Yeḻꞌ wṉabiaꞌ c̱he Jesúzaꞌ
20
Naꞌ bllin to lla, shlak chliꞌ chsedi Jesúzaꞌ beṉꞌkaꞌ leshꞌ chyoodoꞌnaꞌ naꞌ chyix̱jeꞌileꞌ ḻegakeꞌ dillꞌ wen dillꞌ kob c̱he Chiozaꞌ, bllin bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ len beṉꞌ golkaꞌ chṉabiaꞌ.
Lucas 20.1-47
―Wnashki netoꞌ, ¿bi yeḻꞌ wṉabiaꞌ napoꞌ chonoꞌ diiki? Naꞌ ¿nora beṉ liꞌ yeḻꞌ wṉabiaꞌni?
3 Naꞌch cheꞌ Jesúzaꞌ ḻegakeꞌ:
―Ḻekzkaꞌ nadꞌ de to dii iṉabidꞌ leꞌ, ḻi iṉashki nadꞌ:
4 ¿Noran bseḻꞌ Juannaꞌ kwenc̱he bidchoeꞌ beṉꞌ nisaꞌ? ¿AChiozanꞌ bseḻeeneꞌ? ¿Anti beṉꞌ yell-lionaꞌzan bseḻeeneꞌ, lla?
5 Naꞌch wzologakeꞌ choeꞌlen ljwellgakeꞌ dillꞌ, cheꞌgakeꞌ:
―¿Nakra ka yeꞌchoneꞌ, lla? Shi yeꞌchoneꞌ Chiozaꞌ bseḻeeneꞌ, ḻobeꞌ iṉeꞌ choꞌ: “¿Berac̱he ki wyajḻeꞌle c̱heꞌ, shkaꞌ?”
6 Naꞌ shi yizeꞌchoneꞌ nozə beṉꞌ bseḻeeneꞌ, yogꞌ beṉꞌki wlliagakeꞌ choꞌ yaj witgakeꞌ choꞌ, ḻaꞌ yogꞌgakeꞌ chajḻeꞌgakeꞌ Juannaꞌ biꞌe dillꞌ daa goll Chiozaꞌneꞌ.
7 Naꞌch gollgakeꞌ Jesúzaꞌ:
―Bi ṉezintoꞌ no bseḻꞌ beenaꞌ.
8 Naꞌch cheꞌ Jesúzaꞌ ḻegakeꞌ:
―Ḻekzkaꞌ nadꞌ aga wniaꞌ leꞌ noran beṉ nadꞌ yeḻꞌ wṉabiaꞌnaꞌ kwenc̱he chonꞌ diiki.
Jempl c̱he wen llin malkaꞌ
9 Naꞌ Jesúzaꞌ bseesee to jempl lao beṉꞌkaꞌ lleꞌ naꞌ:
―To beṉꞌ billee yag uva, naꞌ beneꞌn lallꞌ naꞌ beṉꞌkaꞌ gap wwian, naꞌ wzee wyajeꞌ ssha gan yoblə.
10 Naꞌ ka biziꞌ bilap beṉꞌkaꞌ uvanaꞌ, x̱aninnaꞌ bseḻee to wen llin c̱heꞌ kwenc̱he lljelleꞌ beṉꞌkaꞌ nak lallꞌ naꞌgakeꞌ yag uvakaꞌ weꞌgakeꞌneꞌ daa chidoḻee yikee. Naꞌ beṉꞌkaꞌ chapgakeꞌ yag uvakaꞌ bex̱ꞌgakeꞌneꞌ bet wdingakeꞌneꞌ, naꞌtech bilaggakeꞌneꞌ to kaꞌ cheꞌ.
11 Naꞌch bseḻee sto wen llin c̱heꞌnaꞌ. Naꞌ ḻekzkaꞌ bet wdingakeꞌneꞌ, naꞌ biya dii bengakileꞌneꞌ, naꞌ bizlaggakeꞌneꞌ to kaꞌ cheꞌ.
12 Naꞌch de wyoṉ shii, bizseḻee wen llin yoblə, naꞌ ḻekzkaꞌ bengakeꞌneꞌ bido weꞌzi, naꞌ bizlaggakeꞌneꞌ.
13 ’Naꞌch chaki x̱an yag uvakaꞌ: “¿Nakra ka gonaꞌn? Wseḻꞌshkidꞌ biꞌ c̱haꞌni, biꞌni ḻe chakidꞌ. Shera shicholə wzenaggakeꞌ c̱hebꞌ.”
14 Naꞌ ka bleꞌi beṉꞌkaꞌ chap yag uvakaꞌ xiiṉeꞌnaꞌ, naꞌch cheꞌ ljwelleꞌ: “Biꞌnin yigaaṉlemꞌ yell-lioni. Ḻi da witchobꞌ kwenc̱he yigaaṉlenchon.”
15 Naꞌ wlejgakeꞌbꞌ ganaꞌ lleꞌ yag uvakaꞌ naꞌ betgakeꞌbꞌ.
Naꞌch wṉabi Jesúzaꞌ beṉꞌkaꞌ chzenag:
―¿Nakra ka chakile goni x̱an yag uvakaꞌ beṉꞌkaꞌ, lla?
16 Ba nakten shajeꞌ naꞌ lljeteꞌ beṉꞌkaꞌ chap yag uva c̱heꞌnaꞌ naꞌ yiyoneꞌ yell-lio c̱heꞌnaꞌ lallꞌ naꞌ beṉꞌ yoblə.
Naꞌ ka beni beṉꞌkaꞌ wneꞌ kaꞌ, naꞌ wnagakeꞌ:
―¡Bat weꞌ Chiozaꞌ latj gak kaꞌ!
17 Naꞌ bwia Jesúzaꞌ ḻegakeꞌ, chiꞌe:
―¿Beran zejin Choꞌa Xtillꞌ Chiozaꞌ ganaꞌ na:
Yajaꞌ daa bi wyoolallꞌ wen yookaꞌ,
ḻeyeṉꞌlannanꞌ yajaꞌ daa ba nc̱hejcha yoonaꞌ?
18 Nottezə beṉꞌ lljc̱hazeꞌ lawinnaꞌ kwiayee, naꞌ shi idakwan beṉꞌ, ax̱t wshoshjan ḻeꞌ.
Jaṉabgakileꞌ Jesúzaꞌ shi chiyaḻꞌ c̱hixjgakeꞌ daa chṉab beenaꞌ chṉabiaꞌ Rómanaꞌ
19 Naꞌ bx̱ozkaꞌ chṉabiaꞌ naꞌ beṉꞌkaꞌ chliꞌ chsedi leyaꞌ goklallꞌgakeꞌ gox̱ꞌgakeꞌ Jesúzaꞌ ka biyoll golleꞌ kaꞌ, ḻaꞌ gokbeꞌgakileꞌ c̱hezgakenꞌ wṉieꞌ daa bi chajḻeꞌgakeꞌ c̱heꞌ. Per bllebgakeꞌ beṉꞌkaꞌ ndop nllag naꞌ.
20 Naꞌch bseḻꞌgakeꞌ to c̱hop beṉꞌ wiwia wiyi, naꞌ bentezgakeꞌ ka beṉꞌ cheenchgayi wzenag c̱heꞌ. Per aga do lallꞌgakenꞌ wyajgakeꞌ, san kwenc̱hezə kwejyelgakileꞌ Jesúzanꞌ naꞌ lljadaogakeꞌ xya c̱heꞌ lao beenaꞌ chṉabiaꞌ ganaꞌ mbani Judeanaꞌ.
21 Naꞌ wṉabgakileꞌneꞌ:
―Maestro, ṉezintoꞌ daa noꞌ naꞌ daa chliꞌo nakan dii ḻi, naꞌ aga chwioꞌ nak nak beṉꞌ, shi nakeꞌ beṉꞌ zakii wa shi bi nakeꞌ. Ṉezintoꞌ chliꞌo nez ḻi c̱he Chiozaꞌ kon ka nakan.
22 Wnashki netoꞌ: ¿Achiyaḻꞌ c̱hixjcho daa chṉab Césaraꞌ, beenaꞌ chṉabiaꞌ, anti bi chiyaḻꞌ c̱hixjchon?
23 Naꞌ gokbeꞌi Jesúzaꞌ aga do lallꞌgakenꞌ wṉabgakileꞌneꞌ, naꞌch chiꞌe:
24 ―Ḻi wliꞌshkayi nadꞌ to mech. ¿Nora choꞌalawin naꞌ no leyin daꞌn?
Naꞌ cheꞌgakeꞌneꞌ:
―C̱he Césaranꞌ, beenaꞌ chṉabiaꞌ Rómanaꞌ.
25 Naꞌch chiꞌe:
―Naꞌlen, ḻi weꞌ Césaraꞌ daa naki c̱heꞌ, naꞌ ḻekzkaꞌ ḻi weꞌ Chiozaꞌ daa naki c̱heꞌ.
26 Naꞌ ni shchoꞌa dillꞌ daa biꞌe lao beṉꞌkaꞌ bi gok wc̱hingakeꞌn kwenc̱he gaogakeꞌ xya c̱heꞌ. Naꞌ bibangakileꞌ ka golleꞌ ḻegakeꞌ naꞌ bibeꞌgakeꞌ llizə.
Wṉabgakileꞌ Jesúzaꞌ nak gak katꞌ yiban beṉꞌ wetkaꞌ
27 Ka wde dga, bllin baḻ saduceokaꞌ lao Jesúzaꞌ, beṉꞌkaꞌ bi chajḻeꞌ daa yiban beṉꞌ wetkaꞌ. Naꞌch cheꞌgakeꞌ Jesúzaꞌ:
28 ―Maestro, leyaꞌ bzej dii Moisézaꞌ nan: shi to beṉꞌ byo gueteꞌ naꞌ igaaṉ xooleꞌnaꞌ wizeb naꞌ kono xiiṉgakeꞌ wzoa, beṉꞌ bishꞌ beṉꞌ wetaꞌ chiyaḻꞌ yikee nool wizebaꞌ kwenc̱he soa xiiṉ dia c̱he dii beṉꞌ bisheenaꞌ.
29 Ki gok to shii, wzoa gall bishꞌ beṉꞌ, naꞌ beṉꞌ nechaꞌ bshagnee, naꞌ witeꞌ naꞌ kono xiiṉeꞌ wzoa.
30 Naꞌ beṉꞌ wchopinaꞌ bikee noolaꞌ, naꞌ ḻekzkaꞌ witeꞌ naꞌ kono xiiṉeꞌ wzoa.
31 Naꞌ beṉꞌ wyoṉinaꞌ, ḻekzkaꞌ bizkee noolaꞌ, naꞌ wizeteꞌ naꞌ kono xiiṉeꞌ wzoa. Naꞌ ḻekzkaꞌ beṉꞌkaꞌ zi tap bizkaagakeꞌ noolaꞌ naꞌ witgakeꞌ, naꞌ ni to beṉꞌkaꞌ gall bi wzoa xiiṉgakeꞌ kon noolaꞌ.
32 Naꞌ ka bllin lla ḻekzkaꞌ wit noolaꞌ.
33 Naꞌ katꞌ yiban beṉꞌ wetkaꞌ, ¿norayeṉꞌenꞌ gak beṉꞌ c̱heꞌ, lla?, ḻaꞌ galltienꞌ wzoaleneꞌ.
34 Naꞌch cheꞌ Jesúzaꞌ ḻegakeꞌ:
―Beṉꞌkaꞌ lleꞌ yell-lioni ṉaa chkaa ljwellgakeꞌ, naꞌ ḻekzkaꞌ choeꞌ yeḻꞌ wishagnaꞌ c̱he xiiṉeꞌkaꞌ.
35 San beṉꞌkaꞌ iṉa Chiozaꞌ zakꞌgakeꞌ yiyajgakeꞌ ganaꞌ zoeꞌ ka yibangakeꞌ ladj beṉꞌ wetkaꞌ, aga kaꞌchan gongakeꞌ. Ḻaꞌ koch no wshagnaꞌ ganaꞌ zoa Chiozaꞌ,
36 ni koch no guet, san soagakeꞌ ka zoa anjlkaꞌ. Naꞌ gakgakeꞌ xiiṉ Chios daa ba bisbaneꞌ ḻegakeꞌ ladj beṉꞌ wetkaꞌ.
37 Kwin dii Moisézaꞌ bzejeꞌ kwenc̱he iṉezicho yiban beṉꞌ wetkaꞌ kanaꞌ bzejeꞌ c̱he yag yeshaa daa bleꞌileꞌ chaḻꞌṉiṉ. Naꞌ wneꞌ X̱ancho Chiozaꞌ nakeꞌ Chios c̱he Abrahamaꞌ, Isaacaꞌ naꞌ Jacobaꞌ.
38 Naꞌ Chiozaꞌ aga nakeꞌ Chios c̱he beṉꞌ wet, san nakeꞌ Chios c̱he beṉꞌ de yeḻꞌ mban c̱heyin. Ḻaꞌ yogꞌḻoḻ beṉꞌ nx̱enilallii Chiozaꞌ, dekzə yeḻꞌ mban c̱hegakeꞌ.
39 Naꞌch baḻ beṉꞌkaꞌ chliꞌ chsedi leyaꞌ gollgakeꞌneꞌ:
―Maestro, ka ba wnayeṉoon nakan.
40 Naꞌ bich bi biyaxjchgakileꞌ iṉabchgakileꞌneꞌ.
Crístonaꞌ nakeꞌ xiiṉ dia c̱he dii Davinaꞌ
41 Naꞌ cheꞌ Jesúzaꞌ ḻegakeꞌ:
―¿Berac̱he nazə beṉꞌ Crístonaꞌ nakeꞌ xiiṉ dia c̱he dii Davinaꞌ?,
42 len kwin dii Davinanꞌ bzejeꞌ ḻee libr c̱he Sálmokaꞌ ganaꞌ na:
X̱ancho Chiozaꞌ golleꞌ X̱anꞌnaꞌ:
“Wcheꞌ kwitꞌ de shḻi ni
43 shlak wzoaꞌ xṉiꞌonaꞌ beṉꞌkaꞌ chakzbani liꞌ.”
44 ¿Berac̱he chakzile Crístonaꞌ nakeꞌ xiiṉ dia c̱he dii Davinaꞌ, len kwin Davinaꞌ golleꞌneꞌ: “X̱anꞌ”?
Jesúzaꞌ wneꞌ nan beṉꞌkaꞌ chliꞌ chsedi leyaꞌ chongakeꞌ mal
45 Naꞌ shlak chzenag yogꞌ beṉꞌkaꞌ lleꞌ naꞌ, Jesúzaꞌ golleꞌ beṉꞌkaꞌ nakgakeꞌneꞌ txen:
46 ―Ḻi wsakꞌ bi gonle ka chon beṉꞌki chliꞌ chsedi leyaꞌ. Ḻe chibagakileꞌ gon xeꞌkaꞌ dii toṉ, naꞌ cheengakileꞌ yogꞌzə beṉꞌ gapgakeꞌ ḻegakeꞌ balaaṉ ladj lkweꞌ beṉꞌ. Naꞌ ganaꞌ chdop chllagcho choeꞌḻwillcho Chiozaꞌ chbagakileꞌ kweꞌgakeꞌ ganaꞌ chbeꞌ beṉꞌkaꞌ zakii, naꞌ kaꞌkzə chongakeꞌ ga de yeḻꞌ waw.
47 Naꞌ ḻekzkaꞌ chkaatezgakeꞌ lill nool wizebkaꞌ, naꞌ chongakeꞌ ka chshaljlen Chiozaꞌ ssha nlleb kwenc̱he gaki beṉꞌ ḻe wen chongakeꞌ. Naꞌ daa chongakeꞌ kaꞌ, ba nakten ileꞌgakileꞌ yeḻꞌ zakꞌziꞌ walaꞌ.