Jesúzaꞌ naꞌ Zaquewaꞌ
19
Naꞌch bllin Jesúzaꞌ yell Jericónaꞌ naꞌ wdieꞌ gchoḻ yellaꞌ.
2 Naꞌ yellaꞌ zoa to beṉꞌ wniꞌa lieꞌ Zaqueo, naꞌ ngoo lallꞌ nee x̱oṉj wic̱hixjkaꞌ.
3 Naꞌ goklallee ileꞌileꞌ Jesúzaꞌ, per bi gok ileꞌileꞌneꞌ daa nakeꞌ beṉꞌ bc̱hekwdoꞌ naꞌ daa zejlen Jesúzaꞌ beṉꞌ zan.
4 Naꞌch wllialodoeꞌ laweꞌkaꞌ naꞌ wyepeꞌ to lo yag xen kwenc̱he ileꞌileꞌneꞌ ka tieꞌ.
5 Naꞌ ka bllin Jesúzaꞌ xan yagaꞌ, naꞌ bḻis laweꞌnaꞌ chiꞌeneꞌ:
―Zaqueo, btalalloo biyetj, ḻaꞌ lilloꞌnanꞌ yigaaṉaꞌ ṉaa.
6 Naꞌch biyetjdo Zaquewaꞌ chibaileꞌ bic̱hiꞌe Jesúzaꞌ lilleꞌnaꞌ.
7 Naꞌ ka bleꞌi beṉꞌkaꞌ lleꞌ naꞌ ka gok, yogꞌzeꞌ wzolo biz chon chnagakeꞌ c̱heꞌ, cheꞌgakeꞌ:
―Yigaaṉxgaleꞌ lill beṉꞌ saaxyani, na.
8 Naꞌch wzolla Zaquewaꞌ naꞌ chiꞌe X̱ancho Jesúzaꞌ:
―X̱anꞌ, cheenidꞌ wiꞌa gashjə daa de c̱haꞌ beṉꞌ yeshꞌkaꞌ, naꞌ yogꞌ beṉꞌkaꞌ ba bc̱hixjꞌ dii xench, yiyoeꞌgakee taplə ka daa ba wlanꞌ c̱hegakeꞌ.
9 Naꞌch cheꞌ Jesúzaꞌneꞌ:
―Ṉaanlla ba bisla Chiozaꞌ beṉꞌki zoa ḻoo yooni kwenc̱he bi kwiayiꞌgakeꞌ, daa len Zaquewi nakeꞌ xiiṉ dia c̱he dii Abrahamaꞌ.
10 Ḻaꞌ ka nakꞌ nadꞌ, Beṉꞌ Bseḻꞌ Chiozaꞌ Yell-lioni, bidꞌ kwenc̱he yiyiljꞌ naꞌ yislaꞌ beṉꞌkaꞌ yoo nez daa wlliayiꞌn ḻegakeꞌ.
Jempl c̱he beenaꞌ bkwaaṉlen wen llin c̱heꞌkaꞌ mech
11 Shlak chzenag beṉꞌkaꞌ daa cheꞌ Jesúzaꞌ, bseesileꞌ ḻegakeꞌ to jempl, daa ba zoa illineꞌ Jerusalénnaꞌ naꞌ ḻegakeꞌ gokgakileꞌ daa nakeꞌ beṉꞌ bseḻꞌ Chiozaꞌ lii solotieꞌ iṉabiꞌe.
12 Naꞌch chiꞌe ḻegakeꞌ:
―To beṉꞌ zakii bchejeꞌ wyajeꞌ to yell zitꞌ wal kwenc̱he lljaḻaneꞌ yeḻꞌ wṉabiaꞌ c̱he lalleꞌnaꞌ, naꞌ ka yillineꞌ iṉabiꞌe.
13 Naꞌ ka ziꞌ see, wṉieꞌ shi wen llin c̱heꞌkaꞌ naꞌ biꞌe ḻegakeꞌ twej mech dii zakꞌ dii xen naꞌ chiꞌe ḻegakeꞌ: “Ni de mechi, ḻi gonlenan delgens shlak bi soaꞌ.”
14 Naꞌ beṉꞌ wlall c̱heꞌkaꞌ ḻe chakzbangakileꞌneꞌ, naꞌ ka wde wzee bseḻꞌgakeꞌ x̱oṉj beṉꞌ wyajgakeꞌ lao beenaꞌ weꞌ lsens iṉabiꞌe kwenc̱he jellgakeꞌneꞌ: “Bi cheenintoꞌ iṉabiaꞌ beeni netoꞌ.”
15 Per biaꞌkzə gok lo nee iṉabiꞌe, naꞌ biyajeꞌ lalleꞌnaꞌ. Naꞌ ka billineꞌ goxeꞌ beṉꞌkaꞌ bkwaaṉleneꞌ mechaꞌ kwenc̱he iṉezileꞌ kaꞌkꞌ wej ben mechaꞌ gan daa bkwaaṉleneꞌ to toeꞌ.
16 Naꞌ ka bllin beṉꞌ nechaꞌ laweꞌnaꞌ naꞌ chiꞌeneꞌ: “X̱anꞌ, xmechoꞌnaꞌ bkwaaṉꞌlenoꞌ nadꞌ benaꞌn gan shin.”
17 Naꞌch beṉꞌ wṉabiaꞌnaꞌ chiꞌeneꞌ: “Wenkzan benoꞌ. Daa benoꞌ ka chiyaḻꞌ kon latꞌ mechaꞌ bkwaaṉlenꞌ liꞌ, wzoaꞌ liꞌ iṉabiꞌo shi yell.”
18 Naꞌ ka bllin beenaꞌ sto laweꞌnaꞌ naꞌ chiꞌeneꞌ: “X̱anꞌ, xmechoꞌnaꞌ bkwaaṉꞌlenoꞌ nadꞌ benaꞌn gan gayaan.”
19 Naꞌ ḻekzkaꞌ chiꞌe beenaꞌ: “Wzoaꞌ liꞌ iṉabiꞌo gayꞌ yell.”
20 Naꞌch bllin stoeꞌ laweꞌnaꞌ naꞌ chiꞌeneꞌ: “X̱anꞌ, ni de xmechoꞌnaꞌ bkwaaṉꞌlenoꞌ nadꞌ. Blallꞌtiptezaꞌn to lechꞌ naꞌ wlooshawaan
21 daa bllebꞌ liꞌ, ḻaꞌ ḻe beṉꞌ zṉia nakoꞌ. Chkaatezoꞌ dii bi naki c̱hoꞌ, naꞌ chiziꞌ chilaptezoꞌ dii goz gooṉ beṉꞌ yoblə.”
22 Naꞌch cheꞌ beṉꞌ wṉabiaꞌnaꞌ ḻeꞌ: “Bikzbi yejniꞌalallii benoꞌ. Kon ka ba wnoꞌ kaꞌkzan gak c̱hoꞌ. Ṉeziloꞌ nakꞌ beṉꞌ zṉia, naꞌ chkaatezꞌ dii bi naki c̱haꞌ naꞌ chiziꞌ chilapꞌ dii goz gooṉ beṉꞌ yoblə.
23 Naꞌ daa ṉeziloꞌ kaꞌ chonꞌ, ¿berac̱he ki biꞌo xmechaa gon yic̱hjin kwenc̱he yikaan ṉaa ba biyedꞌ?”
24 Naꞌch chiꞌe beṉꞌkaꞌ lleꞌ naꞌ: “Ḻi yikaa mechaꞌ daa biꞌaneꞌ naꞌ ḻi weꞌn beenaꞌ beneꞌ gan shin.”
25 Naꞌch cheꞌ beṉꞌkaꞌneꞌ: “X̱anꞌ, ba napkzə beenaꞌ shin.”
26 Naꞌ cheꞌ beṉꞌ wṉabiaꞌnaꞌ ḻegakeꞌ: “Niaꞌ leꞌ, beenaꞌ chonleneꞌ llin daa yoo lo nee, wakch lallꞌ nee dii xench; san beenaꞌ bi chonleneꞌ llin daa yoo lo nee, ax̱t daa ngoo lo nee latꞌ yidoyo.
27 Naꞌ ka nak beṉꞌkaꞌ chakzbangakileꞌ nadꞌ, beṉꞌkaꞌ bi cheengakileꞌ iṉabiꞌa, ḻi lljx̱iꞌgakeꞌ ni naꞌ ḻi witgakeꞌ ileꞌteidꞌ.”
Billin Jesúzaꞌ Jerusalénnaꞌ
(Mt. 21:1-11; Mr. 11:1-11; Jn 12:12-19)
28 Naꞌ ka wde wna Jesúzaꞌ kaꞌ, naꞌch bigooleneꞌ nez beṉꞌkaꞌ nakgakeꞌneꞌ txen ziyajgakeꞌ Jerusalénnaꞌ.
29 Naꞌ ka billingakeꞌ xṉiꞌa yaa daa le Yaa Olivos, gaozə yellkaꞌ le Betfagé naꞌ Betania, naꞌch bseḻee c̱hop beṉꞌkaꞌ nakgakeꞌneꞌ txen,
30 naꞌ chiꞌe ḻegakeꞌ:
―Ḻi shaj yellaꞌ llia naꞌ, naꞌ ka illinle ileꞌile to burr chbandoꞌ, ba konoṉꞌ kwia, daꞌb yag. Naꞌ wsell-leb wc̱heꞌleb nilə.
31 Naꞌ shi no iṉaz leꞌ: “¿Berac̱he chsellzleb?”, naꞌ yeꞌleneꞌ: “X̱anchonanꞌ chyalljileꞌb.”
32 Naꞌch wyaj beṉꞌkaꞌ bseḻee, naꞌ ka bllingakeꞌ bleꞌgakileꞌ to burr chbandoꞌ daꞌb yag, kon kayeṉꞌ goll Jesúzaꞌ ḻegakeꞌ.
33 Naꞌ ka chsellgakeꞌ burraꞌ naꞌch cheꞌ x̱amaꞌ ḻegakeꞌ:
―¿Berac̱he chsell-leb?
34 Naꞌch cheꞌgakeꞌneꞌ:
―X̱anchonanꞌ chyalljileꞌb.
35 Naꞌch bc̱heꞌgakeꞌb jwaꞌgakeꞌb lao Jesúzaꞌ naꞌ bx̱oagakeꞌ xeꞌkaꞌ kollꞌbaꞌ naꞌ blliagakeꞌ Jesúzaꞌ kollꞌbaꞌ.
36 Naꞌ shlak zej Jesúzaꞌ llieꞌ burraꞌ, chshilj xa beṉꞌkaꞌ tlo nezaꞌ.
37 Naꞌ ka ba chillingakeꞌ gaozə ganaꞌ chiyetj nez daa zizaꞌ Yaa Olívozaꞌ, yogꞌḻoḻ beṉꞌkaꞌ nakgakeꞌneꞌ txen chosyaagakeꞌ daa chibagakileꞌ naꞌ choeꞌlaꞌogakeꞌ Chiozaꞌ daa bleꞌgakileꞌ yogꞌ yeḻꞌ wakkaꞌ beneꞌ.
38 Naꞌch nagakeꞌ:
―¡Gaklenshga X̱ancho Chiozaꞌ beeni ba bseḻee iṉabiꞌe! ¡Ḻi da, weꞌlaꞌocho Chiozaꞌ zoa yabanaꞌ daa beneꞌ ka zoalenchoneꞌ mbalaz!
39 Naꞌ baḻ fariseokaꞌ len ladj beṉꞌkaꞌ no Jesúzaꞌ, cheꞌgakeꞌneꞌ:
―Maestro, goll beṉꞌki nakgakeꞌ liꞌ txen soagakeꞌ llizə.
40 Naꞌ cheꞌ Jesúzaꞌ ḻegakeꞌ:
―Niaꞌ leꞌ, shi beṉꞌki soagakeꞌ llizə, naꞌ yaj kilə solo gosyaagakan weꞌlaꞌogakan nadꞌ.
41 Naꞌ ka billineꞌ gaozə yell Jerusalénnaꞌ, gokyeshileꞌ ka bleꞌileꞌn naꞌ wchelleꞌ c̱he beṉꞌkaꞌ zoa naꞌ.
42 Naꞌ chiꞌe:
―¡Sheḻꞌkaꞌ ṉaanlla gakbeꞌile nakan gonle kwenc̱he soale mbalaz! Per ngashaan laolenaꞌ naꞌ aga wakbeꞌkzile.
43 Wllin lla ilaꞌ beṉꞌkaꞌ chakzbangakileꞌ leꞌ naꞌ wzec̱hjgakeꞌ yelli leej naꞌ kono gak shoꞌ ichej.
44 Naꞌ ni sto yaj c̱he lill-lekaꞌ bich yikwaaṉgakeꞌ kollꞌ ljwellin, naꞌ witgakeꞌ leꞌ len xiiṉlekaꞌ, ḻaꞌ bi gokbeꞌile ka blaꞌ Chiozaꞌ ladjleni.
Bishesh Jesúzaꞌ beṉꞌkaꞌ chitꞌ chde leshꞌ chyoodoꞌnaꞌ
(Mt. 21:12-17; Mr. 11:15-19; Jn 2:13-22)
―Choꞌa Xtillꞌ Chiozaꞌ nan: “Lillaꞌnaꞌ nakan ga choeꞌḻwill beṉꞌ nadꞌ”, naꞌ leꞌ ṉaa ba nonzlen ka to ga chdop chllag wban.
47 Naꞌ yogꞌ lla bliꞌ bsedi Jesúzaꞌ beṉꞌ ganaꞌ zoa yoodoꞌnaꞌ, naꞌ bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ naꞌ nochlə beṉꞌ wṉabiaꞌ c̱he beṉꞌ Israelkaꞌ ḻaꞌkzi biyiljlallꞌgakeꞌ naklə gongakeꞌ kwenc̱he witgakeꞌneꞌ
48 bikzə bi gok gongakeꞌ, ḻaꞌ yogꞌzə beṉꞌ chibagakileꞌ chzenaggakeꞌ dillꞌkaꞌ choꞌe.
Lucas 19.1-48