ba bilaꞌbꞌ mbamꞌ; gok c̱hebꞌ ka biꞌ wnit, naꞌ ṉaa ba billelbꞌ.”